ဖားကန့်မြို့နယ်၊ မနရွာအနီးရှိ လက်ကျင်း ကျောက်စိမ်းတူးဖော်ရေး မြေစာပုံ ပြိုကျပြီး လူ ၄၀ နီးပါး ပျောက်ဆုံးခဲ့ရာမှ အလောင်း ၁၀ လောင်းထက်မနည်း ပြန်လည် ဆယ်ယူရရှိ
ရန်ကုန်၊ သြဂုတ် ၁၅
ကချင်ပြည်နယ်၊ ဖားကန့်မြို့နယ်၊ မနရွာအနီးရှိ လက်ကျင်း ကျောက်စိမ်း တူးဖော်ရေး လုပ်ကွက်မြေစာပုံ ပြိုကျပြီး လူဦးရေ ၄၀ နီးပါး ပျောက်ဆုံး နေခဲ့ရာမှ ယနေ့တွင် အလောင်း ၁၀ လောင်းထက်မနည်းကို ပြန်လည် ဆယ်ယူရရှိခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
သြဂုတ်လ ၁၃ ရက်နေ့ မွန်းလွဲ ၂ နာရီ ၃၀ မိနစ်ခန့်တွင် ဖားကန့်မြို့နယ်၊ မနရွာအနီးရှိ လက်ကျင်း ကျောက်စိမ်းတူးဖော်ရေး လုပ်ကွက်မြေစာပုံ ပြိုကျခဲ့ပြီး လူဦးရေ ၄၀ နီးပါ ပျောက်ဆုံးခဲ့ကြောင်း၊ ယနေ့တွင် အလောင်း ၁၀ လောင်း ထက်မနည်းကို ပြန်လည်ဆယ်ယူရရှိခဲ့ကြောင်း၊ အလောင်းများကို ထပ်မံ ရှာဖွေလျက်ရှိကြောင်း သိရှိရသည်။
“ဖားကန့်မြို့ မနရွာအနီးက လက်ကျင်းလုပ်ကွက်မြေစာပြိုကျတယ်။ အခုအလောင်းတွေဖော်နေပါတယ်။ အသေ အပျောက် အားလုံးခန့်မှန်း ၄၀ ခန့်ရှိမယ်။ အလောင်း ၁၀ လောင်းထက်မနည်း ပြန်တွေ့ရပါတယ်” ဟု ကယ်ဆယ်ရေးလုပ်နေသူတစ်ဦးက ပြောဆိုသည်။
