ထားဝယ်နှင့် သရက်ချောင်း မြို့နယ်ရှိ ရဲစခန်း၊ စစ်ဆေးရေး ဂိတ်တို့ကို ဝင်ရောက် တိုက်ခိုက်မှု စစ်တပ်ဘက်မှ ၇ ဦးသေဆုံး
ရန်ကုန်၊ ဧပြီ ၁၀
တနင်္သာရီတိုင်း၊ ထားဝယ်နှင့် သရက်ချောင်း မြို့နယ်ရှိ ရဲစခန်းနှင့် စစ်ဆေးရေး ဂိတ်တို့ကို ဝင်ရောက် တိုက်ခိုက်ရာ စစ်တပ်ဘက်မှ ၇ ဦးသေဆုံးခဲ့ကြောင်း စစ်ဒေသခွဲ အမှတ် ၃ သတင်းနှင့် ပြန်ကြားရေးဌာနမှ သိရသည်။
ဧပြီလ ၉ ရက်နေ့ နံနက် ၁၀ နာရီခန့်တွင် ပြည်သူ့ကာကွယ်ရေး တပ်မတော်နှင့် ပူးပေါင်းတပ်ဖွဲ့များမှ အင်အားအလုံးအရင်းဖြင့် ထားဝယ်မြို့နယ်အတွင်းရှိ ပကာရီရဲစခန်းကို ဝင်ရောက်တိုက်ခိုက်ခဲ့ကြောင်း၊ တိုက်ပွဲအတွင်း အကြမ်းဖက် စစ်ကောင်စီ တပ်ဖွဲ့များကို ပြည်သူ့ကာကွယ်ရေး တပ်မတော် ပူးပေါင်းတပ်ဖွဲ့များမှ လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့ပြီး ညနေ ၄ နာရီ ဝန်းကျင်အချိန်ခန့်တွင် တော်လှန်ရေးပူးပေါင်းတပ်များ ပြန်လည်ဆုတ်ခွာနိုင်ခဲ့ကြောင်း သိရသည်။
ဧပြီလ ၁၀ ရက်နေ့ နံနက်ပိုင်းတွင် ပြည်သူကာကွယ်ရေး တပ်မတော်နှင့် ပူးပေါင်း တပ်ဖွဲ့များက အဆိုပါ ရဲစခန်းကို ၆၀ မမ ဗုံးသီးများ၊ ၄၀ မမ ဗုံးသီးများဖြင့် ပစ်ခတ် တိုက်ခိုက်ခဲ့ပြီး စနိုက်ပါဖြင့် ထပ်မံ ပစ်ခတ် တိုက်ခိုက်ခဲ့ကြောင်း၊ အကြမ်းဖက် စစ်ကောင်စီ တပ်သား ၇ ဦးခန့် သေဆုံးနိုင်ကြောင်း သိရသည်။
ပကာရီ ရဲစခန်းသည် ထားဝယ်-မေတ္တာလမ်းပိုင်းရှိ တောင်ကုန်း အမြင့် ပေါ်တွင်တည်ရှိပြီး စခန်းအနီးပတ်ဝန်းကျင် တောထဲ၌လည်း ကတုတ်ကျင်းများနှင့် တပ်စခန်းပုံစံ အခိုင်အမာ တည်ဆောက်ထားသော ဗျူဟာကျသည့်နေရာတစ်ခုဖြစ်ကြောင်း၊ တိုက်ပွဲ ဖြစ်ပွားနေချိန်အတွင်း ပကာရီရွာ အနောက်ဘက်တွင်ရှိသော အကြမ်းဖက် စစ်ကောင်စီ လက်အောက်ခံ သပြေချောင်းတပ်မှ ၁၂၀ မမ လက်နက်ကြီးဖြင့် ၈ ကြိမ်ထက်မနည်းပစ်ခတ်ခဲ့ကြောင်း၊ အကြမ်းဖက် စစ်တပ်၏ လက်နက်ကြီးကျည် ၁ လုံး စစ်ဘေးရှောင် စခန်းအနီး ကျရောက် ပေါက်ကွဲခဲ့ကြောင်း၊ ပကာရီရဲစခန်းမှ ပစ်ခတ်ခဲ့သော လက်နက်ကြီးကြောင့်လည်း ပကာရီရွာမှ နေအိမ်အချို့ထိခိုက်ပျက်စီးခဲ့ကြောင်း၊ ပကာရီ ရဲစခန်းကို ထားဝယ်မြို့နယ်အတွင်းရှိ ပြည်သူ့ကာကွယ်ရေးတပ်မတော် စစ်ကြောင်းများနှင့် ပူးပေါင်းမဟာမိတ်များမှ တိုက်ခိုက်ခဲ့ခြင်းဖြစ်ကြောင်း သိရသည်။
ဧပြီလ ၉ ရက်နေ့၊ နံနက် ၉ နာရီခန့်တွင် ထားဝယ်-ရေး လမ်းပိုင်းရှိ မောင်မယ်ရှောင်ရွာအနီးတွင် အခိုင်အမာတပ်စွဲထားသော အကြမ်းဖက် စစ်ကောင်စီတပ်၏ ဘုရားမဲစစ်ဆေးရေးဂိတ်ကို ပြည်သူ့ကာကွယ်ရေးတပ်မတော်ပူးပေါင်းတပ်ဖွဲ့များမှ ဝင်ရောက်တိုက်ခိုက်ခဲ့ရာ နှစ်ဖက်အပြန်အလှန် ပစ်ခတ်မှု ဖြစ်ပွားခဲ့ပြီး မွန်းလွဲပိုင်း အထိ အကြမ်းဖက် စစ်ကောက်စီဘက်မှ လက်နက်ကြီးများဖြင့် ရမ်းသမ်း ပစ်ခတ်မှုများ ပြုလုပ်ခဲ့ပြီး တိုက်ပွဲအတွင်း ထိခိုက်မှု အခြေအနေများကို အတည်မပြုနိုင်သေးကြောင်း သိရသည်။
ဧပြီလ ၉ ရက်နေ့၊ နံနက် ၆ နာရီခန့််တွင် ပြည်သူ့ကာကွယ်ရေး တပ်မတော် ပူးပေါင်း တပ်ဖွဲ့များမှ သရက်ချောင်းမြို့နယ်၊ စော်ဖျားရွာ စစ်ဆေးရေးဂိတ်ရှိ အကြမ်းဖက် စစ်တပ် လက်အောက်ခံ ပျူစောထီးနှင့် စစ်သားများ ပူးပေါင်းကာ တပ်စွဲထားသော ဘုရားကုန်း တပ်စခန်းကို ဝင်ရောက်တိုက်ခိုက်ခဲ့ပြီး နံနက် ၁၁ နာရီအချိန်အထိ တိုက်ပွဲ ပြင်းထန်ခဲ့ကာ စစ်ကောင်စီဘက်မှ ရောင်းမော်ရွာနှင့် ဆေးဖြတ်ကုန်းရွာတို့ကို ၁၂၀ မမလက်နက်ကြီးများဖြင့် အသုံးပြု ပစ်ခတ်ခဲ့ပြီး တိုက်ပွဲအတွင်း ထိခိုက်သေဆုံးမှု အခြေအနေကို အတည်မပြုနိုင်သေးကြောင်း သိရသည်။
ထို့ပြင် ကင်းရှေ့ရွာ လမ်းအတိုင်း စစ်ကူလာရောက်သည့် အကြမ်းဖက် စစ်ကောင်စီ တပ်သားများက မွန်းလွဲပိုင်းတွင် လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်ခြင်းကြောင့် ကင်းရှေ့ရွာရှိ နေအိမ်အချို့ထိမှန်ကာ ပျက်စီးခဲ့ကြောင်း စစ်ဒေသခွဲ အမှတ် ၃ သတင်းနှင့် ပြန်ကြားရေးဌာနမှ သိရသည်။
