ချောင်းဦး၊ မုံရွာနှင့် ယင်းမာပင် မြို့နယ်တို့တွင် မိုင်းရှင်ရန် လာသည့် စစ်သားများ၊ ကြေးနီ ယာဉ်တန်းနှင့် စစ်ယာဉ်တန်းများကို ၂ ရက်ဆက် မိုင်းဆွဲ တိုက်ခိုက်မှု စစ်တပ်ဘက်မှ ထိခိုက်ဒဏ်ရာရရှိသူ များပြား

ချောင်းဦး၊ မုံရွာနှင့် ယင်းမာပင် မြို့နယ်တို့တွင် မိုင်းရှင်ရန် လာသည့် စစ်သားများ၊ ကြေးနီ ယာဉ်တန်းနှင့် စစ်ယာဉ်တန်းများကို ၂ ရက်ဆက် မိုင်းဆွဲ တိုက်ခိုက်မှု စစ်တပ်ဘက်မှ ထိခိုက်ဒဏ်ရာရရှိသူ များပြား

ရန်ကုန်၊ မတ် ၁

စစ်ကိုင်းတိုင်း၊ မုံရွာ-မန္တလေ လမ်းပိုင်းတွင် မိုင်းရှင်ရန် ထွက်လာသော အကြမ်းဖက် စစ်သားများကို မိုင်းဆွဲ တိုက်ခိုက်ရာ အရာရှိ ၁ ဦး အပါအဝင် စစ်သား ၄ ဦး ပြင်းထန်ဒဏ်ရာရရှိခဲ့ကြောင်း CDSOM ဗိုလ်စင်္ကြာစစ်ကြောင်းမှ ရဲဘော်စမာက ရန်ကုန်ခေတ်သစ် သတင်းဌာနထံသို့ပြောဆိုသည်။

ဖေဖော်ဝါရီလ ၂၆ ရက်နေ့ ညနေ ၄ နာရီ ၃၀ မိနစ်ခန့်တွင် မုံရွာ-မန္တလေး လမ်းပိုင်း၌ မိုင်းရှင်းရန် နတ်ရေကန် စစ်တပ် အထိုင်စခန်းမှ ထွက်လာသော အကြမ်းဖက် စစ်ကောင်စီ တပ်သားများကို တော်လှန်ရေး တပ်ဖွဲ့များက နတ်ရေကုန်နှင့် ချောင်းဦးဘက် သွားသည့် လမ်းဆုံတွင် မိုင်းပွိုင့် ၃ ပွိုင့်ဖြင့် ဖောက်လွဲ တိုက်ခိုက်ခဲ့ခြင်းဖြစ်ကြောင်း သိရသည်။

ယင်းတိုက်ခိုက်မှု အတွင်း အကြမ်းဖက် စစ်တပ်ဘက်မှ အရာရှိ ၁ ဦး အပါအဝင် စစ်သား ၄ ဦး ပြင်းထန်ဒဏ်ရာရရှိခဲ့ကြောင်း၊ တိုက်ခိုက်မှု ဖြစ်ပွားပြီးနောက် အကြမ်းဖက် စစ်ကောင်စီ တပ်သားများက ဘုန်းကြီးကား ၁ စီးကို ချောဆွဲ၍ ရေပိုးသား ကျောင်းထဲကို ခေါ်ဆောင်သွားပြီး ဆေးကုသမှု ပြုလုပ်နေကြောင်း သိရှိရသည်။

“နတ်ရေကန်နဲ့ ချောင်းဦးဘက်ကို သွားတဲ့ လမ်းခွမှာ မိုင်းပွိုင့် ၃ ခုနဲ့ ဖောက်ခွဲ တိုက်ခိုက်ခဲ့တာပါ။ ဗိုလ် ၁ ကောင် အပါအဝင် ၄ ကောင် ပြင်းထန် ဒဏ်ရာရတယ်။ ဘုန်းကြီးကားကို ချောဆွဲပြီး ဒဏ်ရာရတဲ့ ကောင်တွေကို ရေပိုးသားကျောင်းထဲ ခေါ်ဆောင်သွားပြီး ဆေးကုနေတယ်။ ဝမ်းပေါင်က ထွက်လာတဲ့ ကားတွေ ဖြတ်မှာမို့လို့ မိုင်းလာရှင်းတာလို့ သိရတယ်။ သူတို့ ရောက်လာတာနဲ့ ချက်ခြင်း မိုင်းဆွဲ လိုက်တာ ပြည်သူတွေအနေနဲ့ စစ်ခွေးတွေနဲ့ ဝေးရာမှာ နေထိုင်ကြဖို့ မေတ္တာရပ်ခံချင်ပါတယ်” ဟု CDSOM ဗိုလ်စင်္ကြာစစ်ကြောင်းမှ ရဲဘော်စမာက ပြောဆိုသည်။

အဆိုပါ တိုက်ခိုက်မှုကို CDSOM ဗိုလ်စင်္ကြာစစ်ကြောင်းမှ ပြုလုပ်ခဲ့ခြင်းဖြစ် တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။

ဖေဖော်ဝါရီလ ၂၇ ရက်နေ့ နံနက် ၉ နာရီ ၃၀ မိနစ်ခန့်တွင် မုံရွာ-မန္တလေး လမ်းတစ်နေရာ၌ နမခ မှ ထွက်လာသော Jammer ကား ၅ စီးကို ရှေ့ထွက်မိုင်း ၅ လုံး၊ ပဒေသာမိုင်း ၃ လုံးတို့ ဖောက်ခွဲတိုက်ခိုက်ခဲ့ရာ ၃ စီးမြောက်ကို ထိမှန်ခဲ့ပြီး ဘတ်စုံလမ်း တစ်နေရာတွင် ထိုးရပ်သွားပြီး စစ်ကောင်စီ တပ်သားများ ထိခိုက်သေဆုံးမှု အခြေအနေကို အတည်ပြုနေဆဲဖြစ်ကြောင်း သိရှိရသည်။

အဆိုပါ တိုက်ခိုက်မှုကို North Western People Defence Force – N.W.P.D.F (အနောက်မြောက်ဒေသ ပြည်သူ့ကာကွယ်ရေးတပ်)၊ ယင်းမာပင်ခရိုင် အမှတ် (၉) တပ်ရင်း၏ Idiots Columnနှင့် မုံရွာခရိုင်တပ်ရင်း ၁၁ ( South monywa ) ၏ တပ်ခွဲ (၂) – Youth Vigor Revlution Force၊ မုံရွာမြို့နယ် (ပကဖ) တိုက်နယ် ၄ တိုက်ခိုက်ရေးအဖွဲ့ (Royal God People Defence Force)၊ Black tiger Attackes force ( LPDF) တို့ ပူပေါင်း လုပ်ဆောင်ခဲ့ကြောင်း သိရသည်။

ထို့ပြင် ယင်းမာပင်မြို့နယ်တွင်လည်း ဖေဖော်ဝါရီလ ၂၆ ရက်နေ့ နံနက် ၇ နာရီ ၄၀ မိနစ်ခန့်ကလည်း ဝမ်ပေါင်ကုမ္ပဏီ နှင့် ယမ်စီကုမ္ပဏီမှ ကြေးနီ တင်ဆောင်လာသော ကားအစီး ၃၀ ကျော်ခန့်ကို ရဲတပ်ရင်း ၂၈ နှင့် မြောက်ယမားတံတား အကြားရှိ မုံရွာ-ပုသိမ် လမ်းပိုင်းတွင် မိုင်းဆွဲ တိုကခိုက်ခဲ့ရာ ကား ၁ စီး ထိမှန်ပြီး ယာဉ်မောင်း ၁ ဦး မိုင်းစ ထိမှန်ခဲ့ကြောင်း သိရှိရသည်။

တိုက်ခိုက်မှု အတွင်း မိုင်းစ ထိမှန်ခဲ့သော ယာဉ်မောင်း ၁ ဦးကို ကင်းပုန်းဝပ်နေသော အကြမ်းဖက် စစ်ကောင်စီ တပ်သားများက ပြည်သူပိုင် ကား ၁ စီးကို ချောဆွဲ၍ ဆေးရုံသို့ အရေးပေါ် ပို့ဆောင်ခဲ့ကြောင်း၊ မိုင်းပေါက်ကွဲပြီး အကြမ်းဖင် စစ်ကောင်စီ တပ်သားများက လက်နက်ကြီး၊ လက်နက်ငယ်များဖြင့် ရမ်းသမ်း ပစ်ခတ်မှုများ လုပ်ဆောင်ခဲ့ကြောင်း သိရသည်။

အဆိုပါ တိုက်ခိုက်မှုကို ယင်းမာပင်မြို့နယ် ၊ တိုက်နယ် ၂ ပကဖ မှ တော်လှန်ရေး ရဲဘော်များက ပြုလုပ်ခဲ့ခြင်းဖြစ်ပြီး အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရှိရသည်။