ရဲတံခွန် သဘာဝဓာတ်ငွေ့ စီမံကိန်းကနေ ပွင့်လင်းမြင်သာမှုမရှိဘဲ ထွက်ခွာသွားတဲ့ ကုမ္ပဏီများ စစ်အုပ်စုအတွက် အကျိုးအမြတ်တွေ ခွဲဝေပေးခဲ့တာလား

ရဲတံခွန် သဘာဝဓာတ်ငွေ့ စီမံကိန်းကနေ ပွင့်လင်းမြင်သာမှုမရှိဘဲ ထွက်ခွာသွားတဲ့ ကုမ္ပဏီများ စစ်အုပ်စုအတွက် အကျိုးအမြတ်တွေ ခွဲဝေပေးခဲ့တာလား

ရန်ကုန်၊ ဧပြီ ၂၀

ရဲတံခွန် သဘာ၀ဓာတ်ငွေ့ စီမံကိန်းမှာ ပါဝင်လုပ်ကိုင်နေတဲ့ ဂျပန် ENEOS Holding နှုတ်ထွက်သွားခြင်းကို စစ်ကောင်စီက တရားဝင် အတည်ပြု ပေးလိုက်ပြီ ဖြစ်ပေမဲ့ ဒီထွက်ခွာမှုဟာ ပွင့်လင်းမြင်သာမှုမရှိဘဲ နောက်ကွယ်မှာ စစ်အုပ်စုအတွက် အကျိုးအမြတ်တွေ ခွဲဝေပေးခဲ့တာလားလို့ Justice For Myanmar အပါအဝင် အရပ်ဖက် အဖွဲ့အစည်းတွေက မေးခွန်းထုတ်လိုက်ပါတယ်။

သတင်းအချက်အလက် အနည်းငယ်သာပါတဲ့ ENEOS ရဲ့ ကြေငြာချက်ထဲမှာ ကုမ္ပဏီအနေနဲ့ “ကျွန်ုပ်တို့၏ စုပေါင်း ဘဏ္ဍာရေး ရလာဒ်များအပေါ် လက်ရှိရောင်းချမှု၏ အကျိုးသက်ရောက်မှု အနည်းငယ်သာ ရှိမယ်လို့ မျှော်လင့်ပါသည်” ဟု စာသားအနည်းငယ်သာ ဖော်ပြထားခဲ့တာပါ။

တိကျသေချာတဲ့ သတင်အချက်အလက်များ၊ ဘဏ္ဍာရေး ညွှန်းကိန်းများ၊ရင်းနှီးမြှုပ်နှံမှုဆိုင်ရာ ကိန်းဂဏန်းအချက်အလက်များ၊ စီမံကိန်းမှ ထွက်ခွာခြင်းကြောင့် စစ်ကောင်စီနဲ့ အကျိုးအမြတ် ခွဲဝေမှုဆိုင်ရာ ကိစ္စရပ်များကို တိတိကျကျ ဖော်ပြထားခြင်း မရှိတာပဲ ဖြစ်ပါတယ်။

ဒါ့အပြင် စီးပွားရေးနှင့် လူ့အခွင့်အရေးဆိုင်ရာ ကုလသမဂ္ဂရဲ့ လမ်းညွှန်အခြေခံမူများ၊ OECD လမ်းညွှန်ချက်များအရ စီးပွားရေးလုပ်ငန်းမှ တာဝန်ယူမှုရှိစွာ နှုတ်ထွက်ရေးအတွက် ကုမ္ပဏီက လိုက်နာရမဲ့ တာဝန်ဝတ္တရားများ စတဲ့အကြောင်းတွေကိုလည်း ရည်ညွှန်းဖော်ပြထားမှု မရှိခဲ့ပါဘူး။

ကန့်ကွက်မှုများကြားက ENEOS ဟာ ရဲတံခွန်စီမံကိန်းမှ အခွန်ငွေတွေကို မြန်မာစစ်တပ်ထံ တိုက်ရိုက်လွှဲပြောင်းပေးခဲ့ဟန်ရှိပြီး၊ စစ်ကောင်စီထံ အခွန်ငွေများ မရောက်ရှိရေး ကိစ္စရပ်မှာ ထင်ထင်ရှားရှား ပျက်ကွက်ခဲ့တယ်လို့ အရပ်ဖက်အဖွဲ့အစည်းတွေက ထောက်ပြပါတယ်။

ဒါ့အပြင် ENEOS နှင့် မိတ်ဖက်ကုမ္ပဏီများဟာ ကုန်ခန်းလုနီးပါးဖြစ်နေပြီဖြစ်တဲ့ သဘာ၀ဓာတ်ငွေ့သိုက်ကို ပိတ်သိမ်းဖို့ ကိစ္စရပ်တွေမှာ တာဝန်ယူမှုရှိရှိ လုပ်ဆောင်ခဲ့ခြင်း မရှိဘူးလို့လည်း ထောက်ပြထားကြပါတယ်။

စစ်ကောင်စီရဲ့ ထိန်းချုပ်ခံ MOGE ဟာလည်း သဘာ၀ဓာတ်ငွေ့ လုပ်ကွက်တွေကို သဘာ၀ပတ်ဝန်းကျင် ထိခိုက်မှု အနည်းဆုံးဖြစ်အောင် တာဝန်ခံမှု တာဝန်ယူမှုရှိရှိနဲ့ ပိတ်သိမ်းမှာမဟုတ်ဘူးလို့လည်း Justice For Myanmar နဲ့ အရပ်ဖက်အဖွဲ့အစည်းတွေက ယုံကြည်နေကြတာပါ။

ENEOS ရဲ့ လုပ်ငန်းခွဲ Nippon Oil Exploration (Myanmar) ဟာ မလေးရှားကုမ္ပဏီ Petronas၊ မြန်မာ့ရေနံနှင့်သဘာဝဓာတ်ငွေ့လုပ်ငန်း (MOGE)၊ ထိုင်းကုမ္ပဏီ PTTEP တို့နဲ့ ရဲတံခွန်သဘာဝ ဓာတ်ငွေ့စီမံကိန်းမှာ မိတ်ဖက် ကုမ္ပဏီအဖြစ် ဆောင်ရွက်နေတာ ဖြစ်ပါတယ်။ Nippon Oil ရဲ့ အခြားရင်းနှီးမြှပ်နှံသူများက ဂျပန်အစိုးရနှင့် Mitsubishi Corporation တို့ဖြစ်နေတာပါ။

ဒါ့ကြောင့် ENEOS နှင့်မိတ်ဖက် ကုမ္ပဏီတွေကို စစ်အုပ်စုလက်အောက်မှာရှိတဲ့ ရင်းနှီးမြှုပ်နှံမှုများကို တာဝန်သိစွာဖြင့် ရုတ်သိမ်းဖို့နဲ့ အရပ်ဘက် အဖွဲ့အစည်းများ၊ ဒေသခံလူမှုအဖွဲ့အစည်းများနဲ့ ဆွေးနွေးညှိုနှိုင်းပြီး ပွင့်လင်းမြင်သာမှုရှိစွာ ပူးပေါင်းဆောင်ရွက်ဖို့ တို့ကို Mekong Watch၊ FoE Japan နှင့် Justice For Myanmar တို့က ပြီးခဲ့တဲ့ ၂၀၂၂ ခုနှစ်နဲ့ အခုနှစ် ၂၀၂၃ ခုနှစ်တွေထဲမှာ တောက်လျေက် တိုက်တွန်းပြောကြားနေခဲ့တာပါ။

Justice For Myanmar မှရရှိသော အချက်အလက်များအရ လက်ရှိ ရဲတံခွန် သဘာ၀ဓာတ်ငွေ့ စီမံကိန်းကို ထိုင်းနိုင်ငံအခြေစိုက် Northern Gulf Petroleum အဖွဲ့ရဲ့ တစ်စိတ်တစ်ပိုင်းဖြစ်တဲ့ Gulf Petroleum Myanmar မှ လွှဲပြောင်းရယူပြီး စစ်ကောင်စီနဲ့ အကျိူးတူ လုပ်ဆောင်သွားမယ်လို့လည်း သိရပါတယ်။

Northern Gulf Petroleum ကို အခွန်ကင်းလွတ်ခွင့် အထူးနိုင်ငံဖြစ်တဲ့ (အခွန်ရှောင်တိမ်းဖို့အတွက်) ဘာမြူဒါရှိ ဟန်ပြကုမ္ပဏီများမှတစ်ဆင့် ဖွဲ့စည်းတည်ထောင်ထားပြီး၊ စင်ကာပူနိုင်ငံမှာလည်း ကုမ္ပဏီခွဲတစ်ခုကို ပိုင်ဆိုင်ထားပါတယ်။

ဒါဟာ စစ်အုပ်စုကို ငွေပေးချေနိုင်မယ့် ဥပဒေအကြောင်းအရ လွတ်ကင်းတဲ့ တဆင့်ခံ ကြားခံနယ်ပယ်အနေနဲ့ အသုံးချမဲ့ ဟန်ပြကော်ပိုရိတ် ဖွဲ့စည်းမှုတစ်ရပ်ပဲ ဖြစ်ပါတယ်။

Gulf Petroleum Myanmar ကုမ္ပဏီကို လွှဲပြောင်းဆက်ခံသူအဖြစ် ရွေးချယ်ခဲ့မှုမှာ ပါဝင်နိုင်တဲ့ ENEOS ရဲ့ အခန်းကဏ္ဍအပေါ်မှာလည်း မေးခွန်းထုတ်စရာ ဖြစ်နေပါတယ်။

ဒါ့ကြောင့် ရဲတံခွန်သဘာဓာတ်ငွေ့ စီမံကိန်းကနေ နှုတ်ထွက်သွားတဲ့ ENEOS နှင့် မိတ်ဖက်ကုမ္ပဏီများအနေနဲ့ လူ့အခွင့်အရေးဆိုင်ရာ လိုက်နာရမဲ့ ပြဌာန်းချက်တွေအပေါ် လိုက်နာခဲ့မှု အပါအဝင် ဆိုးကျိုးသက်ရောက်မှုတွေကို ဖြေရှင်းဖို့ ကိစ္စရပ်တွေမှာ ၎င်းတို့လုပ်ဆောင်ရမယ့် လုပ်ငန်းအဆင့်ဆင့်တွေကို နိုင်ငံတကာ လူ့အခွင့်အရေး တာဝန်ဝတ္တရားများနှင့်အညီ ထုတ်ပြန်ပေးဖို့ Justice For Myanmar က တောင်းဆိုထားပါတယ်။