တောင်ကိုရီးယားနိုင်ငံ၊ ဆိုးလ်မြို့ရှိ မြန်မာသံရုံးရှေ့တွင် အကြမ်းဖက် မြန်မာစစ်အုပ်စုက အတုအယောင် ရွေးကောက်ပွဲဖြင့် အရေခွံခြုံ အရပ်သားအစိုးရ အသွင်သဏ္ဌာန်ဖန်တီးကာ စစ်အစိုးရ အာဏာတည်မြဲရေး ကြိုးပမ်းမှုများကို ပြင်းပြင်းထန်ထန် ကန့်ကွက်ရှုတ်ချသည့် သတင်းစာရှင်းလင်းပွဲကို ဧပြီလ ၇ ရက်နေ့ နံနက် ၁၁ နာရီခန့်တွင် ပြုလုပ်ခဲ့ကြောင်း သိရသည်။

​အဆိုပါ သတင်းစာရှင်းလင်းပွဲကို ကိုရီးယားအရပ်ဘက် အဖွဲ့အစည်းများက ဦးဆောင်ကျင်းပခြင်းဖြစ်ပြီး မြန်မာ့ တော်လှန်ရေးအင်အားစုများမှ တာဝန်ခံများလည်း ပူးပေါင်းပါဝင်ခဲ့ပြီး ၁၅ ဦးဝန်းကျင် တက်ရောက်ခဲ့ကြောင်း၊ မြန်မာစစ်အုပ်စု၏ တရားမဝင်သော လုပ်ရပ်များအား ကိုရီးယားအစိုးရ၊ ကိုရီးယားပြည်သူများနှင့် နိုင်ငံတကာအသိုက်အဝန်းက သိရှိစေရန် ရည်ရွယ်ခြင်း ဖြစ်ကြောင်း သိရှိရသည်။

​”မင်းအောင်လှိုင်သည် စစ်ရာဇဝတ်ကောင်သာ ဖြစ်သည်” ဟု ကြေညာချက်တွင် ပါရှိပြီး ​သတင်းစာရှင်းလင်းပွဲ၏ အဓိက ခေါင်းစဉ်မှာ “မြန်မာစစ်အုပ်စု၏ အတုအယောင် သမ္မတတင်မြှောက်ခြင်းကို ဆန့်ကျင်ကန့်ကွက် ရှုတ်ချခြင်း” ဖြစ်ကြောင်း၊ စစ်ခေါင်းဆောင် မင်းအောင်လှိုင်သည် ပြည်သူလူထု ရွေးချယ်တင်မြောက်သည့် သမ္မတမဟုတ်ဘဲ စစ်ရာဇဝတ်ကောင်သာဖြစ်ကြောင်း၊ စစ်ကောင်စီကို အသိအမှတ်မပြုရန် ကိုရီးယားအစိုးရထံ ဆက်လက်တောင်းဆိုသွားရန် နှင့် ဆန္ဒပြပွဲများ ဆက်လက်ပြုလုပ်ရန် စီစဥ်ထားကြောင်း သိရသည်။

The post တောင်ကိုရီးယားနိုင်ငံ၊ ဆိုးလ်မြို့ရှိ မြန်မာသံရုံးရှေ့တွင် စစ်အုပ်စု၏ အတုအယောင် သမ္မတ တင်မြှောက်မှုကို ကန့်ကွက် ရှုတ်ချကြောင်း သတင်းစာရှင်းလင်းပွဲ ပြုလုပ် appeared first on Khit Thit Media.

ကရင်နီပြည်နှင့် ရှမ်းတောင်ဒေသတို့ကို စစ်ရေးလိုအပ်ချက်အရ စစ်ဒေသ ၅ ခုဖြင့်ဖွဲ့စည်းလိုက် ကြောင်း KNDF ဗဟို သတင်းနှင့်ပြန်ကြားရေးဌာန တာဝန်ရှိသူက ရန်ကုန်ခေတ်သစ်သတင်း ဌာန ထံသို့ ပြောကြားသည်။

လက်ရှိ စစ်အာဏာရှင်စနစ် တော်လှန်ရေးတွင် တပ်ဖွဲ့များ၏ ဆောင်ရွက်မှုများကို ပိုမိုကျစ်လစ်တိ ကျစေရန်၊ အရည်အသွေး စွမ်းဆောင်ရည် ပြည့်မီစေရန်၊ လုပ်ငန်းများအား ထိရောက်စွာ အကောင် အထည်ဖော်နိုင်စေရန်နှင့် အမိန့်ပေးမှုစနစ်အား ပိုမိုတိကျခိုင်မာသော တပ်ဖြစ်စေရန် ရည်ရွယ်၍ က ရင်နီပြည်နှင့် ရှမ်းတောင်ဒေသ တို့ကို စစ်ဒေသ ၅ ခုဖြင့်ဖွဲ့စည်းလိုက်ခြင်းဖြစ် ကြောင်း သိရသည်။

“ကျနော်တို့ ကရင်နီဒေသပေါ့၊ ရှမ်းပြည်နယ်တောင်ပိုင်းအပါအဝင် စစ်ဒေသ ၅ ခုကို ဖွဲ့စည်းလိုက် တာ ဖြစ်ပါတယ်။ အဓိကကတော့ ကျစ်ကျစ်လစ်လစ်နဲ့ စစ်ဒေသအလိုက် စစ်ရေး လှုပ်ရှားမှုတွေကို ဆောင်ရွက်နိုင်ဖို့အတွက် ပြန်လည်ပြီးတော့ ဖွဲ့စည်းလိုက်တာဖြစ်ပါတယ်။ ကျနော်တို့ရှိရင်းစွဲ ဗျူဟာ တွေ၊ တပ်ရင်းတပ်ဖွဲ့တွေကို စစ်ရေးလိုအပ်ချက်အရ ကျစ်ကျစ်လစ်လစ်နဲ့ ပြန်ပေါင်းစည်းပြီးတော့မှ ဖွဲ့စည်းလိုက်တာဖြစ်ပါတယ်” ဟု KNDF ဗဟို သတင်းနှင့်ပြန်ကြားရေးဌာနတာဝန်ရှိသူက ရန်ကုန် ခေတ်သစ်သတင်း ဌာနထံသို့ ပြောကြားသည်။

ထိုသို့ ပြန်လည်ဖွဲ့စည်းမှုသည် တပ်ဖွဲ့၏ အမိန့်ပေးစီးဆင်းမှု၊ စည်းကမ်းနှင့် စနစ်တကျဖြစ်မှုများကို ပိုမိုခိုင်မာစေရန် ရည်ရွယ်သည့် မဟာဗျူဟာမြောက် ဆုံးဖြတ်ချက်တစ်ရပ်ဖြစ် ကြောင်း၊ ထို့ကြောင့် အဖွဲ့အသစ်အဖြစ် ပြန်လည်တည်ထောင်ထားသော KNDF တပ်ရင်းများအနေဖြင့် အရည်အသွေးမြင့် စွမ်းဆောင်ရည်များနှင့်အတူ စည်းကမ်းပြည့်ဝသော ဆောင်ရွက်မှုများကို ဆက်လက် အကောင်အ ထည် ဖော်သွားမည်ဖြစ်ပြီး ပြည်သူလူထု၏ ယုံကြည်မှုနှင့် အတူ အပြည့်အဝ ကြိုးစား လုပ်ဆောင်၍ အ ကောင်းဆုံးပုံစံဖြင့် ရပ်တည် ဆောင်ရွက်သွားမည်ဖြစ်ကြောင်း ကတိပြုထားသည်။

KNDF တပ်ရင်းအမှတ် ၈ နှင့် KNDF တပ်ရင်းအမှတ် ၅ တို့ကို ပူးပေါင်းညှိနှိုင်းကာ ကရင်နီ အမျိုး သားများကာကွယ်ရေးတပ် တပ်ရင်းအမှတ် ၇ (အမှတ် ၂ စစ်ဒေသ) အဖြစ် ပြန်လည်ဖွဲ့စည်းလိုက် ကြောင်း ယမန်နေ့ ဧပြီလ ၇ ရက်နေ့က KNDF တပ်ရင်း ၇ က တရား ဝင် ထုတ်ပြန်ခဲ့သည်။

ကရင်နီအမျိုးသားများ ကာကွယ်ရေးတပ် -KNDF သည် ၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် စစ်အာဏာမှုကြောင့် ပေါက်လာသည့် နွေဦးတော်လှန်ရေးတပ်ဖွဲ့ဖြစ်ပြီး တပ်ရင်းပေါင်း ၃၀ ကျော်ရှိ ကာ ၂၀၂၅ ခုနှစ်၊ ဒီဇင်ဘာလ ၁၅ ရက်နေ့က ဖွဲ့စည်းခဲ့သည့် နွေဦးတော်လှန်ရေး မဟာမိတ်တပ် ပေါင်းစု -SRA တွင်လည်း အဖွဲ့ဝင်တပ်ဖွဲ့တစ်ခုဖြစ်ကြောင်း သိရသည်။

The post ကရင်နီပြည်နှင့် ရှမ်းတောင်ဒေသတို့ကို စစ်ရေးလိုအပ်ချက်အရ KNDF က စစ်ဒေသ ၅ ခု ဖွဲ့စည်း appeared first on Khit Thit Media.

အကြမ်းဖက် စစ်ခေါင်းဆောင် မင်းအောင်လှိုင် သမ္မတရာထူး လုယူလိုက်မှုကြောင့် ဒဏ်ခတ်ပိတ်ဆို့အရေးယူမှုအသစ်များ တိုးမြှင့်လာနိုင်၍ ပြင်ဆင်မှုများ လုပ်ဆောင်ရန် သြစတြေးလျအခြေစိုက် ရင်းနှီးမြှုပ်နှံမှုဆိုင်ရာ ဒေတာပလက်ဖောင်းတစ်ခုဖြစ်သည့် Meyka AI PTY LTD ၏ Meyka က ဧပြီလ ၆ ရက်နေ့တွင် ဆန်းစစ် သတိပေးချက်ထုတ်ပြန်သည်။

စစ်ခေါင်းဆောင် မင်းအောင်လှိုင် သမ္မတဖြစ်လာခြင်းကြောင့် အရှေ့တောင်အာရှတွင် ပထဝီနိုင်ငံရေးအရ အဓိကစွန့်စားရမှု တစ်ခု ဖြစ်လာနေပြီဟု ဆိုသည်၊

စစ်တပ်က လွှမ်းမိုးထားသော လွှတ်တော်က ဧပြီလ ၆ ရက်နေ့ မင်းအောင်လှိုင်ကို သမ္မတအဖြစ် တင်မြှောက်ခဲ့ပြီး၊ မင်းအောင်လှိုင်၏ လူယုံ ရဲဝင်းဦးကို တပ်မတော်ကာကွယ်ရေးဦးစီးချုပ်အဖြစ် ရာထူးတိုးမြှင့်ပေးခဲ့သည်။

ယင်းအခြေအနေများကြောင့် မြန်မာနိုင်ငံအတွင်း တိုက်ပွဲများ ပိုမိုပြင်းထန်လာခြင်း၊ ပြုပြင်ပြောင်းလဲမှု အကန့်အသတ်ရှိခြင်းနှင့် နိုင်ငံတကာ၏ အသိ အမှတ် ပြုမှု ရရှိရန် ကြိုးပမ်းလာခြင်းတို့ကို မြင်တွေ့ရဖွယ် ရှိကြောင်း၊ ယူကေ (UK) ရင်းနှီး မြှုပ်နှံသူများအတွက်မူ ပိုမိုတင်းကျပ်သော စည်းမျဉ်းလိုက်နာမှုစစ် ဆေးခြင်း (Compliance checks)၊ မတည်ငြိမ်သော ကုန်သွယ်ရေးလမ်း ကြောင်းများနှင့် တရုတ်-မြန်မာ ဆက်ဆံရေးကို ပိုမိုစောင့်ကြည့်ရမည့် အခြေ အနေများ ရှိနိုင်ကြောင်း Meyka သတိပေးသည်။

မြန်မာနိုင်ငံအပေါ် ပိတ်ဆို့အရေးယူမှုဆိုင်ရာ စွန့်စားရမှုများ၊ ရင်းနှီးမြှုပ်နှံမှုအစုစု (Portfolio) အပေါ် သက်ရောက်မှုများနှင့် မိမိတို့၏အရင်းအနှီးကို ကာကွယ်ရန် လုပ်ဆောင်ရမည့် အဆင့်များကိုလည်း Meyka က အကြံပြုသည်။

မင်းအောင်လှိုင် သမ္မတ ရာထူး ရယူခြင်းသည် တရားဝင်မှု ရရှိရန်နှင့် လုံခြုံရေးနှင့် နိုင်ငံပိုင်လုပ်ငန်းများအပေါ် အမိန့်ပေးနိုင်စွမ်း ပိုမိုခိုင်မာစေရန် ရည်ရွယ်ခြင်းဖြစ်ပြီး လေ့လာဆန်းစစ်သူများကမူ ပဋိပက္ခဖြစ်ပွားမှု ပိုမိုများပြားလာနိုင်ကာ ဆွေးနွေးပွဲများအတွက် အကန့်အသတ်များသာ ရှိတော့မည်ဟု ရှုမြင်ကြသည်။

အဓိကကျသော ဒေသများတွင် ဖိအားပေးထိုးစစ်ဆင်မှုများနှင့် တင်းကျပ်သော ထိန်းချုပ်မှုများ ရှိလာနိုင်သည်ဟု မျှော်လင့်ရပြီး ထောက်ပံ့ရေးလမ်းကြောင်းများ၊ နယ်စပ်ကုန်သွယ်ရေးနှင့် ဆက်သွယ်ရေး လုပ်ငန်းများမှာလည်း ရံဖန်ရံခါ အနှောင့်အယှက်များနှင့် ရင်ဆိုင်ရနိုင်ကြောင်း၊ ထိုအချက်က လုပ်ငန်းဆောင်ရွက်မှု အချိန်ဇယားများကို မသေမချာဖြစ်စေပြီး အာမခံစရိတ်များကို မြင့်တက်စေကြောင်း၊ မူဝါဒအပြောင်းအလဲများ မကြာခဏ ဖြစ်ပေါ်နိုင်ကြောင်း၊ ယူကေရင်းနှီးမြှုပ်နှံသူများအနေဖြင့် ငွေပေးချေမှု၊ အကောက်ခွန်နှင့် ပါမစ်များတွင် ကြန့်ကြာမှုများရှိနိုင်သည်ဟု ယူဆထားသင့်ပြီး သင်္ဘောတင်ချိန်နှင့် ကုန်ပစ္စည်းလက်ကျန် အစီအစဉ်များတွင် ကြားခံအချိန် (Buffer) များ ထည့် သွင်းထားသင့်ကြောင်း Meyka က ဆက်လက်အကြံပြုထားသည်။

၂၀၂၁ ခုနှစ်မှစ၍ အနောက်နိုင်ငံများ၏ အရေးယူမှုများသည် စစ်တပ်နှင့် ဆက် နွှယ်သူများနှင့် နိုင်ငံပိုင်လုပ်ငန်းများအပေါ် အာရုံစိုက်ခဲ့ကြောင်း၊ ယူကေကုမ္ပဏီများအနေဖြင့် ယူကေပိတ်ဆို့အရေးယူမှုစာရင်း (UK Sanctions List) နှင့် အမေရိကန်၏ SDN စာရင်းတို့ကို ကုမ္ပဏီဒါရိုက်တာများနှင့် အကျိုးခံစားခွင့်ရှိသူပိုင်ရှင်များအထိ ပြန်လည်စစ်ဆေးသင့်ကြောင်း၊ မင်းအောင်လှိုင် သမ္မတဖြစ်လာ ခြင်းကြောင့် ပိတ်ဆို့ဒဏ်ခတ်မှု စာရင်းတွင် နာမည်သစ်များ ပိုတိုးလာနိုင်ပြီး ပို့ကုန်ထိန်းချုပ်မှုများ ပိုမိုတင်းကျပ်ကာ ဘဏ်များကလည်း ပိုမိုသတိ ထားလာဖွယ် ရှိသည်ဟု Meyka က ထပ်မံ သတိပေးသည်။

မြန်မာနှင့်ဆက်နွယ်နေသော လုပ်ငန်းများနှင့်ပတ်သက်၍ စိစစ်မှု (Due diligence) များကို မှတ်တမ်းတင်ထားရန်၊ စာရင်းစစ်ဆေးရာတွင် ခြေရာခံနိုင်ရန်နှင့် မြန်မာနိုင်ငံနှင့် ဆက်ဆံနေသော မိတ်ဖက်အားလုံးထံမှ စည်းမျဉ်းလိုက်နာမှုဆိုင်ရာ ဝန်ခံကတိပြုချက်များကို ရယူထားရန် လိုအပ်ကြောင်း Meyka က ဆိုသည်။

စီးပွားရေးအရ ဆက်ဆံနေသော မိတ်ဖက်အားလုံးသည် ကန့်သတ်ခံထားရသူများနှင့် ပိုင်ဆိုင်မှု သို့မဟုတ် ထိန်းချုပ်မှုဆိုင်ရာ ဆက်နွှယ်မှု ရှိမရှိ ပြန်လည် ဆန်းစစ်ရန်၊ ငွေလွှဲပြောင်းမှုများကို ဘဏ်များနှင့် ကြိုတင်ရှင်းလင်းထားရန်၊ Escrow (ကြားခံထိန်းသိမ်းငွေ) သို့မဟုတ် အတည်ပြုပြီးသော အကြွေး ဝယ် စာလွှာ (Letter of credit) များကို အသုံးပြုရေး စဉ်းစားရန်၊ အသုံးစရိတ် ခန့်မှန်းချက်များတွင် ပိုမိုမြင့်မားသော စရိတ်များနှင့် ကြာမြင့်သော အချိန်များကို ထည့်သွင်းတွက်ချက်ရန် လိုအပ်ကြောင်း၊ မူဝါဒပိုင်းဆိုင်ရာ မတည်ငြိမ်မှုကို တိုးပွားစေသဖြင့် လုပ်ငန်းဆက်လုပ်ရန် သို့မဟုတ် ရပ်ဆိုင်းရန် တိကျ သော စံသတ်မှတ်ချက်များ၊ ပိတ်ဆို့အရေးယူမှုဆိုင်ရာ အစပျိုးချက်များ (Triggers) နှင့် မြန်မာနိုင်ငံနှင့် မပတ်သက်သော အခြားကုန်သည်များကို ရှာဖွေထားသင့်ကြောင်း Meyka က ထောက်ပြသည်။

တရုတ်နိုင်ငံအနေဖြင့် ကုန်သွယ်ရေးလမ်းကြောင်းများနှင့် စွမ်းအင်ဆက်သွယ်မှုများကို ကာကွယ်ရန် ကြိုးပမ်းနေသဖြင့် တရုတ်-မြန်မာ ဆက်ဆံရေးသည် ပိုမိုနက်ရှိုင်းလာဖွယ် ရှိကြောင်း၊ တရုတ်နိုင်ငံက မြန်မာနိုင်ငံကို အပြည့်အဝ ထောက်ခံအား ပေးခြင်းထက် သံတမန်ရေးအရ အကာအကွယ်ပေးခြင်းနှင့် ရွေးချယ်ထားသော စီးပွားရေးဆိုင်ရာ ပံ့ပိုးမှုများကိုသာ ပေးဖွယ်ရှိကြောင်း၊ ထိုအချက်က မြန်မာနိုင်ငံကို အထီး ကျန်ဖြစ်မှုမှ လျှော့ချနိုင်သော်လည်း ဗြိတိန်ကုမ္ပဏီများအတွက်မူ ပိတ်ဆို့အရေးယူမှု စွန့်စားရမှုများမှ ကင်းလွတ်သွားစေမည် မဟုတ်ကြောင်း Meyka က ဆိုသည်။

မင်းအောင်လှိုင် သမ္မတဖြစ်လာခြင်းကြောင့် အခြေခံအဆောက်အအုံနှင့် ထောက် ပံ့ပို့ဆောင်ရေး ကဏ္ဍများတွင် ပူးပေါင်းဆောင်ရွက်မှု တိုးလာနိုင်သော်လည်း အနောက်နိုင်ငံများ၏ ဈေးကွက်များသည် တင်းကျပ်သော စည်း မျဉ်းများနှင့် ဂုဏ်သိက္ခာပိုင်းဆိုင်ရာ စိစစ်မှုများကို ဆက်လက်ထိန်းသိမ်းထားမည်ဖြစ်ကြောင်း Meyka က ဆိုသည်။

ကုန်စည်များ၊ သင်္ဘောအာမခံနှင့် နယ်စပ်လုပ်ငန်းများတွင် ရင်းနှီးမြှုပ်နှံထားသော ရန်ပုံငွေများကို စောင့်ကြည့်ရန်၊ တရုတ်-မြန်မာ ဆက်ဆံရေးသည် ဘင်္ဂလားပင်လယ်အော်မှ ယူနန်သို့ သွားသော လမ်းကြောင်းများကို ပြောင်းလဲစေနိုင်ပြီး ကုန်စည်ပို့ဆောင်ခနှင့် စွန့်စားရမှု ဈေးနှုန်းများကို ပြောင်းလဲစေနိုင်ကြောင်း၊ ရှယ်ယာရှင်များအနေဖြင့် မြန်မာနိုင်ငံမှ ကုန်ကြမ်းယူသူများ သို့မ ဟုတ် မြန်မာနိုင်ငံကို ဖြတ်သန်းသွားရသည့် ထောက်ပံ့သူများကို ပြန်လည်အကဲဖြတ်ရန်လိုအပ်ကြောင်း၊ အကယ်၍ မြန်မာနိုင်ငံတွင် ပိုမိုကျယ်ပြန့်သော တိုက်ပွဲများ ဖြစ်လာပါက ဒေသတွင်း ထောက်ပံ့ပို့ဆောင်ရေး စရိတ်များ မြင့်တက်လာနိုင်သည်ကို မျှော်လင့်ထားရန် လိုအပ်ကြောင်း Meyka က တွက်ချက်ခန့်မှန်းထားသည်။

ထို့ကြောင့် လာမည့် ရက် ၃၀ အတွင်း ဖောက်သည်များ၊ ထောက်ပံ့သူများ၊ ဘဏ်များနှင့် အာမခံကုမ္ပဏီများအကြား ပိတ်ဆို့အရေးယူမှုဆိုင်ရာ စစ်ဆေးမှုများကို ပြုလုပ်သင့်ကြောင်း၊ စာချုပ်ပါ အချက်အလက်များတွင် ရုတ်တရက် အပြောင်းအလဲဖြစ်လာလျှင် ရပိုင်ခွင့်များ (Snap-back rights) နှင့် မလွှဲမရှောင်သာသော အခြေအနေ (Force majeure) အချက်များကို မွမ်းမံသင့်ကြောင်း၊ အစားထိုး သင်္ဘောလမ်းကြောင်းများနှင့် ဆိပ်ကမ်းများကို ကြိုတင်သတ်မှတ်ထားသင့်ကြောင်း၊ မြန်မာနိုင်ငံအတွင်း စာရွက်စာတမ်းစစ်ဆေးမှုများ ပိုမိုကြာမြင့်နိုင်သည်ဟု ယူဆကာ ကုန်ပစ္စည်းပို့ဆောင်ချိန်နှင့် ငွေပေးချေမှု အချိန် များကို တိုးမြှင့်ထားရန် လိုအပ်ကြောင်း အကြံပြုထားသည်။

ကုမ္ပဏီများအနေဖြင့် ကြန့်ကြာနေသော ငွေလက်ခံဖြတ်ပိုင်းများနှင့် မြင့်မား သော လည်ပတ်အရင်းအနှီး လိုအပ်ချက်များအတွက် ဗြိတိသျှပေါင် (GBP) ငွေသားအရန်သင့်မှုကို ပုံဖော်တွက်ချက်ထားသင့်ကြောင်း၊ အခြေအနေ သုံးရပ်အတွက် ပြင်ဆင်ထားသင့်ပြီး အခြေအနေ ပိုမိုဆိုးရွားလာခြင်း၊ တုံ့ဆိုင်းနေခြင်း နှင့် အတိုင်းအတာတစ်ခုအထိ လျော့ပါးသွားခြင်းများ ဖြစ်ပေါ်နိုင်ကြောင်း၊ အခြေအနေ တစ်ခုချင်းစီကို ပိတ်ဆို့အရေးယူမှုအသစ်၊ ဘဏ်လုပ်ငန်း ကန့်သတ်ချက် သို့မဟုတ် နယ်စပ်ပဋိပက္ခများကဲ့သို့သော အစပျိုးချက် (Triggers) များဖြင့် ချိတ်ဆက်ထားရန် အကြံပြုသည်။

ကန့်သတ်ခံထားရသော ကဏ္ဍများ သို့မဟုတ် အဖွဲ့အစည်းများနှင့် မပတ်သက်သော စွန့်စားရမှုနည်းသည့် ဝန်ဆောင်မှုများအတွက် “အစိမ်းရောင်အချက်ပြ” နှင့် လုပ်ငန်းမှ နုတ်ထွက်ရမည့် “အနီရောင်စည်းမျဉ်း” များကို တိကျစွာ သတ် မှတ်ထားရန်လည်း အကြံပြုထားသည်။

မြန်မာနိုင်ငံ၏ အခြေအနေများက ယူကေရင်းနှီးမြှုပ်နှံသူများအတွက်မူ လက် တွေ့ကျသော သက် ရောက်မှုမှာ ပိုမိုမြင့်မားသော မြန်မာနိုင်ငံဆိုင်ရာ ပိတ်ဆို့အရေးယူမှု စွန့်စားရမှုများ၊ ပိုမိုတင်းကျပ်သော ဘဏ်နှင့်ဘဏ္ဍာရေးဆိုင်ရာ စောင့်ကြည့်မှု ရှိလာနိုင်ကြောင်း သိရှိရသည်။

စစ်တပ်နှင့် ဆက်နွှယ်သော စွမ်းအင်၊ သတ္တုတွင်း၊ သစ်တော၊ ကျောက်မျက်၊ ကာကွယ်ရေးနှင့် ပို့ဆောင်ရေး ဝန် ဆောင်မှုများသည် အမြင့်ဆုံး စွန့်စားရမှု ရှိနေကြောင်း၊ ဒါရိုက်တာများ၊ အကျိုးခံစားခွင့်ရှိသူများနှင့် ကြားခံဆောင်ရွက်သူများကို သေ ချာ စွာ စိစစ်ရန် လိုအပ်ကြောင်း၊ အာမခံသူများ၊ သင်္ဘောကုမ္ပဏီများနှင့် ဘဏ်များသည်လည်း စည်းမျဉ်းများကို ပိုမိုတင်းကျပ်လာဖွယ်ရှိကြောင်း Meyka က အကြံပြုခန့်မှန်းထားသည်။

The post စစ်ခေါင်းဆောင် မင်းအောင်လှိုင် သမ္မတရာထူး လုယူလိုက်မှုကြောင့် ဒဏ်ခတ်ပိတ်ဆို့အရေးယူမှုအသစ်များ တိုးမြှင့်လာနိုင်ဟု Meyka က သတိ ပေး appeared first on Khit Thit Media.

ရန်ကုန်၊ ဧပြီ ၇

အကြမ်းဖက် မင်းအောင်လှိုင်က အတင်းလုယူထားသော သမ္မတအဖြစ် ဧပြီလ ၁၀ ရက်နေ့တွင် ကျမ်း ကျိန်ဆိုမည်ဖြစ်ပြီး မင်းအောင်လှိုင်၏ကျမ်းကျိန်ပွဲသို့ နိုင်ငံတကာမှ ခေါင်းဆောင်များ တက်ရောက်ရန် လိုက်လံဖိတ်ကြားနေကြောင်း စစ်တပ်သတင်းရင်းမြစ်၏ ပြောဆိုချက်နှင့် နိုင်ငံတကာသတင်းများအရ သိရှိရသည်။

မင်းအောင်လှိုင်က ဧပြီလ ၁၀ ရက်နေ့ ၎င်း၏ သမ္မတအဖြစ် ကျမ်းသစ္စာကျိန်ဆိုပွဲသို့ ထိုင်း၊ တရုတ်၊ ရုရှား၊ အိန္ဒိယ၊ ဘယ်လာရုစ်၊ ကမ္ဘောဒီးယား၊ လာအို၊ ဗီယက် နမ် အပါအဝင် အာဆီယံ၊ ကုလသမဂ္ဂ နှင့်မိတ်ဖက်နိုင်ငံများမှ ခေါင်း ဆောင်များ တက်ရောက်ရန် ဖိတ်ကြားထားကြောင်း သိရှိရသည်။

အကြမ်းဖက် မင်းအောင်လှိုင်က ဧပြီ ၁၀ ရက်နေ့ သမ္မတအဖြစ် ကျမ်းသစ္စာ မကျိန် ဆိုမီ ဝန်ကြီး၊ဒုဝန်ကြီးများ အဆိုပြုခန့်ထားခြင်း၊ တိုင်း/ပြည်နယ်ဝန်ကြီး ချုပ်များ အဆိုပြု ခန့်ထားခြင်း၊ နိုင်ငံအဆင့် အဖွဲ့အစည်းများ ဖွဲ့ စည်းခြင်းများ လုပ်ဆောင်လျက်ရှိကြောင်း သိရှိရသည်။

မင်းအောင်လှိုင်၏ သမ္မတ ကျမ်းသစ္စာကျိန်ဆိုပွဲသို့ အိန္ဒိယနိုင်ငံဘက်မှ ပြည်ပရေးရာ လက်ထောက် အငယ်တန်းဝန်ကြီး ကာတီဗာဒန်ဆင်း ၊ ထိုင်းနိုင်ငံဘက်မှ ထိုင်းနိုင်ငံခြားရေးဝန်ကြီးဟောင်း ပန်ပရီ ဘဟီဒါနုကရာ (Parnpree Bahiddha-Nukara)တို့ တက်ရောက်ကြမည်ဖြစ်ကြောင်း နိုင်ငံတကာ သတင်းများအရ သိရှိရသည်။

The post အကြမ်းဖက် မင်းအောင်လှိုင်က အတင်းလုယူထားသော သမ္မတအဖြစ် ဧပြီလ ၁၀ ရက်နေ့တွင် ကျမ်းကျိန်ဆိုမည်ဖြစ်ပြီး ကျမ်းကျိန်ပွဲသို့ နိုင်ငံတကာမှ ခေါင်းဆောင်များ တက်ရောက်ရန် လိုက်လံဖိတ်ကြားနေ appeared first on Khit Thit Media.

အင်ဒိုနီးရှားတွင် အကြမ်းဖက် စစ်ခေါင်းဆောင် မင်းအောင်လှိုင်ကို ရိုဟင်ဂျာ လူမျိုးတုံးသတ်ဖြတ်မှုဖြင့် တရားစွဲဆိုမှုကို အင်ဒိုနီးရှားအာဏာပိုင်များက ဥပဒေသစ်အရ ပထမဆုံးအကြိမ် လက်ခံအမှုဖွင့်လှစ်လိုက်ကြောင်း သိရှိရသည်။

ယနေ့ ဧပြီလ ၆ ရက်နေ့ မင်းအောင်လှိုင်ကို ရိုဟင်ဂျာ လူမျိုးတုံးသတ်ဖြတ်မှုဖြင့် အရေးယူပေးရန် ရိုဟင်ဂျာ ၁ ဦး နှင့် အင်ဒိုနီးရှားနိုင်ငံမှ ထင်ရှားကျော်ကြားသူလူပုဂ္ဂိုလ် ၁၀ ဦးတို့က အင်ဒိုနီးရှားနိုင်ငံ၏ ရာဇဝတ်ကျင့်ထုံးဥပဒေသစ်အရ တရားဝင်ဖိုင်တွဲ တင်သွင်းတိုင်ကြားမှုကို အင်ဒိုနီးရှားအာဏာပိုင်များက လက်ခံလိုက်ခြင်းဖြစ်သည်။

အဆိုပါတရားစွဲဆိုမှုသည် မင်းအောင်လှိုင်က ၎င်းကိုယ်တိုင် စိတ်ကြိုက်ခြယ်လှယ်ထားသည့် ရွေး ကောက်ပွဲအပြီး ဖွဲ့စည်းလိုက်သော လွှတ်တော်မှတစ်ဆင့် သမ္မတအဖြစ် ရွေးချယ်တင်မြှောက်ခံရပြီး ရက်ပိုင်းအတွင်းမှာပင် ပေါ်ပေါက်လာခြင်းဖြစ်သည်။

အကြမ်းဖက်စစ်တပ်၏ ရိုဟင်ဂျာ လူမျိုးတုံးသတ်ဖြတ်မှုအတွင်း အသက်ဘေးမှ လွတ်မြောက်လာသူ Yasmin Ullah က “အင်ဒိုနီးရှားရဲ့ ရာဇဝတ်ကျင့်ထုံးဥပဒေသစ်အောက်မှာ ကမ္ဘာလုံးဆိုင်ရာ တရား စီရင်ပိုင်ခွင့် (Universal Jurisdiction) နဲ့ တင်သွင်းတဲ့အမှုကို ပထမဆုံးအကြိမ် တရားဝင် လက်ခံလိုက်တာ ဖြစ်ပါတယ်။ ဒါဟာ တရားမျှတမှုနဲ့ တာဝန်ခံမှုဆီ သွားနေတဲ့ ရိုဟင်ဂျာလူမျိုးတွေရဲ့ ခရီးရှည်မှာ သမိုင်းဝင် မှတ်တိုင်တစ်ခုပါပဲ။ ကျွန်မတို့ လူမျိုးတွေကို သုတ်သင်ဖို့ စီစဉ်ခဲ့တဲ့ သူနဲ့ အခြားသော အစုလိုက်အပြုံလိုက် သတ်ဖြတ်မှုတွေကို ကျူးလွန်ခဲ့သူကို ဘာအပြစ်ဒဏ်မှ မခံရဘဲ သမ္မတအိမ်တော်ထဲမှာ သက်သောင့်သက်သာ ထိုင်နေခွင့် မပေးနိုင်ပါဘူး။”ဟု ပြောဆိုသည်။

အင်ဒိုနီးရှား ရှေ့နေချုပ်ဟောင်း Marzuki Darusman ကလည်း အဆိုပါအမှုတွဲတွင် ပါဝင်လက်မှတ်ရေးထိုးထားပြီး မင်းအောင်လှိုင်အား တရားစီရင်နိုင်ရန် စုံစမ်းစစ်ဆေးမှုများ ချက်ချင်းစတင်ရန် အာဏာပိုင်များကို တိုက်တွန်းထားသည်။

၎င်းက “မြန်မာနိုင်ငံမှာ ပြစ်ဒဏ်ကင်းလွတ်ခွင့် ရနေတာတွေ အဆုံးသတ်ဖို့ အင်ဒိုနီးရှားမှာ ပြတ်ပြတ်သားသား အရေးယူဆောင်ရွက်ရမယ့် တာဝန်ရှိပါတယ်” ဟု ဆိုသည်။

ယင်းအမှုကို ဦးဆောင်လိုက်ပါမည့် Themis Indonesia မှ ရှေ့နေ Feri Amsari က အင်ဒိုနီးရှားဥပဒေသစ်သည် လူမျိုးတုံးသတ်ဖြတ်မှုကဲ့သို့ ရာဇဝတ်မှုမျိုးအတွက် မည်သည့်နေရာတွင် ကျူးလွန်သည်ဖြစ်စေ၊ မည်သူက ကျူးလွန်သည်ဖြစ်စေ အရေး ယူနိုင်သည့် အခွင့်အာဏာရှိကြောင်း ထုတ်ဖော်ပြောဆိုသည်။

“ဥပဒေသစ်ဟာ လူမျိုးတုံးသတ်ဖြတ်မှုအတွက် အင်ဒိုနီးရှားရဲ့ ကမ္ဘာလုံးဆိုင်ရာ တရားစီရင်ပိုင်ခွင့်ကို ရှင်းရှင်းလင်းလင်း ဖော်ပြထားပါတယ်။ ကျူးလွန်သူ ဒါမှမဟုတ် ခံရသူတွေက အင်ဒိုနီးရှားနိုင်ငံသား မဟုတ်တာ၊ အမှုဖြစ်ပွားတဲ့နေရာက အင်ဒိုနီးရှားမှာ မဟုတ်တာတွေက အရေးမကြီးပါဘူး။ ကျွန်တော်တို့မှာ ခိုင်လုံတဲ့ သက်သေအထောက်အထားတွေ ရှိပါတယ်။ မင်းအောင်လှိုင်ဟာ ရိုဟင်ဂျာ အမျိုးသား၊ အမျိုးသမီးတွေကို စနစ်တကျ သတ်ဖြတ်၊ မုဒိမ်းကျင့်ဖို့နဲ့ သူတို့ရဲ့ လူနေမှုဘဝတွေကို ဖျက်ဆီးပစ်ဖို့ စစ်တပ်ကို အမိန့်ပေးခဲ့သူ ဖြစ်ပါတယ်။”ဟု ၎င်းက ရှင်းပြသည်။

Myanmar Accountability Project (MAP) ၏ ဒါရိုက်တာ Chris Gunness ကလည်း မြန်မာနိုင်ငံသည် ငွေလိမ်ဂိုဏ်းများ၊ မူးယစ်ဆေးဝါးနှင့် လူကုန်ကူးမှုများ၏ ဗဟိုချက်ဖြစ်လာပြီး ဒေသတွင်း ဒုက္ခသည်ပြဿနာများကိုပါ ဖြစ်ပေါ်စေနေကြောင်း ထောက်ပြသည်။

“အာဆီယံအတွင်းမှာ ကမ္ဘာလုံးဆိုင်ရာ တရားစီရင်ပိုင်ခွင့် ခေတ်ဦး ရောက်လာပါပြီ။ မင်းအောင်လှိုင်ကို အရေးယူဖို့ အမှုတွဲကလည်း အရင်ကထက် ပိုပြီးခိုင်မာနေပါတယ်။ မြန်မာနိုင်ငံဟာ ဒေသတွင်းအတွက် အရှက်ရစရာ ဖြစ်လာနေပြီး အတုအယောင် ရွေးကောက်ပွဲက ပြဿနာတွေကို ပိုပြီး နက်ရှိုင်းစေမှာပါ။ ဒါကြောင့် ချဉ်းကပ်ပုံအသစ်နဲ့ ဆောင်ရွက်ဖို့ အချိန်တန်ပါပြီ။”ဟု သူက ပြောသည်။

ယခုအမှုသည် အာဆီယံဒေသတွင်းတွင် မြန်မာစစ်ခေါင်းဆောင်အား လူမျိုးတုံးသတ်ဖြတ်မှုဖြင့် တရားဥပဒေအရ အရေးယူရန် ကြိုးပမ်းသည့် အရှိန်အဟုန်အမြင့်ဆုံး ဖြစ်စဉ်တစ်ခုပင်ဖြစ်သည်။

The post အင်ဒိုနီးရှားတွင် မင်းအောင်လှိုင်ကို လူမျိုးတုံးသတ်ဖြတ်မှုဖြင့် တရားစွဲဆိုမှုကို အင်ဒိုနီးရှားအာဏာပိုင်များက ဥပဒေသစ်အရ ယနေ့ ပထမဆုံးအကြိမ် လက်ခံ appeared first on Khit Thit Media.

ရဲချုပ်ဟောင်း အောင်နိုင်သူကို ရန်ကုန်တိုင်းဝန်ကြီးချုပ်၊ ဗိုလ်မှူးချုပ်အောင်ဝင်းသန်းကို မွန်ပြည်နယ်ဝန်ကြီးချုပ်နှင့် မန္တလေးတိုင်းဝန်ကြီးချုပ်အဖြစ် လက်ရှိ မျိုးအောင်ကို ပြန်ခန့်လိုက်ပြီး အကြမ်းဖက် တိုင်း/ပြည်နယ် ဝန်ကြီးချုပ် နေရာများကို ကြံ့ဖွတ်များ၊ စစ်ဗိုလ်ဟောင်း၊ ရဲအရာရှိဟောင်းများကို အကြမ်းဖက် မင်းအောင်လှိုင် ခန့်အပ်ထားကြောင်း သိရှိရသည်။

ယနေ့ အကြမ်းဖက်ရန်ကုန်တိုင်းလွှတ်တော်အစည်းအဝေးတွင် အကြမ်းဖက် ရန်ကုန်တိုင်းဝန်ကြီးချုပ်အဖြစ် ကိုးကိုးကျွန်းမြို့နယ်မှ ရန်ကုန်တိုင်းလွှတ်တော်အမတ်အဖြစ် ကြံ့ဖွတ်ကိုယ်စားပြု ရွေးချယ်ခံထားရသော ရဲချုပ်ဟောင်း အောင်နိုင်သူကို မင်းအောင်လှိုင်က ခန့်အပ်အဆိုပြုပြီး အကြမ်းဖက် ရန်ကုန်တိုင်း လွှတ်တော်က အတည်ပြုကြောင်း သိရှိရသည်။

အလားတူ မန္တလေးတိုင်းဝန်ကြီးချုပ်နေရာကို လက်ရှိ ဝန်ကြီးချုပ် မျိုးအောင်ကိုပင် မင်းအောင်လှိုင်က အဆိုပြုခန့်အပ်ခဲ့ပြီး မွန်ပြည်နယ်ဝန်ကြီးချုပ်နေရာကိုမူ စစ်တပ်၏ မွန်ပြည်နယ် လွှတ်တော်ကိုယ်စား လှယ် ဗိုလ်မှူးချုပ် အောင်သန်းဝင်းကို မင်းအောင်လှိုင်က အဆိုပြု ခန့်အပ်ကြောင်း သိရှိရသည်။

ပဲခူးတိုင်းဝန်ကြီးချုပ်အဖြစ်လည်း လက်ရှိဝန်ကြီးချုပ်လည်းဖြစ်။ ရဲအရာရှိဟောင်းဖြစ်သူ မျိုးဆွေဝင်းကိုပင် ဆက်လက် ခန့်အပ်ခဲ့ပြီး ဧရာဝတီတိုင်း ဝန်ကြီးချုပ်အဖြစ် ကြံ့ဖွတ်ပါတီ၏ ဧရာ၀တီတိုင်း လွှတ်တော်အမတ် အေးကျော်ကို ခန့်အပ်ကြောင်း သိရှိရသည်။

ကချင်ပြည်နယ် ဝန်ကြီးချုပ်အဖြစ် လက်ရှိဝန်ကြီးချုပ်ဖြစ်သူလည်းဖြစ်၊ ကြံ့ဖွတ်ပါတီ၏ မြစ်ကြီးနားမြို့ အခြေပြု ကချင်ပြည်နယ်လွှတ်တော်ကိုယ်စားလှယ်ဖြစ်သူ ခက်ထိန်နန်ကို မင်းအောင်လှိုင်က ခန့်အပ်ခဲ့သည်။

ကရင်ပြည်နယ်ဝန်ကြီးချုပ်နေရာကိုလည်း လက်ရှိ ဝန်ကြီးချုပ်လည်းဖြစ်၊ ကြံ့ဖွတ်ပါတီ၏ ကရင် ပြည်နယ် လွှတ်တော်ကိုယ်စားလှယ်လည်းဖြစ်သူ စောမြင့်ဦးကိုပင် မင်းအောင်လှိုင်က ပြန်လည် ခန့် အပ်ခဲ့သည်။

ရှမ်းပြည်နယ်ဝန်ကြီးချုပ်ကိုလည်း ကြံ့ဖွတ်ပါတီ၏ ရပ်စောက်မြို့နယ် ကိုယ်စားလှယ် စိုင်းထိန်စိုးကို ရှမ်းပြည်နယ်ဝန်ကြီးချုပ်အဖြစ် မင်းအောင်လှိုင်က ခန့်အပ်ကြောင်း သိရှိရသည်။

အကြမ်းဖက် မင်းအောင်လှိုင်က ပြည်နယ်နှင့်တိုင်းဝန်ကြီးချုပ်နေရာများကို လူဟောင်းများ၊ ကြံ့ဖွတ်များ၊ စစ်အရာရှိများ၊ စစ်အရာရှိဟောင်းများနှင့်ရဲအရာရှိဟောင်းများကိုသာ ဦးစားပေးခန့်ထားလျက်ရှိပြီး တိုင်းရင်းသားပါတီများမှ ပြည်နယ်/တိုင်း လွှတ်တော်ကိုယ်စားလှယ်များကို ဝန်ကြီးချုပ်များအဖြစ် ခန့်အပ်ခြင်းမပြုသည်ကိုတွေ့ရှိရသည်။

The post ရဲချုပ်ဟောင်း အောင်နိုင်သူကို ရန်ကုန်တိုင်းဝန်ကြီးချုပ်၊ ဗိုလ်မှူးချုပ်အောင်ဝင်းသန်းကို မွန်ပြည်နယ်ဝန်ကြီးချုပ်နှင့် မန္တလေးတိုင်းဝန်ကြီးချုပ်အဖြစ် လက်ရှိ မျိုးအောင်ကို ပြန်ခန့်၊ အကြမ်းဖက် တိုင်း/ပြည်နယ်ဝန်ကြီး ချုပ်များအဖြစ် ကြံ့ဖွတ်များနှင့်စစ်ဗိုလ်ဟောင်း၊ရဲဟောင်းများကို မင်းအောင်လှိုင်က ခန့်အပ် appeared first on Khit Thit Media.

မြန်မာနိုင်ငံတွင် စစ်အာဏာသိမ်းမှုကြောင့် ပေါ်ပေါက်လာသော ရှုပ်ထွေးသည့် နိုင်ငံရေးပြဿနာများကို ဖြေရှင်းရာတွင် လူထုခေါင်းဆောင် ဒေါ်အောင်ဆန်းစုကြည်နှင့် တွေ့ဆုံညှိနှိုင်းဆွေးနွေးမှုများ မရှိဘဲ မည်သို့မျှ ပြေလည်ရေးလမ်းစ ရရှိနိုင်မည်မဟုတ်ကြောင်း အမျိုးသားဒီမိုကရေစီအဖွဲ့ချုပ် (NLD) က သဘောထားထုတ်ပြန်ချက်တစ်ရပ် ယနေ့ ထုတ်ပြန်သည်။

လက်ရှိမြန်မာ့နိုင်ငံရေး၏ အဓိကသော့ချက်မှာ NLD ပါတီဥက္ကဋ္ဌ ဒေါ်အောင်ဆန်းစုကြည်ဖြစ်ပြီး သူမ၏ ပါဝင်ပတ်သက်မှုမရှိဘဲ ဆောင်ရွက်သည့် မည်သည့်ဖြေရှင်းနည်းမျိုးမဆို ထိရောက်သည့်ရလဒ် ထွက်ပေါ်လာမည်မဟုတ်ကြောင်း အလေးအနက် ဖော်ပြထားသည်။

“ယခင်ကတည်းက ထုတ်ပြန်ခဲ့တဲ့ အဖွဲ့ချုပ်သဘောထားပါ။ အဖွဲ့ ချုပ်ရဲ့သဘောထားကို နိုင်ငံတ ကာနဲ့ ပြည်သူလူထုအားလုံး သိစေလိုပါတယ်။ အခုလောလောဆယ် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံ တော်သမ္မတကြီး ဦးဝင်းမြင့်တို့လွတ်မြောက်ရေးလှုပ်ရှားမှုကတော့ ငြိမ်းချမ်းစွာနဲ့ နိုင်ငံရေးဖြစ်စဉ်ကို လိုလားသူတွေရဲ့ လှုပ်ရှားမှုလို့ မြင်ပါတယ်” ဟု စမ်းချောင်းမြို့နယ် အမျိုးသားဒီမိုကရေစီအဖွဲ့ချုပ် ဒုတိယဥက္ကဌ ဦးဘိုဘိုဦးက ရန်ကုန်ခေတ်သစ်သတင်းဌာနထံသို့ ပြောကြားသည်။

ပြီးခဲ့သည့် ဖေဖော်ဝါရီလ ၂၈ ရက်နေ့တွင် Zoom မှတဆင့် အမျိုးသားဒီမိုကရေစီအဖွဲ့ချုပ် ဒုတိယ ဗဟိုကော်မတီ၏ ကြားကာလ သတ္တမအကြိမ်အစည်း အဝေးတွင် စစ်အာဏာသိမ်းမှုကြောင့် ပေါ်ပေါက်လာသော မြန်မာ့နိုင်ငံရေးပြဿနာများကို ဖြေရှင်းရာတွင် အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နှင့်တွေ့ဆုံဆွေးနွေးမှုမပါဝင်ဘဲ ပြေလည်ရေးလမ်းစရရှိနိုင်မည်မဟုတ်ဟု ယုံကြည်သောကြောင့် မတရားဖမ်းဆီး ခံထားရသော ဒေါ်အောင်ဆန်းစုကြည်အပါအဝင်နိုင်ငံရေး အကျဉ်းသားများအားလုံး ခြွင်းချက်မရှိ အမြန်ဆုံး လွတ်မြောက်ရေးကို စီမံချက်များရေးဆွဲဆောင်ရွက်ရန်သွားရန် အတည်ပြုဆုံးဖြတ်ခဲ့သည်။

မြန်မာနိုင်ငံအတွင်း ဖြစ်ပေါ်နေသည့် ပဋိပက္ခများ၊ လူမှုစီးပွားပျက်စီးမှုများနှင့် နိုင်ငံရေးမတည်ငြိမ်မှုများကို ရေရှည်တည်တံ့သော နည်းလမ်းဖြင့် ဖြေရှင်းနိုင်ရန်အတွက် လူထုက ယုံကြည်ကိုးစားသည့် ခေါင်းဆောင်များနှင့် ထိပ်သီးအဆင့် တွေ့ဆုံဆွေးနွေးမှုများ အရေးတကြီး လိုအပ်နေကြောင်း ပြည်တွင်း အခြေစိုက် နိုင်ငံရေးအင်အားစုများက သုံးသပ်ပြောဆိုသည်။

ပြည်သူလူထု၏ တစ်ခဲနက်ထောက်ခံမှုကို ရရှိထားသည့် ဒေါ်အောင်ဆန်းစုကြည်ကို နိုင်ငံရေးဖြစ်စဉ်များမှ ဖယ်ထုတ်ထားခြင်းသည် လက်ရှိအကျပ် အတည်းကို ပိုမိုဆိုးရွားစေရုံသာမကဘဲ ပြည်တွင်း၊ ပြည်ပက လိုလားနေသည့် ငြိမ်းချမ်းသော အဖြေရှာမှုကိုလည်း နှောင့်နှေးစေကြောင်း ပြည်တွင်း အခြေ စိုက် နိုင်ငံရေးအင်အားစုများက ဆက်လက်ပြောဆိုသည်။

နိုင်ငံတကာအသိုင်းအဝိုင်းအနေဖြင့်လည်း မြန်မာ့အရေးကို ဖြေရှင်းရာ၌ အနှစ်သာရရှိသော ဆွေးနွေးပွဲများ ပေါ်ပေါက်လာစေရန်နှင့် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများ လွတ် မြောက်ရေးအတွက် ပိုမိုတက်ကြွစွာ ဝိုင်းဝန်းတွန်းအားပေးရန် ပြည်တွင်းနိုင်ငံရေးအင်အားစုက တောင်းဆိုထားသည်။

လက်ရှိတွင် ဒေါ်အောင်ဆန်းစုကြည်သည် နေပြည်တော်၌ ထိန်းသိမ်းခံထားရဆဲဖြစ်ပြီး သူမနှင့် တွေ့ဆုံခွင့်ရရှိရေးမှာ နိုင်ငံတကာသံတမန်များနှင့် အတိုက် အခံအင်အားစုများအကြား အဓိကတောင်းဆိုချက်တစ်ခု ဖြစ်နေဆဲဖြစ်သည်။

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် အကြမ်းဖက် မင်းအောင်လှိုင်က ၂၀၂၀ ရွေးကောက်ပွဲတွင် မဲမသမာမှု ရှိသည်ဟုဆိုကာ စစ်အာဏာသိမ်းခဲ့ပြီး လူထုခေါင်းဆောင် ဒေါ်အောင်ဆန်းစုကြည်နှင့် သမ္မ တ ဦးဝင်းမြင့်တို့ကို မတရားအကျဉ်းချထားခဲ့သည်။

ယင်းနောက် စစ်အာဏာသိမ်း​ပြီး ၅ နှစ်အကြာ အတုအယောင်ရွေးကောက်ပွဲ ကျင်းပ၍ အတုအယောင် လွှတ်တော်က​ ရွေးကောက် တင်မြှောက်သော အကြမ်းဖက် သမ္မတအဖြစ် ရာထူးရယူထားသည်။

ဓာတ်ပုံ- အီးပီအေ။ (ပုံအဟောင်းကို အသုံးပြုထားပါသည်။)

The post မြန်မာ့နိုင်ငံရေးအကျပ်အတည်းပြေလည်ရန် ဒေါ်အောင်ဆန်းစုကြည်နှင့် တွေ့ဆုံဆွေးနွေးမှုမပါဘဲ လမ်းစမရနိုင်ဟု NLD ပါတီ ထုတ်ပြန် appeared first on Khit Thit Media.

NUG အစိုးရနှင့် ကြားကာလ မကွေးဖက်ဒရယ်ယူနစ်အစိုးရတို့ ယနေ့ ဧပြီလ ၂ ရက်နေ့တွင် တွေ့ဆုံခဲ့ပြီး ပြဿနာပိုမိုကြီးထွားစေသည့် ဆောင်ရွက်ချက်များကို ထိန်းကျောင်းကြရန် ဆွေးနွေးခဲ့ကြောင်း အမျိုးသားညီညွတ်ရေးအစိုးရက ထုတ်ပြန်ထားသည်။

လက်ရှိတွင် မကွေးဖက်ဒရယ်ယူနစ် ပခုက္ကူခရိုင်၊ မြိုင်နှင့် ပေါက်မြို့နယ်အတွင်းရှိ စီမံခန့်ခွဲမှုဆိုင်ရာ ကိစ္စရပ်များနှင့် ပတ်သက်ပြီး ယနေ့ ဧပြီလ ၂ ရက်နေ့တွင် အမျိုးသားညီညွတ်ရေးအစိုးရတာဝန်ရှိသူများနှင့် ကြားကာလမကွေးဖက်ဒရယ်ယူနစ်အစိုးရတာဝန်ရှိသူတို့ Online မှ တဆင့်တွေ့ဆုံဆွေးနွေးခဲ့ကြခြင်းဖြစ်ကြောင်း သိရသည်။

ထို အစည်းအဝေးသို့ အမျိုးသားညီညွတ်ရေးအစိုးရ ပြည်ထောင်စုဝန်ကြီးချုပ်ရုံး ပြည်ထောင်စုဝန်ကြီး ဒေါက်တာဇော်ဝေစိုး၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်၊ ဖက်ဒရယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျှံမှုန်းဆာခေါင်း နှင့် ဌာနဆိုင်ရာ တာဝန်ရှိသူများ၊ ကြားကာလ မကွေးဖက်ဒရယ်ယူနစ် အစိုးရအဖွဲ့ ဝန်ကြီးချုပ် ဒေါက်တာရဲထွန်းဇော်၊ ဒုတိယဝန်ကြီးချုပ် ဦးချစ်ဝင်းမောင်၊ မကွေးဖက်ဒရယ်ယူနစ်လွှတ်တော်ဥက္ကဌ ၊ ဒုတိယဥက္ကဌ နှင့် တာဝန်ရှိသူများ တက်ရောက်ခဲ့ကြောင်း သိရှိရသည်။

ဆွေးနွေးပွဲတွင် သက်ဆိုင်ရာ တာဝန်ရှိသူများက တော်လှန်ရေးနှင့် ပြည်သူလူထုကို မထိခိုက်စေသော နည်းနာများဖြင့် အမြန်ဆုံးပြေလည်အောင်ဆောင်ရွက်နိုင်ကြရေး ရင်းနှီးပွင့်လင်းစွာဖြင့် အလေးထားဆွေးနွေးခဲ့ကြောင်း၊ မြေပြင်တွင် ဖြစ်ပျက်နေသည့် အကြောင်းအရာများကို နားလည်မှုလွဲစေနိုင်သည့် ရန်သူ အကြမ်းဖက်စစ်တပ် အကြိုက်တွေ့စေမည့် ရေးသားမှုများ၊ ထုတ်ပြန်မှုများကို မပြုလုပ်ကြရေး နှင့် ပြဿနာကို ပိုမိုကြီးထွားစေသည့် ဆောင်ရွက်ချက်များကိုလည်း ထိန်းကျောင်းကြရန် ဆွေးနွေးခဲ့ကြောင်း သိရသည်။

ပြည်ထောင်စုအစိုးရနှင့် မကွေးဖက်ဒရယ်ယူနစ်အစိုးရအကြား လုပ်ပိုင်ခွင့် အာဏာခွဲဝေရေး (Division of competences) နှင့် ဆက်နွယ်နေသော ကိစ္စရပ်များဖြစ်သဖြင့် ပြည်ထောင်စုအစိုးရနှင့် ဖက်ဒရယ်ယူနစ်အကြား ဖက်ဒရယ်ဒီမိုကရေစီစနစ်ကိုအတူတကွ တည်ဆောက်နိုင်ရေး ဦးတည်ချက်ဖြင့် အဆင်ပြေမှုရရှိသည်အထိ စဉ်ဆက်မပြတ် ဆက်လက် ညှိနှိုင်းဆွေးနွေးသွားကြရန်လည်း သဘောတူဆုံးဖြတ်ခဲ့ကာ အစည်းအဝေးကိုအောင်မြင်စွာရုတ်သိမ်းခဲ့ကြောင်း သိရှိရသည်။

The post NUG အစိုးရနှင့် ကြားကာလ မကွေးဖက်ဒရယ်ယူနစ်အစိုးရတို့ တွေ့ဆုံခဲ့ပြီး ပြဿနာပိုမိုကြီးထွားစေသည့် ဆောင်ရွက်ချက်များကို ထိန်းကျောင်းကြရန် ဆွေးနွေးခဲ့ appeared first on Khit Thit Media.

မြန်မာနိုင်ငံတွင် ဖြစ်ပေါ်နေသော လူ့အခွင့်အရေး အကျပ်အတည်းသည် ကမ္ဘာပေါ်တွင် အဆိုးရွားဆုံးနှင့် အရေးတကြီး ဖြေရှင်းရမည့် အခြေအနေတစ်ခုအဖြစ် ရှိနေဆဲဖြစ် ကြောင်း၊ နိုင်ငံတကာ အသိုက်အဝန်းအနေဖြင့် အဆိုပါကိစ္စကို မျက်ကွယ်ပြုမထားရန် ဗြိတိန်နိုင်ငံက ပြင်းပြင်းထန်ထန် သတိပေး ပြောကြားလိုက်သည်။

ဆွစ်ဇာလန်နိုင်ငံ၊ ဂျီနီဗာမြို့တွင် ကျင်းပခဲ့သည့် ကုလသမဂ္ဂ လူ့အခွင့်အရေးကောင်စီ အစည်း အဝေးတွင် ဗြိတိန်နိုင်ငံ၏ လူ့အခွင့် အရေး သံအမတ်ကြီး Eleanor Sanders က မြန်မာနိုင်ငံဆိုင်ရာ အထွေထွေသုံးသပ်ချက် မိန့်ခွန်းတွင် အထက်ပါအတိုင်း ပြောကြားခဲ့ခြင်းဖြစ်သည်။

၂၀၂၁ ခုနှစ် အာဏာသိမ်းပြီးကတည်းက မြန်မာစစ်တပ်သည် အရပ်သားများအပေါ် လေ ကြောင်းမှ ဗုံးကြဲတိုက်ခိုက်ခြင်း၊ ကျေးရွာများကို မီးရှို့ဖျက်ဆီးခြင်း၊ မတရား ဖမ်းဆီးချုပ်နှောင်ခြင်းနှင့် ညှဉ်းပန်းနှိပ်စက်ခြင်း စသည့် လူ့အခွင့်အရေး ချိုးဖောက်မှုများကို စနစ် တကျ ကျူးလွန်နေကြောင်း သံအမတ်ကြီးက ထောက်ပြခဲ့သည်။

အထူးသဖြင့် ပြီးခဲ့သည့် မတ်လအတွင်း စစ်ကောင်စီက တပ်မတော်နေ့ စစ်ရေးပြပွဲများ ကျင်းပနေချိန်တွင်ပင် ရခိုင်၊ မကွေးနှင့် စစ်ကိုင်းတိုင်းတို့ရှိ လူနေအိမ်များ၊ ဘာသာရေး အဆောက်အအုံများနှင့် စစ်ဘေးရှောင်စခန်းများကို လေကြောင်းမှ ဆက်တိုက် တိုက်ခိုက်ခဲ့ခြင်းကြောင့် အရပ်သားများ ကြောက်မက်ဖွယ် အခြေအနေများနှင့် ရင်ဆိုင်နေရသည်ဟု ဆိုသည်။

လက်ရှိတွင် မြန်မာနိုင်ငံ၌ လူပေါင်း ၁၆ သန်းကျော်မှာ လူသားချင်းစာနာမှု အကူအညီများ အရေးပေါ် လိုအပ်နေပြီး၊ အနည်းဆုံး လူ ၃ ဒသမ ၇ သန်းမှာ နေရပ်စွန့်ခွာ ထွက်ပြေးနေရကြောင်းလည်း ဗြိတိန်က ထုတ်ဖော်ပြောကြားသည်။

ထို့ပြင် စစ်ကောင်စီက ပြုလုပ်ခဲ့သည့် တစ်ဖက်သတ် ရွေးကောက်ပွဲများသည် လွတ်လပ်မျှတမှု မရှိသည့်အပြင် နိုင်ငံရေး ထွက် ပေါက်ကိုလည်း မပေးနိုင်ဘဲ အကြမ်းဖက်မှုများကိုသာ ပိုမို ဖြစ်ပေါ်စေခဲ့သည်ဟု ဝေဖန်ခဲ့သည်။

ဗြိတိန်နိုင်ငံအနေဖြင့် မြန်မာပြည်သူများ၏ ဒီမိုကရေစီနှင့် ငြိမ်းချမ်းရေး ဖော်ဆောင်မှုအပေါ် အမြဲတမ်း ရပ်တည်သွားမည်ဖြစ်ကြောင်းနှင့် ကျူးလွန်သူများကို ထိရောက်စွာ အရေးယူနိုင်ရေး၊ အရပ်သားများကို အကာအကွယ်ပေးရေးနှင့် အကူအညီများ အဟန့် အတားမရှိ ပေးအပ်နိုင်ရေးတို့အတွက် ကုလသမဂ္ဂ အဖွဲ့ဝင်နိုင်ငံများက ပူးပေါင်းဆောင်ရွက်ကြရန် သံအမတ်ကြီးက တိုက်တွန်း ပြောကြားသည်။

The post မြန်မာနိုင်ငံ၏ လူ့အခွင့်အရေး အခြေအနေမှာ ကမ္ဘာ့အဆိုးရွားဆုံးဖြစ်နေပြီး အရေးတကြီး ဖြေရှင်းရန်နှင့် နိုင်ငံတကာက မျက်ကွယ်မပြုရန် ဗြိတိန် သတိပေး appeared first on Khit Thit Media.

မြန်မာ့နွေဦးတော်လှန်ရေးဟာ ၅ နှစ်ကျော် ကာလထဲကို ချဉ်းနင်းဝင်ရောက်လာပြီ ဖြစ်ပါတယ်။ ဒီခရီးလမ်းတလျှောက်မှာ ရန်သူကို အလဲထိုးနိုင်ဖို့ လက်နက်နှင့် ဘဏ္ဍာငွေက အသက်သွေးကြောဖြစ်တယ်ဆိုသော်ငြား လွဲမှားတဲ့ ဘဏ္ဍာငွေ ရှာဖွေပုံနည်းလမ်းနှင့် စီမံခန့်ခွဲမှု အမှားတွေကြောင့် တော်လှန်ရေးကို လမ်းမချော်စေဖို့ အရေးကြီးပါတယ်။

တော်လှန်ရေးဟာ ပြည်သူကို ကာကွယ်ဖို့ဖြစ်ပေမယ့်လည်း အခန့်မသင့်လို့ အာဏာနှင့် ငွေကြေးနောက်ကို လိုက်ပါမျောသွားတဲ့အခါ အာဏာရှင်လက်သစ် မွေးထုတ်သလိုဖြစ်လာတတ်ပါတယ်။

အထူးသဖြင့် အညာရေနံမြေ လို့ တင်စားခေါ်ဝေါ်ကြတဲ့ မကွေးတိုင်း၊ မြိုင်မြို့နယ်အတွင်းက ရေနံမှော်ဒေသတွေမှာ ဖြစ်ပေါ်နေတဲ့ အခြေအနေတွေဟာ စိုးရိမ်ဖွယ်ရာ ဖြစ်နေပါတယ်။

ဒီလိုဖြစ်စဉ်တွေရဲ့ ဗဟိုချက်မှာတော့ မြိုင်မြို့နယ် ပကဖ တာဝန်ခံမှသည် မကွေး တိုင်း ဖက်ဒရယ်ယူနစ် ကာကွယ်ရေးဝန်ကြီးဖြစ်လာသူ ဗိုလ်လက်ယာရဲ့ အခန်းကဏ္ဍနဲ့ သူတာဝန်ခံရမှာတွေလည်း များစွာရှိနေပါတယ်။

ဗိုလ်လက်ယာ (ခ) ကိုလက်ယာဟာ ၂၀၀၁ ခုနှစ်မှာ ရဲတပ်ဖွဲ့သို့ စတင်ဝင်ရောက်ခဲ့ပြီး ၂၀၂၁ ခုနှစ် အာဏာသိမ်းမှုအပြီးမှာတော့ CDM လှုပ်ရှားမှုထဲသို့ ဝင်ရောက်လာခဲ့သူ ဖြစ်ပါတယ်။

တော်လှန်ရေးကာလအတွင်းမှာ မြိုင်မြို့နယ် ပြည်သူ့ကာကွယ်ရေးအဖွဲ့ (ပကဖ) တာဝန်ခံ ဖြစ်လာပြီးတဲ့နောက် ဝင်ငွေကောင်းတဲ့ ရေနံတွင်းတွေကို အခြေပြုပြီး သူ့ဩဇာက ကြီး မား ကျယ်ပြန့်လာပါတယ်။

အညာဒေသရဲ့ ရေနံမြေလို့ခေါ်တဲ့ အဲ့ဒီဒေသမှာ ရေနံကျင်းပေါင်း သိန်းနဲ့ချီရှိနေပြီး တစ်နေ့ကို ဆီပီပါပေါင်း သောင်းချီ ထွက်ရှိတာ ဖြစ်ပါတယ်။ အဲ့ဒီသယံဇာတွေက ရရှိတဲ့ ငွေကြေးအင်အားနဲ့ ဒေသတော်လှန်ရေးတပ်ဖြစ်တဲ့ မြိုင်ပကဖအတွက် လက်နက်ဝယ်ယူမှုတွေ လုပ်ဆောင်ခဲ့ပါတယ်။

ဒီလက်နက်တွေနဲ့ အင်အားနည်းပါးတဲ့အဖွဲ့တွေကို လက်နက်တပ်ဆင်ပေးတာတွေလည်း ရှိလာပြီး မြိုင်ပကဖ လက်အောက်ခံ ဩဇာခံ တပ်တွေလိုဖြစ်လာတာတွေလည်း ရှိပါတယ်။ ဒါဟာ ဩဇာခံတပ်တွေဟာ တော်လှန်ရေးထက် ကိုယ့်လက်နက်တပ်ဆင်ပေးသူကို ဩဇာခံသလို ဖြစ်လာတာကလည်း တော်လှန်ရေးအတွက် အပြုသဘော မဆောင်လှပါဘူး။

အခြားတစ်ဖက်မှာလည်း ဗိုလ်လက်ယာလက်အောက်ခံ တပ်တချို့ရဲ့ ကျူး လွန်တဲ့ ရာဇဝတ်မှုတချို့ရှိနေပြီး ဒါတွေကိုလည်း တာဝန်ခံ ဖြေရှင်းပေးမှုတွေ လိုအပ်နေဆဲဖြစ်ပါတယ်။

ဒီကျူးလွန်မှုတွေဟာ ဗိုလ်လက်ယာက တိုက်ရိုက်ကြီး လုပ်ဆောင်တာမဟုတ်ပေမယ့်လည်း သူ့လက်အောက်မှာရှိနေတဲ့ တပ်တချို့က ကျူးလွန်တာမို့ သူ့မှာ တာဝန်အပြည့်ရှိတာကလည်း အသေအချာပါပဲ။

၂၀၂၅ ခုနှစ်၊ နိုဝင်ဘာလမှာ ဖြစ်ပွါးခဲ့တဲ့ ဗဟင်းကျေးရွာ ပအဖ တာဝန်ခံ ဦးလှအောင် သတ်ဖြတ်ခံရမှုက ထင်ရှားတဲ့ သာဓက တခုဖြစ်ပါတယ်။ ဗိုလ်လက် ယာရဲ့ တပည့်ဖြစ်သူနဲ့ အချင်းချင်း စကားများရာမှအစပြုကာ “ဗိုလ်လက်ယာ အမိန့်နဲ့” ဟုဆိုပြီး ဦးလှအောင်နှင့် အဖွဲ့ဝင်များကို ညသန်းခေါင် သေနတ်ဖြင့်ချိန်ကာ ဖမ်းဆီးသွားခဲ့ပါတယ်။

နောက်ပိုင်း စစ်ဆေးမေးမြန်းရာမှာ “လက်လွန်သွားသည်” ဆိုကာ အကြောင်းပြပြီး ဦးလှအောင်ကို သတ်ဖြတ်ပစ်ခဲ့ပါတယ်။ ရုပ်အလောင်းကိုတောင် မိသားစုထံ ပြန်မပေးဘဲ သင်္ဂြိုလ်လိုက်ခြင်းဟာ စစ်ကောင်စီရဲ့ ရက်စက်ကြမ်းကြုတ်တဲ့ နည်းလမ်းတွေကို ပြန်လည် ကျင့်သုံးနေခြင်း ဖြစ်ပါတယ်။

၂၀၂၃ ခုနှစ်၊ ဇန်နဝါရီလ ၃၁ ရက်နေ့တုန်းက မြိုင်မြို့နယ်၊ စဘေကန်ရွာအနီးမှာ ကြက်ဝိုင်းလုပ်နေတုန်း မြိုင်အနောက်မြောက်ပိုင်းက လက်နက်ကိုင်အဖွဲ့တစ်ခု ရောက်လာပြီး သေနတ်ပစ်ဖောက် ဖမ်းဆီးခဲ့ပါတယ်။ အဲဒီမှာ နန်းတော်ရာရွာက အသက် ၄၈ နှစ်အရွယ် ဦးဌေးမောင်ဟာ ဦးခေါင်းကို ကျည်ထိမှန်ပြီး နေရာတင် ပွဲချင်းပြီး သေဆုံးသွားခဲ့သလို၊ ကိုဇင်လင်းမောင်ဆိုသူလည်း ဦးခေါင်းမှာ ကျည်ထိမှန် ဒဏ်ရာရခဲ့ပါတယ်။

ဒီကိစ္စနဲ့ပတ်သက်ပြီး မိသားစုက အမှုမဖွင့်ခဲ့ပေမဲ့ ရက်လည်ဆွမ်းကပ်ပြီးတဲ့နောက်မှာ ကိုချမ်းစိုး၊ ကိုကြည်မြင့်နဲ့ နန်းတော်ရာ ပကဖ တာဝန်ခံ ကိုကျော်မြင့်တို့က နစ်နာကြေး ငွေကျပ် ၄၈ သိန်း လာပေးခဲ့တယ်လို့ သိရပါတယ်။

၂၀၂၃ ခုနှစ်၊ မေလ ၁၆ ရက်နေ့ ညပိုင်းမှာလည်း ဝက်ဖိုးရွာက အုပ်ချုပ်ရေးမှူးဟောင်း ဦးအောင်ဌေးကို လက်နက်ကိုင်တစ်စုက “မေးစရာရှိတယ်” ဆိုပြီး ကား၊ ဆိုင်ကယ်၊ ဖုန်းတွေနဲ့အတူ ခေါ်သွားပါတယ်။ ဦးအောင်ဌေးဟာ အာဏာသိမ်းပြီးနောက်ပိုင်း စစ်ကောင်စီနဲ့ ပတ်သက်မှုမရှိဘဲ အေးဆေးနေသူဖြစ်သလို PDF တွေ လာဖမ်းမယ်ဆိုတာ သိပေမဲ့ ထွက်မပြေးဘဲ စောင့်နေခဲ့သူပါ။

၂၀၂၄ ခုနှစ်၊ ဖေဖော်ဝါရီလမှာတော့ သူတို့ယူသွားတဲ့ ကားနဲ့ ဆိုင်ကယ်ကို ဦးအောင်ဌေးရဲ့ ယောက်ဖဖြစ်သူဆီ ပြန်အပ်ခဲ့ပြီး ဦးအောင်ဌေးကိုတော့ အမှတ် (၁) စစ်ဒေသကို လွှဲလိုက်ပြီလို့ ပြောခဲ့ပေမဲ့ ဒီနေ့အထိ ဘာသတင်းမှမရဘဲ ပျောက်ဆုံးနေဆဲ ဖြစ်ပါတယ်။

နောက်အမှုတစ်ခုကတော့ သံမြေကျင်းကျေးရွာ ပကဖ ရဲဘော် မိုးစက် (ခ) အောင်ကိုမင်း အသတ်ခံရမှုအတွက် သံမြေကျင်း ပကဖ တာဝန်ခံ ကိုစိုးသူက မြိုင်မြို့နယ် ပကဖ တာဝန်ခံ ကိုလက်ယာနဲ့ တွေ့ဖို့ကြိုးစားပေမဲ့ တွေ့ခွင့်မရခဲ့ပါဘူး။ ပလဖ ဘက်ကို တိုင်ကြားတဲ့အခါမှာလည်း “ဒါဟာ ပကဖ အချင်းချင်းဖြစ်တဲ့ကိစ္စမို့ ပကဖ ပဲ ရှင်းလိမ့်မယ်” ဆိုပြီး ငြင်းထုတ်ခဲ့ပါတယ်။ ဒါကြောင့် ကျူးလွန်သူတွေဟာ အခုထိ လွတ်မြောက်နေဆဲ ဖြစ်ပါတယ်။

၂၀၂၅ ခုနှစ်၊ အောက်တိုဘာလ ၁၆ ရက်နေ့မှာ ယင်းမာပင်မြို့နယ်၊ ဖိုဝင်တောင်ဂိတ်မှာ မြိုင်မြို့နယ် ပကဖ အဖွဲ့ဝင် ၄ ဦး ဖြစ်တဲ့ ကိုစိုးမိုးထက်၊ ကိုဝင်းမင်းဌေး၊ ကျော်ဇင်ထွန်း၊ ကိုယဉ်မင်းထွေး တို့ကို ဘိန်းမဲ ၂ ပိသာခွဲ၊ ကိုကင်း၊ Happy မူးယစ်ဆေးထုပ်တွေနဲ့အတူ ဖမ်းဆီးရမိခဲ့တယ်လို့ သိရပါတယ်။ ဒါကိုလည်း သက်ဆိုင်ရာက အရေးယူထားပြီဖြစ်ပေမယ့် အဓိက တာဝန်ခံရမယ့်သူကတော့ မြို့နယ် ပကဖ တာဝန်ခံဖြစ်တဲ့ ဗိုလ်လက်ယာမှာ တာဝန်ရှိနေပါတယ်။

ဒါ့အပြင် အညာရေနံမြေဒေသမှာ ပြည့်တန်ဆာခန်းတွေ၊ မာဆတ်နဲ့ KTV စတဲ့ ဆိုင်ပေါင်းများစွာ ရှိခဲ့ပေမယ့်လည်း အာဏာရှင်တော်လှန်ရေး ဖြစ်နေချိန်မှာလည်း အဲဒါတွေက ပိုလိုတောင် ပေါ်ပေါ်ထင်ထင် အဲဒီဆိုင်တွေ ဖွင့်လှစ်လာတာကလည်း မြိုင်ပကဖနဲ့ ဒေသ ရပ်/ကျေး တာဝန်ခံတွေရဲ့ အခန်းကဏ္ဍကို မေးခွန်းထုတ်ရမှာပါ။

အညာရေနံမြေမှာ ဖွင့်နေတဲ့ ဆိုင်ခန်းတွေကနေ တစ်လကို သက်ဆိုင်ရာတွေက ဆိုင်ခန်း တစ်ခန်းကို ငွေကျပ် ၄ သိန်းဝန်းကျင်အထိ အခွန်ကောက်ခံနေတာဖြစ်ပါတယ်။

အဆိုးဝါးဆုံးကိစ္စကတော့ အဲ့ဒီ KTV နဲ့ ပြည့်တန်ဆာခန်းတွေဟာ ဒုစရိုက်လုပ်ငန် းတွေသာမကဘဲ မူးယစ်ဆေးဝါးတွေ လွယ်လွယ်ကူကူ ဝင်ရောက်နေတာပါပဲ။ ဒါတွေကို တားဆီးဖို့ ဒေသရပ်/ကျေးအာဏာပိုင်တွေမှာ တာဝန်ရှိပါတယ်။ မတားဆီးဘဲ သူတို့ကိုယ်တိုင် ပါဝင်နေသေလားဆိုတာကလည်း မေး ခွန်းထုတ်စရာပါပဲ။

ရှမ်းပြည်နယ်မြောက်ပိုင်းမှ သွင်းယူလာသော Ketamine (K) နှင့် Ecstasy (E) အပါအဝင် မူးယစ်ဆေးဝါးများကို အဲ့ဒီ KTV နဲ့ ပြည်တန်ဆာခန်းများမှာ ကျယ်ကျယ်ပြန့်ပြန့် ဖြန့်ဖြူးရောင်းချနေတယ်လို့ သတင်းတွေ ဆက်တိုက်ထွက်ပေါ်နေတာ ဖြစ်ပါတယ်။

မူးယစ်ဆေးဝါးနဲ့ လောင်းကစားကို တားမြစ်ထားတယ်လို့ အပေါ်ယံဆိုသော်ငြား လက် တွေ့မှာတော့ အညာရေနံမြေမှာ တွင်တွင်ကျယ်ကျယ်ဖြစ်နေပါတယ်။

လက်ရှိ ရေနံမှော်ဒေသတွင်းမှာ အဖွဲ့ပေါင်းစုံကနေ ဂိတ်အမျိုးမျိုးဖွင့်ပြီး အခွန်ငွေတွေ အဆမတန် ကောက်ခံနေပါတယ်။ ဆီတပီပါကို ၃,၀၀၀ ကျပ်ကနေ ၁၇,၀၀၀ ကျပ်အထိ ဂိတ်တိုင်းမှာ အထပ်ထပ်အခါခါ ပေးဆောင်နေရတဲ့အတွက် ရေနံချက်ဖိုလုပ်ကိုင်သူတွေနဲ့ ကုန်သည်တွေမှာ အမြတ်မကျန်တော့ဘဲ အခက်ကြုံနေရပါတယ်။

ထင်းကား၊ ဆီကားများထံကလည်း အခွန်ကောက်ယူမှုတွေကြောင့် အဲ့ဒီဒေသက ကုန် ဈေးနှုန်းတွေ တက်လာခဲ့ပါတယ်။ စစ်ကောင်စီရဲ့ မှတ်ပုံတင်ကို အသုံးမပြုလိုတဲ့ ပြည်သူတွေကိုပါ ဒေသစစ်ဆေးရေးဂိတ်တွေမှာ ကြမ်းကြမ်းတမ်းတမ်း စစ်ဆေးမှုတွေ ရှိနေပါတယ်။ ဒါတွေကလည်း မဖြစ်မနေ ပြောင်းလဲ ပြုပြင်ရပါမယ်။

ရေနံမြေကို အခြေခံပြီး စစ်ဘုရင်ဝါဒလို ဖြစ်လာခြင်းနဲ့ ကျင့်သုံးမှုတွေ ရှိနေသလိုဖြစ်လာတာက နွေဦးတော်လှန်ရေးအတွက် ကြီး မားတဲ့ ခြိမ်းခြောက်မှု တခုဖြစ်ပါတယ်။တော်လှန်ရေးရဲ့ သန့်စင်မှုကို ပျက်စီးစေနိုင်တာမို့ ဒါတွေကို အချိန်မီ ပြန်လည်ပြုပြင်ရမှာဖြစ်ပါတယ်။

မြေပြင်မှာ ဖြစ်ပျက်နေမှုတွေဟာ NUG ကာကွယ်ရေးဝန်ကြီးဌာန၊ NUG ပြည်ထဲရေးဝန်ကြီးဌာနနဲ့ မကွေးတိုင်းယူနစ်အစိုးရ၊ မကွေးဖက်ဒရယ်ယူနစ် ကာကွယ်ရေးဝန်ကြီးဌာနတို့က ပူးပေါင်းဆောင်ရွက်မှုနဲ့ အမြန်ဆုံးပြန်လည် တည့်မတ်ရမှာလည်းဖြစ်ပါတယ်။

ဘယ်လောက်ပဲ လက်နက်အင်အား တောင့်တင်းပါစေ အမှန်တရားနဲ့ ဝေးကွာနေပြီး စည်း လုံးမှုမရှိဘဲ သူတစ်လူ ငါတစ်မင်းဖြစ်နေရင် တော်လှန်ရေးကို အနည်းနဲ့ အများထိခိုက်ပြီး ပြည်သူလူထုရဲ့ ဒီမိုကရေစီ အိပ်မက်တွေအပေါ် မှေးမှိန်မှု ဖြစ်စေမှာကို မကွေး ဖက်ဒရယ်ယူနစ် ဝန်ကြီးချုပ်၊ မကွေး ဖက်ဒရယ်ယူနစ်ကာကွယ်ရေးဝန်​ကြီးနဲ့ သက်ဆိုင်ရာ NUG အစိုးရတာဝန်ရှိသူတွေက သတိပြုပြီး ညှိနှိုင်းဆောင်ရွက်ကြဖို့လိုအပ်ပါတယ်။

တော်လှန်ရေးအတွက် စစ်အုပ်စုကို ပစ်ရမယ့် သေနတ်ကျည်ဆန်တွေကို ရန်သူစစ်တပ်ဆီ ကို တည့်တည့်ပစ်ပြီး လက်ရှိ ဖြစ်ပေါ်နေတဲ့ စီမံခန့်ခွဲမှု အလွဲအမှားတွေကို ချက်ချင်း ပြုပြင်ကာ တော်လှန်ရေး ခရီးကို အားလုံး စုစုစည်းစည်းညီညီညွတ်ညွတ် ရှေ့ဆက်လျှောက်လှမ်းရမှာဖြစ်ပါတယ်။

The post ဗိုလ်လက်ယာ တာဝန်ခံ ဖြေရှင်းရမယ့် ကိစ္စရပ်တွေနဲ့ ညှိနှိုင်းပူးပေါင်းဆောင်ရွက်သွားရမယ့် စစ်အာဏာရှင် အမြစ်ဖြတ်တော်လှန်ရေးခရီး appeared first on Khit Thit Media.