ရန်ကုန်၊ ဇွန် ၁၀
မကွေးတိုင်း ရေစကြိုမြို့နယ် သဲတောရွာကို စစ်တပ်နှင့် ပျူစောထီးအဖွဲ့များက ဇွန်လ ၉ ရက်နေ့တွင် ဝင်ရောက် စီးနင်းခဲ့ပြီး ကျေးရွာနေ ပြည်သူ အသက် ၇ဝ အရွယ် ဒေါ်အေးကို မီးရှို့သတ်ဖြတ်ခဲ့ကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
စစ်တပ်က ကျေးရွာအတွင်းရှိ ပြည်သူပိုင်နေအိမ် ၂၇ လုံးကိုလည်း မီးရှို့ဖျက်ဆီးခဲ့ပြီး ကျေးရွာအတွင်းရှိ ပြည်သူပိုင် ပစ္စည်းများဖြစ်သော ထော်လာဂျီ ၁ စီး၊ ဆိုင်ကယ် အစီး ၃၀ ကျော်နှင့် တန်းဖိုးရှိ ပစ္စည်းများကို ခိုးယူ လုယက်သွားကြောင်းသိရသည်။
ထို့ပြင် ကျေးရွာနေပြည်သူ အသက် ၃၈ နှစ်အရွယ် အမျိုးသား ၁ ဦးကို ဖမ်းဆီးသွားပြီး မည်သည့် နေရာသို့ ခေါ်သွားသည်ကို မသိရှိရသေးကြောင်း ဒေသခံပြည်သူများက ပြောဆိုသည်။
အလားတူ စစ်ကိုင်းတိုင်း ကန့်ဘလူမြို့နယ် ရှော်ဖြူကုန်းကျေးရွာကို အကြမ်းဖက် စစ်တပ်က ဇွန်လ ၆ ရက်နေ့တွင် ဝင်ရောက်စီနင်း မီးရှို့ခဲ့ပြီး ပြည်သူပိုင် နေအိမ် ၁၁၈ လုံး မီးလောင်ပြာကျခဲ့ကြောင်း Kotaungbo Revolution KTB-R တပ်ဖွဲ့ထံမှ သိရသည်။
အကြမ်းဖက် စစ်တပ် မီးရှို့ဖျက်ဆီးခြင်းကြောင့် လျော်ဖြူကုန်းရွာအတွင်းရှိ ပြည်သူပိုင် နေအိမ် ၁၁၈ လုံးနှင့် စပါး တိုက် ၃၅ လုံးရှိ စပါးတင်း ၁ သောင်းကျာ် မီးလောင်ပြာကျခဲ့ကြောင်း သိရသည်။
ထို့ပြင်စစ်ကိုင်းတိုင်း ရေဦးမြို့နယ် ချမ်းသာရွာနှင့် ထန်းပင်ကုန်းရွာ ကို အကြမ်းဖက် စစ်တပ်က ဇွန်လ ၇ ရက်နေ့တွင် ဝင်ရောက် စီးနင်း မီးရှို့ခဲ့ပြီး ပြည်သူပိုင် နေအိမ် ၁၁၇ လုံး မီးလောင် ပြာကျခဲ့ကြောင်း ဒေသခံပြည်သူများထံမှ သိရသည်။
စစ်တပ် စစ်ကြောင်းက ချမ်းသာရွာကို ဇွန်လ ၈ ရက်နေ့ နံနက်ပိုင်းက စတင်ကာ လက်နက်ကြီးများဖြင့် ပစ်ခတ်ခဲ့ပြီး ကျေးရွာကို ဝင်ရောက်စီးနင်းကာ ညနေ ၃ နာရီခန့်မှ စတင်ပြီး ချမ်းသာရွာ အတွင်းရှိ ပြည်သူပိုင် နေအိမ် ၁၀၅ လုံး၊ ချမ်းသာရွာ အတွင်းအုပ်စုရှိ ထန်းတောကုန်းရပ်ကွက်မှပြည်သူပိုင် နေအိမ် ၉ လုံးနှင့် ထန်းပင်ကုန်းရွာရှိ ပြည်သူပိုင် နေအိမ် ၃ လုံးတို့ကို မီးရှို့ဖျက်ဆီးခဲ့ခြင်း ဖြစ်ကြောင်း သိရသည်။
ထို့ပြင် အကြမ်းဖက် စစ်တပ်က မေလ ၇ ရက်နေ့ကလည်း ချမ်းသာရွာရှိ ပြည်သူပိုင်နေအိမ် ၂၄ လုံးကို မီးရှို့ဖျက်ဆီးခဲ့ကာ ယခု အကြိမ်သည် ဒုတိယ ကြိမ်မြောက် မီးရှီု့ဖျက်ဆီးခံရခြင်း ဖြစ်ကြောင်း သိရသည်။
ချမ်းသာရွာသည် ခရစ်ယာန် ဘာသာဝင်များ နေထိုင်သော ကျေးရွာဖြစ်ပြီး အကြမ်းဖက် စစ်တပ်က ၂ ကြိမ် ဝင်ရောက်မီးရှို့ခဲ့သောကြောင့် ပြည်သူပိုင် နေအိမ် ၁၄၁ လုံး မီးလောင်ပြာကျခဲ့ကြောင်းသိရသည်။
