မန္တလေးအပြည်ပြည်ဆိုင်ရာလေဆိပ်၊ လေကြောင်းရဲတပ်ဖွဲ့မှ ဒုရဲအုပ် သန်းမင်းစိုး နှင့် ဇနီးတို့ ရွာအပြန်ခရီးတွင် တိုက်ခိုက်ခံရပြီး သေဆုံး
ရန်ကုန်၊ စက်တင်ဘာ ၁၄
မန္တလေးအပြည်ပြည်ဆိုင်ရာလေဆိပ်၊ လေကြောင်းရဲတပ်ဖွဲ့မှ ဒုရဲအုပ် သန်းမင်းစိုးနှင့် ဇနီးဖြစ်သူ ဒေါ်သူဇာထွန်းတို့ တိုက်ခိုက်ခံရပြီး သေဆုံးသွားကြောင်း ပြည်ထဲရေးဝန်ကြီးဌာန၏ ရဲကြေးနန်းအရ သိရှိရသည်။
စက်တင်ဘာလ ၁၃ ရက်နေ့ မွန်းလွဲ ၁ နာရီအချိန် လေကြောင်းရဲတပ်ဖွဲ့၊ မန္တလေး အပြည်ပြည်ဆိုင်ရာလေဆိပ်တာဝန်ကျ ဒုရဲအုပ် သန်းမင်းစိုးသည် ဇနီးဖြစ်သူ ဒေါ်သူဇာထွန်း၊ ၃၅ နှစ်၊ အသက် ၉ နှစ်အရွယ် သမီး၊ အသက် ၂ နှစ်အရွယ် သားဖြစ်သူ တို့ကို ခေါ်ဆောင်၍ Honda Fit ခဲရောင်မော်တော်ယာဉ်ဖြင့် စစ်ကိုင်းမြို့၏အနောက်ဘက် ၇ မိုင်ခန့် အကွာ၊ စစ်ကိုင်းမြို့နယ်၊ သလွန်ဖြူကျေးရွာ၊ ရွှေဘုံသာဘုန်းကြီးကျောင်းအနီးသို့ ခရီးသွားရောက်ရှိခဲ့ကြောင်း၊ အဆိုပါရွာတွင် ဇနီးဖြစ်သူ ဒေါ်သူဇာထွန်း၏ မိခင် နေထိုင်၍ လာရောက်ကန်တော့ခြင်းဖြစ်ကြောင်း သိရှိရသည်။
စက်တင်ဘာလ ၁၃ ရက်နေ့ မွန်းလွဲ ၃ နာရီ ၁၀ မိနစ်အချိန် တာဝန်ကျရာ လေဆိပ်သို့ ပြန်ရန် ကားရပ် ထားခဲ့သည့် ရွှေဘုံသာဘုန်းကြီးကျောင်းအနီးသို့ ရောက်ရှိစဉ် လူ ၈ ဦးက သေနတ်ဖြင့် ပစ်ခတ်သဖြင့် ဒုရဲအုပ် သန်းမင်းစိုး တွင် နဖူးနှင့် ဝဲနားထင်ကျည်ဖောက်ဝင်ဒဏ်ရာများဖြင့် သေဆုံးသွားခဲ့ကြောင်း၊ အလားတူ သားဖြစ်သူ တင်ပါး ကျည်ရှပ်ထိဒဏ်ရာ (မစိုးရိမ်ရ)ရရှိခဲ့ကြောင်း သိရှိရသည်။
ထို့နောက် လူ ၈ ဦးက ဒုရဲအုပ် သန်းမင်းစိုး၏ ဇနီးဖြစ်သူ ဒေါ်သူဇာထွန်းကို ကျေးရွာ အနောက်ပိုင်းသို့ခေါ်ဆောင်သွားပြီး သေနတ်ဖြင့်ပစ်ခတ်ခဲ့ရာ ငယ်ထိပ်ကျည် ဖောက်ဝင်ဒဏ်ရာဖြင့်သေဆုံးသွားခဲ့ကာ အလောင်းအား ဒုရဲအုပ် သန်းမင်းစိုး၏အလောင်းအနီးသို့ ပြန်လည် သယ်ဆောင်ထားရှိခဲ့ကြောင်း၊ သိရှိရသည်။
ယင်းနောက် စက်တင်ဘာလ ၁၃ ရက်နေ့ ညနေ ၆ နာရီ ၁၅ မိနစ်အချိန် သေဆုံး သူ ၂ ဦးနှင့် ဒဏ်ရာရရှိသူ ၁ ဦး တို့ကို တွေ့ရှိရ၍ ဆေးရုံတင်ပို့ရာ စစ်ကိုင်းမြို့ နယ်ဆေးရုံ ကြီးသို့ရောက်ရှိခဲ့ကြောင်း၊ ဒဏ်ရာရရှိသူ ကလေးငယ်အား ဆေးကုသ ပေးလျက်ရှိ ကြောင်း သိရှိရသည်။
