ကျွန်းစုမြို့နယ်၊ ဝန်တောင်ရွာဘက်ကို တက်လာသည့် စစ်သင်္ဘောများကို တိုက်ခိုက်မှု စစ်တပ်ဘက်မှ ထိခိုက်သေဆုံးမှုရှိ
တနင်္သာရီတိုင်း၊ ကျွန်းစုမြို့နယ်၊ ဝန်တောင်ရွာဘက်ကို တက်လာသည့် အကြမ်းဖက် စစ်တပ်၏ စစ်သင်္ဘောများကို တိုက်ခိုက်ရာ စစ်တပ်ဘက်မှ ထိခိုက်သေဆုံးမှုရှိကြောင်း ကျွန်းစုမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၆ ရက်နေ့ နံနက် ၁၀ နာရီ ၄၅ မိနစ်ခန့်တွင် ကျွန်းစုမြို့နယ်၊ ရှော်တောမော်ကျေးရွာဘက်မှ ဝန်တောင် ကျေးရွာဘက်သို့ တက်လာသည့် အကြမ်းဖက် စစ်တပ်၏ ၁၁၄ စစ်သင်္ဘော အပါအဝင် သင်္ဘော ၂ စီးကို တော်လှန်ရေး တပ်ဖွဲ့များက စောင့်ကြို တိုက်ခိုက်ခဲ့ခြင်းဖြစ်ကြောင်း သိရသည်။
ယင်းထိတွေ့တိုက်ပွဲသည် နှစ်ဖက် အပြန်အလှန် ဖြစ်ပွားခဲ့ပြီး တော်လှန်ရေး ရဲဘော်များဘက်က လက်နက်ငယ်များ နှင့် ၄၀ မမ ဗုံးသီးများဖြင် ပစ်ခတ်တိုက်ခိုက်ခဲ့ရာ စစ်သင်္ဘောအနီးတွင် ကျရောက် ပေါက်ကွဲမှုများရှိကြောင်း၊ တိုက်ပွဲအတွင်း အကြမ်းဖက် စစ်တပ်၏ ၅၆၆ စစ်သင်္ဘောကလည်း လက်နက်ကြီးများဖြင့် ပြန်လည် ပစ်ခတ် တိုက်ခိုက်ခဲ့ပြီး စမုံ၊ မင်းခေါင်းဆေးနှင့် ရှင်မြတ် တို့ဘက်မှ စစ်သင်္ဘော ၃ စီးသည်လည်း စစ်ကူပေးရန် ရှော်တောမော်ဘက်သို့ ခုတ်မောင်းလာခဲ့ကြောင်း သိရှိရသည်။
ထို့ပြင် တိုက်ပွဲအတွင်း အကြမ်းဖက် စစ်တပ်၏ ရေတပ်စစ်သင်္ဘောများက ရမ်းသမ်း ပစ်ခတ်မှုကြောင့် ဝန်တောင်ကျေးရွာရှိ MyTel ဖုန်းတာဝါတိုင် ထိခိုက် ပျက်စီးခဲ့ကြောင်း၊ ထိတွေ့ တိုက်ပွဲသည် ၁ နာရီ နှင့် မိနစ် ၂၀ ခန့် ကြာမြင့်ခဲ့ပြီး ကာကွယ်ရေးတပ်ဖွဲ့ဘက်မှ အထိအခိုက်မရှိ အောင်မြင်စွာ ဆုတ်ခွာနိုင်ခဲ့ပြီး အကြမ်းဖက် စစ်ကောင်စီ တပ်သားများ ထိခိုက်သေဆုံမှုရှိသော်လည်း အရေအတွက်ကို အတည်ပြုနိုင်ခြင်းမရှိကြောင်း သိရသည်။
“စစ်ခွေးတွေ ထိခိုက်သေဆုံးမှုရှိတယ်။ အရေအတွက်ကို အတည်မပြုနိုင်သေးဘူး။ ၄၀ မမ နဲ့ ပစ်တာ သင်္ဘောအနားကျတယ်။ သင်္ဘောက မီးခိုးတော့ ထွက်သွားတာတွေ့တယ်” ဟု ကျွန်းစုမြို့နယ် ပြည်သူ့ကာကွယ်ရေးအဖွဲ့မှ တာဝန်ရှိသူ တစ်ဦးက ပြောဆိုသည်
