ရန်ကုန်၊ ဇူလိုင် ၆
ရှမ်းပြည်နယ်မြောက်ပိုင်းတွင် MNDAA ၊ TNLA ၊ UWSA အပါအဝင် တိုင်းရင်းသားလက်နက်ကိုင်များ အင်အားကြီးထွားနေမှုကို တန်ပြန်ရန် စစ်တပ်အရန်အင်အားများ အရေးပေါ်စုဆောင်းရန် လျှို့ ဝှက် ညွှန်ကြားလိုက်ကြောင်း သက်ဆိုင်ရာစစ်ရေး သတင်းရင်းမြစ်များထံမှ သိရှိရသည်။
ရှမ်းပြည်နယ်မြောက်ပိုင်းတွင် ကိုးကန့် MNDAA ၊ တအာင်း TNLA ၊ ၀ UWSA အပါအဝင် တိုင်းရင်းသား လက်နက်ကိုင်များ အင်အားတိုးချဲ့နေပြီး စစ်မှုထမ်းဆင့်ခေါ်မှုများ အရှိန်အဟုန်ဖြင့် လုပ်ဆောင်နေကြောင်း၊ ယင်းကဲ့သို့ အခြေအနေတွင် စစ်တပ်အနေဖြင့် ယင်းသို့ တိုင်းရင်းသားလက်နက်ကိုင်များ၏ အင်အားကြီးထွားလာမှုကို တန်ပြန်ဆောင်ရွက်ရန်အတွက် စစ်တပ်အရန်အင်အားများကို စာရင်းပြုစုပြီး အမြန်ဆုံး စုဆောင်းပြင်ဆင်မှုများ လုပ်ဆောင်သွားရန် လိုအပ်ကြောင်း အကြမ်းဖက်စစ်တပ်က အရေးပေါ် လျှို့ဝှက်ချက်တစ်ရပ်ထုတ်ပြန်ထားသည်။
လားရှိုးအခြေစိုက် အရှေ့မြောက်တိုင်းစစ်ဌာနချုပ်အနေဖြင့် ရှမ်းပြည်နယ်(မြောက်ပိုင်း)အတွင်း မြို့နယ်များအားလုံးတွင် အသက် ၁၈ နှစ်မှ ၆၀ နှစ်အတွင်းရှိ နိုင်ငံသားဝန်ထမ်းများကို စစ်တပ်၏အရန်အင်အားစာရင်းတွင် ထည့်သွင်းရမည်ဖြစ်ကြောင်း၊ ထို့ကြောင့် မြန်မာနိုင်ငံရဲတပ်ဖွဲ့ဝင်များ၊ ရဲတပ်ဖွဲ့ဝင်များ၏ မိသားစုဝင်များ ၊ မြန်မာနိုင်ငံမီးသတ်တပ်ဖွဲ့ဝင်များနှင့် နိုင်ငံတော်၏အရန်အင်အားစာရင်းအတွက် အသက် ၁၈ နှစ်မှ ၆၀ နှစ်အတွင်းရှိ ဌာနဆိုင်ရာ ဝန်ထမ်းများနှင့် မိသားစုများ၏ အင်အားစာရင်းအားပြုစု၍ အရှေ့မြောက်တိုင်းစစ်ဌာနချုပ်၊ စစ်ဦးစီးဌာန(ပြည်သူ့စစ်ဌာနခွဲ)သို့ အမြန်ဆုံး အရေးပေါ် ပြန်လည်တင်ပြရန် လျှို့ဝှက်ညွှန်ကြားသည်။
စစ်တပ်၏ အရန်အင်အားစာရင်းများကို ဖော်ပြရာတွင် ရှမ်းပြည်နယ်(မြောက်ပိုင်း)အတွင်း မြို့နယ်များအလိုက် ဌာနတိုင်းရှိ အသက် ၁၈ နှစ်မှ ၆၀ နှစ်အတွင်းရှိ နိုင်ငံသားဝန်ထမ်းအင်အားစာရင်းကို ဇယားပြုစု၍ အမြန်ဆုံး မပျက်မကွက်(မပျက်မကွက်) တင်ပြရမည်ဖြစ်ကြောင်း စစ်တပ်က အမိန့် ညွှန်ကြားတစ်ရပ်ကို အရေးပေါ် ထုတ်ပြန်ထားသည်။
စစ်တပ်က စစ်တပ်၏ အရေးပေါ် အရန်အင်အား စုဆောင်းနေသော ရှမ်းမြောက် မြို့နယ်များတွင် လားရှိုးမြို့နယ်၊ သိန္နီမြို့နယ်၊ ကွမ်းလုံမြို့နယ်၊ မူဆယ်မြို့နယ်၊ နမ့်ခမ်းမြို့နယ်၊ ကျောက်မဲမြို့နယ်၊ သီပေါမြို့နယ်၊ နောင်ချိုမြို့နယ်၊ နမ္မတူမြို့နယ်၊ မိုးမိတ်မြို့နယ်၊ မဘိမ်းမြို့နယ်၊ ၊တန့်ယန်းမြို့နယ်၊ မိုင်းရယ်မြို့နယ်တို့ပါဝင်သည်။
စစ်တပ်က အရန်အင်အားစာရင်းများ ရရှိပြီးပါက ရှမ်းမြောက်မြို့နယ် ၁၃ ခုရှိ စစ်တပ်အရန်အင်အားများကို ပစ်ခတ်ရေး သင်တန်းများ ပို့ချခြင်း၊ လက်နက်ခဲယမ်းများ တပ်ဆင်ခြင်းများကိုလည်း အရေးပေါ် လုပ်ဆောင်သွားမည်ဖြစ်ကြောင်း သိရှိရသည်။
