ရန်ကုန်၊ ဩဂုတ် ၂၃
မြန်မာနိုင်ငံမြောက်ပိုင်းရှိ တိုင်းရင်းသားလက်နက်ကိုင်အဖွဲ့များကို တရုတ်ဖိအားနှင့် စစ်တပ်၏ စစ်ရေး ဖိအားများ ပြင်းထန်လာနေချိန် KIO ဒုတိယဥက္ကဋ္ဌ ဒုဗိုလ်ချုပ်ကြီး ဂွန်မော်က Mufasa: The Lion King ကာတွန်းဇတ်ဝင်ခန်းဖြင့် သတိပေး တိုက်တွန်းသည်။
ယမန်နေ့ ညပိုင်း KIO ဒုတိယဥက္ကဋ္ဌ ဗိုလ်ချုပ်ကြီး ဂွန်မော်က Mufasa: The Lion King ကာတွန်းရုပ်ရှင် ဇတ်ကား၏ ဇတ်ရှိန်အမြင့်ဆုံးသော ဇတ်လမ်းဇတ်ကွက်အပိုင်းကို “မူဖါဆာ & မယ်လီလီ” ခေါင်းစဉ်တပ်၍ ၁ မိနစ်နှင့် ၃၆ စက္ကန့် ဇတ်ကွက်အား မြန်မာစာတန်းထိုးဖြင့် ဖြတ်တောက်၍ လူမှုကွန်ရက်တွင် တင်ပြလာခြင်းဖြစ်သည်။
KIO ဒုတိယဥက္ကဋ္ဌ ဗိုလ်ချုပ်ကြီး ဂွန်မော်က တင်ပြထားသော Mufasa: The Lion King ကာတွန်းရုပ်ရှင် ဇတ်ကား၏ ဇတ်ရှိန်အမြင့်ဆုံးသော ဇတ်လမ်းအ ပိုင်းတွင် စည်းလုံးညီညွတ်ရေးအတွက် အထူးသတိပေးသော စကားလုံးများစွာ ပါဝင်သည်။
“မင်းတို့ ကြောက်နေကြတာ သိတယ်။ ဒါပေမယ့် ငါတို့ တကွဲတပြားစီဖြစ်နေရင် ဘာမှ ပြောင်းလဲသွားမှာမဟုတ်ဘူး။ ငါတို့မျိုးနွယ်တွေနဲ့ တစ်ခြားမျိုးနွယ်တွေအားလုံးအတွက်ရောပဲ။ ဒီနေ့ ငါ့ဆီကို လာတိုက်ခိုက်တာမှန်တယ်။ ဒါပေမယ့် မင်းတို့အသိုက်အဝန်းထဲကို သူတို့ကို ဝင်ခွင့်ပေးလိုက်တာနဲ့ မနက်ဖြန်ဆိုရင် မင်းတို့ဘက်ကို မြှားဦးလှည့်လာလိမ့်မယ်။ ငါရဲ့တိုက်ပွဲကလည်း မင်းတို့ရဲ့ တိုက်ပွဲပဲ။ ငါမကောင်းဆိုးဝါးတွေကို ဒူးမထောက်သလို မင်းတို့လည်း မထောက် သင့်ဘူး။ အတူတူဆိုရင် ငါတို့ သန်မာတယ်” ဟု Mufasa: The Lion King ကာတွန်းရုပ်ရှင်၏ ဇတ်လမ်းထဲတွင် ဖော်ပြထားသည်။
KIO ဒုဥက္ကဋ္ဌ ဒုဗိုလ်ချုပ်ကြီး ဂွန်မော် တင်ပြထားသော အဆိုပါဇတ်လမ်းရုပ်ရှင်တိုကို လူပေါင်း ၄၅၀၀ ကျော်က ပြန်လည် မျှဝေထားပြီး စည်းလုံးညီညွတ်ကြရန်၊ တရုတ်နှင့်စစ်တပ်၏ ဖိအားကို ညီညွတ်စွာဖြင့် ရင်ဆိုင်ကြရန် တိုက်တွန်း ပြောဆိုထားကြသည်။
အမျိုးသားညီညွတ်ရေးအစိုးရ၏ လျှပ်စစ်နှင့်စွမ်းအင် ဒုဝန်ကြီး ဦးမော်ထွန်းအောင်က ဒုတိယဗိုလ်ချုပ်ကြီး ဂွန်မော်၏ ပို့စ်ကို ပြန်လည် မျှဝေရင်း “လူမျိုး၊ ဘာသာ၊ စတဲ့ ကိုယ် မရွေးချယ်ခဲ့တဲ့ အရာတွေ နဲ့ ကိုယ်တွေရဲ့ လွတ်လပ်မှု၊ တရားမျှတ မှု ကို ကန့်သတ်တာ ကို လက်မခံ ဖို့ပါပဲ။ တရားမျှတမှု ဆိုတာ လူမျိုး၊ ဘာသာ မရွေးတဲ့ အတွက် တရားမျှတမှု အောက်မှာ လူမျိုးတိုင်း၊ ဘာသာတိုင်း၊ ဒေသတိုင်းက ပြည်သူတွေ အကျိုးခံစားရမှာ ဖြစ်တယ်” ဟု မှတ်ချက်ပြုထားသည်။
ရှမ်းပြည်နယ်မြောက်ပိုင်းရှိ ၁၀၂၇ စစ်ဆင်ရေးအတွင်း မဟာမိတ်အဖွဲ့အစည်းများထံသို့ လက်နက်နှင့်ငွေကြေးများ ထောက်ပံ့မှုအတွက် UWSA ကို တရုတ်က ပိတ်ဆို့အရေးယူသဖြင့် တရုတ်ငွေယွမ်ဘီလီယံပေါင်းများစွာ ဆုံးရှုံးပြီး နှစ်ပေါင်း ၄၀ အတွင်း အပြင်းထန်ဆုံး ဖိအားပေးခံနေရကြောင်း UWSA “ဝ” တပ်ဖွဲ့ ဒုဥက္ကဌ ဦးကျောက်ကော်အမ်းက ဩဂုတ်လ ၂၀ ရက်နေ့က ထုတ်ဖော်ပြောဆိုသည်။ ထို့ကြောင့် TNLA ၊ MNDAA နှင့် SSPP တို့ကို UWSA က လက်နက်နှင့်ငွေကြေး ထောက်ပံ့တော့မည်မဟုတ်ကြောင်း UWSA က ထုတ်ပြန် ကြေညာထားသည်။
