ငလျင်ကြောင့် သေဆုံးသူ ၃၃၅၄ ဦးရှိလာပြီး တော်လှန်ရေးတပ်စိုးမိုးသော ဒေသမှ ငလျင်ဘေးသင့် ပြည်သူများထံသို့ အကူအညီပေးရေးအဖွဲ့များ သွားရောက်ခွင့် စစ်တပ်က ပိတ်ပင်ထား
မြန်မာနိုင်ငံတွင် မတ်လ ၂၈ ရက်နေ့ လှုပ်ခတ်ခဲ့သော ငလျင်ကြောင့် သေဆုံးသူ ၃၃၅၄ ဦးရှိလာကြောင်း အကြမ်း ဖက် စစ်ကောင်စီ၏ သတင်းထုတ်ပြန်ချက်အရ သိရှိရသည်။
ငလျင်ကြောင့် မြန်မာနိုင်ငံအလယ်ပိုင်းဒေသများအပါအဝင် ငလျင်လှုပ်ခတ်သော ဒေသများအားလုံးတွင် သေဆုံးသူ စုစုပေါင်း ၃၃၅၄ ဦးရှိလာကြောင်း၊ မန္တလေးတိုင်းတွင် သေဆုံးသူ စုစုပေါင်း သေဆုံးသူ ၂၁၂၂ ဦး၊ နေပြည် တော် ကောင်စီနယ်မြေတွင် သေ ဆုံးသူ စုစုပေါင်း ၆၁၅ ဦး၊ စစ်ကိုင်းတိုင်းတွင် သေဆုံးသူ စုစုပေါင်း ၅၀၇ ဦး၊ ပဲခူးတိုင်းတွင်သေဆုံးသူ ၄၄ ဦး၊ ရှမ်းပြည်နယ်တွင် စုစုပေါင်းသေဆုံးသူ ၆၆ ဦး ရှိကြောင်း သိရှိရသည်။
ငလျင်ကြောင့် စုစုပေါင်းဒဏ်ရာရရှိသူ ၄၅၀၈ ဦး နှင့် ပျောက်ဆုံးနေသူ ၂၂၀ ဦးရှိကြောင်း သိရှိရသည်။
စစ်ကောင်စီ၏ တားဆီးမှုများ အပါဝင် လုံခြုံရေးစိုးရိမ်ရမှုများကြောင့် စစ်ကိုင်းနှင့် ပဲခူးတိုင်းအတွင်းရှိ ငလျင်ဘေးသင့်ပြည်သူများမှာ လူသားချင်းစာနာထောက်ထားမှု အကူအညီများ ရရှိခြင်းမရှိကြောင်း၊ ဒေသ ပရဟိတ နှင့် အလှူရှင်များသည် စစ်ကောင်စီထိန်းချုပ်ထားသော စစ်ကိုင်းမြို့ပေါ်တွင်သာ အကူအညီများ လာရောက် ပေး အပ်နေကြပြီး စစ်ကိုင်းမြို့ ပြင်ပ တော် လှန်ရေးတပ်များ ထိန်းချုပ်ထားသော ဒေသများသို့ သွားရောက် လှူဒါန်းရန် စစ်တပ်၏ တားဆီးမှုများ ခံနေရကြောင်း သိရှိရသည်။
အလားတူ ပဲခူးတိုင်းအတွင်းရှိ ထန်းတပင်၊ အုတ်တွင်းနှင့် တောင်ငူမြို့နယ်အတွင်းရှိ ငလျင်ဘေးသင့်ဒေသများသို့လည်း လူသားချင်းစာနာထောက်ထားမှု အကူအညီပေးနိုင်ရန်မှာ စစ်တပ်၏ တားဆီးမှုများ ခံနေရကြောင်း သိရှိရသည်။
“ဒီတောင်ငူမြို့ပေါ်က အကျော်ဆိုရင် ကျနော်တို့ကို အသွားမခံဘူး။ ရိက္ခာ၊ ဆန်၊ ဆီ၊ ဆားပါရင် သွားခွင့်မပေးဘူး။ မြို့ပေါ်မှာပဲ အလှူပစ္စည်းတွေ ထားခဲ့ရမယ်လို့ ပြောတယ်” ဟု ထန်းတပင်ရှိ ငလျင်ဘေးသင့်ပြည်သူများ ကူညေ ရန်သွားရောက်ခဲ့သည့် ပုဂ္ဂလိက အလှူရှင်အဖွဲ့တစ်ခုက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဓာတ်ပုံ- အမရပူရမြို့နယ်၊ ဘုံးအိုးကျေးရွာတွင် ငလျင်ဒဏ်ကြောင့် သေဆုံးသွားခဲ့ရသည့် ပြည်သူများ။
