စစ်ကိုင်းတိုင်း၊ ရေဦးမြို့အတွင်း ကင်းပတ်ရန် ထွက်လာသော စစ်သားများကို မိုင်းဆွဲ တိုက်ခိုက်ရာ အကြမ်းဖက် စစ်တပ်ဘက်မှ ထိခိုက်သေဆုံးမှုရှိကြောင်း ပြည်သူ့ကာကွယ်ရေးအဖွဲ့ ရေဦးမြို့နယ် ပကဖ တာဝန်ခံက ရန်ကုန်ခေတ်သစ် သတင်းဌာနထံသို့ပြောဆိုသည်။
ဩဂုတ်လ ၂၉ ရက်နေ့ နံနက် ၈ နာရီခန့်တွင် ရေဦးမြို့ မြောက်ဘက်သို့ ကင်းပတ်ရန် ထွက်လာသော အကြမ်းဖက် စစ်သား ၁၀ ဦး ခန့်ကို ရေဦးမြို့ အဝင် ဆိုင်းဘုတ်အနီး အရောက်တွင် ရေဦးမြို့နယ် ပြည်သူ့ကာကွယ်ရေးအဖွဲ့က မိုင်း ၁ ပွိုင့်ဖြင့် မိုင်းဆွဲ တိုက်ခိုက်ခဲ့ခြင်းဖြစ်ကြောင်း သိရသည်။
ထိုမိုင်းဆွဲတိုက်ခိုက်မှုအတွင်း အကြမ်းဖက် စစ်တပ်ဘက်မှ ထိခိုက်သေဆုံးမှုရှိသော်လည်း အရေအတွက်ကို အတည်ပြုနိုင်ခြင်းမရှိသေးဘဲ တော်လှန်ရေး တပ်ဖွဲ့များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရှိရသည်။
“စစ်ခွေး သေစာရင်းကတော့ မသိရသေးဘူး။ သတင်းဝင်မလာသေးလို့ပါ။ ဒီနေ့ တိုက်ခိုက်ခဲ့တာပါ။ စစ်ခွေးဘက်တော့ ထိခိုက်သေဆုံးမှု ရှိနိုင်ပါတယ်။ သတင်းမထုတ်ပြန်နိုင်သေးတာပါ။ စစ်ခွေးဘက်ကတော့ လက်နက်ငယ်တွေနဲ့ ရမ်းပစ်ပါတယ်”ဟု ပြည်သူ့ကာကွယ်ရေးအဖွဲ့- ရေဦးမြို့နယ် ပကဖ တာဝန်ခံကပြောဆိုသည်။
ထိုသို့ တိုက်ပွဲမှု ဖြစ်ပွားပြီးနောက် အကြမ်းဖက် စစ်တပ်ဘက်က လက်နက်ငယ်များဖြင့် ပြန်လည် ပစ်ခတ်ခဲ့ပြီး မြို့အဝင် အထွက် ဂိတ်များတွင် လုံခြုံရေး တင်းကျပ်စွာ ချထားပြီး ပြည်သူများကို စစ်ဆေးမှုများ လုပ်ဆောင်ခဲ့ကြောင်း သိရသည်။
