တရုတ်နှင့် မြန်မာစစ်တပ်တို့ ပူးပေါင်းလုပ်ဆောင်မည့် မူဆယ်-မန္တလေး ရထားလမ်းသစ် ဖောက် လုပ်ရေး စီမံကိန်းကော်မတီကို အဖွဲ့ဝင် ၁၉ ဦး ဖြင့် မင်းအောင်လှိုင်က ဖွဲ့စည်းပြီး မြထွန်းဦးကို ဥက္ကဋ္ဌ တာဝန်ပေး

ရန်ကုန်၊ နိုဝင်ဘာ ၃၀

တရုတ်နိုင်ငံနှင့် မြန်မာစစ်တပ်တို့ ပူးပေါင်းလုပ်ဆောင်မည့် မူဆယ်-မန္တလေး ရထားလမ်းသစ် ဖောက် လုပ်ရေး နိုင်ငံတော်အဆင့် စီမံကိန်း ဦးဆောင်ကော်မတီကို အဖွဲ့ဝင် ၁၉ ဦးဖြင့် မင်းအောင်လှိုင်က ဖွဲ့စည်းထားကြောင်း စစ်တပ်က ထုတ်ပြန်ထားသော ပြန်တမ်းများအရ သိရှိရသည်။

အကြမ်းဖက်စစ်တပ်က မူဆယ်-မန္တလေးရထားလမသစ်ဖောက်လုပ်ရေး စီမံကိန်း အကောင် အထည်ဖော်ဆောင်ရွက်နိုင်ရေးအတွက် နိုင်ငံတော် အဆင့် စီမံကိန်း အကောင်အထည်ဖော်ဆောင်ရွက်ရေး ဦးဆောင်ကော်မတီကို ဩဂုတ်လ ၃၀ ရက်နေ့တွင် ဖွဲ့စည်းခဲ့ပြီး ယင်းကော်မတီကို ပို့ဆောင်ရေးနှင့်ဆက်သွယ်ရေးဝန်ကြီး ဗိုလ်ချုပ်ကြီးဟောင်း မြထွန်းဦးက ဥက္ကဋ္ဌ အဖြစ် ဦးဆောင်ကာ အဖွဲ့ဝင် ၁၉ ဦးပါဝင်သည်။

အဆိုပါ ကော်မတီ၏ လုပ်ငန်းတာဝန်များတွင် မူဆယ်- မန္တလေး ရထား စီမံကိန်း အကောင် အထည်ဖော်ရန် အစိုးရအချင်းချင်း ညှိနှိုင်းဆောင်ရွက်နိုင်ရေး မူဘောင်ကို ရေးဆွဲ အတည်ပြုရန် ၊ ယင်းနောက် နှစ်နိုင်ငံအစိုးရများအကြား တွေ့ဆုံ ညှိနှိုင်းဆွေးနွေးမှုများ ပြုလုပ်နိုင်ရေး စီစဉ်ဆောင်ရွက်ခြင်းနှင့် မူဘောင်သဘောတူညီချက်ကို လက်မှတ်ရေးထိုးရန်၊ ဦးဆောင်ကော်မတီက စီမံကိန်းအတွက် လိုအပ်သော ကော် မတီများနှင့်အဖါဲ့များ ဖွဲ့စည်းပြီး ကြီးကြပ်ကွပ်ကဲရန်၊ စီမံကိန်းအတွက် ပြည်တွင်းပြည်ပ ရင်းနှီးမြှုပ်နှံမှုများ ဖိတ်ခေါ်ရန်နှင့် အတိုးနှုန်းသက်သော ဖွံ့ဖြိုးမှု ရန်ပုံငွေ ရရှိရေး ဆိုင်ရာ ပေါင်းစပ်ညှိနှိုင်းဆောင်ရွက်ရန် တို့ပါဝင်သည်။

အကြမ်းဖက် မင်းအောင်လှိုင်က မန္တလေး- မူဆယ် ရထားလမ်းစီမံကိန်းကို အမြန်အကောင် အထည် ဖော်ရန် ဆောင်ရွက်နေပြီး၊ ရုရှားနှင့်ပါ ကုန်သွယ်မှုများ လုပ်နိုင်မည့်အခြေအနေရှိကြောင်း ယခုနှစ် စက်တင်ဘာ ၁ ရက်နေ့ တရုတ်နိုင်ငံ၊ တီယန်ကျင်းမြို့၌ ပြုလုပ်သည့် မြန်မာ- တရုတ် စီးပွားရေးပူးပေါင်း ဆောင်ရွက်မှုမြှင့်တင်ရေးတွေ့ဆုံပွဲတွင် ထုတ်ဖော်ပြောဆိုခဲ့သည်။

မန္တလေး- မူဆယ် မီးရထားလမ်းမှာ တရုတ်က ဆောက်လုပ်နေသည့် ဘေကျင်း- ကူမင်း- ရွှေလီ အမြန်ရထားလမ်းနှင့် ချိတ်ဆက်မည်ဖြစ်ပြီး အဆိုပါ မီးရထားလမ်းမှာ ကျောက်ဖြူအထိ တိုးချဲ့၍ ကုန်းတွင်းပိတ် တရုတ်တောင်ပိုင်းပြည်နယ်များအတွက် မြန်မာနိုင်ငံမှတစ်ဆင့် ပင်လယ် ထွက်ပေါက်ရရှိစေမည့် အခွင့်အလမ်းဟု မင်းအောင်လှိုင်က ဆိုသည်။

မူဆယ်-မန္တလေးရထားလမ်းသစ်ဖောက်လုပ် ရေးစီမံကိန်းအတွက် ဒီဇိုင်းကို တရုတ်ဘက်က တင် ပြမှုများရှိခဲ့သော်လည်း စစ်တပ်က စိစစ်ရွေးချယ်နေဆဲဖြစ်ကြောင်း၊ မူဆယ်-မန္တလေးရထားလမ်းသစ် စီမံကိန်းမှာ ကီလိုမီတာ ၄၀ဝ ကျော်အရှည်ရှိပြီး အမေရိကန်ဒေါ်လာ ၁၀ ဘီလီယံဝန်းကျင် ကုန်ကျနိုင်မည်ဟု ကနဦး သုံးသပ်ထားသည်ဟု ကနဦးသုံးသပ်ချက်အစီရင်ခံစာများအရ သိရှိရသည်။

NLD အစိုးရလက်ထက် ၂၀၁၈ ခုနှစ် အောက်တိုဘာလတွင် ပို့ဆောင်ရေးနှင့်ဆက်သွယ်ရေးဝန်ကြီး ဌာန၊ မြန်မာ့မီးရထား ဌာနနှင့် တရုတ်နိုင်ငံ China Railway Eryuan Engineering Group Co. Limited (CREEC) ၊ China Railway Group Limited တို့သည် ရထားလမ်း ဖောက်လုပ်ရေး စီမံကိန်း ဖြစ်မြောက်နိုင်ခြေလေ့လာမှု ဆောင်ရွက်ရန် နားလည်မှု စာချွန်လွှာ MoU ရေးထိုးခဲ့ကြပြီး ယင်းအချိန်က လေ့လာမှု အစီအရင်ခံစာများကိုလည်း ယခုကောမတီ၏ လုပ်ငန်းဆောင်ရွက်မှုများတွင် ထည့်သွင်းစဉ်းစားလျက်ရှိကြောင်း သိရှိရသည်။

မူဆယ်-မန္တလေး စီမံကိန်းမှာ မူဆယ်မှ ရခိုင်ပြည်နယ်၊ ကျောက်ဖြူမြို့နယ်အထိ ရထားလမ်း ဖောက်လုပ်ရန် ရည်ရွယ်ထားပြီး လတ်တလော ရှမ်းမြောက်နှင့် ရခိုင်တွင် တိုက်ပွဲများ ဖြစ်ပွားခဲ့သည့်အတွက် မြေပြင်တွင် လက်တွေ့ကျသော စီမံကိန်းဆိုင်ရာ သဘာ၀ပတ်ဝန်းကျင်လေ့လာမှုများ ယာယီရပ်ဆိုင်းထားရကြောင်း သိရှိရသည်။