တနင်္သာရီတိုင်း၊ ရေဖြူမြို့နယ်၊ ဆယ်အိမ်စုကျေးရွာအနီးတွင် တိုက်ပွဲဖြစ်ပွားပြီး အကြမ်းဖက် စစ်တပ်ဘက်မှ ၃၄ ဦး သေဆုံးခဲ့ကြောင်း NMSP-AD/Ramonnya Mon Army က သတင်းထုတ်ပြန်ထားသည်။
ဩဂုတ်လ ၂၈ ရက်နေ့ နံနက် ၁၀ နာရီခန့်မှ မွန်းလွဲ ၁ နာရီခန့် အထိ ရေဖြူမြို့နယ်၊ ဆယ်အိမ်စုကျေးရွာအနီး စစ်ကြောင်းထိုးလာသော အကြမ်းဖက် စစ်တပ် စစ်ကြောင်းနှင့် တော်လှန်ရေး တပ်ဖွဲ့များ တိုက်ပွဲဖြစ်ပွားခဲ့ကြောင်း သိရသည်။
ထိုထိတွေ့ တိုက်ပွဲသည် ၃ နာရီကြာ ဖြစ်ပွားခဲ့ပြီး အကြမ်းဖက် စစ်တပ်ဘက်မှ စစ်သား ၃၄ ဦး သေဆုံးကာ ၁၀ ဦး ထိခိုက်ဒဏ်ရာရရှိခဲ့ကြောင်း၊ ထို့ပြင် ရာမညမွန်တပ်တော် (RMA) ဘက်မှ ရဲဘော် ၁ ဦး ကျဆုံးကာ မဟာမိတ်ပူးပေါင်းတပ်ဖွဲ့များမှ ရဲဘော် ၃ ဦး ဒဏ်ရာရရှိခဲ့ကြောင်း သိရှိသည်။
ရေဖြူဒေသအတွင်း ထိုးစစ်ဆင်နေသော အကြမ်းဖက် စစ်တပ် နှင့် တော်လှန်ရေးတပ်ဖွဲ့များ အကြား တိုက်ပွဲများ ပြင်းထန်စွာဆက်လက်ဖြစ်ပွားနိုင်ကြောင်း NMSP-AD/Ramonnya Mon Army က အသိပေးနှိုးဆော်ထားသည်။
အဆိုပါ တိုက်ခိုက်မှုကို ရာမညမွန်တပ်တော် (RMA) ၏ ရေဖြူဒေသတပ်ရင်းမှ ရဲဘော်များနှင့် မဟာမိတ်ပူးပေါင်းတပ်ဖွဲ့များ ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
အလားတူ ဩဂုတ်လ ၂၂ ရက်နေ့ကလည်း ရေဖြူမြို့နယ်အတွင်း စစ်ကြောင်းထိုးလာသော အင်အား ၁၀၀ ခန့်ပါ အကြမ်းဖက် စစ်တပ် စစ်ကြောင်းနှင့် ရာမညမွန်တပ်တော် (RMA) တပ်ဖွဲ့၊ မဟာမိတ် ပူးပေါင်းတပ်ဖွဲ့များ တိုပ်ပွဲဖြစ်ပွားခဲ့ပြီး စစ်သား ၁၀ ဦးထက်မနည်းသေဆုံးခဲ့ကြောင်း သိရှိရသည်။
