ဒီမိုကရေစီအကျိုးပြုတပ်မတော် DKBA စစ်ရေးချုပ်၏ ဝေါလေရှိ နေအိမ်ကို စစ်တပ်က ဒရုန်းဖြင့် ဗုံးကျဲချခဲ့ရာ နေအိမ်ပျက်စီးသွားပြီး စစ်တပ်က ၎င်းတို့ဘက်မလိုက်သော လက်နက်ကိုင်အဖွဲ့မှန်သမျှကို ရန်သူဟု သတ်မှတ်တိုက်ခိုက်လာသည့်သဘောဖြစ်ကြောင်း ကရင်စစ်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဩဂုတ်လ ၃ ရက်နေ့ မြ၀တီမြို့နယ်၊ ဝေါလေရှိ DKBA စစ်ရေးချုပ် ဗိုလ်မှူးကြီး စောစိန်ဝင်း၏ နေအိမ်ကို စစ်တပ်က ကာမိကာဇေ အသေခံဒရုန်းများဖြင့် ဗုံးကျဲချခဲ့ကြောင်း၊ ယင်းသို့ ဗုံးကျဲတိုက်ခိုက်မှုကြောင့် နေအိမ်နှင့် ကားဂိုဒေါင်ပျက်စီးသွားခဲ့ပြီး လူထိခိုက်မှုမရှိကြောင်း သိရှိရသည်။။
“ဗိုလ်စိန်ဝင်း က အဲဒီအိမ်မှာ မနေတာ ကြာပါပြီ။ စစ်တပ်က အဲဒီလို တိုက်ခိုက်တော့ DKBA ဘက်မှာလည်း အတိုင်းအတာတစ်ခုအထိတော့ တပ်လှန့်တာတွေ ဖြစ်တယ်။ စစ်တပ်ရဲ့သဘောကတော့ သူ့ဘက်က မလိုက်ရင် ဘယ်အဖွဲ့မဆို ရန်သူအဖြစ် သတ် မှတ်ပြီး တိုက်ခိုက်လာတဲ့သဘောလို့ ပြောလို့ရတယ်။ ငါနဲ့မတူ ငါ့ရန်သူဆိုတာမျိုး စစ်တပ်က သဘောထားလာတာ” ဟု ကရင် စစ်ရေး သတင်းရင်းမြစ်က ပြောဆိုသည်။
စစ်တပ်က DKBA ကရင်လက်နက်ကိုင်အဖွဲ့၏ ခေါင်းဆောင်၏ နေအိမ်ကို ဦးတည်တိုက်ခိုက်လာခြင်းမှာ ပထမဆုံးအကြိမ်ဖြစ်ပြီး ယင်းနေရာတွင် DKBA စစ်ရေးချုပ်၏ နေအိမ်မှန်း သိလျက်နှင့် ရည်ရွယ်ချက်ရှိရှိ တိုက်ခိုက်ခြင်းဟု ဆိုနိုင်ကြောင်း ကရင်စစ်ရေးသတင်းရင်းမြစ်က ပြောဆိုသည်။
“DKBA ပင်မတပ်ရဲ့ သဘောထားကတော့ တရားဝင် သဲသဲကွဲကွဲ ထုတ်ပြန်ကြေညာတာမျိုးမရှိပေမယ့် စစ်တပ်ကို မကူညီဘူး။ DKBA စိုးမိုးထားတဲ့ ကျောက်ခတ်လိုနေရာမှာလည်း လုံခြုံရေးအရ စိုးရိမ်စရာ ဖြစ်လာပြီ။ စစ်တပ်က နယ်စပ်စခန်းတွေဆုံးရှုံးနေရတော့ ရှုံးမဲမဲပြီး အကုန်ရမ်းလာတာ” ဟု ကရင်စစ်ရေး သတင်းရင်းမြစ်က ဆက်လက်ပြောဆိုသည်။
လတ်တလော စစ်ကောင်စီ၏ ဝေါလေ ဗျူဟာကုန်းစစ်တပ်စခန်းကို KNLA အပါအဝင် တော်လှန်ရေးတပ်များက ပိတ်ဆို့ တိုက်ခိုက်နေပြီး စစ်ကောင်စီက မြေပြင်မှ စစ်ကူမပေးနိုင်တော့ကြောင်း၊ လေယာဉ်ဖြင့် ရိက္ခာနှင့် လက်နက်ခဲယမ်းများ ကျဲချရာတွင်လည်း KNLA ပူးပေါင်းတပ်များက ရရှိနေကြောင်း သိရှိရသည်။
ထိုင်း-မြန်မာ နယ်စပ်အနီးမှ စစ်ကောင်စီ၏ ပူးလူးတူ၊ ခလယ့်ဒေး၊ တခေါဘီခွီး၊ မော်ဖားသူးစခန်း ၊တာလယ်စခန်း များ၊ မယ်လ၊ ဘလက်ဒို၊ မော်ခီး၊ ဘုရင့်နောင်စခန်းကုန်း၊ ကနဲလေးစခန်းနှင့် ရွှေအေးမြိုင်တပ်စခန်း၊ ဇွန်လ ၃ ရက်နေ့တွင် သေ့ဘောဘိုးစခန်း၊ ဇွန်လ ၂၂ ရက်နေ့တွင် ထီးကပလယ်စခန်း၊ ဇူလိုင်လ ၁၂ ရက်နေ့တွင် ဥကရစ်ထစခန်းတို့ကို KNLA ပူးပေါင်းတပ်များက တိုက်ခိုက်သိမ်းပိုက်ခဲ့သည်။
