နိုင်ငံခြားငွေ စီးဆင်းနေမှု ဖြတ်တောက်ခံရပြီး စီးပွားရေး တစ်ခုလုံး ကြေမွ မှာကို ပြာပြာသလဲ စိုးရိမ်နေရပြီဖြစ်တဲ့ အကြမ်းဖက် စစ်ကောင်စီ

နိုင်ငံခြားငွေ စီးဆင်းနေမှု ဖြတ်တောက်ခံရပြီး စီးပွားရေး တစ်ခုလုံး ကြေမွ မှာကို ပြာပြာသလဲ စိုးရိမ်နေရပြီဖြစ်တဲ့ အကြမ်းဖက် စစ်ကောင်စီ

By ရန်ကုန်‌ခေတ်သစ်

ပြည်သူလူထုကို သတ်ဖြတ် ဗုံးကျဲ ညှဉ်းပန်းနှိပ်စက်ပြီး မတရား စစ်အာဏာ သိမ်းထားတဲ့ အကြမ်းဖက်စစ်ကောင်စီ လက်အောက်ခံ MFTB ခေါ် မြန်မာ့ နိုင်ငံခြားကုန်သွယ်မှုဘဏ်နဲ့ MICB ခေါ် မြန်မာ့ရင်းနှီးမြှုပ်နှံမှုနဲ့ ကုန်သွယ် ရေးဘဏ်တို့ကို အမေရိကန်ပြည် ထောင် စုက ပစ်မှတ်ထား အရေးယူဖို့ ရှိနေပြီဆိုတဲ့ သတင်းကို Thai PBS သတင်းဌာနက ဖော်ပြလိုက်ပါတယ်။

ဇွန်လ ၁၉ ရက်နေ့မှာ အဲဒီသတင်းကို Thai PBS သတင်းဌာနက သံတမန် တွေကို ကိုးကား ထုတ်ပြန်ခဲ့တာဖြစ်ပြီး ဇွန်လ ၂၀ ရက်နေ့မှာတော့ အကြမ်း ဖက်စစ်ကောင်စီရဲ့ ပြောခွင့်ရ ဇော်မင်းထွန်းကိုယ်တိုင် MFTB နဲ့ MICB ကို ပိတ်ဆို့အရေးယူမှုဟာ ထိခိုက်မှု မရှိနိုင်ဘဲ စိုးရိမ်စရာမရှိပါဘူးဆိုပြီး ထွက် ပြောလာပါတယ်။

တကယ်တော့ စစ်ကောင်စီမှာ နိုင်ငံခြားဝင်ငွေ၊ ထွက်ငွေကို အဓိက စီးဆင်း နေတဲ့ ဘဏ်ကြီး ၂ ခုက MFTB နဲ့ MICB ဘဏ်ဖြစ်ပါတယ်။ အဲဒီဘဏ် တွေက နေ မြန်မာတစ်နိုင်ငံလုံးအတွက် ပို့ကုန်သွင်းကုန်၊ ပြည်ပ နိုင်ငံခြားရင်းနှီး မြှုပ်နှံတဲ့ကုမ္ပဏီတွေ၊ ဝန်ကြီး ဌာနနဲ့ ပုဂ္ဂလိက နိုင်ငံခြား ဝင်ငွေ ထွက်ငွေ၊ ပြည် ပ ရင်းနှီးမြှုပ်နှံမှုဆိုင်ရာ အခွန်ငွေတွေ စတဲ့ နိုင်ငံလုံးဆိုင်ရာအဆင့် နိုင်ငံခြား ငွေ ကို စီးဆင်းထိန်းချုပ်နေတာဖြစ်ပါတယ်။

စစ်ကောင်စီမှာ နိုင်ငံခြားဝင်ငွေတွေ စီးဆင်းနေတဲ့ ရင်းမြစ်တွေများစွာအနက် MFTB ၊ MICB နဲ့ MOGE လို့ခေါ်တဲ့ မြန်မာရေနံနဲ့ သဘာ၀ဓာတ်ငွေ့ လုပ်ငန်း တွေဟာ အဓိက ကျပါတယ်။

၂၀၂၁ ခုနှစ် စစ်အာဏာသိမ်းချိန်ကစလို့ မြန်မာနိုင်ငံတွင်းမှာ နိုင်ငံခြား ရင်းနှီး မြှုပ်နှံမှုတွေ အကြီးအကျယ် ထွက်ခွာသွားကြသလို ကုလသမဂ္ဂအပါအဝင် ကမ္ဘာ့ဘဏ်၊ IMF တို့လို နိုင်ငံတကာ ငွေကြေးအဖွဲ့အစည်းတွေနဲ့ နိုင်ငံတကာ အကူအညီပေးရေး၊ ဒေါ်လာ သန်းပေါင်းများစွာနဲ့ ချေးငွေတွေကို ရပ်ဆိုင်း လိုက်ကြပါတယ်။

စစ်ကောင်စီဟာ တရားမဝင် အာဏာသိမ်း စစ်တပ်ဖြစ်တာမို့ ဒေါ်လာ သန်း ချီတဲ့ အကူအညီတွေ မရသလို ချေးငွေလည်း မရတဲ့အပြင် အခြားတစ် ဖက် မှာလည်း တယ်လီနော၊ တိုတယ်ရေနံကုမ္ပဏီ အပါအဝင် နိုင်ငံခြား ရင်း နှီးမြှုပ် နှံမှုများစွာ ထွက်ခွာသွားကြတာမို့ နိုင်ငံခြားဝင်ငွေ တဖြည်းဖြည်း နည်းလာ နေပါတယ်။

MOGE ကရနေတဲ့ နိုင်ငံခြားဝင်ငွေတွေကလည်း စက်သုံးဆီတင်သွင်းရတာ စစ်လက်နက်ပစ္စည်းတွေ ဝယ်ယူနေရတာကြောင့်မို့လို့ သွင်းကုန်အဓိက အားထားနေရတဲ့ နိုင်ငံအတွက် နိုင်ငံခြားအရန်ငွေကြေး မရှိသလောက် နည်း လာပါတယ်။ တစ်ဖက်မှာလည်း နိုင်ငံခြားဝင်ငွေ နည်းလာချိန် ရှိတာတွေ ထုတ်သုံးလို့ ကုန်သလောက်ရှိသွားခဲ့ပါပြီ။

စျေးကွက်စီးပွားရေး တစ်ခုလုံးကို အမိန့်အာဏာနဲ့ ထိန်းချုပ်တဲ့ စျေးကွက် အဖြစ် ပြောင်းလဲပြီး ငွေလဲနှုန်းကို တတ်နိုင်သမျှ ဟန်မပျက် ထိန်းထား ပေမယ့်လည်း ရေရှည်မှာ စစ်ကောင်စီအနေနဲ့ တောင့်မခံနိုင်တော့ပါဘူး။

ဒါကြောင့်ပဲ အကြမ်းဖက်စစ်ကောင်စီ ဒုစစ်ခေါင်းဆောင် စိုးဝင်းက စက်သုံးဆီ တင် သွင်းတာတွေ အကြီးအကျယ်လျှော့ချတာ၊ ဇိမ်ခံသွင်းကုန်ပစ္စည်းတွေ၊ မော်တော်ကားတွေ ပိတ်ပင်တာ ၊ ပြည်သူလူထုအတွက် သွင်းကုန်တင်သွင်းမှု မှန်သမျှကို ပိတ်ပင်တာတွေ လုပ်ဆောင်လာခဲ့ပါတယ်။

စစ်တပ်သတင်းရင်းမြစ်တစ်ခုကတော့ စစ်ကောင်စီမှာ ပြည်ပ ဒေါ်လာဝင်ငွေ အင်မတန်နည်းလာတာမို့ တရုတ်နဲ့ရုရှားဆီကနေ အတိုးနှုန်း အမြင့်နဲ့ ချေးငွေ ယူဖို့ ဆွေးနွေးမှုတွေ ရှိနေပြီလို့ဆိုပါတယ်။ ရေရှည်မှာ နိုင်ငံခြား ငွေပြတ် လပ်လာရင် စက်သုံးဆီ တင်သွင်းမှုက စတင်မယ့် ကုန်စျေးနှုန်းကြီးမြင့်မှုနဲ့ သွင်းကုန်ပြတ်လပ်မှု၊ ဒေါ်လာတန်ဖိုးမြင့်တက်မှု ပြဿနာတွေအတွက် စစ် ကောင်စီမှာလည်း အဖြေရှိမနေဘူးလို့ဆိုပါတယ်။

နိုင်ငံခြားဝင်ငွေ ကျဆင်းမှုနဲ့ အရန်ငွေမရှိတော့ ပြဿနာကို စစ်တပ်ဘက်က ကြုံနေရချိန်မှာ MFTB နဲ့ MICB ကို အမေရိကန်က ပိတ်ဆို့အရေး ယူမယ့် သတင်းကြောင့် စစ်ကောင်စီဘက်မှာ ပြာပြာသလဲ ဖြစ်ရသလို စီးပွားရေး အသိုင်း အဝိုင်းမှာလည်း ဂယက်ရိုက်ခတ်မှု ကြီးနေပါတယ်။

စစ်တပ်က တစ်တိုင်းပြည်လုံးရဲ့ နိုင်ငံခြားဝင်ငွေ၊ ထွက်ငွေတွေကို MFTB နဲ့ MICB လိုသလို ခြယ်လှယ်နေတာမို့ ဒီဘဏ်နှစ်ခုကိုသာ အမေရိကန်က တကယ် ပိတ်ဆို့ကြောင်းကြေညာရင် ပြည်တွင်းစီးပွားရေးတစ်ခုလုံး ထိခိုက် မှုရှိမှာ အသေအချာပါပဲ။ အရင် စစ်အာဏာရှင် သန်းရွှေခေတ်က စင်ကာပူ နိုင်ငံမှာ ဘဏ်အကောင့်တွေ ဖွင့် ၊ စီးပွားရေးပိတ်ဆို့မှုကို Bypass လက်တစ် လုံးခြား ကျော်လွှားနိုင်ခဲ့ပေမယ့် အခုနောက်ပိုင်း ပြင်းထန်တဲ့ စီးပွားရေး ပိတ်ဆို့မှုတွေက အဲဒီလို ကျော်လွှားနိုင်ဖို့လည်း မရှိတော့ပါဘူး။

၂ နှစ်ကျော်၊ ၃ နှစ်နီးပါး ကာလအတွင်း စစ်တိုက်ပြီး ပြည်သူတွေကိုသာ သတ်ဖြတ်ညှဉ်းပန်းနှိပ်စက်နေတဲ့ အလုပ်တစ်ခုတည်းကိုသာ ပီပီပြင်ပြင် လုပ်ဆောင်ခဲ့တဲ့ စစ်တပ်အတွက် MOGE ၊ MFTB နဲ့ MICB လို ပင်မ နိုင်ငံခြားဝင်ငွေစီးကြောင်းနေရာတွေ ပိတ်ဆို့ခံရမယ်ဆိုရင် အနှေးနဲ့ အမြန် ဆိုသလို ပြည်တွင်းစီးပွားရေးတစ်ခုလုံး ကြေမွသွားနိုင်ခြေရှိနေပါတယ်။

ပြာပြာသလဲ ဖြစ်နေတဲ့ စစ်ကောင်စီဟာ MFTB နဲ့ MICB ပိတ်ဆို့ရမယ်ဆိုတဲ့ သတင်းကြားတာနဲ့ စိတ်မပူကြဖို့နဲ့ ထိခိုက်မှုမရှိဘူးဆိုပြီး ထွက်ရှင်းနေရတာက မိုးကြိုးပစ်တာကို ထန်းလျက်နဲ့ ကာဖို့ ကြိုးစားနေသလိုလည်းဖြစ်နေပါတယ်။

ပြည်သူတွေ စိတ်မပူကြဖို့ ထွက်ပြောနေတဲ့ စစ်ကောင်စီမှာတော့ ပြင်းထန်တဲ့ စီးပွားရေးပိတ်ဆို့မှုတွေကြောင့် အတော်ဗလောင်ဆူနေပုံရပါတယ်။

အမေရိကန်ရဲ့ စီးပွားရေးပိတ်ဆို့မှု လုပ်ရပ်တွေကြောင့် ပါတီဒီမိုကရေစီ ပြန် သွား ဖို့ နှောင့်နှေးသွားမယ်လို့တောင် သွေးရူးသွေးတန်းနဲ့ ဇော်မင်းထွန်းက ထုတ်ပြောရတဲ့အထိဖြစ်လာပါတယ်။

အမေရိကန်ရဲ့ စီးပွားရေးပိတ်ဆို့မှုတွေအပေါ် ဇော်မင်းထွန်းပြောသလို ပြည် သူတွေက စိတ်ပူနေတာမဟုတ်ဘဲ တကယ်စိတ်ပူနေတာက စစ်ကောင်စီ ပဲဖြစ်ပါတယ်။

ဘက်ပေါင်းစုံ အကျပ်အတည်းဖြစ်နေတဲ့ စစ်ကောင်စီအတွက် အမေရိကန် ပြည်ထောင်စုက ထပ်မံချမှတ်မယ့် စီးပွားရေးပိတ်ဆို့မှု အသစ်တွေက အရှိန် ပြင်း ပြင်း ရိုက်ခတ်မှာကတော့ အသေအချာပါပဲ။