ပခုက္ကူမြို့၊ မြို့ရှောင်လမ်းရှိ စစ်ကောင်စီ၏ စစ်ဆေးရေး အဝင်ဂိတ်ကို ဗုံးခွဲ တိုက်ခိုက်
ရန်ကုန်၊ ဇွန် ၁၁
မကွေးတိုင်း၊ ပခုက္ကူမြို့၊ အမှတ် ၃ ရပ်ကွက်၊ မြို့ရှောင်လမ်းနှင့် သီတာလမ်း ထောင့်ရှိ မြို့အဝင် စစ်တပ် စစ်ဆေး ရေးဂိတ်တွင် ဗုံးခွဲတိုက် ခိုက်မှု ဖြစ်ပေါ်ခဲ့ ကြောင်း ပခုက္ကူမြို့နေပြည်သူတစ်ဦးက ရန်ကုန်ခေတ်သစ် သတင်းဌာန ထံသို့ ပြောကြားသည်။
ဇွန်လ ၉ ရက်နေ့ ညနေပိုင်း မြို့အဝင် စစ်ဆေးရေးဂိတ်ကို ဗုံးခွဲတိုက်ခိုက်ခြင်းဖြစ်ပြီး အမျိုးသမီးတစ်ဦးသေဆုံးသည်ဟု သတင်းထွက်ပေါ်ခဲ့ကြောင်း၊ ၊ ယင်းဗုံးကွဲမှုနှင့် ပတ်သက်၍ အကြမ်းဖက်စစ်တပ်က မီးသွေးကန်ကျေး ရွာကို စစ်ကြောင်းဖြင့် ဝင်ရောက်ပြီး အသက် ၁၆ နှစ်အရွယ် ကလေးတစ်ဦးကို ဖမ်း ဆီး ခေါ်ဆောင် သွားကြောင်း၊ ဖမ်းဆီးခံရသူ၏ လက်ကိုင်ဖုန်းကိုလည်း သိမ်းဆည်းသွားကြောင်း သိရသည်။
“ဗုံးကွဲတာ မှန်တယ်၊ အဲဒီဂိတ်က မြို့ရှောင်လမ်းပေါ်မှာရှိတာ၊ မြို့ထဲကထွက်မယ်ဆိုရင်လည်း အဲဂိတ်ကပဲ ထွက်ရတာ၊ ရေစကြိုဘက်ကနေလာမယ်ဆိုရင်အဲဒီဂိတ်ကနေဝင်ရတာ၊ မြို့ရှောင်လမ်းမကြီးပေါ်မှာရှိ တာ၊ ရထားလမ်းသံလမ်းနဲ့မြို့ရှောင်လမ်းက မျဉ်းပြိုင်လိုဖြစ်နေတာ၊ ပေတရာလမ်းကြီးဘေးမှာရှိတာ” ဟု ပခုက္ကူမြို့နေပြည်သူက ရန်ကုန်ခေတ်သစ်သတင်းဌာနထံသို့ ပြောကြားသည်။
စစ်ကောင်စီတပ်က မကွေးတိုင်း၊ ပခုက္ကူမြို့နယ်တွင် စစ်ကြောင်းများခွဲ၍ ကျေးရွာများကို ဝင်ရောက်စီးနင်းခြင်း၊ မီးရှို့ဖျက်ဆီးခြင်း ၊ ပြည်သူများကို ဖမ်းဆီး သတ်ဖြတ်ခြင်းများ လုပ်ဆောင်နေပြီး ပြည်သူများမှာလည်း စစ်ဘေးရှောင်ရန် ထွက်ပြေးတိမ်းရှောင်နေကြရ ကြောင်း၊ ပခုက္ကူမြို့ပေါ်တွင် စစ်တပ်က လုံခြုံရေး အဆမတန် တိုးမြှင့်ထားကြောင်း သိရှိရသည်။
ဓာတ်ပုံ-စစ်ကောင်စီ တပ်ရင်းတပ်ဖွဲ့တစ်ခု၏ အဝင် စစ်ဆေးရေးဂိတ်ကို မြင်တွေ့ရစဉ်။
