ပဇီကြီးရွာကို စစ်တပ်က ယနေ့ မွန်းလွဲပိုင်းတွင် လေကြောင်း တိုက်ခိုက်မှု ပြုလုပ်ပြီးနောက် နေအိမ်များကို မီးတင်ရှို့နေ
ရန်ကုန်၊ ဧပြီ ၂၀
ကန့်ဘလူမြို့နယ်၊ ပဇီကြီးရွာကို အကြမ်းဖက် စစ်တပ်က ယနေ့ မွန်းလွဲပိုင်းတွင် လေကြောင်း တိုက်ခိုက်မှု ပြုလုပ်ပြီးနောက် နေအိမ်များကို မီးတင်ရှို့နေကြောင်း ကျွန်းလှ-ကန့်ဘလူ တက်ကြွ လှုပ်ရှားသူများ အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ယနေ့ ဧပြီလ ၂၀ ရက်နေ့၊ မွန်းလွဲ ၂ နာရီ ၂၆ မိနစ်ခန့်တွင် အကြမ်းဖက် စစ်တပ်က ပဇီကြီးရွာကို လေကြောင်းတိုက်ခိုက်မှု ပြုလုပ်ပြီးနောက် ပြည်သူပိုင် နေအိမ်တချို့ မီးလောင်ခဲ့ပြီးနောက် အကြမ်းဖက် စစ်တပ် စစ်ကြောင်းက ကျေးရွာအတွင်း ဝင်ရောက်ကာ ပြည်သူပိုင် နေအိမ်များကို မီးရှို့ဖျက်ဆီးနေခြင်းဖြစ်ကြောင်း သိရသည်။
” ပဇီကြီးကျေးရွာကို အကြမ်းဖက် စစ်တပ်က ဂျက်ဖိုက်တာ ၁ စီးနဲ့ သုံးကြိမ် ဗုံးကျဲ တိုက်ခိုက် ပြီးတဲ့နောက်မှာ လေကြောင်း တိုက်ခိုက်မှုကြောင့် ရွာထဲမှာရှိတဲ့ နေအိမ်အချို့ မီးစွဲလောင်နေတာ တွေ့မြင်ရတယ်။ ညနေ ၆ နာရီဝန်းကျင်မှာတော့ ပဇီကြီးကျေးရွာအနီး ရောက်ရှိနေတဲ့ အကြမ်းဖက် စစ်တပ် စစ်ကြောင်းက ပဇီကြီးကျေးရွာကို ထပ်မံ မီးရှို့နေတယ်လို့ သိရတယ်” ဟု ကျွန်းလှ-ကန့်ဘလူ တက်ကြွ လှုပ်ရှားသူများ အဖွဲ့မှ တာဝန်ရှိသူ တစ်ဦးက ပြောဆိုသည်။
