ပုဂံမြို့၊ အလိုတော်ပြည့်ဘုရားအနီး ဆိုင်ကယ်စီးလာသော ရဲ ၃ ဦးကို ပစ်ခတ်တိုက်ခိုက်မှု ရဲတပ်သား ရီဝေဦး နှင့် ရဲတပ် ကြပ် ခင်မောင်မြင့် ပွဲချင်းပြီး သေဆုံး၊ ဒုရဲအုပ် ဝါဝါထွန်း ထွက်ပြေးလွတ်မြောက်
ရန်ကုန်၊ ဖေဖော်ဝါရီ ၁၈
မန္တလေးတိုင်း၊ ညောင်ဦးမြို့နယ်၊ ပုဂံမြို့၊ အလိုတော်ပြည့်ဘုရားအနီးတွင် ဆိုင်ကယ်စီးလာသော ရဲ ၃ ဦးကို တော်လှန်ရေးတပ်ဖွဲ့များက ပစ်ခတ်တိုက်ခိုက်ခဲ့ရာ ရဲ ၂ ဦး ပွဲချင်းပြီး သေဆုံးသွားကြောင်း ပုဂံမြို့မှ ပြည်သူများက ရန်ကုန်ခေတ်သစ်သတင်း ဌာနထံသို့ ပြောဆိုသည်။
ယနေ့ ဖေဖော်ဝါရီလ ၁၈ ရက်နေ့ နံနက် ၉ နာရီကျော်အချိန် ပုဂံမြို့၊ အလိုတော်ပြည့်ဘုရားအနီး ဆိုင်ကယ်စီးလာသော ရဲတပ်ဖွဲ့ဝင် ၃ ဦးကို တော်လှန်ရေးတပ်ဖွဲ့ဝင်များက ဝင်ရောက်တိုက်ခိုက်ခြင်းဖြစ်ပြီး ရဲ ၂ ဦး ပွဲချင်းပြီး သေဆုံးသွားခဲ့ကြောင်း သိရှိရသည်။
“ပုဂံမြို့ အလိုတော်ပြည့်ဘုရားနားမှာ ပစ်ခတ်မှုဖြစ်တာ။ အဲဒါ တစ်မနက်လုံး ပုဂံမြို့ဟောင်းဘက် မှာ လမ်းတိုင်းမှာ စစ်တပ်နဲ့ရဲတွေ အစစ်အဆေးကြမ်းနေတယ်။ တစ်မြို့လုံး ပိုက်စိတ်တိုက်ပြီး ရှာနေတာ” ဟု ဒေသပြည်သူတစ်ဦးက ပြောဆိုသည်။
စစ်ကောင်စီ၏ သတင်းထုတ်ပြန်ချက်တွင် ပုဂံနယ်မြေရဲစခန်းမှ ဒုရဲအုပ် ဝါဝါထွန်းနှင့်အဖွဲ့က ယနေ့ ဖေဖော်ဝါရီလ ၁၈ ရက်နေ့ နံနက် ၉ နာရီ ၂၀ မိနစ်အချိန် ညောင်ဦးမြိုနယ် တရားရုံးထုတ် လုံခြုံရေးဆောင်ရွက်ရန်အတွက် ထွက်လာခဲ့ကြောင်း၊ ဒုရဲအုပ် ဝါဝါထွန်း မှ မော်တော်ဆိုင်ကယ် ၁ စီး၊ ရဲတပ်သား ရီဝေဦး နှင့် ရဲတပ်ကြပ် ခင်မောင်မြင့် တို့က ဆိုင်ကယ် ၁ စီးဖြင့် စီးနင်းလာကြောင်း သိရှိရသည်။
ဒုရဲအုပ်ဝါဝါထွန်းနှင့်အဖွဲ့ ညောင်ဦးမြို၊ အမှတ် ၇ ရပ်ကွက်၊ ဝက်ကြီး အင်း ရပ် ကွက်၊ အလိုတော်ပြည့်ဘုရားအနီး၊ အနော်ရထာလမ်းမကြီးဘေး အရောက် ကားတစ်စီးပေါ်မှ ပစ်ခတ်ရာ ရဲတပ်ကြပ် ခင်မောင်မြင့်နှင့် ရဲတပ်သား ရီဝေဦးတို ၂ ဦးသည် ဒဏ်ရာများဖြင့်သေဆုံးသွားခဲ့ပြီး ဒုရဲအုပ် ဝါဝါထွန်းမှာ ထွက် ပြေးလွတ်မြောက်ခဲ့ကြောင်း စစ်ကောင်စီဘက်တော်သားများက သတင်းထုတ်ပြန်ထားသည်။
ဓာတ်ပုံ- ၂၀၂၀ ခုနှစ်အတွင်း ပုဂံဘုရားများအတွင်း ကင်းလှည့်နေသည့် အကြမ်း ဖက်စစ်တပ် လက်အောက်ခံရဲများ။ (ပုံအဟောင်းဖြစ်ပါသည်။)
Photo- Agency။
