ရန်ကုန်၊မေ ၁၆

လွတ်မြောက်ဒေသတစ်ခုရှိ ဆေးရုံသစ်တွင် မေ့ဆေး အထူးကု ဆရာဝန်၊ ဆေးဝါးပညာရှင်များနှင့် သူနာပြု ဆရာ ဆရာမများ အရေးပေါ် လိုအပ်နေပြီး တာဝန်ထမ်းဆောင်လိုသည့် ပညာရှင်များကို ဖိတ်ခေါ်ကြောင်း နွေဦးကျန်းမာ အဖွဲ့မှ Operation Director ကိုထူးက ရန်ကုန်ခေတ်သစ် မီဒီယာသို့ ပြောဆိုသည်။

မေ့ဆေး လျှောက်ထားသူအရေအတွက်ကို ကန့်သတ်ထားခြင်း မရှိဘဲ မေ့ဆေး ဆရာဝန်ကို အနည်းဆုံး တစ်ဦးမှ စ၍ စိစစ်ပြီး လက်ခံသွားမည် ဖြစ်ကြောင်း၊ သူနာပြုများစွာ လိုအပ်နေပြီး ဆေးရုံသစ်ဖြစ်သည့် အတွက် ခွဲစိတ်ကုသမှုများလည်း ပြန်လည် စတင်နေပြီ ဖြစ်ကြောင်း၊ ဆေးဝါးပညာရှင်များကို အနည်းဆုံး ၂ ဦးမှ စ၍ လျှောက်လာသမျှ စိစစ်လက်ခံသွားမည် ဖြစ်ကြောင်း သိရှိရသည်။

“စိစစ်မှုတွေက နံပါတ် ၁ CDM ဖြစ်ရမယ်။ နံပါတ် ၂ သူတို့ရဲ့ ကိုယ်ရေးရာဇဝင်အကျဉ်းနဲ့ Background history ကိုတော့ ကျွန်တော်တို့ စိစစ်ဖို့ ရှိတယ်။ နောက်တစ်ခုအနေနဲ့ ကျွန်တော်တို့ အင်တာဗျူး အသေးလေးလုပ်သွားဖို့ရှိတယ်။ လုပ်ပြီးတော့‌ ရွေးချယ်ဖို့ အဆင်ပြေတယ် ကျွန်တော်တို့နဲ့ လက်တွဲပြီး လုပ်နိုင်တဲ့ ရဲဘော်ရဲဘက်တွေ စိတ်ချရတယ်ဆိုရင် ခေါ်ယူဖို့ ရှိပါတယ်”ဟု နွေဦးကျန်းမာမှ Operation Director ကိုထူးက ပြောဆိုသည်။

ကျန်းမာရေး နယ်ပယ်မှ ရဲဘော်ရဲဘက် စီနီယာ ဂျူနီယာများ အားလုံးကို နွေးထွေးစွာဖိတ်ခေါ်ကြောင်း၊ ပညာရှင်အနေအထားနှင့် လာရောက် ကြမည် ဖြစ်၍ ထိုက်တန်သည့် လုပ်ငန်းဆောင်တာများ၊ ထိုက်တန်သည့် အနေအထားမျိုးနှင့် ကြိုဆိုမည် ဖြစ်ကြောင်း သိရသည်။

“လူခေါ်တာက Urgent လိုနေတာ ဖြစ်တယ်။ အချိန်မရွေး ကျွန်တော်တို့ဆီ လာရောက်တယ်ဆိုရင် အခုခေါ်မှ မဟုတ်ဘူး။ ကျွန်တော်တို့ရဲ့ ကျန်းမာရေးအသိုင်းအဝိုင်းက လာရောက်ချင်တယ်ဆိုရင် အချိန်မရွေး ဆက်သွယ်လို့ရပါတယ်လို့ ပြောချင်ပါတယ်။ ကျွန်တော်တို့က ဝန်ထမ်းလိုမျိုး အနေနဲ့ ခေါ်တာ မဟုတ်ဘဲနဲ့ ကျွန်တော်တို့ရဲ့ တော်လှန်ရေး ရဲဘော်ရဲဘက်အနေနဲ့ ပညာရှင်အနေနဲ့ ဖိတ်ခေါ်တဲ့ သဘောမျိုးပါ”ဟု နွေဦးကျန်းမာ အဖွဲ့မှ Operation Director ကိုထူးက ဆက်လက် ပြောဆိုသည်။

တာဝန်ထမ်းဆောင်လိုသူများအနေနှင့် University of Medicine 2, Yangon student Committee ၏ Facebook Page ဖြစ်သည့်

https://www.facebook.com/universityofmedicine2.studentcommitte.ec?mibextid=ZbWKwL ကို ဆက်သွယ်နိုင်ကြောင်း သိရသည်။

The post လွတ်မြောက်ဒေသရှိ ဆေးရုံသစ်တွင် တာဝန်ထမ်းဆောင်ရန် မေ့ဆေး အထူးကု ဆရာဝန်၊ ဆေးဝါးပညာရှင်များနှင့် သူနာပြုများ ဖိတ်ခေါ် appeared first on Khit Thit Media.

ရန်ကုန်၊ မတ် ၁၆

စစ်ကောင်စီ ရဲ့ စစ်မှု ထမ်းဥပဒေကို အကောင်အထည်ဖော်ဆောင်ရွက်ပေးနေတဲ့ ရပ်ကွက် နဲ့ ကျေးရွာ အုပ်ချုပ်ရေးမှူးတွေ ထိထိရောက်ရောက်အရေးယူသွားမယ်လို့ မွန်ပြည်သစ်ပါတီ (စစ်အာဏာရှင်တိုက်ဖျက်ရေး) က မတ်လ ၁၅ ရက်နေ့မှာ ထုတ်ပြန်ကြေညာပါတယ်။

စစ်ကောင်စီ က မွန်ပြည်နယ် ၊ ကျိုက်မရော မြို့နယ် ရပ်/ကျေး အုပ်ချုပ်ရေးမှူးတွေ ကို စစ်မှုထမ်း ဥပဒေအရ လူ ၁၀၀ စုဆောင်းပေးဖို့ ညွန်ကြားထားတာနဲ့ပတ်သက်လို့ ခုလို ထုတ်ပြန်တာ ဖြစ်တယ်လို့ မွန်ပြည်သစ်ပါတီ AD က ကြေညာပါတယ်။

ကျိုက်မရော မြို့နယ် မှာ စစ်ကောင်စီ က မြို့နယ် အထွေထွေအုပ်ချုပ်ရေးဦးစီးဌာနက တဆင့် ကျေးရွာလူဦးရေ အနေအထားပေါ် မူတည်ပြီး လူ ၂ နှစ်ဦး ၁၀ ဦးအထိ စာရင်းကောက်ပေးဖို့ ရပ်/ကျေးအုပ်ချုပ်ရေးမှူးတွေကို ညွှန်ကြားထားတယ်လို့ မွန်ပြည်သစ်ပါတီ AD ရဲ့ ထုတ်ပြန်ချက် မှာ ဖော်ပြပါရှိပါတယ်။

ရပ်/ကျေးအုပ်ချုပ်ရေးမှူးတွေ အနေနဲ့ စစ်ကောင်စီ ညွှန်ကြားတဲ့ အတိုင်းလုပ်ဆောင်ပါက အရေးယူခံရမှာဖြစ်တယ်လို့ ထုတ်ပြန်ထားတာဖြစ်ပါတယ်။

စစ်ကောင်စီ ရဲ့ လူငယ်တွေကို အဓမ္မ စစ်မူထမ်းခိုင်းတဲ့ ဥပဒေကို မွန်ပြည်သစ်ပါတီ AD အနေနဲ့ ဆန့်ကျင်ကြောင်း ထုတ်ပြန်ချက်မှာရေးသားထားပါတယ်။

စစ်ကောင်စီ ခန့် မွန်ပြည်နယ် ဝန်ကြီးချုပ် ဦးအောင်ကြည်သိန်းကလည်း ချောင်းဆုံမြို့နယ် အတွင်း က လူ ၄၇ ဦး စစ်မှုထမ်းရမယ်လို့ ပြီး ခဲ့တဲ့ ဖေဖော်ဝါရီ လ ၁၇ ရက်နေ့ ကပြောကြားသွားတယ်လို့ သိရှိရပါတယ်။

ချောင်းဆုံ မြို့နယ်မှာ ကျေးရွာအုပ်စုပေါင်း ၄၇ အုပ်စုရှိပြီး ကျေးရွာအုပ်စု တစ်ခုကို တယောက်နှုန်း နဲ့ စစ်မှုထမ်းရမယ်လို့ စစ်ကောင်စီခန့် မွန်ပြည်နယ် ဝန်ကြီးချုပ် ကပြောကြားသွားတာဖြစ်တယ်။

လတ်တလောမှာ စစ်ကောင်စီ က ရန်ကုန်အပါအဝင် မြို့တချို့ မှာ ရပ်ကွက်အုပ်ချုပ်ရေးမှူးရုံး တွေကနေတဆင့် စစ်မှုထမ်း စာရင်းကောက်တာတွေ လုပ်ဆောင်နေပြီလို့ ဆိုပါတယ်။

စစ်ကောင်စီ ဟာ လာမယ့် နှစ်သစ်ကူးကာလ သင်္ကြန်အပြီးမှာ စစ်မှုထမ်း တွေစတင်ခေါ်ယူမယ်လို့ပြောဆိုထား တာဖြစ်ပါတယ်။

The post စစ်မှုထမ်း ဥပဒေကို အကောင်အထည်ဖော်ပေးတဲ့ ရပ်/ကျေး အုပ်ချုပ်ရေးမှူးတွေ ထိထိရောက်ရောက် အရေးယူမယ်လို့ မွန်ပြည်သစ် (AD) က သတိပေးချက် ထုတ်ပြန် appeared first on Khit Thit Media.

ရန်ကုန်၊ မတ် ၂

အကြမ်းဖက် စစ်ကောင်စီ၏ စစ်မှုမထမ်းမနေရ ဥပဒေကို ပြည်သူများ မလိုက်နာရန် နှင့် ရှောင်တိမ်းနိုင်ရေး သတိပေးချက် များကို KNU တပ်မဟာ ၅ က မတ်လ ၁ ရက်နေ့တွင် ထုတ်ပြန်သည်။

တိုင်းပြည်အာဏာအတင်းလုယူ သိမ်းပိုက်သည့် မင်းအောင်လှိုင်ဦးဆောင်သော စစ်ကောင်စီ က ပြည်တွင်းစစ်ကို သက်ဆိုးရှည်စေရန် ဖန်တီးနေကြကြောင်း၊ လက်ရှိတွင် ပြည်သူများကို အတင်းအဓမ္မ ခေါ်ယူ စစ်တိုက်ခိုင်းတော့မည်ဖြစ်ကြောင်း KNU တပ်မဟာ ၅ က ထုတ်ပြန်ပြောဆိုသည်။ ဒ

အကြမ်းဖက်စစ်ကောင်စီ၏ စစ်မှုမထမ်းမနေရ ဥပဒေကို မလိုက်နာဘဲ ဆန့်ကျင်ကြရန်၊ ပြည်သူများ သိရှိနားလည် ရှောင်တိမ်းနိုင်ရေးအတွက်လည်း အသိပေးချက်နှင့် သတိပေးချက်များကို KNU က ထုတ်ပြန်သည်။

ပြည်သူများအနေဖြင့် မူတရော်ခရိုင် ဒေသအတွင်းရှိ ကျေးရွာ၊ မြို့နေ ပြည်သူလူထုအားလုံး စစ်ကောင်စီ ၏ စစ်မှုမထမ်း မနေရ ဥပဒေကို မလိုက်နာဘဲ ဆန့်ကျင်ရန်၊ စစ်ကောင်စီ ခေါ်ယူစုဆောင်းမည့် တပ်သားများသို့ ထောက်ခံ အားပေး၊ ဝင်ရောက်ခြင်း လုံး၀မပြုရန်၊ မြို့နေပြည်သူများအနေဖြင့် အတင်းအကျပ် ဖိအားပေးမှုများနှင့် ရင်ဆိုင်လာပါက နီးစပ်ရာ ရွာများသို့ ထွက်ပြေးတိမ်းရှောင်၍ခိုလှုံရန် အသိပေးထားသည်။

ထို့ပြင် ဝင်ရောက်ခိုလှုံသည့် ကျေးရွာများတွင် သက်ဆိုင်ရာ တာဝန်ရှိသူများထံသို့ လမ်းညွှန်မှုနှင့် ကူညီစောင့်ရှောက်မှုရရှိရန် အမည်စာရင်း အတိအကျ တင်သွင်းရန် ၊ အတင်းအကြပ် အခက်အခဲ အကြပ်အတည်းဖြစ်လာပါက နီးစပ်ရာရှေ့တန်းဒေသ တာဝန်ရှိသူများထံသို့ ချက်ချင်းအသိပေး အကြောင်းကြားရန်၊ ထုတ်ပြန်ချက်များကိုသိရှိပြီး မလိုက်နာ၊ မလုပ်ဆောင်ဘဲ စစ်အာဏာရှင်အုပ်စု စစ်ကောင်စီအဖွဲ့၏ လုပ်ဆောင်ချက်အတိုင်း လိုက်နာလုပ်ဆောင်ပါက စစ်အာဏာရှင် အလိုကျနှင့် စစ်အာဏာရှင်အုပ်စု အဖွဲ့ဝင်ဟု သတ်မှတ်ခြင်းခံရမည်ဖြစ်ကြောင်း သတိပေးထားသည်။

The post စစ်ကောင်စီ၏ စစ်မှုမထမ်းမနေရ ဥပဒေကို ပြည်သူများ မလိုက်နာရန် နှင့် ရှောင်တိမ်းနိုင်ရေး သတိပေးချက်များ KNU တပ်မဟာ ၅ က ထုတ်ပြန် appeared first on Khit Thit Media.

ရန်ကုန်၊ ဖေဖော်ဝါရီ ၂

မြန်မာနိုင်ငံတွင် စစ်အာဏာရှင်စနစ် ချုပ်ငြိမ်းရေးနှင့် အနာဂတ်ဖက်ဒရယ် ဒီမိုကရေစီ ပြည်ထောင်စု နိုင်ငံတော်သစ် တည်ဆောက်ရေး အတူတကွ တိုက်ပွဲဝင်ကြရန် NUCC ခေါင်းဆောင်တစ်ဦးလည်းဖြစ်၊ KNU ဗဟိုတွဲဘက်အတွင်း ရေးမှူး ၂လည်းဖြစ်သူ ပဒိုစောလှထွန်းက တိုက်တွန်းပြောဆိုသည်။

နွေဦးတော်လှန်ရေး ၃ နှစ်ပြည့်အဖြစ် ၎င်းက အထက်ပါအတိုင်း တိုက်တွန်းလိုက်ခြင်းဖြစ်ပြီး အဆိုပါတိုက်တွန်းချက်ကိုလည်း KNU ဗဟိုက တရားဝင် သတင်းထုတ်ပြန်ထားသည်။

စစ်အာဏာသိမ်းမှု ၃ နှစ်ပြည့်လာချိန်တွင် စိန်ခေါ်မှုများ အခက်အခဲများကို ပြည်သူများနှင့်အတူ ရင်ဆိုင် ဖြတ်သန်း နေကြကြောင်း၊ အနာဂတ်ဖက်ဒရယ် ဒီမိုကရေစီ နိုင်ငံတော်သစ်ကြီး တည်ဆောက်ရေး ဆက်လက်ကြိုးပမ်းကြရမည်ဖြစ်ကြောင်း၊ အခက်အခဲများကို ရင်ဆိုင်နေရသည့် ပြည်သူလူထု၏ ဘ၀ကို စာနာ နားလည်ကြောင်း ၎င်းက ဆိုသည်။

“ဒီ သုံးနှစ်တာ ကာလမှာ ခက်ခဲတဲ့ စိန်ခေါ်မှုတွေနဲ့ တကယ့်ကို ရင်ဆိုင်ဖြတ်သန်းနေရတဲ့ ပြည်သူလူထုရဲ့ သူတို့ဘဝကိုလည်း စာနာ နားလည်ပါတယ်။ အဲဒါကြောင့်မို့လည်း ဒီ အာဏာရှင်စနစ်နဲ့ ဘယ်အာဏာရှင်စနစ်မဆို ချုပ်ငြိမ်းပြီးတော့ ကျွန်တော်တို့ အားလုံးအတူတကွ ရှင်တွဲနေထိုင်နိုင်မယ့် အနာဂတ် ဖက်ဒရယ်ဒီမိုကရေစီသစ်ကြီးကို ကျွန်တော်တို့ ဝိုင်းဝန်းပြီးတော့ အတူ တည်ဆောက်ကြရမှာဖြစ်ပါတယ်။ ဒီအတွက်လည်း ရှေ့ဆက် အနာဂတ်မှာကျွန်တော်တို့ လိုချင်တဲ့ တည်ဆောက်ချင်တဲ့ ဖက်ဒရယ်ပြည်ထောင်စု အကောင်အထည်ဖော်၊ တိုက်ပွဲဝင်ရမယ့် အာဏာရှင်စနစ်ချုပ်ငြိမ်းရေး တိုက်ပွဲတွေထဲမှာလည်း လက်ရှိ ပါဝင်နေတဲ့ အခင်းအကျင်းနဲ့အတူ ကျွန်တော်တို့ ပြည်သူတွေလည်း အခု ပါဝင်ဖို့လည်း တိုက်တွန်းပြောကြားလို့ပါတယ်” ဟု ၎င်းက ပြောဆိုသည်။

အမျိုးသားညီညွတ်ရေး အတိုင်ပင်ခံကောင်စီ NUCC အနေဖြင့်လည်း ဖက်ဒရယ်ဒီမိုကရေစီ နိုင်ငံတော်သစ်ကြီး ဖြစ်ပေါ် ရေး ကြိုးပမ်းလျက်ရှိကြောင်း၊ အာဏာရှင်ချုုပ်ငြိမ်းရေး အလွန် အနာဂတ်ဖက်ဒရယ် ဒီမိုကရေစီ ပြည်ထောင်စု သစ်ကြီးကို ပြည်သူများနှင့်အတူ တိုက်ပွဲဝင်ကြရန် ၎င်းက နှိုးဆော်သည်။

” ဒီ သုံးနှစ်တာကာလအတွင်းမှာလည်း NUCC ရဲ့ အဖွဲ့အစည်း အသီးသီးက ကြိုးစားဆောင်ရွက်နေတဲ့ စိန်ခေါ်မှု ခက်ခဲမှု ပင်ပန်းမှုတွေကိုလည်း စာနာနားလည်ရင်းနဲ့ ကျွန်တော်တို့တွေရဲ့ ကြားမှာ တူညီတဲ့ နားလည်မှု၊ အပြန်အလှန် လေးစား အသိအမှတ်ပြုအောက်ကနေ ပါဝင်ဆွေးနွေးခဲ့ရတဲ့အတွက်ကြောင့်လည်း ဒီအဆင့်အထိကို ရောက်ရှိလာတာဖြစ်ပါတယ်။ ဒီအတွက် ရှေ့ဆက်အကောင်အထည်ဖော်ရမယ့် အနာဂတ်နိုင်ငံတော်သစ်အတွက် အတူတကွစုပေါင်းပါဝင်ကြဖို့၊ ရှေ့ဆက်မှာလည်း ပေးဆပ်မှုတွေနဲ့ ကျွန်တော်တို့ အာဏာရှင်ချုပ်ငြိမ်းရေးအလွန် တည်ဆောက်ချင်တဲ့ အနာဂတ်ဖက်ဒရယ်ဒီမိုကရေစီ ပြည်ထောင်စုသစ်ကြီးကိုလည်း ပြည်သူလူထုတွေ အပါအဝင် အတူတကွ တိုက်ပွဲဝင်ကြပါစိုလို့ ပြောကြားရင်းနဲ့ပဲ အားလုံးကိုလည်း ကျေးဇူးတင်ပါတယ်။ ကျွန်တော်တို့ နိုင်ငံတော်သစ်ကြီး အမြန်ဆုံး အတူတကွ ယှဉ်တွဲနေထိုင်နိုင်မယ့် ပြည်ထောင်စုသစ်ကြီးကိုလည်း တည်ဆောက်နိုင်ကြပါစေ” ဟု ၎င်းက ပြောဆို တိုက်တွန်းသည်။

The post စစ်အာဏာရှင်စနစ် ချုပ်ငြိမ်းရေးနှင့် ဖက်ဒရယ် ဒီမိုကရေစီ ပြည်ထောင်စု နိုင်ငံတော်သစ် တည်ဆောက်ရေး ပြည်သူများနှင့် အတူတကွ တိုက်ပွဲဝင်ကြရန် NUCC ခေါင်းဆောင်၊ KNU ဗဟိုတွဲဘက်အတွင်းရေးမှူး ၂ ဖိတ်ခေါ် appeared first on Khit Thit Media.

■ စစ်တပ်လက်အောက်ခံ ပအိုဝ်းအမည်ခံ လက်နက်ကိုင်အဖွဲ့အနေဖြင့် ဘက်ကူးပြောင်းရန် တိုက်တွန်း

ရန်ကုန်၊ ဇန်နဝါရီ ၂၇

မြန်မာပြည်သူများ လိုလားတောင်းတလျက်ရှိသော စစ်အာဏာရှင် စနစ် ချုပ်ငြိမ်းရေး နှင့် ဖက်ဒ ရယ် ဒီမိုကရေစီ စနစ် အကောင် အထည်ဖော်နိုင်ရေး ညီနောင်မဟာ မိတ် တပ်ဖွဲ့များ နှင့်အတူ စစ်ကောင်စီကို တိုက် ခိုက်တော့မည်ဖြစ်ကြောင်း PNLO က တရားဝင် ထုတ်ပြန် ကြေညာ လိုက်သည်။

PNLO သည် တစ်နိုင်ငံလုံး အပစ်အခတ်ရပ်စဲရေး NCA စာချုပ်ကို လက်မှတ်ရေးထိုးပြီးသည့်အချိန်မှစ၍ စာချုပ်ပါ အချက်များကို လေးစားလိုက်နာမှု အရှိဆုံးဖြစ်ကြောင်း၊ PNLO အနေဖြင့် စစ်တပ်နှင့် တစ်နိုင်ငံလုံး အပစ်အခတ် ရပ်စဲရေး NCA စာချုပ်ကို လက်မှတ်ရေးထိုးပြီး စစ်တပ် ဩဇာညောင်းသော ငြိမ်းချမ်းရေး တွေ့ဆုံ ဆွေးနွေးမှု အခင်းအကျင်းတွင် ၈ နှစ်တိုင်တိုင် မျှော်လင့် ချက်ကြီးစွာဖြင့် စိတ်ရောကိုယ်ပါ ပါဝင် လုပ်ဆောင်ခဲ့သော်လည်း အာမခံချက်ရှိသော နိုင်ငံရေး ရလဒ်များ ရရှိခြင်း မရှိခဲ့ကြောင်း PNLO က ထုတ်ပြန်သည်။

ဇန်နဝါရီလ ၂၁ ရက်နေ့ ရှမ်းပြည်နယ်တောင်ပိုင်း၊ ဟိုပုံးမြို့နယ်၊ စံဖူးကျေရွာတွင် PNLA ယာဉ်ကြောင်း ကို ပိတ်ဆို့ ဟန့်တားခြင်းကြောင့် စစ်တပ် လက်အောက်ခံ အသွင်းပြောင်း PNO ပြည်သူ့စစ် နှင့် PNLA တို့အကြား တိုက်ပွဲ စတင်ဖြစ်ပွားခဲ့ကြောင်း ၊ စံဖူး ကျေးရွာ ဖြစ်စဉ်တွင် စစ်မီး မကူးဆက်စေရန်အတွက် စစ်ကောင်စီနှင့် အတတ်နိုင်ဆုံး ညှိနှိုင်းခဲ့သော်လည်း အောင်မြင်မှု မရှိခဲ့ကြောင်း၊ စစ်ကောင်စီက ဇန်နဝါရီလ ၂၂ ရက်နေ့ ညပိုင်း PNLO ၏ ဗဟိုဌာနချုပ် အဝန်း အဝိုင်း ရှိ နော်ထော်ကျေးရွာကို တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့သဖြင့် နောင်ထော်ကျေးရွာရှိ အပြစ်မဲ့ ပြည်သူများ ထိခိုက်သေဆုံးမှု ဖြစ်ပေါ်ခဲ့ကြောင်း၊ အဆိုပါ ဖြစ်စဉ်မှ အစပြု၍ ဆီဆိုင်မြို့ပေါ်အထိ တိုက်ပွဲများ ကူးစက်သွား ရခြင်းဖြစ်ကြောင်း PNLO က ကြေညာသည်။

၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် စစ်အာဏာသိမ်းမှုဖြစ်ပွားသည့်နောက်ပိုင်း ပြည်သူတစ်ရပ်လုံးက လမ်းပေါ်ထွက်ပြီး ငြိမ်းချမ်းစွာ ဆန္ဒပြသည်ကို စစ်တပ်က လက်နက်အားကိုးဖြင့် ပစ်ခတ်နှိမ်နင်းခဲ့ကြောင်း၊ ထို့ကြောင့် ဆန္ဒပြပွဲတွင် ပါဝင်သော လူငယ်အ များစုက တစ်နိုင်ငံလုံးအတိုင်း အတာဖြင့် လက်နက်စွဲကိုင်ပြီး စစ်မျက်နှာသစ်ဖွင့်ခဲ့ကြကြောင်း PNLO က ထုတ်ပြန် သည်။

ယခုဖြစ်ပေါ်လျက်ရှိသော စစ်ရေးပဋိပက္ခသည် လူမျိုးရေး ပဋိပက္ခမဟုတ်ဘဲ စစ်အာဏာရှင် ယန္တရားကို လည်ပတ်စေသူ လူတစ်စုနှင့် အဖိနှိပ်ခံ တိုင်းရင်းသား လူမျိုးများ၊ တစ်ပြည်လုံးရှိ ပြည်သူလူထူတို့အကြား ဖြစ်ပွားသော ပဋိပက္ခသာဖြစ်ကြောင်း၊ စစ်အာဏာ ရှင်စနစ်ချုပ်ငြိမ်းပြီး ပြည်သူလူထုတစ်ရပ်လုံး လိုလားတောင်းတလျက်ရှိသော ဖက်ဒရယ် ဒီမိုကရေစီ စနစ်ကို ဖော်ဆောင် နိုင်သည်အထိ ဘ၀တူ ညီနောင်မဟာမိတ်များနှင့်အတူ ဆင်နွှဲသွားမည်ဖြစ်ကြောင်း PNLO ၏ ကြေညာချက်တွင် ရေးသားထားသည်။

စစ်ကောင်စီကို တိုက်ခိုက်မည်ဖြစ်သော်လည်း ပအိုဝ်းအမျိုးသားအချင်းအချင်း အပြန်အလှန် ပစ်ခတ်တိုက်ခိုက်ခြင်းကို ပြုလုပ်မည်မဟုတ်ကြောင်း၊ စစ်ကောင်စီ၏ စီမံခန့်ခွဲမှု အောက်တွင် ရပ်တည်နေသော ပအိုဝ်းအမည်ခံ လက်နက်ကိုင်တပ်ဖွဲ့အနေဖြင့် အမျိုးသား လွတ်မြောက်ရေး လမ်းကြောင်းပေါ်သို့ ကူးပြောင်းရပ်တည်ရန် PNLO က လေးနက်စွာ တိုက် တွန်း ထားသည်။

PNLO အနေဖြင့် စစ်အာဏာရှင်စနစ် တိုက်ဖျက်ရေး၊ မဟာလူမျိုးကြီးဝါဒနှင့် ကျဉ်းမြောင်းသော အမျိုးသားရေး ဝါဒကို တိုက်ဖျက်ရေး၊ ဖက်ဒရယ်ဒီမိုကရေစီ နိုင်ငံရေးစနစ် တည်ဆောက်ရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ရရှိရေး စသည့် နိုင်ငံရေး ဦးတည်ချက်များ၊ အတိုင်း လုပ်ဆောင်နေခြင်းဖြစ်ကြောင်း၊ ပအိုဝ်းအမျိုးသားပြည်သူများအနေဖြင့် မိမိတို့ အမျိုးသား အခွင့်အရေးများ ပေါ်ထွန်းလာရေးအတွက် ပအိုဝ်းအမျိုးသားလွတ်မြောက်ရေး အဖွဲ့ချုပ် PNLO နှင့်အတူ ပူးပေါင်းပါဝင်ပေးကြရန် လေးနက်စွာ တိုက်တွန်းကြောင်း အသိပေးကြေညာထားသည်။

The post NCA အပစ်ရပ်စာချုပ် လက်မှတ်ရေးထိုးထားသော PNLO က ညီနောင် မဟာမိတ်များနှင့်အတူ စစ်ကောင်စီ ကို တိုက်ခိုက်တော့မည်ဟု တရားဝင်ကြေညာ appeared first on Khit Thit Media.

ရန်ကုန်၊ ဇန်နဝါရီ ၁၈

အကြမ်းဖက်စစ်ကောင်စီက ပြည်သူ့စစ်ဖွဲ့စည်းရန် လုပ်ဆောင်နေမှုကို ပြင်းပြင်းထန်ထန်ပြတ်ပြတ်သားသား အရေးယူမည်ဟု PDF တောင်ပိုင်းစစ်ဒေသက ကြေညာလိုက်ကြောင်း တောင်ပိုင်းစစ်ဒေသ၊ အမှတ် ၂ စစ်ဒေခွဲကွပ်ကဲရေးရုံးမှ ရဲဘော်တင်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ၊ အမှတ် ၂ စစ်ဒေသခွဲ စစ်ဆင်ရေး နယ်မြေအတွင်းရှိ မြို့နယ်များတွင် အကြမ်းဖက်စစ်ကောင်စီတပ်က ပြည်သူ့စစ်ဖွဲ့စည်းရန် အကြောင်းပြချက်များဖြင့် ပြည်သူများကို ခြိမ်းခြောက်၍ အင်အားကို အတင်းအဓမ္မ စုဆောင်းနေကြောင်း၊ စစ်မျက်နှာအနှံ့တွင် အရှုံးနှင့် ရင်ဆိုင်နေရသော စစ်ကောင်စီသည် တပ်ဖွဲ့ဝင်အင်အား ချိနဲ့ ပြုန်းတီးလာခြင်း၊ စိတ်ဓာတ်ရေးရာ ပြိုကျပျက်စီးလာခြင်း ဖြစ်နေသည့်အတွက် ပြည်သူ့စစ်အဖြစ် ပြည်သူများကို လိမ်လည် လှည့်စား စည်းရုံး၍ စစ်မှုထမ်းခိုင်းပြီး ရှေ့တန်းစစ်မျက်နှာ ပို့ဆောင်ခြင်း၊ ပြည်သူအချင်းချင်း ရန်တိုက်ပေးသည့် ယုတ်မာကောက်ကျစ်သော လုပ်ရပ်ဖြစ်ကြောင်း တောင်ပိုင်းစစ်ဒေသ အမှတ် ၂ စစ်ဒေသခွဲက ထုတ်ပြန် ကြေညာသည်။

“အဓိက အကြမ်းဖက်စစ်ကောင်စီက စစ်အင်အားကို အတင်းအဓမ္မစုဆောင်းနေတာကို သတိပေးချင်တဲ့သဘောပါ။ ပြည်သူတွေကိုလည်း မေတ္တာရပ်ခံတာပါသလို ဒီကိစ္စကို ဆောင်ရွက်နေသူတွေကိုလည်း ပြင်းပြင်ထန်ထန် သတိပေးတဲ့သဘောပါ။ အကြမ်းဖက်စစ်ကောင်စီက သူတို့အင်အားပြုန်းတီးပြီးတော့ တပ်ပြိုကွဲနေတဲ့အပေါ်မှာ တစ်ဖက်လှည့်နဲ့ ပြည်သူတွေကို အတင်းအဓမ္မ အင်အား စုဆောင်းတာကတော့ ပြည်သူအချင်းချင်းကို ရန်တိုက်ပေးတဲ့ ယုတ်မာတဲ့ လုပ်ရပ်တစ်ခုပါပဲ။ ဒါကိုလည်း ကျနော်တို့က ပြင်းပြင်းထန်ထန် ပြတ်ပြတ်သားသားဆောင်ရွက်သွားမှာပါ” ဟု ရဲဘော်တင်ဦးက ပြောဆိုသည်။

ပြည်သူများအနေဖြင့် ထိခိုက်နစ်နာမှုမရှိစေရန် ပြည်သူ့စစ်အဖြစ် အတင်းအဓမ္မစုဆောင်းနေခြင်းများကို နည်းလမ်းမျိုးစုံအသုံးပြု၍ ရှောင်ကြရန်၊ စစ်တပ်၊ လက်ပါးစေများနှင့် ပူးပေါင်းဆောင်ရွက်ခြင်း၊ နီးကပ်စွာ နေခြင်းများ ရှောင်ရှားကြရန် တောင်ပိုင်းစစ်ဒေသက မေတ္တာရပ်ခံထားသည်။

အကြမ်းဖက်စစ်ကောင်စီ အလို ကျ ပြည်သူ့စစ်ဖွဲ့စည်းရန် ပြည်သူများကို နည်းမျိုးစုံဖြင့် ခြိမ်းခြောက် ဖိအားပေး ဆောင်ရွက်နေသူအားလုံးကို ပြင်းထန်စွာ အရေးယူသွားမည်ဟု တောင်းပိုင်းစစ်ဒေသက ကြေညာလိုက်ပြီး လက်ပါးစေများအနေဖြင့် လုပ်ရပ်များကို ရပ်တန်းက ရပ်တန့်ရန်လည်း တောင်ပိုင်းစစ်ဒေသက သတိပေးထားသည်။

#နွေဦးတော်လှန်ရေး #khitthitmedia #myanmarmedia #burmesemedia #foryou #foryoupage #NUG #springrevolution #PDF #အကြမ်းဖက်စစ်ကောင်စီ #ပြည်သူ့ကာကွယ်ရေးတပ်မတော်

The post အကြမ်းဖက်စစ်ကောင်စီက ပြည်သူ့စစ်ဖွဲ့စည်းရန် လုပ်ဆောင်နေမှုကို ပြင်းပြင်းထန်ထန်ပြတ်ပြတ်သားသား အရေးယူမည်ဟု PDF တောင်ပိုင်းစစ်ဒေသက ကြေညာ appeared first on Khit Thit Media.

ရန်ကုန်၊ ဇန်နဝါရီ ၅

ရှမ်းပြည်နယ်၊ မိုးမိတ်မြို့နယ်၊ ကျန်ကန်တပ်စခန်းကို ယနေ့ TNLA က သိမ်း ပိုက် ရရှိကြောင်း တရားဝင် သတင်းထုတ်ပြန်သည်။

ဇန်နဝါရီလ ၅ ရက်နေ့ နံနက် ၅ နာရီ ၃၀ မိနစ်အချိန် မိုးမိတ်မြိုနယ် စစ်ကောင် စီ စကခ-၂၁ နှင့် ခလရ-၂၂၃ အခြေချတပ်စွဲထားသည့် ကျန်ကန်တပ်စခန်းကို တအာင်းတပ်မတော် PSLF/TNLA မှ ဝင်ရောက်ရှင်းလင်း သိမ်းပိုက်နိုင်ခဲ့ကြောင်း၊ အဆိုပါ ကျန်ကန်တပ်စခန်းကို တအာင်းတပ်မတော် PSLF/TNLA က ၁၀၂၇ စစ်ဆင်ရေးအတွင်း ဇန်နဝါရီလ ၃ ရက်နေ့မှ စတင်တိုက်ခိုက်ခဲ့ပြီး ၃ ရက်ကြာ ဇန်နဝါရီ ၅ ရက်နေ့ နံနက်ပိုင်းတွင် အလုံးစုံသိမ်းပိုက်ရရှိခဲ့ကြောင်း ၊ ၎င်းတပ်စခန်းအတွင်း စစ်ကောင်စီ၏ လက်နက်ခဲယမ်းများ နှင့် စစ်သုံးဆောင်ပစ္စည်းများ ရှင်းလင်းသိမ်းဆည်းရမိကြောင်း သိရှိရသည်။

စစ်ကောင်စီ ဆင်ကင်(ကျန်ကန်)တပ်စခန်းကို တိုက်ခိုက်နေစဥ်အတွင်း စစ်ကောင် စီ မိုးမိတ်တပ်စခန်းက လက်နက်ကြီးပစ်ခတ်တိုက်ခိုက်မှု ၁၇ ကြိမ် နှင့် လေကြောင်းတိုက်ခိုက်မှု Jet Fighter ၂ ကြိမ် အသုံးပြုတိုက်ခိုက်ခဲ့ကြောင်း သိရှိရသည်။

“မိုးမိတ်ရဲ့ အဓိကဝင်ပေါက် စစ်ကောင်စီ ဆင်ကင်တပ် စခန်းကို တအာင်းတပ်မတော် PSLF/TNLAက ဒီနေ့ သိမ်းပိုက်တယ်။ စစ်ခွေးတွေ ထွက်ပြေးတယ်။ ဆင်ကင်တပ်စခန်းက မန်တုံကနေ ဝင်တဲ့လမ်းပေါ်မှာ ရှိတဲ့ အဓိကနေရာပါ။ မကြာခင် မိုးမိတ်သိမ်းပိုက်ရရှိတော့မယ်လို့ ထင်ပါတယ်” ဟု မိုးမိတ်မြို့မှ ပြည်သူတစ်ဦးက ပြောဆိုသည်။

The post မိုးမိတ်မြို့နယ်၊ ဆင်ကင် (ကျန်ကန်) တပ်စခန်းကို TNLA က သိမ်းပိုက်ရရှိပြီး စစ်သားများ ထွက်ပြေး၊ မိုးမိတ်မြို့သိမ်း တိုက်ပွဲ မကြာမီ လာမည်ဟု ဒေသခံများ ပြောဆို appeared first on Khit Thit Media.

ရန်ကုန်၊ ဇန်ဝါရီ ၄

ရှမ်းပြည်နယ်မြောက်ပိုင်း၊ နောင်ချိုမြို့နယ်၊ သံဘိုကျေးရွာရှိ စစ်ကောင်စီစခန်းကို တော်လှန်ရေးတပ်ဖွဲ့များက တိုက်ခိုက်သိမ်းပိုက်ခဲ့ရာတွင် ယင်းစခန်းသည် ပြင်ဦးလွင် စစ်တက္ကသိုလ်နှင့် ၁၅ မိုင်သာ ကာဝေးတော့သည်ဟု အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက သတင်းထုတ်ပြန်သည်။

ဇန်နဝါရီလ (၂) ရက်နေ့တွင် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် (မန္တလေး) နှင့် တအာင်းအမျိုးသားလွတ်မြောက်ရေးတပ်မတော် (PSLF/TNLA) ပူးပေါင်းတပ်ဖွဲ့များသည် နောင်ချိုမြို့နယ်၊ သံဘိုကျေးရွာရှိ စစ်ကောင်စီအခြေစိုက် စခန်းအား ဝင်ရောက် စီးနင်း တိုက်ခိုက်ခဲ့ကြောင်း၊ ဇန်နဝါရီလ ၃ ရက်နေ့၊ နံနက် ၇ နာရီ ၃၀ မိနစ်အချိန် သံဘိုကျေးရွာစခန်းကို အပြီးသတ် သိမ်းပိုက်ရရှိခဲ့ပြီး စစ်တပ်၏ Drone Jammer စက်အကြီးများအပါအဝင် လက်နက်ခဲယမ်းများစွာ သိမ်းဆည်းရမိခဲ့ကြောင်း သိရှိရသည်။

အဆိုပါသံဘိုကျေးရွာ စစ်စခန်းသည် စစ်ကောင်စီ၏ စစ်တက္ကသိုလ်များတည်ရှိရာ ပြင်ဦးလွင်မြို့နှင့် ၁၅ မိုင်သာ ကွာဝေးသည့်နေရာရှိ စခန်းတခုဖြစ်ကြောင်း၊ ဇန်နဝါရီလ ၃ ရက်နေ့၊ မွန်းလွဲပိုင်း ကျောက်မဲလေးဘက်မှ သံဘိုကျေးရွာသို့ ကား (၃) စီးနှင့်လာသော စစ်တပ် စစ်ကူအဖွဲ့ကို ထပ်မံ ဖြတ်တောက် တိုက်ခိုက်ခဲ့ရာ စစ်သား အများအပြား သေဆုံးခဲ့ပြီး လက်နက်ခဲယမ်းများ ထပ်မံသိမ်းဆည်းရမိခဲ့ကြောင်း သိရှိရသည်။

သံဘိုကျေးရွာ တိုက်ပွဲအတွင်း စစ်တပ်စစ်ကြောင်းမှူး ဒုဗိုလ်မှူးကြီးသက်အောင်ကို အရှင်ဖမ်းဆီးရမိခဲ့ပြီး စစ်တပ်ဘက်မှ ထိခိုက်သေဆုံးမှု များပြားခဲ့ကာ တို့ရဲဘော်တချို့ ပြည်သူ့တော်လှန်ရေးအတွက် မြင့်မြတ်စွာ အသက်ပေးလှူသွားခဲ့ကြောင်း၊ ပြည်သူ့ကာကွယ်ရေးတပ်မတော်အနေဖြင့် ဒုဗိုလ်မှူးကြီးအဆင့် အရာရှိ (၁) ဦးကို ပထမဆုံးအကြိမ်အဖြစ် လက်ရ ဖမ်းဆီးရမိခဲ့ခြင်းဖြစ်ကြောင်း ကာကွယ်ရေးဝန်ကြီးဌာနက သတင်းထုတ်ပြန်ထားသည်။

The post နောင်ချိုမြို့နယ်၊ သံဘိုကျေးရွာရှိ စစ်ကောင်စီစခန်းကို တိုက်ခိုက်သိမ်းပိုက်မှု ပြင်ဦးလွင်စစ်တက္ကသိုလ်နှင့် ၁၅ မိုင်သာ ကာဝေးတော့ဟု ကာကွယ်ရေးဝန်ကြီးဌာနက သတင်းထုတ်ပြန် appeared first on Khit Thit Media.

ရန်ကုန်၊ ဒီဇင်ဘာ ၃၁

ရှမ်းပြည်နယ်မြောက်ပိုင်း၊ လောက်ကိုင်မြို့တွင် နေထိုင်ကြသည့် အရပ်သားပြည်သူများနှင့် နိုင်ငံခြားသားများ အမြန်ဆုံးထွက်ခွာသွားကြရန် ကိုးကန့် MNDAA က ယမန်နေ့တွင် ထပ်မံ အသိပေးလိုက်ကြောင်း သိရှိရသည်။

လတ်တလော စစ်ကောင်စီတပ်ဖွဲ့ဝင်များက ပြည်သူ လူထု ၏ အသက်အန္တရာယ်ကို ဂရုမစိုက်ဘဲ အရပ် သားများ၏ နေအိမ်များကို လေကြောင်းဖြင့် ပစ်ခတ်ခြင်း၊ လက်နက်ကြီးများဖြင့် တိုက်ခိုက်ခြင်းကြောင့် ပြည်သအမြောက်အများ သေဆုံးခြင်းနှင့်ဒဏ်ရာရခြင်းများ ဖြစ်ပေါ်ခဲ့ရကြောင်း၊ လက်ရှိအချိန်တွင် လောက်ကိုင်ဒေသအတွင်းရှိ စစ်ကောင်စီတပ်ဖွဲ့ အကြွင်းအကျန်များနှင့် စစ်တပ် လက်အောက်ခံ ကိုးကန့် ပြည်သူ့စစ်အဖွဲ့တို့က ပေကပ်ခေါင်းမာပြီး တုံ့ပြန် တိုက်ခိုက်နေခြင်းကြောင့် လောက်ကိုင်တွင် တိုက်ပွဲများ၊ လေကြောင်းတိုက်ခိုက် ဗုံးကျဲမှုများ အချိန် မရွေးဖြစ်ပွားလာနိုင်ကြောင်း MNDAA က အသိပေးသည်။

ထို့ကြောင့် ပြည်သူများ၏ အသက်အန္တရာယ်လုံခြုံရေး အတွက် စိုးရိမ်စရာများဖြစ်လာနိုင်ကြောင်း၊ သို့ဖြစ်၍ ပြည်သူများအနေဖြင့် လုံခြုံဘေးကင်းသည့် နေရာသို့ အမြန်ဆုံး တိမ်းရှောင်ကြရန်၊ နိုင်ငံခြားသားများအနေဖြင့် MNDAA ၏ သက်ဆိုင်ရာ ဌာနထံသို့ လျှင်မြန်စွာ လာရောက်စာရင်းပေးပို့ပြီး တရားဝင် လမ်းကြောင်းဖြင့် အမြန်ဆုံး အိမ်ပြန်ကြရန် MNDAA က တိုက်တွန်းသည်။

ယင်းအပြင် MNDAA အနေဖြင့် တရုတ်နိုင်ငံနှင့်အတူ ဆိုက်ဘာမှုခင်းလုပ်ငန်း(ကျားဖြန့်) လုပ်ဆောင်သူများကို ဆက်လက်ပူးပေါင်း ဖမ်းဆီးသွားမည်ဖြစ်ပြီး ကျားဖြန့် လုပ်ငန်းရှင်များအနေဖြင့် အဖမ်းမခံရနိုင်ပါဘူးဆိုသည့် စိတ်သဘောမျိုး မထားရှိကြရန်၊ အသိစိတ်ဖြင့် မိမိနိုင်ငံသို့ ပြန်၍ ပြစ်မှု ဝန်ခံကြရန် တိုက်တွန်းထားသည်။

တရုတ်နိုင်ငံခြားရေးဝန်ကြီးဌာနကမူ လောက်ကိုင်တွင် ဖြစ်ပွားနေသော တိုက်ပွဲများကို မျက်ခြည် မပြတ်စောင့်ကြည့်နေကြောင်း၊ တရုတ်နိုင်ငံသားများ ထိခိုက်မှုများနှင့်ပတ်သက်ပြီး မြန်မာဘက်သို့ ကန့်ကွက်ချက်ပေးပို့ထားကြောင်း ၊ နှစ်ဖက်စလုံးအနေဖြင့် တရုတ်နိုင်ငံသားများကို ထိခိုက်မှုများ မရှိစေရေး နှင့်လုံခြုံရေးအတွက် တိုက်ခိုက်မှုများ ရပ်ဆိုင်းရန် တိုက်တွန်းကြောင်း တရုတ်နိုင်ငံခြားရေးဝန်ကြီးဌာန၏ ပြောခွင့်ရ Mao Ningက ဒီဇင်ဘာလ ၂၉ ရက်နေ့တွင် ထုတ်ဖော်ပြောဆိုသည်။

The post လောက်ကိုင်တွင် နေထိုင်သည့် အရပ်သားပြည်သူများနှင့် နိုင်ငံခြားသားများ အမြန်ဆုံးထွက်ခွာကြရန် MNDAA က ထပ်မံ အသိပေး၊ စစ်ကောင်စီ၏ တိုက် ခိုက်မှုအတွင်း တရုတ်နိုင်ငံသားများ သေဆုံးထိခိုက်မှုများရှိနေ appeared first on Khit Thit Media.

ရန်ကုန်၊ ဒီဇင်ဘာ ၁၂

အညာပစ်တိုင်းထောင်လေးများ ဦးဆောင်သော အညာမြေစစ်ဘေးရှောင်ကူညီစောင့်ရှောက်ရေးအဖွဲ့မှ ကလေးသူငယ်များ ပညာရေး၊ကျန်းမာရေးနှင့် ကိုယ်၀န်ဆောင်များ သက်ကြီးရွယ်အိုများ ကာကွယ်စောင့်ရှောက်ပြုစုရန် ရန်ပုံငွေရရှိရေးအတွက် “စစ်ရှောင်ပြည်သူများနှင့် တို့အတူရပ်တည်ကြောင်းသက်သေထူ(အင်္ကျီ+ဆွဲအိတ်)၀ယ်လို့ကူ….”ကမ်ပိန်း

ပြုလုပ်မည် ဖြစ်ကြောင်း သိရှိရသည်။

ထိုင်းနိုင်ငံ ဘန်ကောက်မြို့ နွေဦးမျိုးဆက်မဟာမိတ်အဖွဲ့၊ SGA ထောက်ပို့အဖွဲ့မှ အင်္ကျီနှင့် လက်ဆွဲအိတ်များကို စီစဉ်ရောင်းချပေးခြင်းဖြစ်ပြီး ဒီဇင်ဘာ ၁၁ ရက်နေ့မှ ဒီဇင်ဘာ ၃၀ ရက်နေ့အထိ ရောင်းချပေးသွားမည် ဖြစ်ကာ အင်္ကျီ တထည်လျှင် ၂၀၀ ဘတ်၊အိတ်တလုံးလျှင် ၁၅၀ ဘတ် ရောင်းချပေးသွားမည် ဖြစ်ကြောင်း သိရှိရသည်။

The post စစ်ရှောင်ပြည်သူများအတွက် ရန်ပုံငွေရရှိရေး အညာပစ်တိုင်ထောင်လေးများအဖွဲ့ ကမ်ပိန်းပြုလုပ် appeared first on Khit Thit Media.