မြဝတီမြို့နယ်တွင် ၆ ရက်ဆက် တိုက်ပွဲဖြစ်ပွားပြီး စစ်တပ်ဘက်မှ ၂၈ ဦး သေဆုံးကာ ၃ ဦးအရှင်ဖမ်းမိပြီး တော်လှန်ရေး ရဲဘော် ၃ ဦးကျဆုံး
ရန်ကုန် ၊ ဧပြီ ၁၀
ကရင်ပြည်နယ်၊ မြဝတီမြို့နယ်တွင် အကြမ်းဖက် စစ်တပ်နှင့် တော်လှန်ရေး တပ်ဖွဲ့များ ၆ ရက်ဆက် တိုက်ပွဲဖြစ်ပွားပြီး စစ်တပ်ဘက်မှ ၂၈ ဦး သေဆုံးကြောင်း Cobra Column စစ်ကြောင်း ထံမှသိရသည်။
ဧပြီလ ၄ ရက်နေ့တွင် မြဝတီ မြို့နယ်ရှိ အကြမ်းဖက် စစ်တပ် လက်အောက်ခံ BGF စခန်းကုန်းကို တော်လှန်ရေး တပ်ဖွဲ့များက သွားရောက်တိုက်ခိုက်ခဲ့ကြောင်း၊ အပြန်အလှန် တိုက်ပွဲ ဖြစ်ပွားကာ တိုက်ပွဲအတွင်း စစ်သား ၈ ဦး သေဆုံးပြီး ခလရ ၁၀၂ မှ ဗိုလ်ကြီး ၁ ဦးနှင့် အခြားအဆင့် ၁၀ ဦးဒဏ်ရာရရှိခဲ့ကြောင်း၊ ထို့ပြင် BGF ၁ ဦးနှင့် သတင်းပေး ၂ ဦးကို ဖမ်းဆီး ရမိခဲ့ကြောင်း သိရသည်။
အဆိုပါ တိုက်ပွဲအတွင်း ကျားသစ်နက် စစ်ကြောင်းမှ တော်လှန်ရေး ရဲဘော် ၃ ဦးပျောက်ဆုံးခဲ့ပြီး ၁ ဦးမှာ ပြန်လည် တွေ့ရှိခဲ့ကာ ၂ ဦး ကျဆုံးခဲ့ကြောင်း သိရှိရသည်။
ဧပြီလ ၅ ရက်နေ့တွင် တိုက်ပွဲဖြစ်ပွားခဲ့သော နေရာများ၌ နယ်မြေ ရှင်းလင်းရေး ပြုလုပ်စဥ် နင်းမိုင်း ၂ လုံး၊ ၆၀ မမ ၁ လုံး ၊ ကပစ ကျည် ၂၀၀ တောင့်ကို သိမ်းဆည်းရမိခဲ့ကြောင်း၊ ထို့ပြင် မဲကနယ်ကျေးရွာကို အကြမ်းဖက် စစ်တပ်က ဧပြီလ ၆ ရက်နေ့တွင် လက်နက်ကြီးများနှင့် အကြိမ် ၂၀ ထက်မနည်း ပစ်ခတ်ခဲ့ပြီး ပြည်သူပိုင် နေအိမ်များ ထိမှန် ပျက်စီး ခဲ့ကာ တော်လှန်ရေး တပ်ဖွဲ့များက အပြန်အလှန် ပစ်ခတ် ခဲ့ကြောင်း သိရသည်။
ဧပြီလ ၇ ရက်နေ့တွင် အကြမ်းဖက် စစ်တပ်နှင့် BGF များဘက်မှ မဲကနယ် ကျေးရွာကို အင်အား အလုံးအရင်းဖြင့် နေရာ ၃ နေရာကို စစ်ကြောင်းထိုး ဝင်ရောက်ခဲ့ပြီး တိုက်ပွဲဖြစ်ပွားခဲ့ကြောင်း၊ တိုက်ပွဲအတွင်း စစ်တပ်နှင့် BGF ဘက်မှ ၆ ဦးသေဆုံးကာ ခလရ ၂၀၇ မှ ဒုတပ်ရင်းမှူး ၁ ဦးနှင့် အခြား အဆင့် ၈ ဦး ဒဏ်ရာရရှိခဲ့ကြောင်း၊ အဆိုပါ တိုက်ပွဲအတွင်း တော်လှန်ရေး ရဲဘော် ၄ ဦးထိခိုက် ဒဏ်ရာရရှိခဲ့ပြီး ဒရုန်း ၁ စီး ပျက်ကျခဲ့ကြောင်း သိရှိရသည်။
ဧပြီလ ၈ ရက်နေ့တွင်လည်း တိုက်ပွဲ ဆက်လက်ဖြစ်ပွားခဲ့ပြီး စစ်တပ်ဘက်မှ လက်နက်ကြီးပစ်ကူ အကြိမ်ရေ ၁၀၀ အထက် ပစ်ခတ်ခဲ့ကာ အင်အား အလုံးအရင်းဖြင့် မဲကနယ်ကို စစ်ကြောင်း ထိုးလာသောကြောင့် တိုက်ပွဲ ပြင်းထန်ခဲ့ပြီး တိုက်ပွဲအတွင်း စစ်တပ်ဘက်မှ ၁၁ ဦးသေဆုံးကာ ခလရ ၂၀၇ ဗိုလ်ကြီး၊ ခလရ ၁၀၂ ဗိုလ်မှူးနှင့် အခြားအဆင့် ၁၁ ဦး ဒဏ်ရာရခဲ့ကြောင်း၊ ထို့ပြင် BGF ကျော်စိုး စခန်းကို တော်လှန်ရေး တပ်ဖွဲ့များက ဝင်ရောက် တိုက်ခိုက်ခဲ့ပြီး ရဲဘော် ၁ ဦး ဒဏ်ရာရရှိခဲ့ကာ ရဲဘော် ၁ ဦး ကျဆုံးခဲ့ကြောင်း သိရသည်။
ဧပြီလ ၉ ရက်နေ့တွင် စစ်ကောင်စီဘက်မှ လက်နက်ကြီး အကြိမ်ရေ ၈၀ ခန့် ပစ်ကူပြီး စစ်ကြောင်းထိုး လာသောကြောင့် နယ်မြေစိုးမိုးမှု ယူထားသည့် တော်လှန်ရေး ပူးပေါင်းတပ်ဖွဲ့များဘက်မှ တပ်စု တပ်ဖွဲ့များနှင့် ထိပ်တိုက်ရင်ဆိုင် တိုက်ပွဲ ဖြစ်ပွားခဲ့ပြီး စစ်တပ်ဘက်မှ လ ၈ တပ်ရင်းမှူးနှင့် အခြားအဆင့် ၅ ဦးဒဏ်ရာရရှိခဲ့ကြောင်း သိရှိရသည်။
BGF ကျော်စိုးစခန်းကုန်းကို တော်လှန်ရေး ပူးပေါင်းတပ်ဖွဲ့များဘက်မှ ဝင်ရောက်တိုက်ခိုက်ခဲ့သည့် တိုက်ပွဲတွင် စစ်ကောင်စီတပ်ဖွဲ့ဝင် ၃ ဦး သေဆုံးပြီး တော်လှန်ရေး တပ်ဖွဲ့များဘက်မှ ဒရုန်း ၁ စီး ပျက်စီးဆုံးရှုံးခဲ့ရကြောင်း၊ ယင်းစခန်းမှ AK ၁ လက်၊ ကျည်ပေါက် ၄ ပေါက်၊ လက်ပစ်ဗုံး ၃ လုံး၊ ၄၀ မမ ၂၀ လုံး၊ ၇.၆၂ အတောင့် ၂၀၀ ၊ ကာဘိုင်ကျည် အတောင့် ၂၄၀ ၊ ၅.၅၆ MA ကျည်အတောင့် ၄၀၀ ၊ AK ကျည် အတောင့် ၂၀၀ ၊ ဖုန်း Huawei ၁ လုံး သိမ်းဆည်းနိုင်ခဲ့ကြောင်း သိရသည်။
အဆိုပါ တိုက်ခိုက်မှုများကို ကော်ဘရာ စစ်ကြောင်း၊ တပ်မဟာ(၆) KNU/KNLA၊ ကျားသစ်နက်စစ်ကြောင်း၊ Golden Eagle၊ ရောင်နီ၊ Federal Wings ပူးပေါင်းတပ်ဖွဲ့တို့ ပူးပေါင်း လုပ်ဆောင်ခဲ့ကြောင်း သိရှိရသည်။
ဧပြီလ ၄ ရက်နေ့မှ ဧပြီလ ၉ ရက်နေ့အတွင်း တိုက်ပွဲများ၌ အကြမ်းဖက် စစ်တပ်နှင့် BGF များက လက်နက်ကြီး အများအပြား အသုံးပြုပစ်ခတ်ခဲ့ပြီး ပြည်သူ့များ၏ နေအိမ်များ၊ ပိုင်ဆိုင်မှုများ ထိခိုက်ဆုံးရှုံးခဲ့ကာ နွား၊ ဝက် တိရစ္ဆာန်များ သေကျေပျက်စီးခဲ့ကြောင်း Cobra Column စစ်ကြောင်းက ထုတ်ပြန်ထားသည်။
