မြစ်ကြီးနားမြို့နယ်ရှိ မြောက်ပိုင်းတိုင်းစစ်ဌာနချုပ်ဂိတ်ကို ၄၀ မမ ဗုံးသီးဖြင့် ထု၊ မြို့လှတွင်လည်းစစ်ကောင်စီတပ်ကို မိုင်းဆွဲတိုက်ခိုက်၊ ဆားလင်းကြီးနှင့်မင်းကင်းတွင်လည်း စစ်တပ်ကို မိုင်းဆွဲတိုက်၊ စုစုပေါင်း စစ်သား ၁၂ ဦးသေဆုံး

ရန်ကုန်၊ မတ် ၂၃

မြစ်ကြီးနားမြို့နယ်ရှိ မြောက်ပိုင်းတိုင်းစစ်ဌာနချုပ်ဂိတ်ကို ၄၀ မမ ဗုံးသီးဖြင့် ပစ်ခတ်ခြင်း၊ မြို့လှတွင်လည်းစစ်ကောင်စီတပ်ကို မိုင်းဆွဲတိုက်ခိုက်ခြင်း ဆားလင်းကြီးနှင့်မင်းကင်းတွင်လည်း စစ်တပ်ကို မိုင်းဆွဲတိုက်ခိုက်ခြင်းတို့ကြောင့် စုစုပေါင်း စစ်သား ၁၂ ဦးသေဆုံးပြီး အများအပြားဒဏ်ရာရရှိကြောင်း သိရှိရသည်။

မြစ်ကြီးနား
========

မတ်လ ၂၂ ရက်နေ့ ညနေ ၆ နာရီကချင်ပြည်နယ်၊ မြစ်ကြီးနားမြို့နယ်၊ မြစ်ကြီးနားဂေါက်ကွင်းမှ လုံခြုံရေးတာဝန်ကျစစ်ကောင်စီတပ်ဖွဲ့ဝင် များကို ၄၀ မမ ဗုံးသီးဖြင့် ပစ်ခတ်တိုက်ခိုက်ခဲ့ကြောင်း၊ ယင်းနောက်ည ၇ နာရီအချိန် မြောက်ပိုင်းတိုင်းစစ်ဌာနချုပ်ဂိတ်ရှိ လုံခြုံရေးတာဝန်ကျ စစ်သားများ ၄၀မမ ဗုံးသီးဖြင့် ပစ်ခတ်ခဲ့ကြောင်းသိရှီရသည်။

မြို့လှ
=======

ကချင်ပြည်နယ်၊ မြို့လှမြို့နယ်အတွင်း ခြေလျင်စစ်ကြောင်းထိုးလာသော အကြမ်းဖက်စစ်ကောင်စီတပ်ဖွဲ့ကို ယနေ့ မတ်လ ၂၃ ရက် နံနက် ၆ နာရီခန့်တွင် ချောင်းဝကျေးရွာအနီး၌ မြို့လှ PDF က မိုင်းဆွဲတိုက်ခိုက်ခဲ့ပြီး စစ်သား ၂ ဦးသေဆုံးကာ ၅ ဦးထက်မနည်း ဒဏ်ရာရကြောင်း သတင်းရရှိသည်။

အင်အား ၅၀ ခန့်ပါသော စစ်ကောင်စီတပ်ဖွဲ့သည် မင်းကျောင်းကုန်းရွာမှ ချောင်းဝကျေးရွာဖက်သို့ ကန်ဘောင်လမ်းအတိုင်း ထွက်ခွာလာစဉ် မြို့လှ PDF မှ ဗိုလ်မိုဃ်းကြိုးဦးဆောင်သော အဖွဲ့က မိုင်း ၈ လုံးဖြင့် ဖောက်ခွဲတိုက်ခိုက်ရာ စစ်သား ၂ ဦး ပွဲချင်းပြီးသေဆုံးကြောင်း၊ ၅ ဦးထက်မနည်း ဒဏ်ရာရကြောင်း မြို့လှ PDF က သတင်းထုတ်ပြန်သည်။

အကြမ်းဖက်စစ်ကောင်စီက သေဆုံးစစ်သားအလောင်းများနှင့် ဒဏ်ရာရသူများကို စက်လှေများဖြင့် သယ်ယူနေကြောင်းနှင့် မြို့လှ PDF များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။

မင်းကင်း
========

မတ်လ ၂၃ ရက်နေ့ နံနက် ၅ နာရီ ၃၀ မိနစ်အချိန်တွင် စစ်ကိုင်းတိုင်း၊ မင်းကင်းနယ် တောင်တွင်းချောင် ကျော်ရွာတွင် တပ်ဆွဲထားသော စကစများကို KLG PDF ရွှေသမင်မုဆိုးPDF ရွှေတြိဂံPDF ကနီတပ်ရင်း ၂ နှင့် ဒေသခံမဟာမိတ်များ ပူးပေါင်းတိုက်ခိုက်ခဲ့ကြောင်း၊ ၂ နာရီကျော်ကြာ တိုက်ပွဲအတွင်း စစ်ကောင်စီတပ်ဖွဲ့ဝင် ၁၀ ဦး သေဆုံးခဲ့ပြီး PDF ၃ ဦးကျည်ထိမှန်ထားကြောင်း သိရှိရသည်။

ဆားလင်းကြီး
===========

စစ်ကိုင်းတိုင်း၊ ဆားလင်းကြီးမြို့နယ်တွင် ရွှေတောင်ဦးကုန်းမှ ဆင်းလာသော စစ်ကောင်စီကား ၁၇စီးကို မတ်လ ၂၃ ရက်နေ့ နံနက် ၄ နာရီ ၃၀ မိနစ်အချိန်တွင် Unity Force monywa – UFMနှင့် Brother Defense Force – BDF တို့က စတင်တိုက်ခိုက်ခဲ့ကြောင်း သိရှိရသည်။

ဓာတ်ပုံ- ယမန်နေ့ညနေပိုင်း မြောက်ပိုင်းတိုင်းစစ်ဌာနချုပ်ကို ပစ်ခတ်ခဲ့သည့် ၄၀ မမ ဗုံးကျည်ခွံ။