ရန်ကုန်၊ မတ် ၉
စစ်ကိုင်းတိုင်း မုံရွာမြို့ရှိ အကျဉ်းထောင်တွင် စစ်တပ်က မတရားသော ပုဒ်မများဖြင့် ဖမ်းဆီးထားသော နိုင်ငံရေး အကျဉ်းသားများကို အကျဉ်းထောင် အတွင်းရှိ လူမိုက်များနှင့် ထောင် အာဏာပိုင်များက ဝိုင်းဝန်း ဖိနှိပ်ရာမှ မတ်လ ၆ရက်နေ့ နံနက်ပိုင်းတွင် ထောင်ဆူမှု ဖြစ်ပွားခဲ့ကြောင်း သိရသည်။
အဆိုပါ ထောင် အာဏာပိုင်များ လက်သက်မွေးထားသည့် ထောင်တွင်းလူမိုက်များက နိုင်ငံရေး အကျဉ်းသားများကို စော်ကား ပြောဆိုမှုများ အနိုင်ကျင့် ဖိနှိပ်မှုများ ပြုုလုပ်ရာမှ နိုင်ငံရေး အကျဉ်းသားများ သည်းမခံနိုင်တော့ဘဲ ပြန်လည် တုံ့ပြန်ရာမှ ထောင်တွင်းရန်ပွဲဖြစ်ပွားခဲ့ပြီး နိုင်ငံရေး အကျဉ်းသား ၁ဦးကို ထောင်တွင်း လူမိုက်များက ဝိုင်းဝန်း ရိုက်နှက်ခံရချိန်တွင် ထောင်ဆူမှုဖြစ်ပွားခဲ့ခြင်း ဖြစ်ကြောင်း သိရသည်။
ထိုသို့ ထောင်ဆူမှု ဖြစ်ပွားပြီးနောက် ထောင်အာဏာပိုင်များ ရောက်လာကာ ဝိုင်းဝန်း ထိုးကြိတ်ခဲ့သော ထောင်တွင်း လူမိုက်များကို အရေးယူပေးမည်ဟု ပြောဆိုပြီး အယောင်ပြ လုပ်ဆောင်ခဲ့ခြင်းကြောင့် ထိုက်သင့်သော ပြစ်ဒဏ် မပေးမချင်း ထမင်းမစားဘဲ ဆက်လက် စောင့်ဆိုင်းနေမည်ဟု ဆန္ဒပြခဲ့ကြကြောင်း၊ ထောင်အာဏာပိုင်များက လူမိုက်များကို ထိုက်သင့်သော ပြစ်ဒဏ်ပေးမည်ဟု လိုက်လျောခဲ့ကြောင်း သိရသည်။
ယင်း နိုင်ငံရေး အကျဉ်သားများအား ဝိုင်းဝန်းရိုက်နှက်ခဲ့သည့် ထောင်တွင်း လူမိုက်များကို ထောက်ခြေကျင်း ၁လနှင့် အဆောင်ပြောင်း ပြစ်ဒဏ်ပေးကာ ၎င်းတို့ မှားယွင်းခဲ့ကြောင်း နိုင်ငံရေး အကျဉ်သားများကို ပြန်လည် တောင်းပန်ခဲ့ကြောင်း သိရသည်။
အလားတူ မုံရွာ အကျဉ်းထောင် အတွင်းရှိ ထောင်ပိုင်ဆိုသူနှင့် အိပ်ဆောင်မှူး ဇော်ဇော်အောင် ဆိုသူလည်း နိုင်ငံရေး အကျဉ်းသားများ ဖိနှိပ်စော်ကားမှု ပြုလုပ်ခဲ့ကြောင်း သိရသည်။
