မြင်းခြံတွင် စစ်ကြောင်းထိုးနေသည့် စစ်တပ်ကို တိုက်ခိုက်မှု စစ်ကောင်စီ တပ်သားများ ထိခိုက် သေဆုံးမှုများပြားပြီး အလောင်းများကို ကားဖြင့် တင်ဆောင်သွား၊ ရေစကြိုတွင်လည်း စစ်တပ် စစ်ကြောင်း တိုက်ခိုက်ခံရပြီး ထိခိုက်သေဆုံးမှုရှိ

မြင်းခြံတွင် စစ်ကြောင်းထိုးနေသည့် စစ်တပ်ကို တိုက်ခိုက်မှု စစ်ကောင်စီ တပ်သားများ ထိခိုက် သေဆုံးမှုများပြားပြီး အလောင်းများကို ကားဖြင့် တင်ဆောင်သွား၊ ရေစကြိုတွင်လည်း စစ်တပ် စစ်ကြောင်း တိုက်ခိုက်ခံရပြီး ထိခိုက်သေဆုံးမှုရှိ

ရန်ကုန်၊ ဒီဇင်ဘာ ၂၂

မန္တလေးတိုင်း၊ မြင်းခြံမြို့နယ်တွင် စစ်ကြောင်းထိုးနေသည့် အကြမ်းဖက် စစ်တပ်ကို တိုက်ခိုက်ရာ စစ်ကောင်စီ တပ်သားများ ထိခိုက် သေဆုံးမှုများပြားပြီး အလောင်းများကို ကားဖြင့် တင်ဆောင်သွားကြောင်း Myingyan District Army-3 (Taungtha Youth) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဒီဇင်ဘာလ ၁၇ ရက်နေ့ နံနက် ၆ နာရီခန့်တွင် သီတာယုမွန် ဦးဆောင်သော ပျူစောထီး အင်အား ၂၅၀ ခန့်နှင့် စစ်သား တချို့ လိုက်ပါလာသော စစ်ကြောင်းသည် မြင်းခြံမြို့နယ်၊ ကျောက်ကုန်းကျေးရွာ၊ ပြည်တော်သာကျေးရွာ ၊ တန်ဆောင်းကျေးရွာ၊ ဒါးကျွန်းကျေးရွာရှိ ကျေးလတ် ဆေးပေးခန်းကို မီးရှို့ပြီး နတ်ညွှန်းတောင်ရွာကို လာရောက်စဉ် မြင်းခြံခရိုင်အမှတ် ၃ တပ်ရင်းမှ ရဲဘော်အင်အား ၄၀ ဖြင့် နတ်ညွှန်းမြောက်ရွာတွင် အနီးကပ် တိုက်ခိုက်ခဲ့ကြောင်း သိရသည်။

ယင်းတိုက်ခိုက်မှု အတွင်း သီတာယုမွန် ဦးဆောင်သော ပျူစောထီး အများအပြားနှင့် စစ်သားများ ထိခိုက်သေဆုံးမှု များပြားပြီး သေဆုံးသူများကို ကား ၁ စီးဖြင့် ပြန်လည် တင်ဆောင်သွားကြောင်း သိရှိရသည်။

“၁၇ ရက်နေ့ နံနက်ပိုင်းမှာ စစ်ခွေး အနည်းငယ်နဲ့ စစ်မှုထမ်းဟောင်းတွေ ပျူခွေးတွေနဲ့ သီတာယုမွန် အပါအဝင် အင်အား ၂၅၀ လောက်က စစ်ကြောင်းထိုးလာပြီး ရွှေညောင်ပင်၊ ကျောက်ကုန်း၊ ရွှေပြည်သာ၊ တစောင်းရွာနဲ့ ဒါးကျွန်းရွာကို ဝင်ရောက်ပြီး PDF တွေ နေထိုင်တယ် အထင်နဲ့ ကျေးလတ်ဆေးပေးခန်းကို မီးရှိုး ဖျက်စီးခဲ့တယ်။ ဒါးကျွန်းရွာ တောင်ဘက် ကျွဲခြံ ဂျုပ်ပင်ဘက်မှာ စစ်ခွေး ကား ၃ စီးနဲ့ အသင့် ကင်းပုန်းဝပ်ပြီး စောင့်နေကြတယ်။ အဲတာကို သတင်းရပြီး တပ်ရင်း ၃ ကျန်တော်တို့ ရဲဘော်တွေက ဝင်လုံးဖို့ အနီးဆုံး ကပ်ထားလိုက်တယ်? ဒါးကျွန်းရွာကို မီးတင်ပြီး စစ်ခွေးတွေက နတ်ညွှန်းတောင်ရွာကို ချီတက်လာတယ်။ အဲကနေ နတ်ကျွန်းတောင်ရွာ မြောက်ရွာကို အကူး ကမ်းပါးရံမှ အဆင်း ကွင်းပြင်အရောက် မှာ တပ်ရင်း ၃ က ကျန်တော်တို့ ရဲဘော်တွေ ပေ၁၈၀ ခန့်အကွာကနေ ရဲဘော် အင်အား ၄၀ လောက်နဲ့ အင်အားခြင်း မမျှပေမယ့် စတင် ပစ်ခတ် တိုက်ခိုက်ခဲ့တယ်။ စစ်ခွေး စစ်ကြောင်း ထိခိုက်သေဆုံးမှုများတယ်။ ခွေးတွေ အထိနာတော့ နောက်ပြန်ဆုတ်ခွာပြီး ကျောက်ကုန်းနားနေပြီး ထွက်ခွာသွားကြတော့တယ်။ စစ်ခွေးတွေ ပြန်ဆုတ်ချိန်မှာ ကားတစ်စီးတိုက် နဲ့ မသာ အလောင်းတွေ သယ်ဆောင်သွားတယ်” ဟု Myingyan District Army-3 (Taungtha Youth) အဖွဲ့မှ တာဝန်ရှိသူ တစ်ဦးက ပြောဆိုသည်။

ထိုသို့ တိုက်ပွဲဖြစ်ပွားပြီးနောက် ဒီဇင်ဘာလ ၁၉ ရက်နေ့ နံနက် ၆ နာရီခန့်တွင် အဆိုပါ အကြမ်းဖက် စစ်တပ် စစ်ကြောင်းသည် မကွေးတိုင်း‌‌‌၊ ရေကြိုမြို့နယ်၊ ရေလည်ကျွန်း‌ဒေသကို ထပ်မံ စစ်ကြောင်းထိုး ဝင်ရောက်လာသောကြောင့် မြင်းခြံခရိုင် အမှတ် ၃ တပ်ရင်းမှ ရဲဘော်များနှင့် နွယ်နီရွာ အနောက်ဘက်တွင် မိနစ် ၄၀ ခန့် တိုက်ပွဲဖြစ်ပွားခဲ့ကြောင်း သိရသည်။

ယင်း တိုက်ပွဲအတွင်း အကြမ်းဖက် စစ်တပ်၏ သင်္ဘောမှလည်း လက်နက်ကြီးများဖြင့် ပြစ်ကူပေးခဲ့ကြောင့် တော်လှန်ရေး ရဲဘော်များ ပြန်လည်ဆုတ်ခွာခဲ့ရကြောင်း၊ ယင်းနေ့ နံနက် ၁၁ နာရီခန့်တွင် လှေခုတ်ရွာကို ဝင်ရောက်လာသော အကြမ်းဖက် စစ်တပ် စစ်ကြောင်းကို မြင်းခြံခရိုင်အမှတ် ၃ တပ်ရင်းမှ ရဲဘော်များနှင့် ညီနောင်မဟာမိတ်တပ်ဖွဲများ ပူးပေါင်းကာ ထပ်မံ ဖြတ်တောက်တိုက်ခိုက်ခဲ့ကြောင်း၊ ထို တိုက်ပွဲသည် ၂ နာရီခန့် ကြာမြင့်ခဲ့ပြီး အကြမ်းဖက် စစ်ကောင်စီ တပ်သားများ အထိ အခိုက် အကျအဆုံးများနိုင်ကြောင်း သိရှိရသည်။

ဒီဇင်ဘာလ ၂၀ ရက်နေ့ ည ၇ နာရီခန့်တွင် ရေလည်ကျွန်းဒေသကို စစ်ကြောင်းထိုးဝင်ရောက်ပြီး ပြည်သူပိုင် ပစ္စည်းများကို သင်္ဘောများဖြင့် ခိုးယူ တင်ဆောင်သွားပြီး ပြန်လည် ထွက်ခွာလာစဉ် မြင်းခြံခရိုင် အမှတ် ၃ တပ်ရင်းမှ ရဲဘော်များနှင့် ညီနောင်မဟာမိတ်များက ဧရာဝတီ မြစ်နှစ်ဖက် အသင့်စောင့်ဆိုင်းနေရာယူ၍ လက်နက်ကြီး၊ လက်နက်ငယ်များဖြင့် ထပ်မံ ပစ်ခတ်တိုက်ခိုက်ခဲ့ကြောင်း၊ ထို ၂ ရက်တာတိုက်ပွဲများအတွင်း သီတာယုမွန် ဦးဆောင်သော ပျူစောထီးများနှင့် စစ်သား အများအပြား ထိခိုက် ဒဏ်ရာရရှိနိုင်ပြီး ပြည်သူ့ကာကွယ်ရေး တပ်ဖွဲ့ဝင်များ ထိခိုက်မှုမရှိကြောင်း သိရသည်။

“မြင်းခြံမှာ အထိနာသွားတဲ့ စစ်ခွေးတွေက စစ်ရေး ပြန်လည် ပြင်ဆင်ပြီး လက်နက် လူအင်အား ဖြည့်တင်းပြီး တစ်ရက်ကျော်အကြာ ၁၉ ရက်နေ့မှာ မြင်းခြံဆိတ်ညံရေတပ်ကနေ စစ်သင်္ဘောနဲ့ ပခုက္ကူ ၂၅၆ ၊ ၂၅၇ ၊ ၂၅၈ တပ်ရင်းက အင်အား ၁၂၀ ဦးခန့်နဲ့ စစ်သင်္ဘော စစ်ကူ ပစ်ပေးပြီး စုဖွဲ့မှုနဲ့ ရေလည်ကျွန်းဒေသကို တိုက်ခိုက်ခဲ့တယ်။ ကျန်တော်တို့ တပ်ရင်း ၃ တစ်ရင်းတည်း ခံတိုက်လို့ မဖြစ်တော့လို့ တစ်နာရီ အကြာ ပစ်ခတ်မှုဖြစ်ပွားပြီး နောက်ဆုတ်ပြီး စုဖွဲ့အင်အားတိုးတာတွေ လုပ်ဆောင်ခဲ့ရတယ်။ စစ်ခွေးတွေင ရေလည်ကျွန်းဒေသ ကျွန်းညို၊ လှေခုတ်နဲံ နွယ်နီရွာက ပြည်သူပိုင် နေအိမ်အချို့ကို မီးရှို့ဖျက်စီးခဲ့တယ်။ မွန်းလွဲ ပိုင်းမှာ တော်လှန်ရေး တပ်ဖွဲ့တွေရဲ့ စုပေါင်း အင်အားနဲ့ ပြန်လည် တိုက်ပွဲဖြစ်တယ်။ ၃ နာရီ ကြာ ထပ်မံဖြစ်ပွားပြီး စစ်ခွေးတွေက ၎င်းတို့ အထိုင်ရှိတဲ့ မင်းရွာဘက်ကို ဝင်သွားကြပါတယ်။ တော်လှန်ရေး ရဲဘော်တွေ အထိခိုက်မရှိဘူး။ စစ်ခွေးတွေ ခံပစ်တဲ့ နေရာတွေမှာ သွေးကွက်အများကြီး တွေ့ရှိခဲ့တယ်။ ၂၀ ရက်နေ့မှာ ပြည်သူပိုင် ပစ္စည်းတွေကို ခိုးယူပြီး သင်္ဘောနဲ့တင်ဆောင်ကာ ပြန်ထွက်လာတဲ့ စစ်ခွေးတွေကို ဧရာဝတီမြစ် တစ်လျှောက် အသင့်ကြိုတင် နေရာယူပြီး ကမ်းစပ်တွေဆီကနေ ပစ်ခတ် တိုက်ခိုက်ခဲ့တယ်။ ကျန်တော်တို့ မြင်းခြံ ခရိုင်တပ်ရင်း ၃ နဲ့ အတူ အမေ့လက်ရုံးတပ်တို့ စုပေါင်းတိုက်ခိုက်ခဲ့တာပါ။ တော်လှန်ရေး ရဲဘော်တွေ တစ်စုံတစ်ရာ ထိခိုက်မှူမရှိခဲ့ပါဘူး။ အဲတိုက်ခိုက်မှုတွေကို မြင်းခြံခရိုင်အမှတ် ၃ တပ်ရင်းက ရဲဘော်တွေနဲ့ အတူ ရေလည်ကျွန်းဒေသက အခြားသော ညီနောင် မဟာမိတ်အဖွဲ့တွေက ပူးပေါင်းတိုက်ပွဲဝင်ခဲ့ပါတယ်” ဟု Myingyan District Army-3 (Taungtha Youth) အဖွဲ့မှ တာဝန်ရှိသူ တစ်ဦးက ဆက်လက် ပြောဆိုသည်။