ရန်ကုန်၊ စက်တင်ဘာ ၂၈
ရန်ကုန်တိုင်း၊ လှိုင်မြို့နယ်၊ လျှပ်စစ်မီတာရုံး မကြာခဏ ဗုံးပစ်ခံရပြီးနောက် ဘူတာရုံလမ်းမှတ်တိုင် ကို စစ်ကောင်စီက ယခုညတွင် စတင်ဖျက်သိမ်းလိုက်ကြောင်း လှိုင်မြို့နယ် ပြည်သူများထံမှ သိရှိရသည်။
စက်တင်ဘာလ ၂၇ ရက်နေ့ ညနေ ၄ နာရီ ၃၀ မိနစ်အချိန်တွင် ရန်ကုန်-အင်းစိန် လမ်းမဘေး လှိုင်မြို့နယ် လျှပ်စစ်မီတာရုံးရှေ့ရှိ စစ်တပ်ဘန်ကာကို ဗုံးဖြင့် ပစ်ခြင်း၊ သေနတ်ဖြင့် ပစ်ခတ်ခြင်းများဖြစ်ပေါ်ခဲ့ကြောင်း၊ ဗုံးပစ်ခံရ သဖြင့် ဗိုလ်သင်တန်းကျောင်း (မှော်ဘီ)မှ ဒုတပ်ကြပ် စိုးရန်နိုင် ဝဲဘက်နားထင်ဗုံးစထိမှန်၊ ဒဏ်ရာနေရာစုံ (၁၂) ချက်ထိမှန်ခဲ့ပြီး တပ်မတော်စစ်ဆေးရုံသို့ ပို့ဆောင်ကုသနေလျက်ရိုကြောင်း သိရှိရသည်။
“အင်းစိန်ဘက်ကို ပြန်တဲ့ ရန်ကုန်-အင်းစိန် လမ်းပေါ်က ဘူတာရုံလမ်းမှတ်တိုင်ကို ဒီညက စပြီး ဖျက်သိမ်းလိုက်တယ်။ အင်းစိန်ဘက်ပြန်ရင် သုခ နဲ့ဆင်ရေတွင်းမှတ်တိုင်ကစီးရမယ်။ ဘူတာရုံးလမ်းမှတ်တိုင် မရှိတော့ဘူးပေါ့။ အဲဒီစာ ဒီည လာကပ်သွားတာ။ ဗုံးပစ်တာနဲ့ မှတ်တိုင်ဖျက်သိမ်းတာနဲ့ဘာမှလဲမဆိုင်ဘူး။ တော်တော်သွေးပျက်နေကြပြီထင်တယ်” ဟု ဒေသခံပြည်သူတစ်ဦးက ပြောသည်။
လက်ရှိတွင် စစ်ကောင်စီက လှိုင်မြို့နယ် မီတာရုံး ပတ်ဝန်းကျင် နေရာအများအပြားကို အကာအရံအတားအဆီးများ ချထားကြောင်း သိရှိရသည်။
ဓာတ်ပုံ- ဘူတာရုံးလမ်းမှတ်တိုင် ဖျက်သိမ်းကြောင်း ကြေညာထားသည့် ဆိုင်းဘုတ်ကို ယခုည စစ်တပ်က ထောင်သွားစဉ်။
