စီးပွားရေးပိတ်ဆို့မှုကြောင့် စစ်ကောင်စီ၏ မိတ်ဖက် MAI ငွေစာရင်းဘဏ်အကောင့်ကို စင်ကာပူ UOB ဘဏ်က ဩဂုတ်လ ၁၅ ရက်နေ့တွင် အပြီး ပိတ်သိမ်းမည်

စီးပွားရေးပိတ်ဆို့မှုကြောင့် စစ်ကောင်စီ၏ မိတ်ဖက် MAI ငွေစာရင်းဘဏ်အကောင့်ကို စင်ကာပူ UOB ဘဏ်က ဩဂုတ်လ ၁၅ ရက်နေ့တွင် အပြီး ပိတ်သိမ်းမည်

■ MAI က ရရန်နှင့်ပေးရန်များ ဆိုင်းငံ့ထားရပြီး စင်ကာပူ DBS ၊ ထိုင်း Kasikorn ဘဏ် နှင့် ဒူဘိုင်း Emirates NDB ဘဏ်တွင် ငွေစာရင်းဖွင့်လှစ်ရန် ကြိုးစားနေ

ရန်ကုန်၊ ဇူလိုင် ၉

အမေရိကန်အပါအဝင် အနောက်နိုင်ငံများ၊ ဥရောပသမဂ္ဂနှင့် နိုင်ငံတကာ၏ စီးပွားရေးပိတ်ဆို့မှုကြောင့် စစ်ကောင်စီ၏ မိတ်ဖက် MAI လေကြောင်းလိုင်းပိုင် ဘဏ်စာရင်းအကောင့်ကို စင်ကာပူ UOB ဘဏ်က ဩဂုတ်လ ၁၅ ရက်နေ့တွင် အပြီးပိတ်သိမ်းမည်ဖြစ်ကြောင်း MAI က မိတ်ဖက် စီးပွားရေးကုမ္ပဏီများထံ အကြောင်းကြားစာအရ သိရှိရသည်။

MAI လေကြောင်းလိုင်း၏ ငွေစာရင်းအကောင့်များကို စင်ကာပူ UOB က ပိတ်သိမ်းလိုက်ပြီး ငွေစာရင်းရှင်းလင်းခြင်းနှင့် အကောင့်ပိတ်သိမ်းခြင်းကို ဇူလိုင်လ ၁ ရက်နေ့မှ စတင်၍ လုပ်ဆောင်နေကြောင်း၊ ဩဂုတ်လ ၁၅ ရက်နေ့တွင် အပြီးပိတ်သိမ်းမည်ဖြစ်ကြောင်း၊ MAI က ပြန်လည် စဉ်းစားပေးရန် အသနားခံတင်ပြမှုကိုလည်း စင်ကာပူ UOB ဘဏ်က ပယ်ချလိုက်ကြောင်း သိရှိရသည်။

လက်ရှိတွင် MAI လေကြောင်းလိုင်း အနေဖြင့် ပေးရန် ရှိနေသည်များကို ပေးဆောင်နိုင်ခြင်းမရှိသေးဘဲ စင်ကာပူ DBS ဘဏ် ၊ ထိုင်း Kasikorn ဘဏ် နှင့် ဒူဘိုင်း Emirates NDB ဘဏ်တွင် ငွေစာရင်းဖွင့်လှစ်ရန် ကြိုးစားနေကြောင်း၊ တိုးတက်မှုများရှိနေကြောင်း MAI လေကြောင်းလိုင်းက မိတ်ဖက် စီးပွားရေးကုမ္ပဏီများထံ အကြောင်းကြားစာအရ သိရှိရသည်။

MAI လေကြောင်းလိုင်းကို ယခင်က ကမ္ဘောဇဘဏ်ပိုင်ရှင် အောင်ကိုဝင်းက ပိုင်ဆိုင်ခဲ့သော်လည်း ၂၀၁၈ ခုနှစ်မှစတင်၍ 24 Hours ကုမ္ပဏီပိုင်ရှင် အောင်အောင်ဇော်က ရှယ်ယာအများစု ဝယ်ယူပြီး ပိုင်ရှင်အဖြစ် လက်လွှဲပြောင်းရယူခဲ့ခြင်းဖြစ်ကြောင်း သိရှိရသည်