မြိုင်မြို့နယ်၊ ဗဟင်းရွာကို စစ်တပ်က MI 35 ရဟတ်ယာဥ်ဖြင့် ပစ်ခတ်၊ ပြည်သူများ ထိခိုက်မှုရှိ
ရန်ကုန်၊ ဇန်နဝါရီ ၂၁
မကွေးတိုင်း၊ မြိုင်မြို့နယ်၊ ဗဟင်းရွာကို စစ်တပ်က MI 35 ရဟတ်ယာဥ်ဖြင့် ပစ်ခတ်ခဲ့ပြီး ပြည်သူများ ထိခိုက်မှုရှိကြောင်း ဒေသခံ ပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဇန်နဝါရီလ ၂၁ ရက်နေ့ မွန်းလွဲ ၁ နာရီ ၃၀ မိနစ်တွင် မြိုင်မြို့နယ် ဗဟင်းရွာကို အကြမ်းဖက် စစ်တပ်က MI 35 ရဟတ်ယာဥ်ဖြင့် ပစ်ခတ် တိုက်ခိုက်ခဲ့ပြီး ပြည်သူများ ထိခိုက်မှုရှိသော်လည်း အခြေအနေ အသေးစိတ်ကို အတည်မပြုနိုင်သေးကြောင်း သိရသည်။
” ဗဟင်းရွာကို ပစ်တာလို့သိရတယ်။ အခုအတည်မပြုနိုင်တာက စာသင်ကျောင်းက ကလေးတွေ ဖျော်ဖြေပွဲကို ပစ်တာလား။ တိုက်နယ်ဆေးရုံကို ပစ်တာလား မသိရသေးဘူး။ ဘယ်နေရာကိုပစ်တယ်ဆိုတာ အတည်မပြုနိုင်သေးဘူး။ ဘာတိုက်ပွဲမှလည်းမရှိဘူး။ ဒီအတိုင်းကို လာပစ်သွားတာ ပြည်သူတွေ ထိခိုက်မှုရှိတယ်။ သေဆုံးသူ ရှိမရှိတော့ မသိရသေးဘူး” ဟု ဒေသခံ ပြည်သူတစ်ဦးက ပြောဆိုသည်။
