ကနီမြို့နယ်တွင် ကျဆုံးရဲဘော် ဇင်မင်းအောင်၏ ၁ လပြည့် အောက်မေ့ဖွယ် အခမ်းအနားနှင့် စစ်အာဏာရှင်ဆန့်ကျင်ရေး သပိတ်ချီတက်
ရန်ကုန်၊ ဖေဖော်ဝါရီ ၁၂
စစ်ကိုင်းတိုင်း၊ ယင်းမာပင်ခရိုင်၊ ကနီမြို့နယ်တွင် ဒေသခံပြည်သူများ ဦးဆောင်ပြီး နယ်မြေမငြိမ်မသက်ဖြစ်နေသည့်ကြားမှ ဒီပဲယင်းမြို့နယ် စိုင်ပြင်တိုက်ပွဲတွင် ကျဆုံးခဲ့သော ရဲဘော် ဇင်မင်းအောင်၏ ၁ လပြည့် အောက်မေ့ဖွယ်အခမ်း အနားနှင့် စစ်အာဏာရှင် ဆန့်ကျင်ရေး တော်လှန် သပိတ်ကို ပြုလုပ်ကြသည်။
ကျဆုံးရဲဘော်၏ဓာတ်ပုံများနှင့်အတူ “စစ်အာဏာရှင်ရှိနေသရွေ့ တိုင်းပြည်သေမိန့်ကျမည် ၊ “အာဇာနည်စိတ်မွေး ဖက်ဒရယ်တည်ဆောက်” ဘန်နာစာသားများ ကိုင်ဆောင်၍ “ငါတို့သည်ဗိုလ်ချုပ်အောင်ဆန်းများ” ၊ “ဘယ်သူတွေလဲ ကနီနယ်သားတွေ ၊ ကနီနယ်သားတွေ နီသလားဟေ့ နီတယ်ဟေ့” ကြွေးကြော်သံများ ကြွေးကြော်၍ စစ်အာဏာရှင်စနစ်ကို အလိုမရှိကြောင်းဆန္ဒပြကြသည်။
