ယနေ့ တရုတ်နိုင်ငံသို့ သွားရောက်မည့် အကြမ်းဖက် မင်းအောင်လှိုင်က တရုတ် သမ္မတ ရှီကျင့်ပင်ကို လက်ဆောင်ပေးရန်အတွက် အကျဉ်းထောင်များတွင် ပြစ်ဒဏ်ကျခံနေရသော တရုတ်နိုင်ငံသားတချို့ကို ပြစ်ဒဏ်မှ လွတ်ငြိမ်း ခွင့်ပေးပြီး လေယာဉ်ဖြင့် တစ်ပါတည်း တင်ခေါ်သွားမည်ဖြစ်ကြောင်း နေပြည် တော် စစ်ဘက်သတင်းရင်းမြစ်က ပြောဆိုသည်။
ယနေ့ ဩဂုတ်လ ၃၀ ရက်နေ့မှ စက်တင်ဘာလ ၆ ရက်နေ့အထိ တရုတ်နိုင်ငံသို့ သွားရောက်မည့် အကြမ်း ဖက် မင်းအောင်လှိုင်က ယင်းကဲ့သို့ ပြစ်ဒဏ်ကျ တရုတ်နိုင်ငံသားတချို့ကို ၎င်းနှင့်အတူ လေယာဉ် ၁ စီးတည်း လိုက်ပါသွားရန် တင်ခေါ်သွားမည်ဖြစ်ပြီး လွတ်ငြိမ်းခွင့်ပြုသည့် တရုတ်နိုင်ငံသား အကျဉ်းသားများကို လက်ဆောင်အဖြစ် သမ္မတရှီကျင့်ပင်နှင့် တရုတ်အစိုးရထံသို့ လွှဲ ပြောင်း ပေးအပ်မည်ဖြစ်ကြောင်း သိရှိရသည်။
ထိုသို့ တရုတ်နိုင်ငံသား အကျဉ်းသားများကို မင်းအောင်လှိုင်က ၎င်းနှင့်အတူ တစ်ပါတည်း ခေါ်သွားမည့် ကိစ္စကို အထူးလျှို့ဝှက်အဖြစ် သတ်မှတ်ဆောင် ရွက်နေကြောင်း ၊ အကြမ်းဖက် မင်းအောင်လှိုင်က ၎င်း၏ ပြည်ပခရီးစဉ်အတွက် ဝယ်ယူထားသော MAI အထူးလေယာဉ် Airbus 319 -XYALK ဖြင့် တရုတ်နိုင်ငံသို့ သွားရောက်မည်ဖြစ်ကြောင်း သိရှိရသည်။
စစ်ခေါင်းဆောင် မင်းအောင်လှိုင်က ဩဂုတ်လ ၃၁ ရက်နေ့မှ စက်တင်ဘာလ ၁ ရက်နေ့ အထိ ပြုလုပ်မည့် ရှန်ဟိုင်းပူးပေါင်းဆောင်ရွက်ရေးအဖွဲ့ (Shanghai Cooperation Organization -SCO) ၏ ၅ ကြိမ်မြောက် ထိပ်သီးအစည်း အဝေး တက်ရောက်မည်ဖြစ်ပြီး စက်တင်ဘာလ ၃ ရက်နေ့ ပြုလုပ်ရန် ရှိသည့် နှစ် ၈၀ ပြည့် ဂျပန်စစ်တပ်လက်နက်ချ အညံ့ခံခြင်းနှင့် ဒုတိယကမ္ဘာစစ်အောင်နိုင်ခြင်း တရုတ်စစ်တပ်၏ စစ်ရေးပြချီတက်ပွဲသို့လည်း တက်ရောက်မည်ဖြစ် သည်။
ထို့ပြင် မင်းအောင်လှိုင်က တရုတ်ခရီးစဉ်တွင် တရုတ်နိုင်ငံ၏ စီးပွားရေးဖွံ့ဖြိုးတိုးတက်နေသော မြို့တချို့နှင့် စက်မှုဇုန်တချို့ကိုလည်း သွားရောက်လေ့လာမည်ဖြစ်ကာ စက်တင်ဘာလ ၆ ရက်နေ့တွင် နေပြည်တော်သို့ ပြန်လည် ရောက်ရှိမည်ဖြစ်သည်။
