စစ်ကိုင်းငလျင်ကြီး လှုပ်ခတ်ပြီးနောက် စစ်ကောင်စီက လေကြောင်းတိုက်ခိုက်မှု ၇၂ ကြိမ်လုပ်ဆောင်ခဲ့ကာ ပြည်သူ ၁၀၅ ဦး သေဆုံး
စစ်ကိုင်းငလျင်ကြီး လှုပ်ခတ်ပြီးနောက် စစ်ကောင်စီက လေကြောင်းတိုက်ခိုက်မှု ၇၂ ကြိမ်လုပ်ဆောင်ခဲ့ပြီး ပြည်သူ ၁၀၅ ဦး သေဆုံးခဲ့ကြောင်း အမျိုးသားညီညွတ်ရေးအစိုးရ-NUG က ယမန်နေ့ သတင်းစာရှင်းလင်းပွဲတွင် သတင်းထုတ်ပြန်သည်။
မတ်လ ၂၈ ရက်နေ့ အင်အားပြင်း စစ်ကိုင်းငလျင်ကြီး လှုပ်ခတ်ပြီးချိန်မှစတင်၍ ဧပြီလ ၁၁ ရက်နေ့အတွင်း အကြမ်းဖက်စစ်တပ်က စစ်ကိုင်း၊ မကွေး၊ ပဲခူး၊ မန္တလေး၊ ကရင်နီ၊ ရှမ်း၊ ချင်း၊ ဧရာဝတီ၊ ကချင်၊ ကရင် ၊ မွန်နှင့် ရခိုင် တို့တွင် လေကြောင်းတိုက်ခိုက်မှုနှင့် လက်နက်ကြီး ပစ်ခတ်မှုများ ဆက်လက်ကျူးလွန်ခဲ့ကြောင်း ၊ စစ်ကောင်စီ၏ လေကြောင်းတိုက်ခိုက်မှု ၇၂ ကြိမ်အတွင်း ပြည်သူ ၁၀၅ ဦး သေဆုံးခဲ့ကာ ၁၀၂ ဦး ထိခိုက်ဒဏ်ရာ ရရှိခဲ့ကြောင်း သိရှိရသည်။
အကြမ်းဖက်စစ်တပ်၏ လေကြောင်းတိုက်ခိုက်မှုကြောင့် ပြည်သူ့ နေအိမ် ၇၄ လုံး ပျက်စီးခဲ့ပြီး စာသင်ကျောင်း ၃ ကျောင်းလည်း ပျက်စီးခဲ့ကြောင်း၊ ထို့ပြင် လက်နက်ကြီး ပစ်ခတ်မှု အကြိမ် ၃၀ လုပ်ဆောင်ခဲ့ပြီး လက်နက်ကြီးကြောင့် ပြည်သူ ၆ ဦး သေဆုံးကာ ၃၀ ဦး ထိခိုက်ဒဏ်ရာရရှိခဲ့ကြောင်း၊ လက်နက်ကြီး ဒဏ်ကြောင့် နေအိမ် ၂၁ လုံးပျက်စီးပြီး ဘာသာရေးအဆောက်အအုံ ၂ လုံး ပျက်စီးခဲ့ကြောင်း သိရှိရသည်။
“NUG အစိုးရအနေနဲ့ လူသားစာနာအကူအညီတွေ ထိထိရောက်ရောက်ပေးနိုင်ဖို့ ခုခံကာကွယ်စစ်က လွဲပြီး ထိုးစစ်အားလုံး ခေတ္တရပ်တန့်မှုကို မတ်လ ၃၀ ရက်နေ့မှာ စတင်မယ်ဆိုတာ မတ်လ ၂၉ ရက်နေ့ကတည်းက ထုတ်ပြန်ကြေညာခဲ့ပါတယ်။ အကြမ်းဖက်စစ်တပ်က အပစ်အခတ်ရပ်စဲရေးကို ဧပြီ ၂ ရက်နေ့မှာ ကြေညာခဲ့ပေမယ့် တကယ့်လက်တွေ့မှာ ပြည်သူတွေကို ဦးတည်ပြီး လေကြောင်းကနေ တိုက်ခိုက်မှု၊ လက်နက်ကြီးတိုက်ခိုက်မှု၊ စစ်ကြောင်းထိုး ဝင်ရောက်ပြီး ပြည်သူပိုင်ပစ္စည်းဥစ္စာတွေ မီးရှို့ဖျက်ဆီးပြီး ယူဆောင်တာတွေကို ငလျင်ဘေးသင့်ဒေသက ပြည်သူတွေ အပါအဝင် နိုင်ငံဒေသအနှံ့တော်တော်များများမှာ ဆက်လက်ကျူးလွန်တာကိုခံနေရပါတယ်” ဟု NUG ဝန်ကြီး ဒေါက်တာဝင်းမြတ်အေးက ယမန်နေ့ သတင်းစာရှင်းလင်းပွဲတွင် ပြောကြားသည်။
ထို့ပြင် ငလျင်ဘေးအတွက် နိုင်ငံတကာက ထောက်ပံ့သည့် အကူအညီများသည် တကယ့်လက်တွေ့ မြေပြင်တွင် အလိုအပ်ဆုံးပြည်သူများထံ ထိရောက်သည့် ပံ့ပိုးမှုများ ရောက်ရှိရန် ဟန့်တားကန့်သတ်မှုများ ရှိနေပြီး နိုင်ငံ တကာ အကူအညီများသည် ပြည်သူများကို အကူအညီဖြစ်မည့်အစား လေကြောင်းတိုက်ခိုက်မှုအပါအဝင် ပြည်သူများကို အကြမ်းဖက်ပြန်လည်တိုက်ခိုက်မှုများအတွက် အထောက်အပံ့ဖြစ်သွားမည်ကို အလေးအနက် သတိ ထားပြီး တားဆီးရန် လိုကြောင်း ၎င်းက ဆက်လက်ပြောဆိုသည်။
ငလျင်ဘေးနှင့် ပတ်သက်၍လည်း NLD အစိုးရလက်ထက်တွင်မှု သဘာဝဘေးနှင့် ပတ်သက်၍ ကြိုတင်စီစဉ်မှုများစွာဆောင် ရွက် ခဲ့ပြီး အမျိုးသားအဆင့် ငလျင်ဘေးအန္တရာယ်ကြိုတင်ပြင်ဆင်ရေးနှင့် တုံ့ပြန်ရေးစီမံချက်များ၊ မြန်မာနိုင်ငံ ဘေးအန္တရာယ်ကြောင့် ထိခိုက်ဆုံးရှုံးနိုင်ခြေလျော့ချရေးစီမံချက်များကို ၂၀၁၉ ခုနှစ်နှင့် ၂၀၁၇ ခုနှစ်များကတည်းက ရေးဆွဲ အကောင်အထည် ဖော်ခဲ့ကြောင်း၊ သဘာဝဘေးများ ကြုံလာချိန်တွင်လည်း အရေးပေါ်တုံ့ပြန်ဆောင်ရွက်နိုင်ရေးအတွက် သဘာဝဘေးအန္တရာယ်ဆိုင်ရာစီမံခန့်ခွဲမှုရန်ပုံငွေကိုလည်း သီးသန့်ထားရှိဆောင်ရွက်ခဲ့သော်လည်း အဆိုပါ ရန်ပုံငွေများကို အကြမ်းဖက်စစ်ကောင်စီက ၂၀၂၂ ခုနှစ်တုန်းအတွင်း အသုံးပြုခဲ့၍ ယခုလက်တွေ့ဖြစ်လာချိန်တွင် လူ့အသက်ပေါင်းများစွာကို ကြိုတင်ပြင်ဆင်မှုများ ပျောက် ကွယ်ခဲ့ရခြင်းဖြစ်ကြောင်း စစ်ကိုင်းငလျင်ကြီး တုံ့ပြန်ရေးလုပ်ငန်းစဉ်ဆိုင်ရာ ယမန်နေ့ သတင်းစာ ရှင်းလင်းပွဲတွင် ဒေါက်တာဝင်းမြတ်အေးက ပြောဆိုသည်။
လက်ရှိ အမျိုးသားညီညွတ်ရေးအစိုးရအနေဖြင့် ငလျင်ဘေးအတွက် အမေရိကန်ဒေါ်လာ တစ်မီလီယံနှင့် ညီမျှသည့် ကျပ်ငွေရန်ပုံငွေကို မတည်ပြီး စတင်ထောက်ပံ့ခဲ့ကြောင်း၊ ငလျင်နှင့် နောက်ဆက်တွဲ ငလျင်တွေကြောင့် ထိခိုက်ပျက်စီးဆုံးရှုံးမှုများကို မျက်ခြည်မပြတ်စောင့်ကြည့်မှတ်တမ်းတင်ပြီး အချိန်နှင့် တပြေးညီထုတ်ပြန်ချက်များ ဆောင်ရွက်ခဲ့ကြောင်း၊ အရေးပေါ် အကူ အညီများကိုလည်း NUG စိုးမိုးနယ်မြေ စစ်ကောင်စီစိုးမိုးနယ်မြေဟူ၍ မခွဲခြားဘဲ အမြန်ဆုံးရောက်ရှိရေး ချိတ်ဆက်ဆောင်ရွက်ခဲ့ပြီး ဆက်လက်ဆောင်ရွက်နေဆဲဖြစ်ကြောင်း NUG က ထုတ်ပြန်ပြောဆိုထားသည်။
ဓာတ်ပုံ- ဧပြီလ ၉ ရက်နေ့ ဝန်းသိုမြို့နယ် လေကြောင်းတိုက်ခိုက်မှုအတွင် သေဆုံးခဲ့ကြသည့် ကလေးငယ်များနှင့် ပြည်သူများ။
