ရန်ကုန်၊ မတ် ၂၆
အိန္ဒိယ-မြန်မာနယ်စပ်ကို တရားဝင်ခရီးသွားလာခွင့် အထောက်အထားများမပါဘဲ ဖြတ်ကျော်ရန် ကြိုးပမ်းခဲ့သည့် အသက် ၅၈ နှစ်အရွယ် ဆလိုဗက်ကီးယား (Slovak) နိုင်ငံသားတစ်ဦးကို မီဇိုရမ်ပြည်နယ်ရဲတပ်ဖွဲ့က ဖမ်းဆီးထိန်းသိမ်းလိုက်ကြောင်း အိန္ဒိယနိုင်ငံ၊ မီဇိုရမ်ပြည်နယ်၊ ရှီဟာ (Siaha) ရဲစခန်း တာဝန်ရှိသူများက ယနေ့တွင် ပြောကြားသည်။
ရဲတပ်ဖွဲ့သတင်းရင်းမြစ်များ၏အဆိုအရ မည်သူမည်ဝါဖြစ်သည်ကို ထုတ်ဖော်ပြောကြားခြင်းမရှိသေးသည့် အဆိုပါနိုင်ငံခြားသားကို လက်ရှိတွင် ထိန်းသိမ်းထားပြီး ပြည်နယ်ရဲတပ်ဖွဲ့၊ ဗဟိုနှင့် ပြည်နယ်ထောက်လှမ်းရေးအဖွဲ့များက ပူးပေါင်းစစ်ဆေးမေးမြန်းလျက်ရှိကြောင်း သိရသည်။
၎င်း၏ ရည်ရွယ်ချက်နှင့် နောက်ခံအကြောင်းအရာ အသေးစိတ်ကို စစ်ဆေးမေးမြန်းပြီးမှသာ ထုတ်ပြန်နိုင်မည်ဖြစ်ကြောင်း အာဏာပိုင်များက ဆိုသည်။
၎င်းကို ပြီးခဲ့သည့် အင်္ဂါနေ့တွင် ရှီဟာခရိုင်မြို့တော်နှင့် ၆၀-၇၅ ကီလိုမီတာခန့် ကွာဝေးသော လာကီ (Laki) ကျေးရွာအနီး နယ်စပ်တစ်လျှောက် တာဝန်ကျနေသည့် အာသံရိုင်ဖယ်တပ်ဖွဲ့ဝင်များက ဖမ်းဆီးခဲ့ခြင်းဖြစ်ပြီး ဥပဒေအရ အရေးယူနိုင်ရန် ရှီဟာမြို့သို့ ခေါ်ဆောင်လာခဲ့ခြင်းဖြစ်သည်။
အခြေခံစုံစမ်းရရှိမှုများအရ အဆိုပါအမျိုးသားက ၎င်းအနေဖြင့် မြန်မာနိုင်ငံသို့သွားရောက်ကာ ရိုးရာသင်္ကြန်ပွဲတော်တွင် ပါဝင်ဆင်နွှဲရန် ရည်ရွယ်ခြင်းဖြစ်ကြောင်း ထွက်ဆိုထားသော်လည်း အာဏာပိုင်များကမူ ထိုထွက်ဆိုချက်ကို ဆက်လက်စစ်ဆေးအတည်ပြုနေဆဲဖြစ်သည်။
ယခုဖြစ်စဉ်သည် မီဇိုရမ်ပြည်နယ်အတွင်း နိုင်ငံခြားသားများအပေါ် မကြာသေးမီက စတင်လုပ်ဆောင်လာသည့် နှိမ်နင်းမှုများကြောင့် ပိုမိုအရေးပါလာခြင်းဖြစ်သည်။
မတ်လ ၁၃ ရက်နေ့ကလည်း အမျိုးသားစုံစမ်းစစ်ဆေးရေးအေဂျင်စီ (NIA) သည် ယူကရိန်းနိုင်ငံသား ၆ ဦးနှင့် အမေရိကန်နိုင်ငံသား ၁ ဦးတို့ကို နိုင်ငံတစ်ဝှမ်းရှိ လေဆိပ် ၃ ခုတွင် ဖမ်းဆီးခဲ့ဖူးသည်။
အဆိုပါအဖွဲ့သည် မီဇိုရမ်ပြည်နယ်သို့ လိုအပ်သော ကန့်သတ်နယ်မြေအတွင်း ဝင်ရောက်ခွင့်လက်မှတ် (PAP) မပါဘဲ ဝင်ရောက်ခဲ့ပြီး မြန်မာနိုင်ငံအတွင်းသို့ ဖြတ်ကျော်ဝင်ရောက်ကာ တိုင်းရင်းသားလက်နက်ကိုင်အဖွဲ့များကို ဒရုန်းစစ်ဆင်ရေးနည်းပညာများ သင်ကြားပေးခြင်းနှင့် ဥရောပထုတ်ဒရုန်းများ မှောင်ခိုသွင်းပေးခြင်းတို့တွင် ပါဝင်ပတ်သက်နေသည်ဟု NIA က စွပ်စွဲထားသည်။
သို့သော် မီဇိုရမ်ပြည်နယ်ရဲတပ်ဖွဲ့ကမူ ထိုစွပ်စွဲချက်များကို သီးခြားအတည်ပြုထားခြင်း မရှိသေးပေ။
အဆိုပါ နိုင်ငံခြားသား ၇ ဦးသည် အိုက်ဇောမြို့အနီးရှိ လန်းပွီး (Lengpui) လေဆိပ်ကဲ့သို့ တရားဝင်ဝင်ပေါက်များကို ရှောင်ကွင်းကာ အာသံပြည်နယ်၊ ဗိုက်ရိန်းတီး (Vairengte) ကဏ္ဍမှတစ်ဆင့် မီဇိုရမ်အတွင်းသို့ ဝင်ရောက်လာခြင်းဖြစ်နိုင်သည်ဟု စုံစမ်းစစ်ဆေးသူများက သံသယရှိနေကြသည်။
လက်ရှိတွင် အပြည်ပြည်ဆိုင်ရာနယ်စပ်တလျှောက် လုံခြုံရေးဆိုင်ရာ စိုးရိမ်မှုများနှင့် နိုင်ငံခြားသားများ ပါဝင်ပတ်သက်နေသည့် နောက်ဆုံးဖြစ်ရပ်များကြောင့် ယခု ဆလိုဗက်ကီးယားနိုင်ငံသားအမှုအား ဂရုတစိုက် ကိုင်တွယ်ဆောင်ရွက်နေကြောင်း တာဝန်ရှိသူများက ပြောကြားသည်။
