ထားဝယ်-ထီးခီးလမ်းပိုင်းတွင် ၃ ရက်ဆက် တိုက်ပွဲဖြစ်ပွားပြီး PDF ရဲဘော် ၁ ဦးကျဆုံး၊ နေအိမ် ၁၅ လုံးကို စစ်တပ်က မီးရှို့ဖျက်ဆီး
ရန်ကုန်၊ ဇန်နဝါရီ ၈
တနင်္သာရီတိုင်း၊ ထားဝယ်-ထီးခီးလမ်းပိုင်းရှိ ရဲစခန်းနှင့် ရိက္ခာပို့ စစ်ကြောင်းကို PDF ပူးပေါင်းတပ်များက ၃ ရက်ဆက် တိုက်ခိုက်ခဲ့ကြောင်း နယ်မြေခံ သတင်းရင်းမြစ်များထံမှ သိရသည်။
ဇန်နဝါရီလ ၅ ရက်နေ့ ည ၉ နာရီခန့်တွင် ထားဝယ်-ထီးခီးလမ်းပိုင်းရှိ ပကာရီ ရဲစခန်းကို PDF ပူးပေါင်းတပ်ဖွဲ့များက ၄၀ မမ ဗုံးသီးများဖြင့် သွားရောက် ပစ်ခတ်တိုက်ခိုက်ခဲ့ပြီး အကြမ်းဖက် စစ်တပ်ဘက်က ထိခိုက်သေဆုံးမှုအခြေအနေကို အတည်မပြုနိုင်သေးကြောင်း သိရသည်။
ဇန်နဝါရလ ၆ ရက်နေ့ မွန်းလွဲပိုင်းတွင် သရက်ငုတ်ရွာအနီး၌ အကြမ်းဖက် စစ်တပ် ခြေလျင် စစ်ကြောင်းနှင့် ရိက္ခာတင် ကားများကို PDF ပူးပေါင်း တပ်ဖွဲ့များက လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့ပြီး အကြမ်းဖက် စစ်တပ်ဘက်မှ ထိခိုက်သေဆုံးမှုရှိသော်လည်း အရေအတွက် အတည်မပြုနိုင်သေးကြောင်း သိရသည်။
ဇန်နဝါရီလ ၇ ရက်နေ့ မွန်းလွဲပိုင်းတွင် ဝကုန်းနှင့် သင်္ကန်းတုံးရွာ အကြားရှိ ဗမဲ့တက်တောင်၌ တိုက်ပွဲထပ်မံဖြစ်ပွားခဲ့ပြီး PDG ရဲဘော် ၁ ဦးကျဆုံးခဲ့ကြောင်း သိရသည်။
အဆိုပါ ထိတွေ့ တိုက်ပွဲများအတွင်း အကြမ်းဖက် စစ်တပ်ဘက်မှလည်း ထိခိုက်သေဆုံးမှုများပြားခဲ့ပြီး သေဆုံးဒဏ်ရာရ စစ်သား အလောင်းများကို မီးရှို့သင်္ဂြိုလ်ပြီး ဖျောက်ဖျက်မှုများ လုပ်ဆောင်ခဲ့ကြောင်း၊ ထို့ပြင် သင်္ကန်းတုန်းရွာ နှင့် ဝကုန်းရွာ တို့ရှိ ပြည်သူပိုင် နေအိမ် ၁၅ လုံးနှင့် ဥယျာဥ်ခြံတို့ကို မီးရှို့ခဲ့ပြီး တန်ဖိုးကြီး ပစ္စည်းများ ခိုးယူသွားကြောင်း နယ်မြေခံ သတင်းရင်းမြစ်များက ပြောဆိုသည်။
