ရခိုင်ပြည်၊ မြောက်ဦးမြို့တွင် စစ်တပ်၏ လေကြောင်းတိုက်ခိုက်မှုကြောင့် ကလေးငယ်များ သေဆုံးဒဏ်ရာရရှိမှုအပေါ် ကုလသမဂ္ဂကလေးများ ရန်ပုံငွေအဖွဲ့ (UNICEF) က စိုးရိမ်ကြောင်း ထုတ်ဖော်ပြောဆိုသည်။
ရခိုင်ပြည်နယ် မြောက်ဦးမြို့နယ်တွင် သြဂုတ် ၂၅ ရက်က တိုက်ခိုက်မှု ဖြစ်ပွားပြီး ကလေးငယ်များ သေဆုံးကာ ဒဏ်ရာရရှိကာ နေအိမ်များ ပျက်စီးဆုံးရှုံးခဲ့ကြောင်း UNICEF က စိုးရိမ်ပူပန်လျက်ရှိကြောင်း၊ မကြာသေးမီလများအတွင်း ရခိုင်ပြည်နယ်တွင် ပဋိပက္ခများ ပြင်းထန်လာခြင်းကြောင့် ကလေးသူငယ်များ ပိုမိုထိခိုက်လာကြောင်း၊ တိုက်ခိုက်မှုများကြောင့် ကြောက်ရွံ့မှု၊ နေရာရွှေ့ပြောင်းမှုနှင့် ဒုက္ခများကို ဆက်လက်ဖြစ်ပေါ်လျက်ရှိကြောင်း၊ ကလေးငယ်များသည် ၎င်းတို့၏နေအိမ်များနှင့် ရပ်ရွာများအပါအဝင် ၎င်းတို့လုံခြုံသည်ဟု ခံစားရမည့်နေရာများတွင် အသတ်ခံနေရကြောင်း UNICEFက ဆိုသည်။
အကြမ်းဖက်မှု၊ မလုံခြုံမှုနှင့် အိုးအိမ်စွန့်ခွာ ထွက်ပြေးရမှုများ တိုးမြင့်လာသည့်အပြင် ရခိုင်ပြည်နယ်ရှိ မိသားစုများမှာ ပညာရေးနှင့် ကျန်းမာရေးစောင့်ရှောက်မှုများ အပါအဝင် ကလေးများအတွက် မရှိမဖြစ်လိုအပ်သော ဝန်ဆောင်မှုများ မရှိနိုင်ဘဲ ပြင်းထန်သော အနှောင့်အယှက်များနှင့် ရင်ဆိုင်နေကြရကြောင်း UNICEF က ထောက်ပြထားသည်။
ကလေးသူငယ်များ အပါအဝင် အရပ်သားများကို ကာကွယ်ရန်၊ အရပ်ဘက်ဆိုင်ရာ အခြေခံအဆောက် အအုံများကို အကာအကွယ်ပေးရန်နှင့် အရေးပေါ်လိုအပ်နေသူများအား အသက်ကယ်တင်နိုင်သော လူသားချင်းစာနာထောက်ထားမှုဆိုင်ရာ အကူအညီများ ရရှိနိုင်စေရန် နိုင်ငံတကာဥပဒေအောက်တွင် အားလုံးလေးစားလိုက်နာကြရန် UNICEF ကတောင်းဆိုသည်။
အကြမ်းဖက်စစ်တပ်က ဩဂုတ်လ ၂၅ ရက်နေ့ ည ၁၁ နာရီ ၂၅ မိနစ်အချိန် ရခိုင်ပြည်၊ မြောက်ဦးမြို့၊ ဒိုင်းကျီရပ်ကွက်ကို တိုက်လေယာဉ်ဖြင့် ဗုံးကျဲချခဲ့ရာ အလှူလုပ်ရန် ပြင်ဆင်နေကြသော မိသားစုဝင်များ နှင့် ပတ်ဝန်းကျင်အနီးအနားမှ ကလေးငယ် ၅ ဦး အပါအဝင် ပြည်သူ ၁၂ ဦး သေဆုံးခဲ့ရကြောင်း၊ ပြည်သူ ၂၀ ဦးမှာ ထိခိုက်ဒဏ်ရာရရှိခဲ့သည်။
