မင်းအောင်လှိုင်ဆေးရုံတက် ဆေးကုသခံယူမှု အမှန်တကယ် ကျန်းမာရေးကိစ္စလား၊ နောက်ကွယ်မှာ နိုင်ငံရေးအပြောင်းအလဲတွေ ရှိနေသလား

By ညို​အေး

စစ်တပ်ရဲ့ အငြိမ်းစားယူရမယ့် အသက် သတ်မှတ်ချက် ကျော်လွန်နေပြီဖြစ်တဲ့ မျက်စိတစ်ဖက်စောင်း အသက် ၆၉ နှစ်အရွယ် မင်းအောင်လှိုင် မတ်လ ၂၀ ရက်နေ့ ခါးကျီးပေါင်းရောဂါကြောင့် အာရုံကြောညှပ်လို့ အိန္ဒိယပါရဂူတွေနဲ့ တပ်ဆေးရုံမှာ ၂ နာရီကြာ အရေးပေါ် ခွဲစိတ်ရတယ်လို့ စစ်တပ်က မနေ့က သတင်းထုတ်ပြန်လာတယ်။

စစ်အာဏာရှင်တွေကို ဘယ်ပြည်သူမှ မကြိုက်ကြဘူး။ တခါတခါ လူတယောက်ကို သေဖို့ ဆုမတောင်းကောင်းပေမယ့် သေမယ့်သူဟာ အာဏာရှင်ဖြစ်မယ်ဆိုရင်တော့ ဘယ်ဘုရားမှာပဲ ဆုတောင်းရဆု တောင်းရ ဆိုတဲ့ မြန်မာပြည်သူတွေရဲ့ ဆန္ဒတွေကို မင်းအောင်လှိုင် ကျန်းမာရေးမကောင်းတဲ့ သတင်းတွေအောက်မှာ ထင်မြင်ချက် Comment မှတ်ချက်တွေ အဖြစ် တွေ့မြင်ရပါတယ်။

“စက်သုံးဆီအတွက် စုံ/မ ခွဲတော့ ကျနော့်ကို လူတွေကဆဲကြတယ်” လို့ မင်းအောင်လှိုင်က ထုတ်ဖော်ပြောဆိုချိန်မှာ နှစ်ထောင်းအားရ ဖြစ်ခဲ့ကြတဲ့ ပြည်သူတွေက အခု သူ နာမကျန်းဖြစ်တယ်ကြားတော့ စောစော သေပါစေလို့ လူတွေက ဆုတောင်း ပျော်ရွှင်နေကြတာကိုလည်း မင်းအောင်လှိုင် မြင်ကောင်းမြင်နိုင်ပါလိမ့်မယ်။

လောလောဆယ်တော့ ခွဲစိတ်မှုအောင်မြင်တယ်လို့ သတင်းထုတ်ပြန်ချက်ထဲမှာပါပေမယ့် စစ်ခေါင်း ဆောင်တွေရဲ့ ကျန်းမာရေးသတင်းတွေကို ထုတ်ပြန်လေ့မရှိဘဲ အခုမှ ထထုတ်တာကိုလည်း စိတ်ထဲ သရိုးသရီဖြစ်စရာပါပဲ။

၁၉၉၂ ခုနှစ်မှာ စစ်ခေါင်းဆောင် အာဏာရှင် စောမောင်ကို ရာထူးကဖယ်ရှားတုန်းကလည်း တရားဝင်အကြောင်းပြချက်က ‘ကျန်းမာရေးမကောင်းလို့ပါ’ ပေါ့။

အဲ့ဒီတုန်းက စောမောင်က ၁၉၉၀ ရွေးကောက်ပွဲရလဒ်ကို လက်ခံတယ်လို့ သတင်းထွက်ခဲ့ပါသေးတယ်။ ဒီလိုနဲ့ တပ်တွင်းထဲမှာ မူဝါဒကွဲပြားမှု / Policy Divergence ဖြစ်ပြီး Health Issue ဆိုပြီး Frame လုပ်ကာ ဖယ်ရှားခံခဲ့ရဖူးတယ်။

စစ်အာဏာရှင်သန်းရွှေတုန်းကတော့ တစုံတယောက် တစုတဖွဲ့က ဖယ်ရှားတာမဟုတ်ဘဲ သူ့ကိုယ်တိုင် Exit Narrative အဖြစ် ကျန်းမာရေးနဲ့ အသက်အရွယ်ကြီးလာပြီဆိုတဲ့ အကြောင်းပြပြီး ၂၀၁၀-၁၁ မှာ အာဏာကနေ ဆုတ်ခွာခဲ့တယ်။

အဲဒီတော့ အာဏာရှင်တွေရဲ့ ကျန်းမာရေးသတင်းတွေဟာ တကယ်ကျန်းမာရေးမကောင်းတာလား ဒါမှမဟုတ် နိုင်ငံရေးကိစ္စတခုခု နှီးနွယ်နေသလားဆိုတာ ဒီနိုင်ငံမှာတော့ ပြောရခက်ပါတယ်။

တပ်တွင်းထဲမှာ မင်းအောင်လှိုင်ကို မကြိုက်ကြတဲ့အသံတွေကလည်း အမြဲညံစီညံစီ ကြားရတတ်တော့ အခု သူကျန်းမာရေးမကောင်းတာကို တကူးတကထုတ်ပြန်လာတော့ သို့လောသို့လောဖြစ်လာပါတယ်။

မအလ သမ္မတလုပ်မှာကို စစ်ဘက်အသိုင်းအဝိုင်းက သိပ်မလိုလားကြဘူး။ နိုင်ငံတကာဖိအားတွေဆက် ရှိလိမ့်မယ်၊ ပြည်တွင်းပြည်ပဖိအားတွေအပေါ် မအလ အနေနဲ့ ဦးဆောင်တွန်းလှန်နိုင်မယ့် ခေါင်း ဆောင်တယောက်လို့ တပ်ဘက်က မယုံကြည်နေဘူး။

တပ်ခေါင်းဆောင်ပိုင်းချင်း စည်းနှောင်မှုဟာ ညီရင်းအစ်ကိုစိတ်ထားမျိုး၊ ငါတို့စုစည်းနေခြင်းဟာ တိုင်း ပြည်အကျိုးလိုလားလို့ဆိုတာမျိုး ဘယ်တုန်းကမှမဟုတ်ခဲ့ဘူး။ တယောက်အကျိုးစီးပွား တယောက်ကာကွယ်ဖို့ ကျောချင်းကပ်ထားကြတာသာဖြစ်တယ်။

ဆိုတော့ သူတို့တပ်မှာက ‘ငါတို့အကျိုးစီးပွားကို မကာကွယ်ပေးနိုင်တော့ဘူး’ လို့ ယုံကြည်သွားတာနဲ့ တနည်းမဟုတ် တနည်းနဲ့ ခေါင်းဆောင်ပိုင်းအပြောင်းအလဲလုပ်ဖို့ ကျားချောင်း ချောင်းနေကြသူတွေနဲ့ ပြည့်နေတာ။ တနည်းမဟုတ်တနည်းဆိုတာ ချော့ပြောတာ ခြောက်ပြောတာ စသဖြင့်ကိုဆိုလိုတာပါ။

တဖက်မှာလည်း တရုတ်ကြီးက မအလ ကို သမ္မတရော တပ်ချုပ်ပါ မလုပ်ဖို့ ဖိအားပေးထားသေးတယ်ဆိုတာတွေကလည်း ထွက်ပေါ်နေပါသေးတယ်။ မင်းအောင်လှိုင်ဟာ ထူးထူးခြားခြား ပြည်သူလည်းမလိုလားသော သူတို့ချင်းလည်း မလိုလားသော အာဂခေါင်းဆောင်တယောက် ဖြစ်မှန်းမသိ ဖြစ်လာနေပါတယ်။

ပုံမှန်အားဖြင့် စစ်ခေါင်းဆောင်တွေဟာ ကိုယ့်ကျန်းမာရေးအခြေအနေကို အများပြည်သူရှေ့ ထုတ်ဖော်ပြောဆိုလေ့ မရှိပါဘူး။ အထူးသဖြင့် အာဏာကို ထိန်းသိမ်းထားချင်တဲ့အချိန်တွေမှာ အားနည်းမှုကို ပြသခြင်းက Political Vulnerability တမျိုးလို့ တွက်ယူနိုင်တယ်။

ဒါကြောင့် အခုလို ကျန်းမာရေးကြေညာချက် ထွက်ပေါ်လာခြင်းဟာ သာမန်ဖြစ်ရပ်တစ်ခုထက်ပိုတယ်လို့ တွေးဆဖို့လိုလာတာပါ။ အထူးသဖြင့် လက်ရှိကာလဟာ အာဏာလွှဲပြောင်းရေးတွေ၊ Elite Contestation လို့ခေါ်တဲ့ ထိပ်ပိုင်းအဖွဲ့အတွင်းပြိုင်ဆိုင်တာတွေ ပြင်းထန်နေတဲ့ အချိန်လည်းဖြစ်နေတော့ ဒီလို ‘ကျန်းမာရေးပြဿနာ’ ဆိုတာ အာဏာကနေ တဖြည်းဖြည်း ဆုတ်ခွာဖို့ Soft Exit Narrative အဖြစ် အသုံးချနေသလားလို့ ယူဆချက်တွေလည်းရှိနေပါတယ်။

ဒါမှမဟုတ် သူဟာ နေမကောင်းနေတဲ့ကြားက သမ္မတလုပ်ပေးခဲ့ရပါတယ်လို့များ ပေါကြောင်ကြောင်ဒရမ်မာခင်းချင်တာဆိုရင်တော့လည်း သူ့ထိုက်နဲ့သူ့ကံပေါ့။ ဘယ်သူကမှတော့လည်း ကျန်းမာရေးတဖက်နဲ့ ဒီလိုကြီးလေးတဲ့ တာဝန်တွေ ထမ်းဆောင်နေရတာပါလားလို့ သနားမယ့်ထဲတော့ ပါပုံရမှာမဟုတ်ဘူး။

သူ့စွမ်းဆောင်ရည်ညံ့ဖျင်းမှုတွေကို ကျန်းမာရေးနဲ့ကာဗာပေးရအောင်ကလည်း နောက်တောင်ကျနေပြီလို့ ပြောရမလိုပါပဲ။ ဘာလို့ဆို ခုလိုကျန်းမာရေးတွေဘာတွေ ချိနဲ့မှမဟုတ်ဘူး၊ သူတက်လာကတည်းက သောက်တလွဲတွေချည်း ထိုင်လုပ်နေတာကိုး။ နာမည်များစီးသွားသလားမသိဘူး၊

ကိုယ့်လူသူ့ဘက်မရွေး မအလကိုမြင်တာနဲ့ မအလ လို့ဆဲချင်နေကြသူတွေချည်း။ အခုမသေသေးရင်တောင် ဆက်ရှင်သန်နေရတဲ့အချိန်တွေက သမိုင်းတလျှောက် အရယ်ရဆုံးစစ်ခေါင်းဆောင် ဆိုတဲ့ဘွဲ့ဂုဏ်သတင်းအတွက် ကြိုးကုတ်နေရတဲ့ အချိန်တွေပဲ ဖြစ်မှာပါ။

(ညိုအေးသည် ဝါရင့် သတင်းသမားတစ်ဦးဖြစ်သည်။)