ရန်ကုန်၊ မတ် ၄
ချင်းပြည်နယ်၊ ကန်ပက်လက်မြို့နယ်နှင့် မကွေးတိုင်းအစပ်တွင် အကြမ်းဖက် စစ်ကောင်စီတပ်ဖွဲ့နှင့် CDF ကန်ပက်လက်ကြား ယနေ့ မတ်လ ၄ ရက်နေ့ မွန်းလွဲ ၁ နာရီ ၄၀ မိနစ်မှာ စတင်ကာ တိုက်ပွဲဖြစ်ပွားနေပြီး စစ်ကောင်စီဘက်မှ ၇ ဦးသေဆုံးကြောင်း CDF ကန်ပက်လက်က သတင်းထုတ်ပြန်သည်။
မကွေးတိုင်း၊ ကျောက်ထုဘက်မှ စစ်ကြောင်း ၃ ကြောင်းခွဲကာ ထိုးစစ်ဆင်လာသော စစ်ကောင်စီတပ်ဖွဲ့နှင့် CDF ကြား တိုက်ပွဲဖြစ်ပွားနေပြီး CDF ကန်ပက်လက်ဘက်မှ ထိခိုက်မှု မရှိကြောင်း လက်ရှိအချိန်ထိ တိုက်ပွဲဆက်လက်ဖြစ်ပွားနေကြောင်း သိရှိရသည်။
အလားတူ တောင်ငူမြို့၊ ရန်ကုန်-နေပြည်တော် အမြန်လမ်း အနောက်ဖက် ၈ မိုင်ခန့်အကွာတွင် အင်အား ၈၀ ခန့်ရှိသော စစ်ကောင်စီတပ်ဖွဲ့နှင့် တောင်ငူခရိုင် PDF တပ်ရင်းအမှတ် ၃၅၀၁၊ တပ်ခွဲ ၁ ကြား တိုက်ပွဲဖြစ်ပွားကာ စစ်ကောင်စီဘက်မှ ၁၅ ဦးခန့် သေဆုံးပြီး ဒဏ်ရာရသူများလည်း ရှိကြောင်း သတင်းရရှိသည်။
တောင်ငူမြို့အနောက်ဖက် နတ်ရေတွင်းကျေးရွာအနီး ရကိုင်းချောင်းရိုးတလျောက် ခြေလျင် ချီတက်လာသော စစ်ကောင်စီတပ်ဖွဲ့ကို တောင်ငူ PDF က အသင့်စောင့်ဆိုင်းကာ မိုင်း ၄ လုံးဖြင့် ဖောက်ခွဲတိုက်ခိုက်ခဲ့ပြီး ဝိုင်းဝန်းပစ်ခတ်ရာ စစ်သား ၁၅ ဦးခန့် သေဆုံးခြင်းဖြစ်ကြောင်း သိရှိရသည်။
စစ်ကောင်စီမှ ဒဏ်ရာရသူ ၇ ဦးကို ထမ်းစဉ်များဖြင့် သယ်ဆောင်သွားကြောင်း၊ သေဆုံးစစ်သားအလောင်းများကို သယ်ဆောင်သွားခြင်း မရှိသေးကြောင်း အထိနာသော စစ်ကောင်စီတပ်သည် ယနေ့ မွန်းလွဲ ၂ နာရီခန့်တွင် တိုက်ပွဲဖြစ်ပွားရာ ပဲခူးရိုးမတောင်ခြေဒေသသို့ စစ်ကား ၈ စီးဖြင့် တပ်ကူများ ထပ်မံရောက်ရှိလာကြောင်း သတင်းရရှိသည်။
ဓါတ်ပုံ – CDF ကန်ပက်လက် တပ်ဖွဲ့ဝင်များ
