ရန်ကုန်၊ အောက်တိုဘာ ၂၈
စစ်ကိုင်းတိုင်း၊မြောင်မြို့နယ်၊ပရိမ္မကျေးရွာကို အကြမ်းဖက်စစ်ကောင်စီတပ်များက ယနေ့ နံနက်ပိုင်း လေကြောင်း ပစ်ခတ်တိုက်ခိုက်မှုများ လုပ်ဆောင်နေပြီး ပြည်သူများ ပိတ်မိနေကြောင်း ဒေသခံများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
အောက်တိုဘာလ ၂၈ ရက်နေ့ နံနက် ၇ နာရီအချိန် တိုက်ခိုက်ရေးရဟတ်ယာဉ် ၁ စီး၊ ရဟတ်ယာဉ် ၂ စီးဖြင့် ပစ်ခတ်နေခြင်းဖြစ်ကြောင်း ၊ အဆိုပါလေယာဉ်များသည် မုံရွာနမခ အထိုင်စခန်းမှ လာရောက်ပစ်ခတ်နေခြင်းဖြစ်ကြောင်း ဒေသခံများက ဆိုကြသည်။
“တိုက်ခိုက်ရေး ရဟတ်ယာဉ် ၁စီးနဲ့ မနက်၇နာရီမှာ ပစ်တယ်။ မနက် ၇နာရီ၁၅မိနစ်မှာ ရိုးရိုး သယ်ပို့ ရတတ်ယာဉ် ၂ စီး ရောက်လာပြီ မြေပြင်ကိုလူချတာလာတော့မသိဘူး။အဲ၂စီးကလည်း ပစ်ခတ်တာတွေ လုပ်တယ်။ မနက်ခင်း ၅ နာရီက ကျောက်ရစ်စခန်းကနေ ပရိမ္မရွာကို အင်အား၇၀နဲ့ စစ်ကြောင်းထိုးလာတယ်။ အဲဒီမှာ ပြည်သူကာကွယ်ရေးအဖွဲ့တွေနဲ့ တိုက်ပွဲဖြစ်ပွားပြီး စစ်ကောင်စီဘက်ကအကျဆုံးများလို့ အခုလို လာပစ်တာဖြစ်နိုင်တယ်” ဟု မြောင်ဒေသခံရွာသားတစ်ဦးကပြောသည်။
ယင်းနောက် နံနက် ၉ နာရီအချိန်တွင် စစ်တပ်က ကျေးရွာအတွင်းသို့ ပစ်ခတ် ဝင်ရောက်စီးနင်း၍ ကျေးရွာကို မီးရှို့နေကြောင်း ဒေသခံများက ဆိုကြသည်။
စစ်ကောင်စီတပ်များက မြောင်မြို့နယ်အတွင်းရှိ ကျေးရွာများ ကို စစ်ကြောင်းထိုးရာတွင် နံနက်အစောပိုင်းနှင့် ညပိုင်းအချိန်များ တွင် အငိုက်ဖမ်း စစ်ကြောင်းထိုးနေကြခြင်းဖြစ်ပြီး ပြည်သူများမှာ မည်သည့် ပစ္စည်းမှ မယူဆောင်နိုင်ဘဲ အသက်လု ထွက်ပြေးမှုများ များပြားနေကြောင်း သိရှိရသည်။
ဓာတ်ပုံ- ယနေ့ နံနက် ကျေးရွာကို ပစ်ခတ်နေသော အကြမ်းဖက်စစ်ကောင်စီ ၏ တိုက်ခိုက်ရေးရဟတ်ယာဉ်တစ်စင်း။
