ပခုက္ကူမြို့နယ်၊ သာကြီးတောင် ရေနံမြေရဲစခန်းကို မြိုင်ပကဖမှ ရဲဘော် ၁ ဦးက ရဲအသွင်ယူ၍ ဝင်ရောက်ပြီး သေနတ် ၃ လက်နှင့် ခဲယမ်းများ ယူဆောင်နိုင်ခဲ့
ရန်ကုန် ၊ မတ် ၁၄
မကွေးတိုင်း၊ ပခုက္ကူမြို့နယ်၊ သာကြီးတောင် ရေနံမြေရဲစခန်းကို မြိုင်ပကဖမှ ရဲဘော် ၁ ဦးက ရဲအသွင်ယူ၍ ဝင်ရောက်ပြီး သေနတ် ၃ လက်နှင့် ခဲယမ်းများ ယူဆောင်နိုင်ခဲ့ကြောင်း မြိုင်ပကဖမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
မတ်လ ၁၃ ရက်နေ့ ညနေ ၅ နာရီ ၃၀ မိနစ်ခန့်တွင် မြိုင်ပကဖမှ စနစ်တကျ သင်တန်းပေးကာ သပ်လျှိုထည့်ထားသော ရဲဘော်မှ အလစ်အငိုက် အခွင့်ကောင်းယူကာ G-3 သေနတ် ၃ လက်နှင့် Uzi သေနတ် ၁ လက်တို့ကို ခိုးယူပြီး ထွက်ပြေးလာခဲ့ကြောင်း သိရသည်။
ထို့သို့ လက်နက်များခိုးယူပြီး ထွက်ပြေးလာစဉ် တစ်ဦးတည်း မနိုင်မနင်းဖြစ်ပြီး အကြမ်းဖက် စစ်ကောင်စီ တပ်သားများက လိုက်လံ ပစ်ခတ်သောကြောင့် Uzi သေနတ်မှာ ပြုတ်ကျ ကျန်ရစ်ခဲ့ကြောင်း၊ ထို့သို့ ထွက်လာသည့် ရဲဘော်ကို မြိုင်ပကဖတပ်ဖွဲ့ ကာကင်း ရဲဘော်များက ခုခံကာကွယ် ပစ်ခတ်ပေးသဖြင့် အထိအခိုက်မရှိ လွတ်မြောက်လာခဲ့ခြင်းဖြစ်ကြောင်း သိရသည်။
ထွက်ပြေး လွတ်မြောက်လာသော ရဲ ဘော်နှင့် အတူ G-3 သေနတ် ၃ လက်၊ ကျည်ဘောက် ၅ ခု၊ 7.62 ကျည် ၈၀ တောင့် တို့ကို အောင်မြင်စွာ ရယူ နိုင်ခဲ့ပြီး အကြမ်းဖက် စစ်ကောင်စီ တပ်အတွင်း ဝင်ရောက်ကာ လက်နက်ရယူနိုင်ခဲ့သည့် PDF တပ်ဖွဲ့ဝင်ရဲဘော်ကို မြိုင်ပကဖ မှ ငွေကျပ် သိန်း ၁၀၀ ဆုချီးမြှင့်ပေးခဲ့ကြောင်း သိရသည်။
ယခုလုပ်ဆောင်မှုတွင် ပါဝင်သော တပ်ဖွဲ့ ၂ ဦးမှာ မြိုင် ပကဖ တပ်ဖွဲ့ ဝင် နှင့် PDF Kamma (ကမ္မတပ်ပေါင်းစု)တပ်ဖွဲ့မှ ရဲဘော်တို့ဖြစ်ပြီး စွန့်စွန့်စားစားစွာ လုပ်ဆောင်နိုင်ခဲ့ခြင်း ဖြစ်ကြောင်း မြိုင်ပကဖ က ထုတ်ပြန်ထားသည်။
