ပဲခူးတိုင်း၊ လက်ပံတန်းမြို့နယ်တွင် စစ်မှုထမ်းကြေး အတင်းအဓမ္မ ကောက်ခံနေသည့် ချောင်းအုပ်စုကျေးရွာ ရာအိမ်မှူး အုန်းသန်းကို လောင်းကစားဝိုင်း၌ ပစ်ခတ်တိုက်ခိုက်ရာ ပွဲချင်းပြီးသေဆုံးခဲ့ကြောင်း ရွှေတန်းမြေ ပြည်သူ့ကာကွယ်ရေး တပ်ဖွဲ့ တာဝန်ခံ ကိုကိုအောင်က ရန်ကုန်ခေတ်သစ် သတင်းဌာနထံသို့ ပြောဆိုသည်။
မေလ ၂၁ ရက်နေ့ နံနက် ၁၁ နာရီ ၅၀ မိနစ်ခန့်အချိန် လက်ပံတန်းမြို့နယ် ၊ သိုက်ဝါး ချောင်းအုပ်စု မှ အကြမ်းဖက် စစ်ကောင်စီ ခန့် ရာအိမ်မှူး အုန်းသန်းကို ၎င်း နေထိုင်ရာ ကျေးရွာအတွင်းရှိ လောင်းကစားဝိုင်းအတွင်း တော် လှန်ရေး ရဲဘော်များက ဝင်ရောက် ပစ်ခတ် တိုက်ခိုက်ခဲ့ရာ ပွဲချင်းပြီး သေဆုံးခဲ့ကြောင်း သိရသည်။
သေဆုံးသွားသော ရာအိမ်မှူး အုန်းသန်းသည် ပြည်သူများကို အာဏာပြ၍ ဆက်ဆံခြင်း ၊ စစ်မှုထမ်းကြေးများ အတင်းအဓမ္မ တောင်းခံခြင်း၊ မပေးနိုင်သည့် ပြည်သူများကို ဖမ်းဆီးရန် အမည်စာရင်း ပေးပို့ခြင်းများ အပြင် စစ်တပ်က ပြုလုပ်ခိုင်းသော လောင်ကစားဝိုင်းများကို ကူညီလုပ်ကိုင်ပေးနေခြင်းများ ပြုလုပ်နေသည်ဟု ပြည်သူများက တိုင်ကြားလာ၍ သွားရောက် ပစ်ခတ် တိုက်ခိုက်လာခြင်းဖြစ်ကြောင်း သိရှိရသည်။
“ကျနော်တို့ ၉ မမ နဲ့ ခေါင်းကို တစ်ချက်နဲ့ ရင်ဝ တစ်ချက် ပစ်ခတ် တိုက်ခိုက်ခဲ့ပါတယ်။ ရာအိမ်မှူးကတော့ နေရာမှာ ပွဲချင်းပြီး သေဆုံးပါတယ်” ဟု ရွှေတန်းမြေ ပြည်သူ့ကာကွယ်ရေး တပ်ဖွဲ့ တာဝန်ခံ ကိုကိုအောင်က ပြောဆိုသည်။
အဆိုပါ တိုက်ခိုက်မှုကို သာယာဝတီခရိုင်ပကဖ၊ အမှတ်(၁)တိုက်ခိုက်ရေးတပ်ဖွဲ့(ရွှေတန်းမြေပြည်သူ့ကာကွယ် ရေး တပ်ဖွဲ့)မှ တော်လှန်ရေး ရဲဘော်များကလုပ်ဆောင်ခဲ့ခြင်းဖြစ်ပြီး အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
