စစ်ကိုင်းတိုင်း၊ ရွှေဘိုမြို့ပေါ်မှ ထွက်လာသော အကြမ်းဖက် စစ်တပ် စစ်ကြောင်းကို ကြားဖြတ် တိုက်ခိုက်ရာ စစ်သား ၂၀ ကျော်သေဆုံးပြီး ရုပ်အလောင်းများနှင့် လက်နက်ခဲယမ်းများ သိမ်းဆည်းရရှိခဲ့ကြောင်း ရွှေဘိုမြို့နယ် လျှပ်စီးမုန်တိုင်း ပြောက်ကျားတပ်ဖွဲ့ ပလိုင်း ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၇ ရက်နေ့ မွန်းလွဲ ၃ နာရီ ၂၀ မိနစ်ခန့်အချိန် ရွှေဘိုမြို့ တောင်ဘက်မုဒ်ဘက်မှ ထွက်လာသော အင်အား ၈၀ ကျော်ပါ စစ်တပ် စစ်ကြောင်းကို တော်လှန်ရေး မဟာမိတ်တပ်ပေါင်းစုများက ကြားဖြတ် တိုက်ခိုက်ခဲ့ကြောင်း ၊ ထိုတိုက်ခိုက်မှုအတွင်း အကြမ်းဖက် စစ်သား ၂၀ ကျော်သေဆုံးခဲ့ပြီး လက်နက်ခဲယမ်းများလည်း ရရှိခဲ့ကြောင်း၊ ထို့ပြင် တိုက်ပွဲဖြစ်ပွားပြီးနောက် တော်လှန်ရေး ရဲဘော်များက နယ်မြေရှင်းလင်းရေး ပြုလုပ်စဉ် စစ်သား အလောင်းများလည်း သိမ်းဆည်းရရှိခဲ့ကြောင်း သိရှိရသည်။
“ရွှေဘိုမြို့အတွင်းကနေ တောင်ဘက်မုဒ်ကို ထွက်လာတဲ့ အင်အား ၈၀ ကျော်ပါ စစ်ခွေး စစ်ကြောင်းကို ကျနော်တို့ တော်လှန်ရေး မဟာမိတ်တပ်ပေါင်စုတွေက ကြားဖြတ် တိုက်ခိုက်ခဲ့တာပါ။ စစ်ခွေး၊ ရဲခွေးနဲ့ ပျူခွေး ၂၀ ကျော် သေဆုံးတယ်လို့ သိရတယ်။ နောက်ပြီး လက်နက်ခဲယမ်းတွေလည်း သိမ်းဆည်းရရှိပါတယ်” ဟု ရွှေဘိုမြို့နယ် လျှပ်စီးမုန်တိုင်း ပြောက်ကျားတပ်ဖွဲ့ ပလိုင်း ပကဖ မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို ရွှေဘိုမြို့နယ် လျှပ်စီးမုန်တိုင်းပြောက်ကျားတပ်ဖွဲ့ ပလိုင်းပကဖနှင့် တော်လှန်ရေး မဟာမိတ်ပူးပေါင်းတပ်ဖွဲ့များက လုပ်ဆောင်ခဲ့ခြင်းဖြစ်ကြောင်း၊ တိုက်ပွဲဖြစ်ပွားပြီးနောက် စစ်တပ် စစ်ကြောင်းသည် အထိနာပြီး ရွှေဘိုမြို့အတွင်းသို့ပြန်လည် ဆုတ်ခွာသွားကြောင်း သိရသည်။
