စစ်တပ်၏ ရွေးကောက်ပွဲကို ဝမ်းမြောက်ဝမ်းသာနှင့် ပူးပေါင်းဆောင်ရွက်မည်ဟု မလေးရှားနိုင်ငံခြားရေးဝန်ကြီးက မပြောဆိုခဲ့ဘဲ စစ်တပ်က လိမ်လည် ဝါဒဖြန့်ခဲ့
ရန်ကုန်၊ အောက်တိုဘာ ၁၁
မလေးရှားနိုင်ငံခြားရေးဝန်ကြီးဌာနက မလေးရှားနိုင်ငံခြားရေးဝန်ကြီး မိုဟာမက် ဟက်ဆန်၏ နေပြည်တော်ခရီးစဉ်တွင် ပြောဆိုခဲ့မှုများနှင့်ပတ်သက်၍ အသေးစိတ် သတင်းထုတ်ပြန်လိုက်သဖြင့် မြန်မာစစ်တပ်၏ လိမ်လည် သတင်း ထုတ်ပြန်မှု ထင်ရှားပေါ်ပေါက်သွားသည်။
မြန်မာစစ်တပ်၏ ရွေးကောက်ပွဲ ကျင်းပရန် ပြင်ဆင်မှုကို ဝမ်းမြောက်ဝမ်းသာဖြစ်ပြီး ပူးပေါင်းဆောင်ရွက်မည်ဟု မလေးရှားနိုင်ငံခြားရေးဝန်ကြီး မိုဟာမက် ဟက်ဆန်က မပြောခဲ့ဘဲ စစ်တပ်က လိမ်လည်ထုတ်ပြန်ခဲ့မှုမှာ မလေးရှားနိုင်ငံခြားရေးဝန်ကြီး ဌာန၏ ယမန်နေ့ သတင်းထုတ်ပြန်မှုကြောင့် အဖြစ်မှန် ပေါ်ပေါက်လာခြင်းဖြစ်သည်။
မလေးရှားနိုင်ငံခြားရေး ဝန်ကြီး မိုဟာမက် ဟက်ဆန်သည် အောက်တိုဘာလ ၉ ရက်နေ့ နေ့ချင်းပြန် နေပြည်တော်သို့ သွား ရောက်ခဲ့ပြီး ယင်းသို့ လာရောက်အပေါ် စစ်တပ်က လိမလည်သတင်းထုတ်ပြန်ခဲ့ခြင်းဖြစ်သည်။
စစ်တပ်၏ လိမ်လည် သတင်းထုတ်ပြန်မှုတွင် မလေးရှားနိုင်ငံခြားရေးဝန်ကြီးက မြန်မာနိုင်ငံ၏ ပါတီစုံဒီမိုကရေစီအထွေထွေရွေးကောက်ပွဲကျင်းပပြုလုပ်ရန် ပြင်ဆင်နေမှုများအားတွေ့ရသည့်အတွက် ဝမ်းမြောက်ဝမ်းသာဖြစ် ကြောင်း၊ အာဆီယံအနေဖြင့် မြန်မာနိုင်ငံ၏ ကြိုးပမ်းဆောင်ရွက်မှုများကို အကောင်းဆုံးဖြစ်အောင်ပူးပေါင်း ဆောင်ရွက်ပေးသွားမည်ဖြစ်ကြောင်း၊ ရွေးကောက်ပွဲလေ့လာစောင့်ကြည့်ရေးအဖွဲ့များကိုလည်း စေလွှတ်ပေးသွားမည်ဟု လိမ်လည် ဖော်ပြခဲ့သည်။
မလေးရှားနိုင်ငံခြားရေးဝန်ကြီးဌာန၏ယမန်နေ့ သတင်းထုတ်ပြန်ချက်တွင် ရွေး ကောက်ပွဲသည် ဒီမိုကရေစီအတွက် အဓိက အရေးကြီးသော အစိတ်အပိုင်းဖြစ်ကြောင်း၊ ရွေးကောက်ပွဲကို လွတ်လပ် မျှတ ပွင့်လင်းမြင်သာ ယုံကြည်ရသည့် လုပ်ငန်းစဉ်များဖြင့် ဆောင်ရွက်ရမည်ဖြစ်ကြောင်း၊ မြန်မာနိုင်ငံ၏ ရွေးကောက်ပွဲမှာ နိုင်ငံရေးပါတီ အားလုံးပါဝင်ပြီး နိုင်ငံသားအားလုံးပါဝင်ဆောင်ရွက်မှုဖြင့်သာ ကျင်းပသင့်ကြောင်း မလေးရှားနိုင်ငံခြားရေးဝန်ကြီးက ထုတ်ဖော်ပြောဆိုခဲ့သည်။
ထို့ပြင် ရွေးကောက်ပွဲစောင့်ကြည့်ရေး အဖွဲ့များ စေလွှတ်ရန် စစ်တပ်က အာဆီယံနိုင်ငံများသို့ ဖိတ်ကြားမှုနှင့်ပတ်သက်၍ မှတ်သားထားပြီး ယင်းအရေးကိစ္စကို လာမည့် ၄၇ ကြိမ်မြောက် အာဆီယံ အစည်းအဝေးတွင် ဆွေးနွေး ဆုံးဖြတ်မည်ဖြစ်ကြောင်း၊ မလေးရှားနိုင်ငံအတွက်မူ ရွေးကောက်ပွဲလေ့လာစောင့်ကြည့်ရေး ဖိတ်ကြားမှုကို မလေးရှားရွေးကောက်ပွဲကော်မရှင်သို့ အသိပေးလိုက်ပြီဖြစ် ကြောင်း မလေးရှားနိုင်ငံခြားရေးဝန်ကြီးဌာနက သတင်းထုတ်ပြန်ခဲ့သည်။
ယင်းအပြင် မလေးရှားနိုင်ငံခြားရေးဝန်ကြီးက မင်းအောင်လှိုင် အပါအဝင် စစ်တပ်ခေါင်း ဆောင်များနှင့် တွေ့ဆုံစဉ် အာဆီယံဘုံသဘောတူညီချက် ၅ ချက် ကို အကောင်အထည်ဖော်ရန်၊ အကြမ်းဖက်မှုများ ရပ်တန့်ရန်၊ လူသားချင်းစာနာထောက်ထားမှုအကူအညီများ ခွင့်ပြုပေးရန်၊ အားလုံးပါဝင်သော တွေ့ဆုံဆွေးနွေးမှု လုပ်ရန် ထပ်မံ အလေးပေးပြောဆိုသည်။
ထို့ပြင် အရပ်သားများနှင့် အရပ်ဘက်အဆောက်အအုံများအပေါ် အကြမ်းဖက်မှုများကို ရပ်တန့်ရန် မလေးရှားနိုင်ငံခြားရေး ဝန်ကြီးက မြန်မာစစ်တပ်ခေါင်း ဆောင်များကို အလေးပေးပြောဆိုခဲ့သည်။
