ရန်ကုန်၊ ဩဂုတ် ၂၆
မကွေးတိုင်း၊ မြိုင်မြို့နယ်တွင် PDF များ၏ ဖမ်းဆီးမှုခံရစဉ် ခုခံတိုက်သဖြင့် ပစ်ခတ်ရာမှ သေဆုံးသူ စစ်အရာရှိမှာ ဒုတိယဗိုလ်မှူးကြီး ထွန်းလင်းအောင်ဖြစ်ပြီး သေဆုံးချိန်တွင် ဇနီးဖြစ်သူ နည်းပညာတက္ကသိုလ်ကျောင်းဆရာမ J လုမိုင်နှင့်သားသမီး ၃ ဦး ကျန်ရစ်ကြောင်း ရန်ကုန်ခေတ်သစ်က စုံစမ်းသိရှိရသည်။
ဒုတိယဗိုလ်မှူးကြီး ထွန်းလင်းအောင်သည် မကွေးတိုင်း၊ မြိုင်မြို့နယ်ထဲသို့ အရပ်ဝတ်ဖြင့် ဆိုင်ကယ်စီး၍ ထွက်ခွာပြီး PDF ဂိတ်တစ်ခုကို PDF ဟု ဆိုကာ ဖြတ်ကျော်ခဲ့ကြောင်း၊ ယင်းနောက် အခြားဂိတ်တစ်ခုတွင် မြိုင်မြို့နယ် ပြည်သူ့ကာကွယ်ရေးတပ်(မြိုင်-ပကဖ) က ဖမ်းဆီးရမိခဲ့ခြင်းဖြစ်ကြောင်း၊ ဖမ်းဆီးရမိစဉ် PDF များကို ခုခံတိုက်ခိုက်၍ ထွက်ပြေးရာမှ ပစ်ခတ်မှုဖြစ်ပြီး သေဆုံးခြင်းဖြစ်ကြောင်း သိရှိရသည်။
PDF က ဒုတိယဗိုလ်မှူးကြီးထွန်းလင်းအောင်ကို ဖမ်းဆီးရမိချိန်တွင် ဇနီးဖြစ်သူက ဆက်သွယ်လာပြီး ခလရ ၄၁ လားရှိုးတွင် တာဝန်ကျချိန်တွင် အိမ်ထောင်ကျခြင်းဖြစ်ကြောင်း၊ ယင်းနောက် တာဝန်ကျရာနေရာသို့ လိုက်ပါပြောင်းရွှေ့ခြင်းဖြစ်ကြောင်း၊ လားရှိုးနည်းပညာတက္ကသိုလ်၊ EP ဌာနမှ တွဲဖက်ပါမောက္ခဖြစ်သည်ဟု ဆက်သွယ် ပြောဆိုလာကြောင်း သိရှိရသည်။ (အသံဖိုင်ကို ဖော်ပြပေးပါမည်)
စစ်တပ်အသိုင်း၀ိုင်းနှင့် ဇနီးဖြစ်သူ J လုမိုင်ကမူ ဒုတိယဗိုလ်မှူးကြီး ထွန်းလင်းအောင် သေဆုံးခြင်း မဟုတ်မှန်ဟု ဆက်လက် ငြင်းဆိုနေဆဲဖြစ်သည်။
ဒုတိယဗိုလ်မှူးကြီး ထွန်းလင်းအောင်၏ ဇနီး Jလုမိုင်က လူမှုကွန်ရက်တွင် Bhone Mai May Jlumai အကောင့်ဖြင့် “ငါနဲ့ ခြောက်ပေအကွာမှာနေပါလို့ ပြောချိန်တောင် မရလိုက်ဘူး သတင်းတစ်ပုဒ်ကြောင့် လူလည်း နေကောင်း ကျန်းမာလျက်ရှိနေပါတယ်ရှင်…ချစ်ရတဲ့သူငယ်ချင်း….” ဆိုသော စာသားကို တင်ထားသည်ကို တွေ့ရှိရသည်။
မြိုင်-ပြည်သူ့ကာကွယ်ရေးတပ်ဖွဲ့(ပကဖ)ကမူ သေဆုံးသွားသူ၏ ဖုန်းအတွင်းမှ ဒုတိယဗိုလ်မှူးကြီးဝတ်စုံဖြင့် သူဖြစ်ပြီး ဖုန်းအတွင်း ဓာတ်ပုံများကို ဖွက်ထား၍ Software ဖြင့် ဖော်မှသာ ဒုတိယဗိုလ်မှူးကြီးဝတ်စုံဖြင့် ပုံထွက်ရှိလာခြင်း ဖြစ် ကြောင်း မှတ်ပုံတင် အတုများလည်း ကိုင်ဆောင်ထားကြောင်း ရှင်းပြသည်။
