ချင်းပြည်နယ်၊ ဖလမ်းမြို့နယ်၊ ဆွမ်ဟရန်ရွာအနီး ဖြစ်ပွားခဲ့သော တိုက်ပွဲအတွင်း အကြမ်းဖက် စစ်တပ်ဘက်မှ ဒုဗိုလ်မှူးကြီး သန့်ဇော်ဦး အပါအဝင် သေဆုံးသူများပြားပြီး စစ်တပ်က အထိနာ၍ လေကြောင်းဖြင့် ဗုံးကျဲတိုက်ခိုက်ခဲ့ကြောင်း ဒေသစစ်ရေးသတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ဧပြီလ ၂၃ ရက်နေ့တွင် ဖလမ်းမြို့နယ်၊ ဆွမ်ဟရန်ရွာအနီး စစ်ကြောင်းထိုးလာသော အကြမ်းဖက် စစ်တပ်နှင့် ချင်းတော်လှန်ရေးတပ်ဖွဲ့များ ဖြစ်ပွားခဲ့သော တိုက်ပွဲအတွင်း အကြမ်းဖက် စစ်တပ်ဘက်မှ ဒုဗိုလ်မှူးကြီး သန့်ဇော်ဦး အပါအဝင် သေဆုံးသူများပြားခဲ့ကြောင်း သိရှိရသည်။

ထိုတိုက်ပွဲအတွင်း အကြမ်းဖက် စစ်တပ်ဘက်မှ အထိနာခဲ့သောကြောင့် ဧပြီလ ၂၃ ရက်နေ့မှ စတင်ပြီး ယနေ့ နံနက်ပိုင်းထိ လေယာဉ်ဖြင့် ဆက်တိုက်ဗုံးကျဲနေပြီး မြို့ပေါ်သို့ ထပ်မံ စစ်ကြောင်းထိုးနိုင်ရန် အင်အားစုဖွဲ့မှုများ လုပ်ဆောင်နေကြောင်း သိရသည်။

“အဲဖြစ်စဉ်က ဟုတ်ပါတယ်။ မနေ့က ဆွမ်ဟရန်ရွာအနီး တိုက်ပွဲမှာ အကြမ်းဖက် စစ်တပ်ဘက်က ဒုဗိုလ်မှူးကြီး သန့်ဇော်ဦး အပါအဝင် သေတာတော်တော်များတယ်။ တိုက်ပွဲတွေက ဆက်ရှိနေတုန်းပါပဲ” ဟု ဒေသစစ်ရေးသတင်းရင်းမြစ်က ပြောဆိုသည်။

အလားတူ ယမန်နေ့ ဧပြီလ ၂၃ ရက် နံနက်အစောပိုင်းကလည်း ဖလမ်းမြို့နှင့် ၁၂ မိုင်ခန့်အကွာရှိ ဗာရ်းတံတား အထက်ဗာရ်း၊ စီဇာမာလ်ကျေးရွာအကြားနှင့် ဆူးရ်ဘုန်လေယာဉ်ကွင်းဘက်အခြမ်းတွင် တိုက်ပွဲများ ပြင်းထန်ခဲ့ပြီး စစ်တပ်က ဂျက်ဖိုက် တာ ၁၀ စီးခန့်ဖြင့် ဗုံးကျဲ တိုက်ခိုက်ခဲ့ကြောင်း သိရသည်။

၂၀၂၅ ခုနှစ် ၊ အောက်တိုဘာလ ၁၉ ရက်နေ့မှ စတင်ပြီး ဖလမ်းမြို့ကို ပြန်သိမ်းပိုက်နိုင်ရေး အတွက် စစ်တပ်က စစ်ကိုင်းတိုင်း ကလေးမြို့မှ ချင်းပြည်နယ်မြောက်ပိုင်းသို့ ဦးတည်၍ ကလေး–နတ်ချောင်း –ဂန့်ဂေါ ၊ ကလေး–နတ်ချောင်း–ဝေဘူလ၊ ကလေး–ခိုင်ကမ်း–သိုင်းငင်း နှင့် တီးတိန်– သိုင်းငင်း လမ်းကြောင်းများမှ စစ်ကြောင်း ၄ ကြောင်းခွဲကာ အင်အား ၁၀၀၀ နီးပါးဖြင့် စစ်ကြောင်း ထိုးတိုက်ခိုက်နေခြင်းဖြစ်ပြီး အကြိမ်ကြိမ် အထိနာကာ ပြန်လည် တပ်ဆုတ်နေရခြင်းဖြစ်ကြောင်း သိရှိရသည်။

The post ဖလမ်း၊ ဆွမ်ဟရန်ရွာအနီး ဖြစ်ပွားခဲ့သော တိုက်ပွဲအတွင်း စစ်တပ်ဘက်မှ ဒုဗိုလ်မှူးကြီး သန့်ဇော်ဦး အပါအဝင် သေဆုံးသူများပြားပြီး စစ်တပ်က အထိနာ၍ လေကြောင်းဖြင့် ဗုံးကျဲတိုက်ခိုက် appeared first on Khit Thit Media.

မကွေးတိုင်း၊ ပေါက်မြို့နယ်ရှိ အကြမ်းဖက်စစ်တပ်၏ ကပစ ၂၄ အတွင်းသို့ ရှော့တိုက်ဒုံး၊ လက်လုပ် ရော့ကတ်များဖြင့် ပစ်ခတ်တိုက်ခိုက်ခဲ့ရာ စက်ရုံအဆောက်အအုံများ ထိမှန်၍ မီးလောင်ပေါက်ကွဲမှု ဖြစ်ခဲ့ကြောင်း MGY – 30 Special Operations Unit – 3 (မကွေးတိုင်း ပကဖ) ၏ တိုက် ခိုက်ရေး စစ်ကြောင်းမှ တာဝန်ရှိသူက ရန်ကုန်ခေတ်သစ်သတင်း ဌာနထံသို့ ပြောကြားသည်။

ဧပြီလ ၂၀ ရက်နေ့က ပေါက်မြို့နယ်အခြေစိုက် အကြမ်းဖက်စစ်တပ်၏ ကပစ – ၂၄ ကို ပြည်သူ့ကာ ကွယ်ရေး ပူးပေါင်းတပ်ဖွဲ့မှ ရှော့တိုက်ဒုံး ၊ လက်လုပ် ရော့ကတ် စုစုပေါင်း ၁၈ လုံးဖြင့် ပစ်ခတ်တိုက် ခိုက်ခဲ့ရာ ကပစ – ၂၄ ၏ အဓိက စက်ရုံ အဆောက်အဦများကို ထိမှန်ပေါက်ကွဲခဲ့ပြီး စက်ရုံ မီးလောင် ကာ ထပ်ဆင့်ပေါက်ကွဲမှုများရှိခဲ့ကြောင်း၊ စက်ရုံမီးလောင်ပျက်စီးမှုကိုလည်း NASA ၏ Fire Map တွင် တရားဝင်ဖော်ပြထားကြောင်း သိရသည်။

“အားလုံး စုစုပေါင်း ၁၈ လုံးပါ။ ထိခိုက်ပျက်စီးမှုနဲ့ သေဆုံးမှုဘယ်လောက်ဆိုတာတော့ အတိအကျ မသိရသေးပါဘူး ပေါက်ကွဲမှု အကြီးစားဖြစ်တယ်ဆိုတာကတော့ NASA ရဲ့ Fire Map ကနေ သိရတာ ပါ ။ မိဘ ပြည်သူတွေအနေနဲ့ အားမလျှော့စိတ်မပျက်ကြဖို့က အဓိကပါပဲ။ ကျနော်တို့ ပကဖ အနေနဲ့ လည်း အရင်ကထက်ပိုပြီး တော်လှန်ရေးအလုပ်တွေပိုလုပ်သွားမယ် တချို့လုပ်မှားကိုင်မှားလေးတွေ ရှိခဲ့ရင်လည်း နားလည်ပေးဖို့ မျှော်လင့်ပါတယ်။ တော်လှန်ရေးမှာ တော်လှန်ပြည်သူတွေက အဓိက ဖြစ်တဲ့အတွက် ကျွန်တော်တို့ ဦးထိပ်ပန်ဆင်ထားပါတယ်” ဟု MGY – 30 Special Operations Unit – 3 (မကွေးတိုင်း ပကဖ) ၏ တိုက် ခိုက်ရေး စစ်ကြောင်းမှ တာဝန်ရှိသူက ရန်ကုန်ခေတ်သစ်သတင်း ဌာနထံသို့ ပြောကြားသည်။

အဆိုပါ တိုက်ခိုက်မှုကို MGY – 30 Special Operations Unit – 3 (မကွေးတိုင်း ပကဖ) ၏ တိုက် ခိုက်ရေး စစ်ကြောင်း နှင့် တောင်ညိုနဂါးတပ်ဖွဲ့ (LPDF) စစ်ကြောင်းတို့ ပူးပေါင်းကာ တိုက်ခိုက်ခဲ့ ခြင်းဖြစ်ကြောင်း သိရသည်။

ထိုသို့ တိုက်ခိုက်ခံရပြီးနောက် ဧပြီလ ၂၃ ရက် နံနက် ၁၁ နာရီခန့်တွင် ကပစ – ၂၄ အနီးဝန်းကျင်ရှိ ရပ်ရွာများအား မကွေးလေတပ်မှ ဂျက်ဖိုက်တာ ၆ စီးဖြင့် ဗုံးကျဲတိုက်ခိုက်မှုများ ပြုလုပ်သည့်အပြင် လက်နက်ကြီးများ၊ ဒရုန်းများဖြင့်လည်း တပြိုင်တည်း တိုက်ခိုက်မှုလုပ်ဆောင်ခဲ့ကြောင်း သိရသည်။

ထို့ကြောင့် ကပစ ၂၄ အနီးပတ်ဝန်းကျင်ရှိ ပြည်သူများအနေဖြင့် အကြမ်းဖက် စစ်တပ်၏ ရမ်းကား တိုက်ခိုက်မှုများအား မြေပြင် သတိ၊ ဝေဟင် သတိပြု၍ ဂရုစိုက်နေထိုင်ကြပါရန် မေတ္တာ ရပ်ခံထားသည်။

ကပစ – ၂၄ သည် အကြမ်းဖက် စစ်တပ်၏ လက်နက်ကုန်ကြမ်းများအတွက် သံသတ္တုများ၊ အလူမီနီ ယံ များ အရည်ကြိုပေးနေသည့် အဓိက ထောက်တိုင် တစ်ခု ဖြစ်သည့်အပြင် မကွေးတိုင်း၊ ထီးလင်း မြို့ နယ်နှင့် ချင်းပြည်နယ်၊ မင်းတပ်မြို့နယ်တို့အတွက် ယာယီ စစ်ဗျူဟာ အခြေချထားသည့် နေရာ တစ်ခုလည်းဖြစ်ကြောင်း၊ လက်ရှိတွင်လည်း ကပစ – ၂၄ အတွင်းသို့ စစ်သား အင်အား အများ အပြား ဖြည့်တင်း၍ ထီးလင်းမြို့နယ်နှင့် ဆောမြို့နယ်၊ ကျောက်ထုမြို့ဘက်သို့ စစ်ကြောင်းများ ထိုးနိုင်ရန် ပြင်ဆင်နေသည့် အဓိက စခန်း စက်ရုံ တစ်ခုဖြစ်ကြောင်း သိရသည်။

ထို့အပြင် အနီးပတ်ဝန်းကျင်ရှိ ကျေးရွာများအတွင်းသို့လည်း 122 MM MLRS များ၊ ၁၂၀ မမ ဟောင် ဝှစ်ဇာများ ၊ ဒရုန်းများဖြင့် အကြိမ်ကြိမ် တိုက်ခိုက်မှုများ လုပ်ဆောင်လျက်ရှိသည့် စစ်တပ်စခန်း တစ် ခုလည်းဖြစ်ကြောင်း သိရသည်။

ဓာတ်ပုံ- PDF တပ်များက ရှော့တိုက်ဒုံးဖြင့် စစ်ရေးပစ်မှတ်များကို ပစ်ခတ်ရန် လုပ်ဆောင်နေစဉ်။ (ပုံအဟောင်းကို အသုံးပြုထားပါသည်။)

The post ပေါက်မြို့နယ်၊ ကပစ ၂၄ အတွင်းသို့ ရှော့တိုက်ဒုံး၊ ရော့ကတ်များဖြင့် တိုက်ခိုက်မှု စက်ရုံအဆောက် အအုံအတွင်း မီးလောင်ပေါက်ကွဲဖြစ် appeared first on Khit Thit Media.

ယမန်နေ့ ညပိုင်း လူမှုကွန်ရက်တွင် ပျံ့နှံ့လာသော ကိုရင်ငယ်လေး ၁ပါးကို လူမဆန်စွာ ရိုက်နှက်နေသည့် ဗီဒီယိုမှ ရိုက်နှက်မှုကို ကျူးလွန်နေသာ မြိတ်မြို့၊ ကျောက်ဖြူတောင်၊ ပဋိပတ္တိတောရကျောင်းမှ ဦးတေဇကို မြိတ်မြို့နယ်သံဃာနာယကအဖွဲ့နှင့်ရဲတပ်ဖွဲ့က ဖမ်းဆီးလိုက်ကြောင်း ယင်းအမှုကို လိုက်ပါဆောင်ရွက်နေသူ အရှင်သုနန္ဒက ရန်ကုန်ခေတ်သစ်သတင်းဌာနထံသို့ မိန့်ကြားသည်။

ယမန်နေ့ ဧပြီလ ၂၁ ရက်နေ့ ညပိုင်းမှစတင်ပြီး ဘုန်းကြီးကျောင်းပေါ်တွင် ကိုရင်ငယ်လေး ၁ ပါးကို ဘုန်းကြီး ၁ ပါးက အဆက်မပြတ် လူမဆန်စွာ ရိုက်နှက်နေသည့် ဗီဒီယိုမှာ လူမှုကွန်ရက်တွင် ပျံ့နှံ့လာခဲ့ပြီး အဆိုပါ ဗီဒီယိုကြောင့် ရိုက်နှက်သူ ဘုန်းကြီးကို အရေးယူပေးရန် တောင်းဆိုမှုများ ဆက်တိုက် ထွက်ပေါ်လာသည်။ ယင်းနောက် ယနေ့နံနက်ပိုင်းတွင် သာသနာရေး၊ ရဲနှင့်ထွေ/အုပ်များက ကိုရင်လေးကို ရိုက်နှက်မှု ကျူးလွန်သော ဘုန်းကြီးကို ဖမ်းဆီး စစ်ဆေးနေကြောင်း သိရှိရသည်။

“သာသနာရေး အဖွဲ့အစည်းတွေရော၊ ထွေ/အုပ်တွေရော အကုန်လုံး ဒီမနက်ကို အားချင်း ဖမ်းဆီးပြီး စစ်ဆေးနေပါတယ။ ကိုရင်လေးကို ရိုက်တဲ့ ဗီဒီယို က မနေ့ညက ပျံ့နှံ့လာတာပါ။ သာသနာရေးကလည်း ထုတ်ပြန်မှာပါ။ ဒီလောက် ဟိုးလေးတကြော်ကြော် ဖြစ်တာဆိုတော့လေ။ အခုမှ စစ်ဆေးနေဆဲမို့လို့ပါ။ စစ်ဆေးနေပါတယ်။ ထွက်မပြေးခင်မှာ ဖမ်းမိတာပါ။ ရိုက်နှက်တဲ့ ဘုန်းကြီးက ဦးတေဇပါ” ဟု အရှင်သုနန္ဒက ရန်ကုန်ခေတ်သစ်သတင်းဌာနထံသို့ မိန့်ကြားသည်။

လတ်တလော အဆိုပါ ရိုက်နှက်သော ဘုန်းကြီးကို ဆက်လက်စစ်ဆေးဆဲဖြစ်ပြီး ခံဝန်ထိုးခိုင်းမည်ဟု သိရှိထားကြောင်း၊ အရေးယူမှုမှာ သံဃာနာယကအဖွဲ့က ပြင်းထန်စွာသတိပေးခြင်းအဆင့်ဖြင့်ပင် ပြီးဆုံးဖွယ်ရှိ​ကြောင်း အရှင်သုနန္ဒထံမှ သိရှိရသည်။

တနင်္သာရီတိုင်း၊ မြိတ်မြို့မှ ပြည်သူများကလည်း ယင်းဖြစ်စဉ်ကို လက်မခံနိုင်ကြောင်း၊ ထို့ကြောင့် သက်ဆိုင်ရာ သံဃာနာယကအဖွဲကများထံသို့ တိုင်ကြားမှုများ လုပ်ဆောင်ခဲ့ကြောင်း ပြောဆိုကြသည်။

“သင်္ကန်းဝတ်ပြီး မေတ္တာ တရားခေါင်းပါး ကိုရင်လေးမှာအပြစ်ရှိရင်တောင် ကလေးပဲ။ သေချာပြောပြဆုံးမပေါ့ ။အခုဟာက ကျွဲရိုက်နွားရိုက်ရိုက်နေတာ ကလေးကို ။ အဲဒါကြောင့် ဒီက ပြည်သူတွေက ၀ိုင်းပြီး မြို့နယ်သံဃာနာယက ကိုတိုင်ကြတာ” ဟု မြိတ်မြို့မှ ပြည်သူတစ်ဦးက ရှင်းပြသည်။

The post Edited Version -လူမှုကွန်ရက်တွင် ပျံ့နှံ့လာသော ကိုရင်ငယ်လေး ၁ပါးကို လူမဆန်စွာ ရိုက်နှက်သည့် ဗီဒီယိုပါ ကျူးလွန်သူ မြိတ်မြို့၊ ကျောက်ဖြူတောင်၊ ပဋိပတ္တိတောရကျောင်းမှ ကျောင်းထိုင်ဘုန်းကြီး ဦးတေဇကို မြိတ်မြို့နယ်သံဃာနာယကအဖွဲ့နှင့်ရဲက စစ်ဆေးပြီး ခံဝန်ထိုးခိုင်းမည်ဟုဆို appeared first on Khit Thit Media.

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသည့် နိုင်ငံ ရေးအကျဉ်းသားများအား လုံး အမြန်ဆုံးလွတ်မြောက်ရေးအတွက် နိုင်ငံတကာအသိုင်းအဝန်းအနေဖြင့် စစ်ကောင်စီအပေါ် ထိရောက်သည့် ဖိအားပေးမှုများ လုပ်ဆောင်ပေးရန် ပြည်တွင်းပြည်ပ အရပ်ဘက်အဖွဲ့အစည်း ၅၈ ခုက ယနေ့တွင် စုပေါင်းတောင်းဆိုလိုက်ကြသည်။

ယနေ့ ဧပြီလ ၂၁ ရက်နေ့သည် နိုင်ငံရေးအကျဉ်းသားများ လွတ်မြောက်ရေးအတွက် အစဉ်တစိုက် ကြိုး ပမ်းခဲ့သူ NLD နာယက၊ နိုင်ငံရေးအကျဉ်းသားဟောင်း ဟံသာဝတီ ဦးဝင်းတင် ကွယ်လွန်ခြင်း ၁၂ နှစ်ပြည့်သည့် နေ့ရက်ဖြစ်သည်။ ယင်းနေ့ကို ဂုဏ်ပြုသောအားဖြင့် ဧပြီလ ၁၀ ရက်နေ့မှ ယနေ့အထိ ၁၂ ရက်တိုင်တိုင် “Blue Shirt Campaign” (အပြာရောင်ဝတ်စုံလှုပ်ရှားမှု) ကို လူထုလှုပ်ရှားမှုတစ်ရပ်အဖြစ် ဖော်ဆောင်ခဲ့ကြသည်။

“အဓိက ဒီထုတ်ပြန်ချက်ကတော့ ကုလသမဂ္ဂအပါအဝင် ၊ အာစီယံနိုင်ငံတွေ၊ နိုင်ငံတကာအ သိုင်းအဝန်းက ခေါင်းဆောင် တွေအနေနဲ့ မြန်မာပြည်အကျဉ်းထောင်ထဲက လူထုခေါင်းဆောင် ဒေါ် အောင်ဆန်းစုကြည် အပါအဝင် နိုင်ငံရေးအကျဉ်းသားများအားလုံး လွတ်မြောက်ရေးကို တကယ့် လက်တွေ့ကျပြီး ထိရောက်သော ဖိအား ပေးတောင်းဆိုမှုကနေ တဆင့် နိုင်ငံရေးအကျဉ်းများလွတ် မြောက်ရေးကို အကောင်းဆုံး အားစိုက်ကြိုးစားပေးဖို့ ကျနော်တို့ဒီအဖွဲ့အစည်းတွေအနေနဲ့ တိုက် တွန်းတာဖြစ်ပါတယ်” ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM မှ ကိုသိုက်ထွန်းဦးက ရန်ကုန်ခေတ်သစ်သတင်း ဌာနထံသို့ ပြောကြားသည်။

မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) နှင့် AAPP တို့၏ မှတ်တမ်းများအရ လက်ရှိတွင် အကျဉ်းထောင်များအတွင်း အမျိုးသား၊ အမျိုးသမီးနှင့် ကလေးသူငယ် စုစုပေါင်း ၁၄,၀၀၀ ကျော် ဖမ်းဆီးချုပ်နှောင်ခံထားရသည်။

အာဏာသိမ်းချိန်မှစ၍ ယနေ့အထိ အကျဉ်းထောင်များအတွင်း ကျန်းမာရေးစောင့်ရှောက်မှု မလုံ လောက်ခြင်းနှင့် ညှဉ်းပန်းနှိပ်စက်ခံရခြင်းတို့ကြောင့် နိုင်ငံရေးအကျဉ်းသား ၂၇၀ ကျော် အသက်ဆုံးရှုံးခဲ့ရသည်ဟု ထုတ်ပြန်ချက်တွင် ဖော်ပြထားသည်။

ကုလသမဂ္ဂ (UN)၊ ဥရောပသမဂ္ဂ (EU)၊ အာဆီယံနှင့် အမေရိကန် အပါအဝင် နိုင်ငံတကာခေါင်းဆောင်များအနေဖြင့် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများအားလုံး လွတ်မြောက်ရေးအတွက် အထူးအလေးထား ဆောင်ရွက်ပေးရန်၊ စစ်ကောင်စီ၏ တရားမဝင် အတုအယောင်အစိုးရအား အသိအမှတ်မပြုရန် တို့ကို အရပ်ဘက်အဖွဲ့များက တောင်းဆိုထားသည်။

ယင်းအပြင် ပြည်သူလူထုအပေါ် လေကြောင်းမှ ဗုံးကြဲနေမှုများကို ရပ်တန့်နိုင်ရန် လေယာဉ်ဆီ ရောင်း ချနေမှုများကို ပိတ်ဆို့ရန်၊ စစ်ရာဇဝတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် စစ်တပ်ကို နိုင်ငံတကာဥပဒေအရ တာဝန်ခံစေရန်တို့ကိုလည်း ဆက်လက် တောင်းဆိုထား သည်။

အဆိုပါ တောင်းဆိုမှုကို အထွေထွေသပိတ်ပေါင်းစပ်ညှိနှိုင်းရေးအင်အားစု (GSCB)၊ မြန်မာနိုင်ငံလုံးဆိုင်ရာ နိုင်ငံရေးအကျဉ်း သားများကွန်ရက် (PPNM)၊ နွေဦးတမာန် (NOTM) နှင့် ထောင်ဝင်စာပို့ကြမယ် (ကလေးမြို့) အပါအဝင် တိုင်းရင်းသားလူငယ်အဖွဲ့အစည်းများနှင့် လူ့အခွင့်အရေးအဖွဲ့ စုစုပေါင်း ၅၈ ဖွဲ့က ပူးပေါင်းထုတ်ပြန်ခဲ့ခြင်း ဖြစ်သည်။

The post ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေး နိုင်ငံတကာက ထိရောက်စွာ ဖိအားပေးရန် အရပ်ဘက်အဖွဲ့ ၅၈ ခုက စုပေါင်းတောင်းဆို appeared first on Khit Thit Media.

အကြမ်းဖက် စစ်ခေါင်းဆောင် မင်းအောင်လှိုင်က နိုင်ငံအကြီးအကဲ ဟု အမည်ရသည့် Head of State အမည်ဖြင့် Facebook စာမျက်နှာဖွင့်လှစ်လိုက်သော်လည်း နာရီပိုင်းပင်မခံဘဲ Page အဖျက်ခံလိုက်ရကြောင်း သိရှိရသည်။

ယနေ့ နံနက် ၁၁ နာရီဝန်းကျင်တွင် အကြမ်းဖက် မင်းအောင်လှိုင်၏ သတင်းများနှင့် ဓာတ်ပုံများ၊ ကြေညာချက်များကို ထုတ်ပြန်ရန်အတွက် Head of State အမည်ဖြင့် ဖေ့ဘုတ်စ်တွင် https://www.facebook.com/profile.php?id=61566096501996 စတင်ဖွင့်လှစ်ခဲ့ပြီး မင်းအောင်လှိုင်၏ ယမန်နေ့ နေပြည်တော်အစည်းအဝေးမှတ်တမ်းများ၊ ရက် ၁၀၀ ရည်မှန်းချက်များကို သတင်းပို့စ် ၄ ခု တင်ခဲ့ကြောင်း၊ ယင်းနောက် ယနေ့ မွန်းလွဲ ၃ နာရီ ၃၀ မိနစ် ဝန်းကျင်တွင် မင်းအောင်လှိုင်၏ Page မှာ ဖျက်ချခံလိုက်ရကြောင်း သိရှိရသည်။

စစ်လော်ဘီများကမူ မင်းအောင်လှိုင်၏ တရားဝင် Facebook စာမျက်နှာကို စတင်မိတ်ဆက်လိုက်ပြီဖြစ်၍ ပြည်သူများ အနေဖြင့် ထုတ်ပြန်သည့် တရားဝင်ကြေညာချက်များ၊ နိုင်ငံတော်ဆိုင်ရာ နောက်ဆုံးရသတင်းများ၊ ပြည်သူလူထုနှင့် တွေ့ဆုံဆောင်ရွက်မှုများနှင့် အရေးကြီးသော ထုတ်ပြန်ချက်များကို တိုက်ရိုက်မျှဝေသွားမည်ဖြစ်၍ Follow ထားရန် သတင်းထုတ်ပြန်ချိန်မှာပင် Page မှာ ဖျက်ချခံလိုက်ရခြင်းဖြစ်သည်။

မင်းအောင်လှိုင်၏ ဖေ့ဘုတ်စ်စာမျက်နှာတွင် ပြည်သူများအား သတင်းအချက်အလက်များကို အချိန်နှင့်တစ်ပြေးညီ သိရှိစေရန်၊ ပွင့်လင်းမြင်သာမှုကို မြှင့်တင်ရန်နှင့် အစိုးရနှင့် ပြည်သူအကြား ဆက်သွယ်ရေးကို ပိုမိုခိုင်မာအားကောင်းစေရန်ဖြစ်ကြောင်း ရည်ရွယ်သည်ဟု ဝါဒဖြန့်ထားသော်လည်း နောက်ဆုံးတွင် Page မှာ နာရီပိုင်းအတွင်း ဖျက်ချခံလိုက်ရခြင်းဖြစ်သည်။

၂၀၁၈ ခုနှစ်၊ ဩဂုတ်လအတွင်းတွင်လည်း ရိုဟင်ဂျာ လူမျိုးတုန်းသတ်ဖြတ်မှုအပါအဝင် စစ်ရာဇဝတ်မှုများ စွာ ကျူးလွန်ထားသော မင်းအောင်လှိုင်၏ Facebook စာမျက်နှာ အပါအဝင် စစ်တပ် သတင်းပြန်ကြားရေး Facebook စာမျက်နှာ အားလုံးနီးပါးကို ဖေ့ဘုတ်စ်က ဖယ်ရှားပိတ်သိမ်းခဲ့ဖူးသည်။

The post မင်းအောင်လှိုင်က နိုင်ငံအကြီးအကဲ- Head of State အမည်ဖြင့် Facebook စာမျက်နှာအသစ် ဖွင့်လှစ်လိုက်သော်လည်း နာရီပိုင်းပင်မခံဘဲ Page အဖျက်ခံလိုက်ရ appeared first on Khit Thit Media.

အကြမ်းဖက်စစ်တပ်က တိုင်းပြည်၏အခက်အခဲနှင့် အကျပ်အတည်းများ ကို ဖြေရှင်းရန် နိုင်ငံရေးဆန္ဒနှင့် အာသီသ မရှိ၍ ငြိမ်းချမ်းရေး ကမ်းလှမ်းချက်အပေါ် လက်မခံကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး- ABSDF က ပယ်ချတုံ့ပြန်လိုက်သည်။

အကြမ်းဖက်စစ်ခေါင်းဆောင် မင်းအောင်လှိုင်က ယမန်နေ့ နေပြည်တော်တွင် ပြုလုပ်သော တရားမဝင် အုပ်ချုပ်ရေးအဖွဲ့ အစည်းအဝေးတွင် အပစ်ရပ်စာချုပ်NCA လက်မှတ်ရေးထိုးထားပြီး လွန်ခဲ့သော ၅ နှစ်အတွင်း တွေ့ဆုံခဲ့ခြင်းမရှိသည့် KNU ၊ CNF ၊ ABSDF တပ်ဖွဲ့များကို ငြိမ်းချမ်းရေး ဆွေးနွေးရန် ဖိတ်ခေါ်ကြောင်း ပြောဆိုလာခြင်းဖြစ်သည်။

မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး-ABSDF မှ တွဲဖက်အထွေ ထွေအတွင်းရေးမှူး ၁ ရဲဘော်ကျော်ကျော်လင်းက အကြမ်းဖက် စစ်တပ်တွင် တိုင်းပြည်၏ အကျပ်အတည်းနှင့် အခက်အခဲကို ဖြေရှင်းရန် နိုင်ငံရေး ဆန္ဒနှင့် အာသီသ မရှိကြောင်း၊ ထို့ကြောင့်ငြိမ်းချမ်းရေး ကမ်းလှမ်းချက်ကို လက်ခံနိုင်စရာ မရှိကြောင်း ထုတ်ဖော်ပြောဆိုသည်။

“လက်ခံနိုင်စရာ မရှိပါဘူး။ စစ်တပ်မှာ တိုင်းပြည်အခက်အခဲအကျပ်အတည်းတွေကို ဖြေရှင်းဖို့ နိုင်ငံ ရေး အာသီသရော၊ ဆန္ဒရော မရှိပါဘူး။ လိုအပ်ရင်တော့ ကျနော်တို့ ထုတ်ပြန်ချက်ထုတ်သွားပါ့မယ်” ဟု ABSDF တွဲဖက်အထွေ ထွေအတွင်းရေးမှူး ၁ ရဲဘော်ကျော်ကျော်လင်းက ရန်ကုန်ခေတ်သစ် သတင်းဌာနထံသို့ ပြောဆိုသည်။

ABSDF သည် တစ်နိုင်ငံလုံးအပစ်ရပ်စာချုပ်NCA ကို သမ္မတ ဦးသိန်းစိန်အစိုးရလက်ထက် ၂၀၁၅ ခုနှစ်တွင် လက်မှတ်ရေးထိုးခဲ့သော်လည်း အကြမ်းဖက်စစ်တပ်က ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းချိန်တွင်မူ စစ်တပ်ကို တော်လှန်ရေးတပ်များနှင့်အတူ ဦးဆောင်လက်တွဲပြီး ဆန့်ကျင်တိုက်ခိုက်လျက်ရှိသော ကျောင်းသားတပ်မတော်ဖြစ်သည်။

ဓာတ်ပုံ- ၂၀၂၅ ခုနှစ်အတွင်း စစ်တပ်စခန်းကို တိုက်ခိုက်သိမ်းပိုက်မှုတွင် ပါဝင်ခဲ့သော ABSDF မှ တော်လှန်ရေးရဲဘော်များ။

The post အကြမ်းဖက်စစ်တပ်က တိုင်းပြည်အခက်အခဲနှင့်အကျပ်အတည်းများကို ဖြေရှင်းရန် နိုင်ငံရေးဆန္ဒနှင့် အာသီသ မရှိ၍ ငြိမ်းချမ်းရေး ကမ်းလှမ်းချက်အပေါ် လက်မခံဟု ABSDF က ပယ်ချ appeared first on Khit Thit Media.

အကြမ်းဖက်စစ်တပ်၏ မတရားဖမ်းဆီးမှုမှ ပြန်လည်လွတ်မြောက်လာသော နိုင်ငံတော်သမ္မတကြီး ဦးဝင်းမြင့်က တိုင်းပြည်နှင့်လူမျိုးအတွက် ဆက်လက်ဆောင်ရွက်ရန် အင်အားအပြည့်ရှိနေသည်ဟု ထုတ်ဖော်ပြောဆိုကြောင်း အမျိုးသားဒီမိုကရေစီအဖွဲ့ချုပ်၏ ပြောရေးဆိုခွင့်ရှိသူ ဒေါက်တာမျိုးညွန့်က ရန်ကုန်ခေတ်သစ်သတင်းဌာနထံသို့ ပြောဆိုသည်။

ယနေ့ မြန်မာနှစ်သစ်ကူး နှစ်ဆန်း ၁ ရက်နေ့တွင် ပြန်လည် လွတ်မြောက်လာသော နိုင်ငံတော်သမ္မတကြီး ဦးဝင်းမြင့်ကို NLD ပါတီမှ ပြောရေးဆိုခွင့်ရှိသူ ဒေါက်တာမျိုးညွန့်နှင့်မိတ်ဆွေများက သွားရောက် တွေ့ဆုံနှုတ်ဆက်ခဲ့ကြောင်း၊ ယင်းသို့ နှုတ်ဆက်စဉ် သမ္မတဦးဝင်းမြင့်က ၎င်းအနေဖြင့် မည်သည့် ဥပဒေမဲ့ လုပ်ရပ်မှ ကျူးလွန်ခဲ့ခြင်းမရှိကြောင်း၊ တိုင်းပြည်နှင့်လူမျိုးအတွက် ဆက်လက် ဆောင်ရွက်ရန် အင်အားအပြည့်ရှိသည်ဟု ထုတ်ဖော်ပြောဆိုကြောင်း ဒေါက်တာမျိုးညွှန့်က ရှင်းပြသည်။

“သမ္မတကြီးကတော့ ထုံးစံအတိုင်း ဘယ်သောအခါမှ ဥပဒေမဲ့ လုပ်ခြင်း၊ ကျူးလွန်ခြင်းမျိုး ဘယ်တော့မှ လုပ်မှာမဟုတ်ဘူး။ တိုင်းပြည်နဲ့ လူမျိုးအတွက် ဆက်လက်ဆောင်ရွက်ဖို့ အင်အားအပြည့်ရှိနေပါတယ်ဆိုတာ ပြောနိုင်ပါတယ်” ဟု ဒေါက်တာမျိုးညွန့်က ရှင်းပြသည်။

လတ်တလော ဒေါ်အောင်ဆန်းစုကြည်နှင့်ပတ်သက်၍ အမျိုးမျိုးသော သတင်းများထွက်နေသော် လည်း မည်သည့်သတင်းကိုမှ အတည်ပြု၍ မရကြောင်း၊ ဒေါ်အောင်ဆန်းစုကြည်ကို မည်သည့်နေရာတွင် ထားရှိသည်ကိုပင် မသိရှိကြောင်း ဒေါက်တာမျိုးညွှန့်က ပြောဆိုသည်။

The post တိုင်းပြည်နှင့်လူမျိုးအတွက် ဆက်လက်ဆောင်ရွက်ရန် အင်အားအပြည့်ရှိနေဟု နိုင်ငံတော်သမ္မတကြီး ဦးဝင်းမြင့် ပြောဆို appeared first on Khit Thit Media.

ကရင်နီပြည်အတွင်းရှိ အကျဉ်းထောင်အသီးသီးမှ အကျဉ်းသား ၂၃၄ ဦးကို လွတ်ငြိမ်းချမ်း သာ ခွင့်ပေးလိုက်ကြောင်း ကရင်နီပြည်ကြားကာလ အုပ်ချုပ်ရေးကောင်စီ – IEC အထွေထွေ အတွင်း ရေးမှူး – ၂ ဗညားခွန်းအောင်က ရန်ကုန်ခေတ်သစ်သတင်းဌာနထံသို့ ပြောကြားသည်။

ယနေ့ ဧပြီလ ၁၇ ရက်နေ့တွင် မြန်မာ့နှစ်သစ်ကူး မင်္ဂလာအခါသမယ အထိမ်းအမှတ်အားဖြင့် လည်း ကောင်း၊ လူသားချင်း စာနာထောက်ထားမှုကို အလေးထားသောအားဖြင့်လည်းကောင်း၊ အကျဉ်း ထောင်/ စခန်း အသီးသီးတွင် အကျဉ်းကျခံနေကြရသော လွတ်ငြိမ်းချမ်းသာခွင့် ရရှိသူ အကျဉ်းသူ/ သား ၂၅ ဦး နှင့် လွတ်ငြိမ်းသက်သာခွင့်ရရှိသူ အကျဉ်းသူ/သား ၂၀၉ ဦး၊ စုစုပေါင်း အကျဉ်းသူ/သား ၂၃၄ ဦးကို ပြစ်ဒဏ်လွတ်ငြိမ်းချမ်းသာခွင့်နှင့် သက်သာခွင့်ပေးလိုက်ကြောင်း သိရသည်။

“အားလုံးကတော့ ၂၃၄ ဦးပေါ့၊ ဒါပေမယ့် အများကြီးခွဲထားတာရှိပါတယ်။ ဥပမာဖြင့် လုံးဝကို လွတ် ငြိမ်းပေးတာရှိတယ်။ တစ်လ လွတ်ငြိမ်းတို့၊ တစ်လသက်သာတို့၊ ၂ လ သက်သာတို့ ၃ လသက်သာတို့ ပေါ့နော်။ စသည်ဖြင့် Section လေးတွေခွဲထားတာရှိပါတယ်။ အများစုကတော့ အမှုသေးတွေနဲ့ နောက်ပြီးတော့ ကျန်းမာရေး အရ ဆေးကုသဖို့၊ ပြန်လည်ပြီးတော့ မိသားစုနဲ့အတူတူနေထိုင်ပြီးတော့ ဆေးကုသဖို့ လိုအပ်တဲ့သူတွေကို အဓိကထားလွှတ်တယ်။ နောက်တစ်ခုကတော့ ပြစ်ဒဏ်ထိန်းသိမ်း စဉ်ကာလမှာ အချုပ်၊ ထောင်စည်းကမ်း လိုက်နာနိုင်မှုအပေါ် အခြေခံပြီးတော့ လွတ်ငြိမ်းပေးခြင်း ဖြစ်ပါတယ်။” ဟု ကရင်နီပြည်ကြား ကာလ အုပ်ချုပ်ရေးကောင်စီ – IEC အထွေထွေ အတွင်း ရေးမှူး – ၂ ဗညားခွန်းအောင်က ရန်ကုန်ခေတ်သစ်သတင်းဌာနထံသို့ ပြောကြားသည်။

အဆိုပါ လွတ်ငြိမ်းချမ်သာလွင့်နှင့်သက်ခွင့်ကို ကရင်နီပြည်၏ ကြားကာလအစီအမံ အပိုဒ် ၇၅ ၊ အပိုဒ် ခွဲ ခ အရ ပေးလိုက်ခြင်းဖြစ်ပြီး သက်ဆိုင်ရာမိသားစုဝင်ထံသို့ အေးချမ်းစွာရောက်ရှိစေရန် တရားရေး ဌာန နှင့် ကရင်နီပြည်ရဲတပ်ဖွဲ့ – KSP တို့ ပူးပေါင်းကာ စီစဉ်ပေးလျက်ရှိကြောင်း သိရသည်။

The post ကရင်နီပြည်ကြားကာလအုပ်ချုပ်ရေးကောင်စီ- IEC က အကျဉ်းသား ၂၃၄ ဦးကို လွတ်ငြိမ်းချမ်းသာ ခွင့်ပေး appeared first on Khit Thit Media.

နိုင်ငံတော်သမ္မတ ဦးဝင်းမြင့်ကို အကြမ်းဖက် စစ်တပ်က ပြန်လွှတ်ပေးရာတွင် နောက်တစ်ကြိမ် ပြစ်မှုထပ်မံကျူးလွန်ပါက ပြစ်မှုလက်ကျန်ကိုပါ ဆက်လက်ကျခံရမည်ဆိုသော စည်းကမ်းချက် သတ်မှတ်ထားကြောင်း စစ်တပ်၏ ထုတ်ပြန်ချက်အရ သိရှိရသည်။

တောင်ငူအကျဉ်းထောင်တွင် အကျဉ်းကျခံနေရသော နိုင်ငံတော်သမ္မတကြီး ဦးဝင်းမြင့်ကို အကြမး်ဖက်စစ်တပ်က ယနေ့တွင် ရာဇဝတ်ကျင့်ထုံးဥပဒေ ပုဒ်မ ၄၀၁ ၊ ပုဒ်မခွဲ၁ ဖြင့် ပြန်လည်လွှတ်ပေးခြင်းဖြစ်ပြီး အဆိုပါ ပုဒ်မမှာ နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန် ကျန်ရှိနေသော ပြစ်ဒဏ်များကိုပါ ဆက်လက်ကျခံပါမည်ဆိုသော စည်းကမ်းချက်ဖြင့် ပြန်လည် လွှတ်ပေးခြင်းဖြစ်ကြောင်း သိရှိရသည်။

အခြားသတင်းများအရ လူထုခေါင်းဆောင် ဒေါ်အောင်ဆန်းစုကြည်ကိုလည်း နေအိမ်အကျယ်ချုပ်သို့ ပြောင်းလဲမည်ဆိုသော သတင်းများ ကျယ်ပြန့်စွာ ထွက် ပေါ်နေပြီး NLD ပါတီမှ ဗဟိုအလုပ်အမှုဆောင် ဒေါက်တာမျိုးညွန့်အပါအဝင် ခေါင်းဆောင်များ နေပြည်တော်သို့ သွားရောက်နေကြကြောင်း သိရှိရသည်။

The post နိုင်ငံတော်သမ္မတ ဦးဝင်းမြင့်ကို အကြမ်းဖက် စစ်တပ်က ပြန်လွှတ်ပေးရာတွင် နောက်တစ်ကြိမ် ပြစ်မှုထပ်မံကျူးလွန်ပါက ပြစ်မှုလက်ကျန်ကိုပါ ပြန်လည်ကျခံရမည်ဆိုသော စည်းကမ်းချက် သတ်မှတ်ထား appeared first on Khit Thit Media.

စစ်ကောင်စီ၏ နှစ်သစ်ကူးလွတ်ငြိမ်းချမ်းသာခွင့်ဖြင့် ထောင်ဒဏ် တစ်သက် တစ်ကျွန်း ချမှတ်ခံထားရသည့် နာမည်ကြီး မှတ်တမ်းရုပ်ရှင်ရိုက်ကူးသူ ရှင်ဒေဝီသည် ယနေ့ ဧပြီလ ၁၇ ရက်နေ့တွင် အင်းစိန်ထောင်မှ ပြန်လည်လွတ်မြောက်လာပြီဖြစ်ကြောင်း သိရသည်။

မရှင်ဒေဝီ လွတ်မြောက်လာသည့်အခြေအနေနှင့် ပတ်သက်၍ မြန်မာနိုင်ငံနိုင်ငံရေးအကျဉ်းသားများကွန်ရက် (PPNM) မှ ဦးဆောင်အဖွဲ့ဝင် ကိုသိုက်ထွန်းဦးက “ဟုတ်ပါတယ်။ ဆရာမရှင်ဒေဝီ ပြန်လွတ်လာပါတယ်” ဟု အတည်ပြု ပြောကြားသည်။

ရှင်ဒေဝီသည် ၂၀၂၃ ခုနှစ်၊ အောက်တိုဘာလ ၁၅ ရက်နေ့တွင် ရန်ကုန်မြို့၊ မြောက်ဥက္ကလာပမြို့နယ်ရှိ အောင်မင်္ဂလာအဝေးပြေးဝင်းအတွင်း၌ အွန်လိုင်းမှ မှာယူထားသော ရိုက်ကူးရေးဒရုန်းကို သွားရောက်ထုတ်ယူစဉ် စစ်ဆေးဖမ်းဆီးခံခဲ့ရခြင်းဖြစ်သည်။

၎င်းကို စစ်ကောင်စီက အကြမ်းဖက်မှုတိုက်ဖျက်ရေးဥပဒေပုဒ်မများဖြင့် တရား စွဲဆိုခဲ့ပြီး ၂၀၂၄ ခုနှစ်၊ ဇန်နဝါရီလ ၁၀ ရက်နေ့တွင် အင်းစိန်ထောင်တွင်းစစ်ခုံရုံးက ထောင်ဒဏ်တစ်သက်တစ်ကျွန်း ပြင်း ပြင်းထန်ထန် ချမှတ်ခဲ့ခြင်းဖြစ်သည်။

အသက် ၅၀ နှစ်အရွယ်ရှိ ရှင်ဒေဝီသည် ဖမ်းဆီးခံရပြီးနောက် စစ်ကြောရေးတွင် ၂ ပတ်ခန့်ကြာမြင့်စွာ ရိုက်နှက်စစ်ဆေးမေးမြန်းမှုများကို ခံခဲ့ရကြောင်းလည်း သိရသည်။

ရှင်ဒေဝီသည် ၁၉၈၈ ခုနှစ် အရေးတော်ပုံကာလကတည်းက စစ်အာဏာ ရှင်စနစ်ကို ဆန့်ကျင်ခဲ့သူတစ်ဦးဖြစ်ပြီး၊ ၂၀၀၇ ခုနှစ် ရွှေဝါရောင်တော်လှန်ရေးကဲ့သို့သော မြန်မာ့နိုင်ငံရေး အချိုးအကွေ့များကို မှတ်တမ်းရုပ်ရှင်များအဖြစ် ဖန်တီးကာ နိုင်ငံတကာသို့ တင်ပြခဲ့သည့် ထင်ရှားသော အမျိုးသမီးမှတ်တမ်းရုပ်ရှင်ရိုက်ကူးသူနှင့် သတင်းထောက်တစ်ဦးလည်း ဖြစ်သည်။

ဓာတ်ပုံ- PPNM ။

The post စစ်တပ်၏ လွတ်ငြိမ်းချမ်းသာခွင့်ဖြင့် မှတ်တမ်းရုပ်ရှင်ရိုက်ကူးသူ ရှင်ဒေဝီ ပြန်လည်လွတ်မြောက် appeared first on Khit Thit Media.