ပဲခူးတိုင်း၊ နတ်တလင်းမြို့ နယ်တွင် ကြံ့ဖွတ်ပါတီ မဲဆွယ် ဆိုင်းဘုတ်များကို တစ်ပြိုင်နက်တည်း မီးရှို့ရှင်းလင်းပြီး စစ်တပ်ရွေးကောက်ပွဲ ကို လက်မခံကြောင်း ပြသခဲ့ကြောင်း ဒေသတွင်း တော်လှန်ရေး သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၆ ရက်နေ့ ညပိုင်း နတ်တလင်းမြို့ အနောက်ခြမ်းရှိ ထိပ်ပိတ်ရွာ ၊ ကွက်ကြီးရွာ ၊ ရွှေကြာပင်ရွာ ၊ အောင်ပင်သာရွာ ၊ လှပခြင်းရွာ ၊ ပွတ်စုရွာ ၊ နွယ်ခွေရွာ ၊ လဲတောရွာ ၊ တောင်ယာတောရွာ ၊ ရေမွေးရွာ ၊ ချောက်ခမ်းရွာ ၊ ကုလားတက်တွင်းရွာ ၊ တောင်ရေကန်ရွာ ၊ အောင်ချမ်းသာရွာ ၊ ချင်းကုန်းကံရွာ ၊ ပွဲသာရွာ ၊ ကြာကံရွာ ၊ လှေကြပ်ကုန်းရွာ ၊ ဂွေးကြီးရွာ နှင့် ဂွေးလေးရွာ တို့ရှိ ကြံ့ဖွတ်ပါတီ မဲဆွယ် ဆိုင်းဘုတ်များကို ပြည်သူများက တစ်ပြိုင်နက်တည်း မီးရှို့ဖျက်ဆီးခဲ့ခြင်းဖြစ်ကြောင်း သိရသည်။
ထိုသို့ မီးရှို့ဖျက်ဆီးမှု လုပ်ဆောင်သွားသော ပြည်သူများသည် ညတွင်းချင်း ထွက်ပြေးတိမ်းရှောင်သွားကြောင်း၊ ယင်းသို့ မီးရှို့ဖျက်ဆီးမှု ဖြစ်ပွားပြီးနောက် တာပွန်ရဲစခန်းမှ စစ်သားနှင့် ရဲများ ရောက်ရှိလာပြီး ကျေးရွာပေါင်းစုံမှ လူငယ် ၃၀ ခန့်ကို ဖမ်းဆီးသွားကြောင်း သိရှိရသည်။
“ကြံ့ဖွတ်ပါတီ ဆိုင်းဘုတ်တွေ မီးရှို့ခံရတဲ့ကျေးရွာတွေက နတ်တလင်းမြို့ အနောက်ဘက် ဧရာဝတီမြစ်ကို သွားတဲ့ရွာတွေပါ။ နတ်တလင်းမြို့ အရှေ့ဘက် ရိုးမဘက်က ဆင်းလာတဲ့ရွာတွေက တော်လှန်ရေး တပ်ဖွဲ့တွေ ခြိမ်းခြောက်ထားနိုင်တဲ့ အခြေအနေပါ။ အခုက စစ်ခွေးတွေ ထိန်းချုပ်ထားတဲ့ မြို့အနောက်ဘက်ရွာတွေက ရွေးကာက်ပွဲကို ဆန့်ကျင်တုံ့ပြန်တာကို ပြသတဲ့ ပုံစံပါ။ ကြံ့ဖွတ်ပါတီ ဆိုင်းဘုတ်တွေ မီးရှို့ဖျက်ဆီးသွားတဲ့သူတွေက လွတ်မြောက်သွားပါပြီ စစ်ခွေးတွေကတော့ အခုသူတို့ စိတ်ထဲမှာ ဖျက်ဆီးတယ်ထင်တဲ့ သူတွေကို လိုက်ဖမ်းပြီး တာပွန်ရဲစခန်းထဲမှာ စစ်ခွေးမေးမြန်းနေတယ်လို့ သိရတယ်” ဟု ဒေသတွင်း တော်လှန်ရေး သတင်းရင်းမြစ်က ပြောဆိုသည်။
အလားတူ နိုဝင်ဘာလ ၂၇ ရက်နေ့ ည ၉ နာရီခန့်တွင် နတ်တလင်းမြို့နယ်၊ ဒမငယ်ရွာရှိ စစ်တပ်၏ သစ်ချိုခြံ (အထွက်တိုးစခန်း) ၊ ဒမငယ်ရဲစခန်းနှင့် တောင်ညိုကွက်သစ်ရဲစခန်းတို့ကို တော်လှန်ရေး တပ်ဖွဲ့များက တပြိုင်တည်း ဝင်ရောက် တိုက်ခိုက်ခဲ့ပြီး အကြမ်းဖက် စစ်သားနှင့် ပျူစောထီး အားလုံး ဆုတ်ခွာထွက်ပြေးသွားသောကြောင့် တော်လှန်ရေး ရဲဘော်များကို ရဲစခန်းအပါအဝင် စစ်တပ် တပ်စွဲထားသောနေရာများကို မီးရှို့ရှင်းလင်းခဲ့ကြောင်း သိရှိရသည်။
