ရန်ကုန်-မန္တလေး လမ်းဟောင်း မိုင်တိုင် ၁၀၁ ရှိ ရဲနှင့် ပျူစောထီးများ တပ်စွဲထားသော KTV ကို ဝင်ရောက် တိုက်ခိုက်မှု ၄ ဦးသေဆုံးပြီး ကား ၁ စီးသိမ်းဆည်းရရှိ
ရန်ကုန်၊ ဇူလိုင် ၂၁
ပဲခူးတိုင်း၊ ကျောက်တံခါးမြို့နယ်၊ ရန်ကုန်-မန္တလေးကားလမ်းဟောင်း မိုင်တိုင် ၁၀၁ ရှိ ရဲနှင့် ပျူစောထီးများ တပ်စွဲထားသော KTV ကို ဝင်ရောက် တိုက်ခိုက်မှု ၄ ဦးသေဆုံးခဲ့ကြောင်း တောင်ပိုင်းတိုင်း အထူးကွန်မန်ဒိုတပ်ရင်းထံမှ သိရသည်။
ယမန်နေ့ ဇူလိုင်လ ၂၀ ရက် ညပိုင်းက အဆိုပါအကြမ်းဖက် စစ်တပ် လက်အောက်ခံ ရဲနှင့် ပျူစောထီးများ တပ်စွဲထားသော KTV ကို ပြည်သူ့ကာကွယ်ရေးပူး ပေါင်းတပ်ဖွဲ့က စီးနင်း တိုက်ခိုက်ခဲ့ရာ အကြမ်းဖက်စစ်တပ် လက်အောက်ခံရဲ ၂ ဦး၊ သတင်းပေးပျူစောထီး ၂ ဦးသေဆုံးပြီး ရဲ ၂ ဦးဒဏ်ရာရရှိကာ အိမ်စီးကား ၁ စီးကို သိမ်းဆည်းရရှိခဲ့ကြောင်း သိရသည်။
အဆိုပါ တိုက်ခိုက်မှုကို တောင်ပိုင်းစစ်ဒေသခွဲ -(၂) အထူးစစ်ဆင်ရေးတပ်ရင်း Special Force Column -Special Operation Commando Battalion (SOC) ရဲဘော်များမှ ဝင်ရောက်တိုက်ခိုက်ခဲ့ခြင်းဖြစ်ပြီး ယခု စစ်ဆင်ရေးအပါအဝင် ကျောက်တံခါးမြို့နယ်အတွင်းရှိ အကြမ်းဖက်စစ်သား၊ ပျူစောထီး၊ ရဲ ၆၀ ကျော်ကို ရှင်းလင်းခဲ့ပြီးဖြစ်ကြောင်း သိရသည်။
ထို့အပြင် ဇူလိုင် ၁၈ ရက်ညပိုင်းကလည်း ကျောက်တံခါးမြို့နယ် ၊ ရန်ကုန်-မန္တလေးကားလမ်း မိုင်တိုင် အမှတ် ၁၀၁/၇ အနီးရှိအလျား ၄၅ ပေရှိ တံတားနှင့် ရန်ကုန်-မန္တလေးမီး ရထားလမ်း၊ ကြေးနန်း မိုင်တိုင် ၁၀၉/၁၀ နှင့် ၁၀၉/၁၁ ကြားရှိ တံတားကို ဖောက်ခွဲခဲ့ရာ အကြမ်းဖက်စစ်သား ၂ ဦးသေဆုံးခဲ့ကြောင်း သိရသည်။
ဇူလိုင်လဆန်းပိုင်းကလည်း ညောင်လေးပင်ခရိုင်၊ ကျောက် တံခါးမြို့နယ် စစ်တောင်းမြစ်အနောက်ဖက် ခြမ်းသို့ ကညွတ်ကွင်းအခြေစိုက် ခမရ ၄၃၉၊ ပိန်းဇလုတ်အခြေစိုက်ခမရ ၂၆၄၊ ဖြူးမြို့အခြေစိုက် ခမရ ၃၀၆ ၊ ပဲနွယ်ကုန်းအခြေစိုက် ခမရ ၃၀၇ တပ်ရင်းများက စစ်ကြောင်းထိုးလာသဖြင့် ထိတွေ့တိုက်ပွဲများ ဖြစ်ပွားခဲ့ကြောင်း တောင်ပိုင်းတိုင်း၊အထူးကွန်မန်ဒိုတပ်ရင်းမှ ထုတ်ပြန်ထားသည်။
