ရန်ကုန်၊ မတ် ၂၇
ပဲခူးတိုင်း၊ တောင်ငူမြို့တွင် နေထိုင်သော အိုးဝေအငှားယာဉ်မောင်း ကိုချစ်ဦးသည် တောင်ငူမှ နေပြည်တော်သို့ ခရီးသည် လိုက် လံ ပို့ဆောင်စဉ် ပျောက်ဆုံးနေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၁ ရက်နေ့တွင် အိုးဝေအငှားယာဉ်မောင်း ကိုချစ်ဦးသည် တောင်ငူမှ နေပြည်တော်သို့ လိုက်လံ ပို့ဆောင်ပေးရန် အမျိုး သမီး ၂ ဦးနှင့် အမျိုးသား ၁ ဦးက ငှားရမ်းခြင်းကြောင့် နေပြည်တော်သို့ လိုက်လံ ပို့ဆောင်ပေးခဲ့ကြောင်း၊ ထိုသို့ သွားရောက်ပို့ဆောင်ပေးစဉ် လမ်းခရီး၌ အဆက်အသွယ် ပြတ်တောက်ခဲ့ခြင်းဖြစ်ကြောင်း သိရသည်။
“အခုချိန်ထိ အဆက်အသွယ် မရသေးပါဘူး။ ကိုချစ်ဦးက တောင်ငူကနေ နေပြည်တော်ကို အိုးဝေအငှားလိုက်သွားတာ အခုထိ အိမ်ပြန်မရောက်သေးဘဲ အဆက်အသွယ် ပြတ်နေတာ အမျိုးသမီး ၂ ဦးနဲ့ အမျိုးသား ၁ ဦးက ငှားသွားလို့ လိုက်ပို့တာ” ဟု ဒေသပြည်သူတစ်ဦးက ပြောဆိုသည်။
အလားတူ မန္တလေးတိုင်း၊ ဝမ်းတွင်းမြို့နယ်တွင်လည်း ကျေးရွာအတွင်း ပေါ်တာဆွဲ ဖမ်းဆီးရန် လာသော စစ်သားများကို တိမ်း ရှောင် စဉ် လူငယ် ၁ ဦး မြွေကိုက်ခံရပြီး သေဆုံးခဲ့ကြောင်း Voice Of Wundwin ထုတ်ပြန်ချက်နှင့် ဒေသပြည်သူများ ပြောဆိုချက်အရ သိရသည်။
မတ်လ ၂၂ ရက်နေ့ ည ၉ နာရီခန့်တွင် ဖလန်ကန်ကျေးရွာအတွင်း အကြမ်းဖက် စစ်တပ်က ပေါ်တာဆွဲ ဖမ်းဆီးရန် လာရောက်မည်ဆိုခြင်းကြောင့် ကျေးရွာအတွင်းမှ လူငယ်များ ရွာပြင်ကို ထွက်ပြေး တိမ်းရှောင်ပြီး ချုံများ၌ ပုန်းအောင်းနေစဉ် အသက် ၄၂ နှစ်အရွယ် အမျိုးသား ၁ ဦး မြွေကိုက်ခံရပြီး သေဆုံးခဲ့ခြင်းဖြစ်ကြောင်း သိရသည်။
“ဝမ်းတွင်းမှာ စစ်ခွေးတွေက နေ့တိုင်းနီးပါး ပေါ်တာဆွဲနေတာဆိုတော့ ရွာထဲက အမျိုးသားတွေက ညဆို ရွာပြင်တွေမှာ တိမ်း ရှောင်နေရတာ အဲ့နေ့ ညကလည်း ဖလန်ကန်ရွာကို ပေါ်တာလာဆွဲမှာ ဆိုတဲ့ သတင်းကြောင့် ရွာထဲက လူငယ်တွေက ရွာပြင်ထွက်ပြီး ချုံတွေထဲမှာ တိမ်းရှောင်နေတုန်း မြွေကိုက်ခံပြီး ပြည်သူ ၁ ဦး သေဆုံးခဲ့တာလို့ သိရတယ်” ဟု ဒေသပြည်သူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ထို့ပြင် မတ်လ ၁၉ ရက်နေ့ကလည်း မြောက်ဇဂျမ်းကုန်းမှ လူငယ် ၂ ဦး သည် အရှေ့ဆည်ရွာ၌ ပန်းရံလုပ်ပြီး နေအိမ်သို့ ပြန်လာစဉ် အကြမ်းဖက် စစ်သားများက ပေါ်တာဆွဲ ဖမ်းဆီးခေါ်ဆောင်သွားကြောင်း သိရသည်။
ဓာတ်ပုံ – ပျောက်ဆုံးနေသော အိုးဝေအငှားယာဉ်မောင်း ကိုချစ်ဦး။
