ရန်ကုန်၊ မတ် ၁၈
အကြမ်းဖက်စစ်ကောင်စီလက်ပါးစေ BGF တပ်ရင်း ၁၀၁၆ မှ တပ်သားအဆင့်ရှိသူ စောမော်ဝါးသည် မတ်လ ၁၇ ရက်နေ့တွင် ကရင်အမျိုးသားအစည်းအရုံး KNU တပ်မဟာ ၅၊ တပ်ရင်း ၁၀၂၊ တပ်ခွဲ ၃ ထံ လက်နက်ခဲယမ်းအပြည့်အစုံဖြင့် အလင်းဝင်လာကြောင်း KNU တပ်မဟာ ၅ မူတြော်သတင်းစဉ်က သတင်းထုတ်ပြန်သည်။
ဖားအံမြို့ဇာတိ စောမော်ဝါးသည် ၎င်း၏ အထက်အရာရှိများ၏ အမိန့်စေခိုင်းချက်ဖြင့် ကရင်အချင်းချင်း ပြည်လည်တိုက်ခိုက်ခြင်း၊ အပစ်မဲ့ပြည်သူများအားသတ်ဖြတ်ခြင်းများကို မိုက်ရူးရဲဆန်ဆန်မပြုလုပ်လိုပါတော့သဖြင့် ယခုလိုအလင်းပြန်လည်ဝင်ရောက်လာရခြင်းဖြစ်ကြောင်း မူတြော်သတင်းစဉ်က ဖော်ပြသည်။
BGF တပ်ရင်း ၁၀၁၆ သည် လှိုင်းဘွဲ့မြို့နယ်၊ ဒေါ်လန်းရွာအခြေစိုက် တပ်ရင်းတခု ဖြစ်သည်။
တပ်သားစောမော်ဝါးသည် M-16 အမျိုးအစား ရိုင်ဖယ်သေနတ် ၁ လက်၊ ကျည်ဘောက် ၃ ခု၊ ကျည်ဆံ ၃၀၀ ဖြင့် အလင်းဝင်ခဲ့ကြောင်း သိရှိရသည်။
ထိုသို့အလင်းဝင်ရောက်ခိုလှုံရာတွင် ၎င်းနှင့်အတူ M-16 ARတစ်လက်၊ ကျည်ကာ(၃)ချပ်နှင့် ကျည်ဆံ(၃၀၀)လုံးအပြည့် ယူဆောင်လာခဲ့ကြောင်းသိရသည်။
ဓါတ်ပုံ – KNU ထံအလင်းဝင်လာသော BGF မှ တပ်သား စောမော်ဝါး
