ရန်ကုန်၊ မတ် ၁၀
ရခိုင်ပြည်နယ် စစ်တွေ သုသာန်အနီးရှိ နေအိမ်များကို အကြမ်းဖက် စစ်ကောင်စီဝင် စစ်သား၊ ရဲနှင့် စည်ပင်များ ပူးပေါင်းကာ ယနေ့ မတ် ၁၀ ရက်နေ့ နံနက်ပိုင်းမှ စတင်ကာ ဝင်ရောက်ဖျက်ဆီးနေကြောင်း၊ အဆိုပါ နေအိမ်များတွင် စစ်ဘေးရှောင်များပါ ဝင်ရောက်ခိုလှုံနေခြင်းဖြစ်ကြောင်း နေအိမ်ဖျက်ဆီးခံရသူများထံမှ သိရသည်။
“ကြိုပြီး အကြောင်းကြားတာ ဘာမှ မရှိဘူး။ လွန်ခဲ့တဲ့ ၂ လတော့ စာရင်းကောက်တာရှိတယ် ။ ဒါပေမဲ့ ဖျက်မယ်လို့ မပြောထားဘူး။ ဝင်တားတဲ့ လူတွေလည်း ဖမ်းခံရတယ်။ ကျွန်တော့်တောင် လိုက်ဖမ်းလို့ ပြေးလာရတယ်” ဟု မျက်မြင်တွေ့ရှိသူ တစ်ဦးက ပြောကြားသည်။
ဖမ်းဆီးခံရသူ ၂ ဦးမက ရှိနေပြီး နေအိမ် ဖျက်ဆီးခံရသူများတွင် စစ်ဘေးရှောင်များပါ ပါဝင်နေကြောင်း ၊ လူဦးရေပေါင်း ၈၀၀ ကျော် အိုးမဲ့ အိမ်မဲ့ ဖြစ်သွားပြီး ဒုက္ခရောက်နေရကြောင်း ဒေသခံများထံမှ သိရှိရသည်။
