ဝက်လက်နှင့် ရွှေဘို နယ်စပ်ရှိ ကျေးရွာ ၂ ရွာကို စစ်တပ်က မီးရှို့ဖျက်ဆီးမှု နေအိမ် ၁၀၀ ကျော်ပြာကျ၊ စစ်တပ်က ပြည်သူ ၂ ဦးကို ပစ်သတ်
ရန်ကုန်၊ စက်တင်ဘာ ၁၀
စစ်ကိုင်းတိုင်း၊ ဝက်လက်မြို့နယ်နှင့် ရွှေဘိုမြို့နယ် အစပ်ရှိ ကျေးရွာ ၂ ရွာကို အကြမ်းဖက် စစ်တပ်က မီးရှို့ဖျက်ဆီးမှု နေအိမ် ၁၀၀ ကျော်ပြာကျခဲ့ကြောင်း ရွှေဘိုခရိုင် အမှတ် ၂၃ တပ်ရင်းမှ ဗိုလ်ရန်ကြီးက ရန်ကုန်ခေတ်သစ် မီဒီယာသို့ ပြောဆိုသည်။
စက်တင်ဘာလ ၄ ရက်နှင့် ၅ ရက်နေ့တွင် အကြမ်းဖက် စစ်တပ်က ရွာသစ်ကုန်း ရွာနှင့် စခန်းသာရွာကို ဝင်ရောက် စီးနင်းမီးရှို့ဖျက်ဆီးခဲ့ပြီး နေအိမ် ၁၀၀ ကျော် မီးလောင် ပြာကျခဲ့ကြောင်း၊ အကြမ်းဖက် စစ်တပ်က စခန်းသာရွာကို မီးရှို့ပြီး ပြန်လည် ထွက်ခွာလာစဥ်တွင် ပြည်သူ ၁ ဦးကို ပစ်သတ်ခဲ့ကာ မြေမြုပ်မိုင်းများ ထောင်ထားခဲ့ကြောင်း သိရသည်။
အကြမ်းဖက် စစ်တပ် စစ်ကြောင်းက ကျေးရွာအတွင်းမှ ပြန်လည်ထွက် ခွာသွား ပြီးနောက် စက်တင်ဘာလ ၈ ရက်နေ့တွင် တော်လှန်ရေး တပ်ဖွဲ့များနှင့် အတူ ပြည်သူ တချို့က နယ်မြေရှင်းလင်းရေး ပူးပေါင်း ပြုလုပ်နေစဥ် စစ်တပ် က ထောင် ထားသည့် မြေမြုပ်မိုင်း နင်းမိပြီး ၁ ဦး ထပ်မံ သေဆုံး ခဲ့ကြောင်း သိရှိရ သည်။
“စခန်းသာရွာကနေ မီးရှို့ပြီး ထွက်လာတဲ့ ခွေးစစ်ကြောင်းက ရွာထိပ်မှာတွေ့တဲ့ ၁၅ နှစ်အရွယ် လူငယ် ၁ ဦးကို ပစ်သတ်သွားတယ်။ အသက် ၄၀ ကျော် အရွယ် ပြည်သူတစ်ဦးကလည်း ကျည်ထိမှန်ပြီး အချိန်မီ ကယ်ဆယ်နိုင်ခဲ့တယ်။ နင်းမိုင်းမိတဲ့ ကောင်လေးကလည်း ကျွန်တော်တို့ တော်လှန်ရေး တပ်ဖွဲ့တွေနဲ့ ရှင်းလင်းရေး လုပ်ပေးနေပြီး ခဏနားတဲ့အချိန် မိုင်းနင်းမိပြီး သေဆုံးခဲ့တယ်။ နောက်ပြီး အမျိုးသမီးငယ် ၁ ဦးလည်း မိုင်းနင်းမိပြီး ခြေတောက်တစ်ချောင်း ဆုံးရှုံးသွာတယ်။ အခုဆေးကုသမှု ခံယူနေတယ်” ဟု ရွှေဘိုခရိုင် အမှတ် ၂၃ တပ်ရင်းမှ ဗိုလ်ရန်ကြီးကပြောဆိုသည်။
အကြမ်းဖက် စစ်တပ်က ပြည်သူလူထု အများဆုံး အသုံးပြုနေသည့် လမ်းဆုံ လမ်းခွများ၊ နေအိမ်များ၊ ဘာသာရေးအဆောက်အဦးများ စာသင်ကျောင်းများ နှင့် အားကစားကွင်းများပါမကျန် မြေမြုပ် နင်းမိုင်းများကို စနစ်တကျ အများအပြား ထောင်ထားခဲ့သောကြောင့် ပြည်သူများ ထိခိုက် သေဆုံးမှု ဖြစ်ပွားခဲ့ကြောင်း၊ ထို့ကြောင့် ပြည်သူများ အနေဖြင့် စစ်သားများ ဝင် ရောက်ခဲ့သည့် နေရာများကို တော်လှန်ရေး တပ်ပေါင်းစုများက နယ်မြေ ရှင်းလင်း ဆောင်ရွက်မှုများ ပြုလုပ်ပြီးမှသာ ပြန်လည် ဝင်ရောက်ကြပါရန်နှင့် သံသယဖြစ်စရာ တစ်စုံတစ်ရာတွေ့ပါက သက်ဆိုင်ရာ အဖွဲ့စည်းများထံ ချက်ခြင်းလာရောက်တင်ပြကြရန် ရွှေဘိုခရိုင်အမှတ် ၂၃ တပ်ရင်းက ထုတ်ပြန် ထားသည်။
