ထိုင်းတွင် စစ်ရာဇဝတ်ကောင် မင်းအောင်လှိုင် ရောက်နေချိန် ဆန့်ကျင်ရေးလှုပ်ရှားမှုအဖြစ် ဧပြီလ ၄ ရက်နေ့ ထိုင်းရောက် မြန်မာ အလုပ်သမားများ အလုပ် မဆင်းရန်နှင့် အနက်ရောင် ဝတ်ဆင်ကြရန် နှိုးဆော်
ရန်ကုန်၊ ဧပြီ ၃
ထိုင်းနိုင်ငံတွင် BIMSTEC အစည်းအဝေးသို့ တက်ရောက်ရန် ရောက်ရှိနေသည့် မင်းအောင်လှိုင်က နိုင်ငံတကာအသိုင်းအဝိုင်းသို့ ခွေးတိုးပေါက်မှ ဝင်ရန် ကြိုး ပမ်းနေသည့်အတွက် မင်းအောင်လှိုင်ကို ဆန့်ကျင်ရေးလှုပ်ရှားမှုအဖြစ် မနက် ဖြန် ဧပြီလ ၄ ရက်နေ့ တစ်ရက်တည်း ထိုင်းနိုင်ငံရောက် မြန်မာအလုပ်သမားများ အလုပ်မဆင်းခြင်းနှင့် အနက်ရောင်ဝတ်ဆင်ကြခြင်းများ ဆောင်ရွက်ကြရန် မြန်မာ့နွေဦးတော်လှန်ရေးလူထုသပိတ်အင်အားစုများက ယနေ့ညပိုင်း တိုက်တွန်းကြေညာချက် ထုတ်ပြန်သည်။
ထိုင်းနိုင်ငံရှိ မြန်မာနိုင်ငံသား အလုပ်သမားများ အနေဖြင့် အကြမ်းဖက် စစ်ကောင်စီ ခေါင်းဆောင် မင်းအောင် လှိုင် BIMSTEC အစည်းအဝေးတက်ရောက်နေချိန် ၂၀၂၅ခုနှစ်၊ ဧပြီ ၄ ရက်နေ့တွင် အလုပ်မဆင်းခြင်းဖြင့် အကြမ်းဖက် စစ်ကောင်စီအား ဆန့်ကျင်ကြောင်း ပြသကြရန် ၊ ထိုင်းနိုင်ငံအတွင်း နေထိုင်ကြသည့် မြန်မာနိုင်ငံသားများနှင့် မြန်မာပြည်သူများနှင့် ရပ်တည်ကြသည့် နိုင်ငံတကာ နိုင်ငံသားများ အနေဖြင့်လည်း အကြမ်းဖက် စစ်ကောင်စီ ခေါင်း ဆောင် မင်းအောင်လှိုင် BIMSTEC အစည်းအဝေးတက်ရောက်နေချိန် ၂၀၂၅ ခုနှစ်၊ ဧပြီ ၄ ရက်နေ့တွင် အနက်ရောင် အဝတ်အစားများ ဝတ်ဆင်ကြခြင်းဖြင့် အကြမ်းဖက် စစ်ကောင်စီအား ဆန့်ကျင်ကြောင်း ပြသကြရန် တိုက်တွန်းနှိုးဆော်သည်။
အကြမ်းဖက် စစ်ကောင်စီ၏ ခေါင်းဆောင် မင်းအောင်လှိုင်သည် BIMSTEC အစည်းအဝေးသို့ တက်ရောက်ရန် ထိုင်းနိုင်ငံသို့ ၂၀၂၅ခုနှစ် ဧပြီလ ၃ ရက်တွင် ထိုင်းနိုင်ငံသို့ ရောက်ရှိနေကြောင်း၊ ရိုဟင်ဂျာလူမျိုးများအား မျိုးတုန်းသတ် ဖြတ် ခြင်းအတွက် အာဂျင်တီးနားနိုင်ငံ ဗြူနိုအေးရိစ် တရားရုံးမှ ရာဇဝတ်ဝရမ်း ထုတ်ပြန်ခံထားရပြီး၊ မြန်မာနိုင်ငံရှိ အရပ်သား ပြည်သူထောင်ပေါင်းများစွာအား သတ်ဖြတ်ခဲ့ခြင်း၊ လေကြောင်း တိုက်ခိုက်မှုများ ပြုလုပ်ခြင်း၊ ငလျင်ဘေးဒဏ်သင့်နေချိန် ကာလတွင်ပင် အရပ်သားပြည်သူများအား ဆက်လက် သတ်ဖြတ်နေသည့် မင်းအောင်လှိုင်အား အစည်းအဝေး တက်ရောက်ခွင့်ပြုခြင်းသည် မြန်မာနိုင်ငံရှိ နစ်နာသူ ပြည်သူများအား စာနာမှုမဲ့ လျစ်လျူရှုခြင်းဖြစ်သဖြင့် BIMSTEC အစည်းအဝေး၏ သက်ဆိုင်ရာ တာဝန်ရှိသူများကို တော်လှန်ရေးအင်အားစုများက ရှုတ်ချထားသည်။
ထိုင်းပြည်သူများက မြန်မာနိုင်ငံ၏ ဒီမိုကရေစီရေး လှုပ်ရှားမှုများနှင့် တော် လှန် ရေး အဆက်ဆက်တွင် အဖိနှိပ်ခံ မြန်မာပြည်သူများအား စာနာနားလည်ပြီး နှစ်ပေါင်းများစွာ ထောက်ခံရပ်တည်ခဲ့ကြကြောင်း၊ ယခုနွေဦးတော်လှန်ရေးကာ လနှင့် ငလျင်ဘေးသင့် ကာလအတွင်း ပြည်သူလူထုအပေါ် ရက်စက်စွာ တိုက် ခိုက် ဗုံးကျဲ သတ်ဖြတ်နေသော အကြမ်းဖက် စစ်ကောင်စီ ခေါင်းဆောင် မင်းအောင်လှိုင်ကိုလည်း ထိုင်းပြည်သူအများက ဆန့်ကျင်ရှုတ်ချကြောင်း လူမှုကွန် ရက်များနှင့် သတင်းများမှ သိရှိရကြောင်း၊ ထို့ကြောင့် အဖိနှိပ်ခံ မြန်မာပြည်သူများနှင့် အတူ ထိုင်းပြည်သူများအား အထူးပင် ကျေးဇူးတင် ရှိကြောင်း တော် လှန်ရေးအင်အားစုများက ဆိုသည်။
ယခု အရေးတွင်လည်း ထိုင်းပြည်သူများ အနေဖြင့် စစ်ကောင်စီ၏ အဖိနှိပ်ခံ မြန်မာပြည်သူများ၏ ရုန်းကန်လှုပ်ရှားမှုများကို သွေးစည်းညီညွတ်မှုဖြင့် နားလည် ပါဝင်ပေးကြရန် မြန်မာနိုင်ငံအတွင်းရှိ လူထုလှုပ်ရှားမှု အင်အားစုများက တညီတညွတ်တည်း တိုက်တွန်း ပန်ကြားအပ်ကြောင်း မြန်မာ့နွေဦးတော်လှန် ရေးလူထုသပိတ်အင်အားစုများက ဆော်ဩထားသည်။
