ရန်ကုန်၊ ဇန်နဝါရီ ၁၇
ကရင်အမျိုးသားအစည်းအရုံး KNU တပ်မဟာ ၅ နယ်မြေ၊ မူတြော် (ဖာပွန်) ခရိုင်၊ မဲပလိကျေးရွာရှိ စစ်ကောင်စီလက်အောက်ခံ BGF စခန်းကို KNLA တပ်မဟာ ၅၊ တပ်ရင်း ၁၀၂ တပ်ဖွဲ့များက ဇန်နဝါရီလ ၁၆ ရက်တွင် ဝင်ရောက်တိုက်ခိုက်ပြီး စခန်းကို မီးရှို့ဖျက်ဆီးခဲ့သည်။
BGF တပ်များအနေဖြင့် အကြမ်းဖက်စစ်ကောင်စီကို ဆက်လက်ကူညီပံ့ပိုးနေမည်ဆိုပါက နေရာဒေသမရွေး တိုက်ခိုက်မည်ဟု KNLA တပ်မဟာ ၅ ဗိုလ်မှူးချုပ် စောမူဟဲက ဇန်နဝါရီလ ၁၂ ရက် ရက်စွဲဖြင့် စာထုတ်ပြန် ပြောဆိုထားသည်။
အဆိုပါစခန်းသည် နယ်ခြားစောင့်တပ် BGF အမှတ် ၁၀၁၄ တပ်ရင်း စခန်းတစ်ခုဖြစ်ကြောင်း၊ ဝင်ရောက်တိုက်ခိုက်ပြီးနောက် စခန်းကို မီးရှို့ဖျက်ဆီးလိုက်ကြောင်း KNLA တပ်မဟာ ၅ သတင်းရင်းမြစ်က ပြောသည်။အဆိုပါ စခန်းသိမ်းတိုက်ပွဲတွင် KNLA ဘက်မှ ၂ ဦး ဒဏ်ရာရရှိခဲ့ပြီး BGF သေဆုံးဒဏ်ရာရမှုစာရင်းကိုမူ မသိရှိနိုင်သေးပေ။
